《CTT出頭天園地》

 | | | 轉寄

I-sap 寓言 40

作者 TLH 2007.11.18

40. Tsuí-ke kap Gû-káng

Tsi̍t-tsiah lāu tsuí-ke tsē tī tsuí-khut-á-piⁿ teh tuh-ku. Sè-kiáⁿ tuā-kiaⁿ sió-kuài tsáu-kuè-lâi kā tâu kóng, “Guá khuàⁿ-tio̍h tsi̍t-tsiah tsiok khó-phà ê tōng-bu̍t, tsiok tuā tsiah, tshin-tshiūⁿ tsi̍t-la̍p suaⁿ hiah-ni̍h tuā. Thâu-khak-tíng huat nn̄g-ki kak. Ū tsi̍t-ki tn̂g bué-liu, kha-tê-á pun-tsò nn̄g-tè.”

“Gōng gín-á, guá kóng hō͘ lí thiaⁿ. He sī Ông--sian--seⁿ ê gû-káng. I mā bô tshiūⁿ lí kóng ê hiah-ni̍h tuā, kan-ta pí guá khah tuā sió-khuá-á nā-tiāⁿ. Tsin kán-tan, guá mā ū huat-tō͘ piàn hiah tuā hō͘ lí khuàⁿ.”

Kóng-liáu, i tsiū khai-sí kā pak-tó͘ kik hō͘ phòng--khí--lâi, mn̄g in kiáⁿ kóng, “I kiám ū tshiūⁿ guá ê pak-tó͘ tsiah-ni̍h tuā?” “Ū no͘h! Pí lí tuā tsiok tsē leh!” Hit tsiah lāu tsuí-ke koh tsài kik, ná kik ná mn̄g, “Án-ne ū kàu tuā--bô?” “Koh khah tuā leh! Koh khah tuā leh!” Lāu tsuí-ke tsiū suh tsi̍t-ē tuā-khuì, koh kik, koh-tsài kik, it-ti̍t kik. I ê sin-khu mā ti̍t-ti̍t phòng-tuā, phòng-tuā, koh phòng-tuā.

“Guá káⁿ khak-tīng gû-káng tsua̍t-tuì bô tshiūⁿ guá tsit-má tsiah-tuā.” Uē tú kóng suah, lāu tsuí-ke ê pak-tó͘ suî piak--phuà lah.

Phòng-hong tsuí-ke thâi bô bah. Tsū-khua tsū-tuā ê lâng kan-ta ē hāi-sí ka-kī.