《赤崁樓ê情phoe》

 | | | 轉寄

Kiâmtō͘ Goântsāi Bûnha̍k Hûn 　　── Si tsì Ngô͘ Sin’Êng pah hòe biánkī

作者 Kua Pik'êng 2021.09.12



Khòaⁿtio̍h lí ê tângsiōng
Góa tsiah tsaiiáⁿ lí
Tha̍ktio̍h lí ê si
Góa tsiah se̍ksāi lí

Hit mî ko͘ ting phōaⁿ bāngkéng
Khòaⁿ lí iōng ji̍tkì siá le̍ksú ê sin’iáⁿ
Lí gia̍h pit ê tsusè tsin ū la̍t
Tī o͘o͘ ê àmmî
Kingkhui kò͘hiong ê ōegí
Lí thiaⁿtsín ê hīⁿkhang tsin jiûnńg
Tī sánsán ê tshânhn̂g
Iù thiaⁿ thó͘tē ê simsng
La̍ktsa̍p nî tsa̍tpak ê khaìn
Tah boán Lâm’êng ê tētô͘
Khihkak ê sinsè pó͘ îⁿ ah
Làukau ê tso̍kphó͘ pó͘ tsiâu ah

Lí tsóngsī tòtshiú the̍h thiaⁿtâng
Tiánkhui kuanhoâi ê hingkhám
Antah sànhiong lâng ê sànhiong
Tshun tshut jîntō ê tshiúkó͘
Lámphō jio̍ksè tsiá ê jio̍ksè
Lí tsóngsī tsiàⁿtshiú gia̍h si pit
Ū to̍ktshâi ahpà ê só͘tsāi
Tio̍h ū lí tshì giâgiâ ê khònggī
Ū uikoân khiónghat ê tāitsì
Tsiū ū lí lāi kiàmkiàm ê bûnjī

Tī lí ê bûnjī góa thiaⁿtio̍h kiantēng ê siaⁿim
Ba̍ksái suah tiāmtiām liàn lo̍hlâi
In’ūi Tâioân mî iáu tsin tn̂g
　　 Tâioân thiⁿ iáu bē kng

Ko͘tuaⁿ ê tângsiōng tī
Ko͘tuaⁿ ê iā bū tiong
Ko͘tuaⁿ

Êng’àm góa phâng tsi̍t pue lí pah nî phang tê
Tsē tòa lí siókhóa laktshat ê tōathúi
Unsi̍p ji̍tsî lín kiásun sīsè
Kā lí oló ê kuasiaⁿ

Hn̄ghn̄g tsi̍t káng sipsip ê háihong tshue lâi
Lí phīⁿkhang tōatōa suh tsi̍tē
　 tshùikak lio̍k’á tíntāng
Góa ê pitsêng thiaⁿtio̍h lí
Kiantēng ê siaⁿim koh tsài
Kiantēng hiángkhí,
"Háihong ê kiâmtō͘ goântsāi
Bûnha̍k ê lênghûn tio̍h ū bīlâi ──"