《CTT出頭天園地》

 | | | 轉寄

I-sap 寓言 27

作者 TLH 2007.08.19

27. Niau-á Sin-niû

Ū-tsi̍t-kang, thiⁿ-sîn teh sio-tsèⁿ, kóng tōng-bu̍t ê pún-sìng kiám ū khó-lîng ē kái-piàn. Jupiter kóng, “Ē!” M̄-kú, Venus kóng, “Bē!”

Só͘-í, in kuat-tīng beh tshì-giām--tsi̍t--ē. Jupiter kā tsi̍t-tsiah Niau-á piàn-tsò tsi̍t-ê tsa-bó͘-gín-á, an-pâi i khì kap tsi̍t-ê siàu-liân-ke kiat-hun.

Kiat-hun-sik tsin sīng-tāi, tai-ke lóng tsin huaⁿ-hí, sin-niû ê piáu-hiān mā hō͘ tāi-ke tsiok o-ló. Tāi-ke tsò-tīn tsia̍h tsheⁿ-tshau ê sî, Jupiter kā Venus kóng, “Lí khuàⁿ, sin-niû piáu-hiān liáu tsiâⁿ hó. Siáⁿ-lâng ē tsai i tsâ-hng iáu-sī tsi̍t-tsiah Niau-á? I-ê pún-sìng tiāⁿ-tio̍h í-king kái lah! Kiám m̄-sī leh?”

“Tán--tsi̍t--ē,” Venus ìn tsi̍t-siaⁿ, tsiū piàn tsi̍t-tsiah niáu-tshí--tshut--lai, pàng ji̍p-khì tshù-lāi. Sin-niû tsi̍t-khuàⁿ-tio̍h niáu-tshí, tsiū tuì í-á-tíng thiàu--khí--lâi, tsông-tuì niáu-tshí khì.

“Ah, lí khuàⁿ,” Venus kóng, “Guá kóng liáu bô m̄-tio̍h, tōng-bu̍t ê pún-sìng bô khó-lîng ē kái-piàn!”