《CTT出頭天園地》

 | | | 轉寄

I-sap 寓言 34

作者 TLH 2007.10.07

34. Hô͘-lî kap O͘-a

Ū tsi̍t-pái, tsi̍t-tsiah hô͘-lî khuàⁿ-tio̍h tsi̍t-tsiah o͘-a hioh-tī tshiū-ki, tshuì kā tsi̍t-tè tshì-suh. I tsiâⁿ huaⁿ-hì, siūⁿ kòng, ”Tse hó tshin-tshiūⁿ sī uī guá tsún-pī--ê.”

I kiâⁿ-kàu tshiū-á kha, huah kóng, ”Gâu-tsá, o͘-a sió-tsiá. Lí kin-á-ji̍t khuàⁿ--khí--lâi tsin suí. Lí ê mo͘ sī hiah-ni̍h-á o͘-kim, ba̍k-tsiu sī hiah-ni̍h-á kng. Guá siūⁿ, lí ê siaⁿ it-tīng kap lí ê guā-piáu kāng-khuán, pí kî-tha ê tsiáu-á koh-khah hó-thiaⁿ. Tshiùⁿ tsi̍t-tiâu kua hō͘ guá thiaⁿ khuàⁿ māi leh, guá tsiū ē-tit-thang khíng-tīng lí tsiū-sī tsiáu-luī ê kua-hiō.”

Hit-tsiah o͘-a tsiū kā i ê thâu giâ kuân-kuân, khai-sí tuā-siaⁿ a-a-kiò. M̄-kú, tī i khui-tshuì hit tang-tsūn, hit-tè tshì-suh suà lo̍k-lo̍h thô͘-kha, hō͘ hô͘-lî kā khì lo͘h. Hô͘-lî kóng, ”án-ne tsiū tio̍h lah, tse tsiū-si guá beh ti̍h--ê. Kì-jiân lí sàng guá tsi̍t-tè tshì-suh, guá mā sàng lí tsi̍t-kù uē. M̄-thang siong-sìn o͘-pe̍h kā lí po, o͘-pe̍h kā lí pa-kiat ê lâng.”