《Kahui ê Tâi-bûn Phû-tô-hn̂g》 |
 |
 |
|
 轉寄 |
Tòa佇旗后的阿婆
作者 Ko Ka-hui 2022.08.28
Góa tsa-hng ka-tī tsē kong-tshia khì tsi̍t king kū tsheh-tiàm kap Ko-hiông ê Saⁿ-û tsheh-tiàm lau-lau--leh! Ū tang-sî-á ka-tī tsi̍t ê lâng ê iû-sńg mā-sī bōe-bái lah! Tī góa lú-hêng pòaⁿ-ji̍t iû kiat-sok, beh tsē kong-tshia tńg-khì tshù--nih ê sî, piⁿ-á tsē tsi̍t ê a-pô. Góa tō siūⁿ kóng, múi tsi̍t ê lāu-lâng lóng ū in ka-tī ê kò͘-sū, tō tsú-tōng hām i la-thian.
Góa tō kóng:“A-pô , lí beh tsē tshia khì tó-ūi?”I kóng:“Góa beh tsē kàu Kok-thài tshī-tiûⁿ lo̍h-tshia!”Liân-āu, góa tō hām i it-ti̍t káng. A-pô kóng i ê tōa-hàn tsa-bô͘ sun tī Tâi-pak tha̍k tāi-ha̍k, tha̍k ê hē sī Hut-lu̍t hē. Góa kā kóng ū-kàu lī-hāi--ê! I kóng i hit ê sun nā-sī ta̍k-kài beh tńg-khì ha̍k-hāu, lóng ē kā kóng：「A-má, góa tsiok siūⁿ--lí--ê.」A-pô mā ē kóng kâng-khóaⁿ ê ōe.
Kóng--ê kóng--ê, góa khòaⁿ-tio̍h a-pô i bô-tiûⁿ-bô-tî ba̍k-sái tō sûi lìn--lo̍k-lâi, koh kā góa kóng ài ke pôe lín gōa-má, in lóng tsiok su-iàu sì-sè ê kuan-sim, kóng si̍t-tsāi ōe, khak si̍t sī án-ne. Goán a-kū mā ē tsiok tsia̍p khì tshōe i、pôe i.
A-pô koh kóng, i siàu-liân ê sî sī tsò saⁿ--ê, in thâu--ê khah-tsá sī tsáu siōng-tsûn, tī lāi-té mā ū siōng-tong ê tē-ūi. In kū-tshù tī Kî-āu, tsit-má sī kiò Kî-tin. Koh kóng siàu-liân sî lóng ē tòe in ang khì gōa-kok, siōng hn̄g tsáu-khì「伊拉克」kap Âng-hái, góa thaiⁿ--leh lóng bî khì ah!
Goân-lâi a-pô ê kò͘-sū hiah-nī tsing-tshái, i beh lo̍h tshia tsìn-tsêng, góa the̍h tsi̍t pún Bóng-pò hō͘ i, i kā góa seh-siā liáu tō lo̍h-tshia. Kám-siā tsit tōaⁿ kî-gū koh hō͘ góa ū tsi̍t phiⁿ bûn-tsiuⁿ thang siá, Tâi-gí tshut-thâu-thiⁿ!!
*刊tī台文罔報第340期(2022/7月)
