《赤崁樓ê情phoe》

 | | | 轉寄

Kámsiā Lí ê Ba̍ksái ——-Kapo̍k siūhāi hūlú

作者 Kua Pik'êng 2021.07.25



Kámsiā lí ê ba̍ksái
Tī lí tsho͘ pêpê ê tshiútê līkhui góa iù mimi ê tshùiphóe liáu’āu
Lí ba̍kkho͘ kâm tsúi, kóng lí ài góa
Góa goânliōng lí

Kámsiā lí ê ba̍ksái
Tī lí tōa’ôan ê kûnthâubó͘ kâm góa ê phīⁿkhang hueh liáu’āu
Lí ba̍ksái liàn lo̍hlâi, kóng lí lim tsiú tsùi
Góa goânliōng lí

Kámsiā lí ê ba̍ksái
Tī lí kohtsài giâkhí íthâu’á khòaⁿ góa un tī thô͘kha liáu’āu
Lí ba̍ksái sìlâmsûi, kóng lí tsi̍t-sî sittsì
Góa goânliōng lí

Kámsiā lí ê ba̍ksái
Tī lí la̍ktio̍h góa ê thâutsang khian tùi piahtó͘ liáuāu
Lí ba̍ksái tiòng tsúitsai, kóng ūitio̍h lán ê gín’á
Góa goânliōng lí

Tse sī tsòe’āu tsi̍t pái beh kámsiā lí ê ba̍ksái
Tī lí gia̍h to tshakji̍p góa ê hingkhám phùn kah hueh saisai liáu’āu
Lí ba̍ksái tsúipangsuaⁿ, kūi tiàm góa ê bōngpâi tsêng
Góa m̄bián koh goânliōng lí