《赤崁樓ê情phoe》

| | | 轉寄

Iōng Kuasiaⁿ Tián Sìⁿmiā —— Sītsiòng tsiá



Koái’á, sô līkhui thóthàn ê lia̍hlêng pâng
Lângkheh khìhiâm ê pháiⁿsiaⁿsàu
Iáu tī hīⁿkhang piⁿ, phōngphōng tân
Tsi̍t tīn bîhong, khaukòe bīnphôe
Léngléng, tài sngbī

Phahkhui imga̍k ê tōamn̂g
Lāusu ê khankà tsáu'óa lâi siotsiohmn̄g
"Ài iōng kuasiaⁿ tián sìⁿmiā!"

Khîmsiaⁿ iujiân khinkhin'á phiau
Tùi kē kàu kôan nńgnńg'á sàng
Hīⁿkhang kik lāilāi, tshing nâ'âu, khan tsi̍t siaⁿ tn̂gim

Khì, tsū tantiân, thàu hing’á, tsim siaⁿtòa
Thàng ian’âu, ta̍t thâuhia̍h
La̍t, iû tsit huat, jî pōe jî kéng jî thâukòa
Thiāu, hiòng tē tèng, jî tûn jî tshik jî khatsiam
Sè, kiông jû tiānkng, jio̍k jû tsikhóe

Ko siaⁿ kē siaⁿ lâm siaⁿ lú siaⁿ, siotsim sio’ù
Khangkhang ê ba̍ktsiu ik tshut siosio ê thiàⁿsim
Ga̍ksiaⁿ iûⁿtsò tsúi, kiat tshut tsintsu

Mîmî tn̂gtn̂g ê simlêng tsi khîm
Koko khókhó ê simlêng tsi kua
Kuasiaⁿ sī ba̍ktsiu
Tùi o͘’àm phunhiòng kongbêng