《CTT出頭天園地》

 | | | 轉寄

I-sap 寓言 46

作者 TLH 2007.12.30

46.Hô͘-lî Kap Ho̍h

Hô͘-lî tī lō͘--nih tn̄g--tio̍h Ho̍h, kap i sio-tsioh-mn̄g, tshiūⁿ hó pîng-iú kāng-khuán. Hô͘-lî tshiáⁿ Ho̍h khì in tau tsia̍h-pn̄g, siūⁿ beh kā tshòng-tī.

Toh-tíng kan-ta 1 ê tshián-tshián ê puâⁿ-á té thng, bô pa̍t-hāng tsia̍h-mi̍h. Hô͘-lî khin-khin sang-sang tsiū kā thng sut liáu-liáu, Ho̍h kan-ta ē-tàng kā tshuì-tsiam ùn-tâm nā-tiāⁿ. Ho̍h beh lî-khui ê sî, pak-tó͘ iáu tsin iau, kap i lâi ê sî-tsūn kāng-khuán.

“Tsin sit-lí! ” Hô͘-lî kóng, “ Guá tsún-pī ê thng, ná-tshiūⁿ bô ha̍h lí ê kháu-bī.” “Tshiáⁿ lí m̄-thang án-ne kóng,” Ho̍h kóng, “ līng-ji̍t uāⁿ guá tshiáⁿ lí tsia̍h-pn̄g.”

Kuè nn̄g kang, Hô͘-lî lâi kàu Ho̍h in tau. Ho̍h kā àm-tǹg té tī tsi̍t-ki ām-kún tn̂g-tn̂g, tshuì-kháu e̍h-e̍h ê kan-á--ni̍h. Hô͘-lî bô huat-tō͘ kā tshuì-kho͘ tshun--jip--khì, kan-ta ē-tàng kā kan-á tshuì tsīⁿ-tsīⁿ leh.

“ Guá bô phah-sǹg beh kā lí huē sit-lé.” Ho̍h kóng, “ Tse sǹg-sī guá tuì lí ê pò-tap!”

M̄-thang uī-tio̍h ka-kī tsi̍t-sî ê khuài-lo̍k khì siong-hāi pa̍t-lâng.