《CTT出頭天園地》

 | | | 轉寄

I-sap 寓言 36

作者 TLH 2007.10.21

36. Lî-á Kap Tshit-thô káu

Ū tsi̍t-kang, tsi̍t-ê tsò-sit lâng lâi kàu i tshī tsing-seⁿ ê liâu-á, khuàⁿ i ê tsing-seⁿ. Liâu-á lāi ū tsi̍t-tsiah i siōng kah-ì ê lî-á. Tsit-tsiah lî-á ta̍k-kang tsia̍h-pá îng-îng, tsài tsú-lâng sì-kè khì tshit-thô.

Tsit-piàn, tsú-lâng tshuā lî-á kap tsi̍t-tsiah tshit-thô káu-á tsò-hué tshut--khì. Tsit-tsiah káu-á tsin huaⁿ-hí, tī tsú-lâng ê sin-piⁿ thiàu-lâi thiàu-khì, koh iōng tsi̍h tsīⁿ tsú-lâng ê tshiú. Tsú-lâng tsē--lo̍h--lâi, tuì i ê lak-tē-á jîm hó-tsia̍h mi̍h hō͘ káu-á tsia̍h. Káu-á thiàu-tsiūⁿ tsú-lâng ê tuā-thuí, hō͘ tsú-lâng kā so hīⁿ-á, huaⁿ-hí kàu ti̍t-ti̍t nih ba̍k-tsiu.

Lî-á khuàⁿ tī gán-lāi, khai-sí kún-liòng, liòng khui pa̍k tī sin-khu ê soh-á, o̍h káu-á giâ-thâu tuā-pō͘ tuā-pō͘ ti̍t-ti̍t kiâⁿ. Tsú-lâng khuàⁿ-tsi̍t-ē jím-bē-tiâu suà tshiò--tshut-- lâi. Lî-á huaⁿ-hí tsi̍t-ē, kiâⁿ uá tsú-lâng ê sin-piⁿ, kā tsîng-kha tà tī tsú-lâng ê king-kah- thâu, siūⁿ beh peh-tsiūⁿ tsú-lâng ê tuā-thuí.

Tsit-sî, tsú-lâng ê tn̂g-kang kuáⁿ-kín gia̍h kùn-á tuì lî-á ê sin-khu kā kòng --lo̍h--khì, kóng, “ O͘-pe̍h lâi! Lí teh kún sím-mi̍h sńg-tshiò!”