《赤崁樓ê情phoe》

 | | | 轉寄

Siû Bāng

作者 Kua Pik'êng 2021.05.16



Iāhêng kun ê sihsut’á pòsò͘ siaⁿ sàu
Ka tn̄g tù khíkôⁿ ê khùnbîn
Sô tī tshiûⁿá kak sûnlô ê siānthâng’á ping
Tsha̍t thâu tsha̍t hīⁿ, iōng hôe’ik ê lûita̍t
Sàubiô siûsik lāi ê góa

Lênghûn hō͘ pê bóan jiâubûn ê gue̍hniû hē tio̍h hû’á
Thâu hunhun, náu tūntūn
Kâmtio̍h bāng ê nitshùi

Siû bāng tsi̍t gia̍h kha
Sûi that tò bih tī piah-kak ê kì’ik àng
Se̍h tshut kanlo̍k ê huahhiu
Tiò khí tshân tsùn kau ê tshiòsiaⁿ
Khiâ tshiūⁿ apa kingkah ê bô siâ
Tiâu tī a-má ké tshùi-khí phāng ê
Tsi̍t mî tōa tsi̍t tshùn

Kiú’ûi ê se̍k’iông tī ânghia tshùténg siù tsiamtsí
Kim n̂g kam’á âng tshong sisòaⁿ, sôan tîn bān siā
Soá kīn ê iantâng thò͘tshut tsháitòa iūⁿ ê thiàⁿsioh
Ah! He sī abú tshiútê kāu kián ê kiaungō͘

Hiongtshiû thí-khui góa ê gôansîn
Kā sòaⁿ iā’iā ê kìtî
Tsi̍t lia̍p tsi̍t lia̍p khioh khí
Hongkòa ê sîtsūn
Ba̍ktsiu kak bô sèjī khì hō͘ suliām tshèng‧tio̍h
Ku̍t lo̍h tsi̍t tih kui put hôe ê kahn̂g