《赤崁樓ê情phoe》

 | | | 轉寄

Lāu Ping ê Pitsêng ── Kimmn̂g sióngsiōng tsi jī

作者 Kua Pik'êng 2021.12.05



Tùihōaⁿ iân phàulúi pêji̍p ba̍ktsiu
Kimsik phah khui kong’êng ê tsêng pòaⁿ sìlâng
Káⁿ sí koh sí bē khì ê ua̍h
Uikoân thiàuji̍p thihthang teh píⁿ kingkah
Pe̍hsik amkhàm uankhut ê āu pòaⁿ sìlâng
Siūⁿ sí koh sí bē khì ê sí

Siáng niû ē tshut kong’êng ū kúi lí tn̂g?
Siáng tshìn ē tshut uankhut ū kúi kin tāng?

Phāiⁿ kitshèng sǹg bánthô
Kā tshingtshun thui kah kimkong siámsiám
Tèng khaliâu pō͘ tshàikin
Kā sòegua̍t autsò pháiⁿ tâng kū siah
Kǹg kòe tsiàⁿtshiú ê tshèngtsí íking seⁿsian
Huihông ê khangtshùi tsá tsiū kianphí
Kòngtn̄g tòkha ê hêngkùn íking ji̍p tsàu
Bújio̍k ê sionghûn iáu koh sin sin
Kó͘lêngthâu ê phàuhō͘ tsin lāi
Lāi bē kòe Hóesio Tó ê ga̍khong

Thunlo̍h sîtāi piàn’ōaⁿ ê hong huah hō͘ jiáng
Tsàitō͘ khiā tū "毋 忘 在 莒" thâutsêng
Âng kng tshiah ji̍tthâu ê siòngphìⁿ
Tsi̍t tiuⁿ tsi̍t tiuⁿ tâiji̍p Thàibú Sam Kongbōng
Ta̍h kòe honghóe ta̍h kòe phàutôaⁿ tshùiphìⁿ ê kìtî
Iáu tī Tsiànsú Koán ê hō͘tēng ing’ia

Tsiànsū inghiông póng koh ántsóaⁿ
Mā ingkai tshiâu tsi̍t ê khangūi hō͘ góa hiohtshoán
Bônāi tsóa thâu bô sèⁿ tsóa bóe bô miâ ê huntsiong
Ōaⁿtsò tsi̍t tiuⁿ kâm hueh bû thiⁿ ê poānloān phòaⁿkuat su

Kìik ê tshèngkoáiⁿ koh tsài tsiūⁿkūi thiàubōng siōng tsiânsòaⁿ
Tshàuphú ê le̍ksú ik lâi kiklia̍t ê simtsiàn hán ōe
Khangkhang ê tsiàⁿ tshiúńg kau bē tiâu êng’ū ê kongtshái
Tēngtēng ê ké tòkha tsàm bē phòa okbāng ê im’iáⁿ
Tuisióng siàuliân ê hongsîn
Tùitsiàu lāu kéng ê piliâng
Ba̍kkho͘ tsik tshut tsi̍t tih phòatshùi ê ba̍ksái

Kéngtsóng ántsóaⁿ koàntsúi
Tiâutsa Kio̍k ántsóaⁿ tiānkik
Lāu khì ê thâukhak
Sian siūⁿ to siūⁿ bô
Kā góa itsing tshiattsò nn̄g pòaⁿ ê
Hit tiuⁿ akiōng’á suanthoântuaⁿ
Tangsî liâm tī tòkha ê
Êté?