《CTT出頭天園地》

 | | | 轉寄

I-sap 寓言 38

作者 TLH 2007.11.04

38. Iā-pô

Tsiáu-luī kap Siù-luī ū tsi̍t-tiûⁿ tsiok tuā ê tshiong-tu̍t teh beh po̍k-huat. Nn̄g-pîng ê kun-tuī teh tsi̍p-ha̍p, tsún-pī beh sio-tsiàn ê sî, Iā-pô sam-sim lióng-ì m̄-tsai beh ka-ji̍p tó tsi̍t-pîng.

Tsi̍t-tīn Tsiáu-luī pue-kàu i hioh ê tshiū-á-tíng, kā kóng, “Kap guán tâng-tsê lâi-khì.” I ìn kóng, “ Guá sī Siù-luī.”

Kuè bô juā-kú, tsi̍t-kuá Siù-luī kiâⁿ-kàu i hioh ê tshiū-á-kha, giâ-thâu kā kóng, “Kap guán tâng-tsê lâi-khì.” M̄-kú i kóng, “Guá sī Tsiáu-luī.”

Hó-ka-tsài, āu--lâi nn̄g-pīng bô sio-tsiàn, tshiong-tu̍t tit-tio̍h hô-pîng kái-kuat. Tāi-ke lóng tsin huaⁿ-hí tsò-tīn teh khìng-tsiok. Iā-pô tsiū tsáu khì Tsiáu-luī hia, siūⁿ beh tshap--tsi̍t--kha. M̄-kú, in bô huan-gîng i. I huan-thâu koh tsáu khì Siù-luī hia, suà hō͘ Siù-luī phah, hiám-hiám-á hō͘ in ua̍h-ua̍h phah--sí.

Iā-pô tsáu-kàu tsin liông-puē, bô-bīn thang kìⁿ-lâng, kóng, “ Guá tsi̍t-má tsai-iáⁿ lah! Siang-kha ta̍h siang-tsûn, siang-thâu bô tsi̍t-ngauh. Taⁿ, guá í-king bô puàⁿ-ê pîng- iú lah!”