《赤崁樓ê情phoe》

 | | | 轉寄

Bīpo̍ktôaⁿ ê Hoánpōe ── Kimmn̂g sióngsiōng tsi it

作者 Kua Pik'êng 2021.11.21



Hīⁿkhang lāi putsî thiaⁿtio̍h
Tsi̍t tsūn tsi̍t tsūn lóng lóng ê siaⁿim
Saⁿ bān gōa ē bô kuitsik ê tsiattsàu
Gō͘ tsa̍p nî lâi kín koh tāng ê kiaⁿ sim lún miā

Ūisiáⁿmih gún tsi̍t tshutsì
Tsùtiāⁿ sī húibia̍t
Húibia̍t jînbēng húibia̍t tshùthe̍h húibia̍t siâⁿpó húibia̍t
Sèkài

Hit nî ê Pat Jī Sam
Tsó͘kok tsho͘tshân ê tshiútê
Kā gún sak ji̍pkhì tsi̍t ki tsi̍t ki tōaphàu lāité
Tng gún saⁿ bān gōa jînkháu ê tōa katso̍k
Tsi̍t tshiong tshut phàukóng
Kui ê Kimmn̂g lóng kúnká khílâi

Gún lāupē tshiúⁿ tio̍h thâuhiuⁿ
Liàm tn̄g in lāupē ê thâukhak
Gún lāubú tsi̍t ua̍tji̍p hāng’á lāi
In lāubú sûi tī hāng’á lāi siausit
Gún tsik peh ko͘ tsím ê paktó͘ thuntsia̍h
In tsik peh ko͘ tsím ê tn̂g’á tn̂gtō͘
Gún hiaⁿ tī tsí mōe ê kha tshiú pehthiah
In hiaⁿ tī tsí mōe ê tn̄g kha tn̄g tshiú
Gún ê gín’á phōaⁿ kui tīn sio tsio
Tī tshùi iûⁿiûⁿ ê ke’á lō͘ thiàu keh’á
Tī tsiùⁿ kô͘kô͘ ê hueh ‧ni̍h siûtsúi

Tang tó sai uai ê tshùthe̍h un tī aikhàu tiong kúnliòng
Kíntiuⁿ ê hôngkhonghô pûn tshut kiaⁿhiâⁿ ê siaⁿtiāu
Kui bān tùn tôaⁿphìⁿ pàtsiàm phīⁿsái tōa ê háitó

Hit nî ê Pat Jī Sam
Tsi̍t tiûⁿ ua̍hmiā kap sísîn ê kaue̍k
Gún ê ketso̍k kap in ê sèkài
Lóng pī khikji̍p bōngpâi
Tse kám sī gún póe bē khui ê miākeh?

M̄ gōan ēng góa ê tshùikut hunsi
Kauōaⁿ in ê khôikha phòasiùⁿ
Tsíhó hoánpōe miākeh
Siáng ū tsukeh kuattēng lâng ê sèⁿmiā?

Tùi tsó͘kok siā lâi kàu tsia
Bih tī thô͘kha té àm bongbong ê tétsàn
Gō͘ tsa̍p tang ah
Góa kiantshî m̄ po̍ktsà
Góa kiantshî
M̄ po̍ktsà