《老人kah海》

 | | | 轉寄

《老人kah海》_11, Thiⁿ bóetsēng kng, i to̍h pàng jī / 天bóetsēng光，伊 to̍h 放餌

作者 Ernest Hemingway, 台譯：Manlajo, 修訂：宋麗瓊 2019.05.12

Lāu lâng siūⁿ, góa íking tī"tōa tséⁿ"phahpiàⁿ kui lépài à,m̄ koh siáⁿmi̍h to bô lia̍h tio̍h. Kin’áji̍t góa beh tshōetshut ū ian á(bonito; kian hî ）kah tshng’á (albacore; úi hî ê tsi̍t tsióng ） hîtīn ê só͘tsāi, hōansè ē ū tōabóe hî kah in tsòhóe.

Tī thiⁿ iáu bô tsin kng tsìntsêng, i to̍h pàng hîjī, tsûn mā pàng hō͘ i tòe háilâu phiauliû. Thâu tsi̍tê hîjī pàng tī iok 75 kongtshioh tshim ê só͘tsāi, tējī ê tī iok 140 kongtshioh, tēsaⁿ kah tēsì ê tī iok 185 kah iok 235 kongtshioh tshim ê nâsik háitsúi nih. Ta̍k ê hîjī lóng thâu ǹg ēbīn tò tiàu, tiòkau liân pèⁿ lóng tshàng tī hîjī lāité, pa̍k kah tsin kiatsi̍t, kau’á só͘ū tu̍t tshut.Lâi ê pō͘hūn, uankhiau ê ūi kah tsiambé, lóng koh ēng sinsian ê un’áhî khàm.Leh. Ta̍k bóe un’á lóng tùi siang ba̍k tshng kòe, kau tsòhóe, só͘í tī tu̍t tshut.Lâi ê thih kau téngbīn, in khòaⁿ khí.Lâi ná tshintshiūⁿ sī pòaⁿ ê huikhôan; kui ki tiòkau lóng ē hō͘ tōahî kámkak phang koh hótsia̍h.

Gín’á hō͘ i nn̄g bóe sinsian ê sèbóe tshng’á,in sī kau tī siōngtshim ê hit nn̄g tiâu hîsòaⁿ, ná tshintshiūⁿ iân tsí kāngkhóan; kîtha ê nn̄g tiâu hîsòaⁿ, i sī ēng tsi̍t bóe tōabóe ê tsheⁿ hî （blue runner; Bítsiu Tāiseiûⁿ háihōaⁿ sán ê bluefish）kah tsi̍t bóe kam á(yellow jack）; sûijiân in íking bat ēng lâi tsò kòe hîjī, m̄ koh tsōnghóng lóng iáu tsin hó, kasiōng ū sinsian ê un’áhî, tōatōa tsēngka in ê phangbī kah khipínla̍t. Ta̍k tiâu hîsòaⁿ lóng tshintshiūⁿ tōa ki iân pit hiah tsho͘, tîⁿ tī tsi̍t ki tsheⁿ sik ê tiòkuaⁿ, só͘í hî nāsī khiú.Tio̍h, ásī tāng tio̍h hîjī, tiòkuaⁿ to̍h ē hiônghiông tìm lo̍hkhì. Ta̍k tiâu hîsòaⁿ lóng iáu ū nn̄g khún iok 75 kongtshioh ê hîsòaⁿ, koh ētàng tsin kín to̍h tsiap tī kîtha pī ēng ê hîsòaⁿ khún, só͘í, suiàu ê sî, tsi̍t bóe hî ētàng thua tshut iok 550 kongtshioh ê hîsòaⁿ.

Taⁿ, lāu lâng ná tsùì tehkhòaⁿ tsûnpiⁿ ê saⁿ ki tiò 杆ê tāng tsēng, ná khinkhin á teh kò tsûn, thang hō͘ hîsòaⁿ pótshî ti̍tti̍t, koh ū tîm lo̍hkhì kàu siktòng ê tshimtō͘. Thiⁿ íking tsin kng ā, ji̍tthâu sûisî to̍h beh phû tshut háibīn.

Ji̍tthâu tùi háibīn phû tshut tāmpo̍h’á, lāu lâng ētàng khòaⁿ tio̍h kîtha ê tsûn, lī tsúibīn kēkē, lī háihōaⁿ bô hn̄g, tòe háilâu sì sòaⁿkhui khì. Liáuāu, ji̍tthâu koh khah kng ā, kiônglia̍t ê kngsòaⁿ tsiò tī tsúibīn. Tng ji̍tthâu kui ê phû tshutlâi ê sî, pêⁿtháⁿ ê háibīn kā kngsòaⁿ hóansiā kàu i ê ba̍ktsiu,ná to teh tsha̍k, m̄ koh, i tsuansim kò tsûn, bô khì khòaⁿ i. I a nǹthâu khòaⁿ ji̍p háitsúi, khòaⁿ ti̍tti̍t thiāmlo̍h o͘àm tshimhái ê hîsòaⁿ; i hō͘ i ê hîsòaⁿ pótshî pí pa̍tlâng ê lóng khah ti̍t, só͘í tī o͘àm háilâu ê múi tsi̍tê tshimtō͘, i lóng ū tsi̍tê hîjī tī i siattēng ê só͘tsāi, teh tánthāi tùi hia siû kòe ê hî; pa̍t ê thóhái lâng sī pàng hîsòaⁿ tòe háilâu phiautāng, tìsú ū sî in siūⁿ kóng hîjī sī tī iok 185 kongtshioh ê tshimhái, sūsi̍t siōng, ū khólêng sī kantaⁿ iok 110 kongtshioh niāniā.

Tsóng.Sī, i siūⁿ, góa ê hîsòaⁿ bē tsingtsha, tsísī góa ê hó ūniōng tsīn ā. M̄ koh, siáng ē tsai leh? Hōansè kin’áji̍t hó ūn to̍h lâi. Ta̍k kang lóng sī sin ê tsi̍t kang, nāsī ū hó ūn siōnghó, m̄ koh, góa lêngkhó tsiàu pō͘ lâi, ánne, hó ūn nā lâi ê sî, lí íking tsúnpī hósè à. Taⁿ ji̍tthâu íking tshutlâi nn̄g tiámtsing, ǹg tang pêng khòaⁿ, mā bē hiahni̍h tsha̍kba̍k ā. Tsitmá, i khòaⁿ ē tio̍h ê, íking kantaⁿ tshun saⁿ tsiah tsûn’á, jîtshiáⁿ in inūi tsài tāng, tsûnsin lóng lī tsúibīn tsin kē, koh lī háihōaⁿ bô hn̄g.

I siūⁿ, góa ê ba̍ktsiu kui sìlâng lóng hō͘ thàutsá ê ji̍tthâu sionghāi, m̄ koh in iáu hóhó; beh àm á ê sî, góa ētàng ti̍t ba̍k khòaⁿ ji̍tthâu, ba̍ktsiu mā bē o͘àm khì. Beh àm á ê ji̍tthâu mā sī tsin béng, m̄ koh, tsákhí sî ê ji̍tthâu sī ē hō͘ ba̍ktsiu tshìthiàⁿ. Hit sî, i khòaⁿ tio̍h tsi̍t tsiah kunkàmtsiáu （manofwar bird）, thiánkhui tn̂gtn̂g ê o͘ si̍t tī i thâutsêng ê thiⁿténg teh se̍hkho͘lìn. I hutjiân kā si̍t iap āu, khòaisok tshiâtshiâ tshih lo̍hlâi, liáuāu sûi koh khaisí se̍h kho͘ á.

老人想：我已經tī「大井」phah拚kui禮拜à，m̄ koh啥物都無掠tio̍h。今á日我beh tshōe出有煙á（bonito；鰹魚）kah串á（albacore；鮪魚ê一種）魚陣ê所在，hoānsè ē有大尾魚kah in做伙。 Tī天iáu無真光tsìn前，伊to̍h放魚餌，船mā放hō͘ 它tòe海流漂流。頭一个魚餌放tī約75公尺深ê所在，第二个tī 約140公尺，第三kah第四个tī 約185 kah 約235公尺深ê藍色海水裡。Ta̍k个魚餌lóng頭ǹg下面倒吊，釣鉤連柄lóng藏tī魚餌內底，縛kah真結實，鉤á所有凸出來ê部分、彎曲ê位kah尖尾，lóng koh用新鮮ê鰮á魚khàm.leh。Ta̍k尾鰮á lóng tùi雙目tshng過，鉤做伙，所以tī凸出來ê鐵鉤頂面，in看起來ná親像是半个花環；kui支釣鉤lóng ē hō͘ 大魚感覺芳koh好食。

Gín’á hō͘ 伊兩尾新鮮ê細尾串á，in是鉤tī siōng深ê hit兩條魚線，ná親像鉛籽仝款；其它ê兩條魚線，伊是用一尾大尾ê青魚（blue runner；美洲大西洋海岸產ê bluefish）kah一尾甘á（yellow jack）；雖然in已經bat用來做過魚餌，m̄ koh狀況lóng iáu真好，加上有新鮮ê鰮á魚，大大增加in ê芳味kah吸引力。Ta̍k條魚線lóng親像大支鉛筆hiah粗，纏tī一支青色ê釣杆，所以魚若是khiú.tio̍h，á是動tio̍h魚餌，釣杆to̍h ē雄雄tìm落去。Ta̍k條魚線lóng iáu有兩綑約75公尺ê魚線，koh ētàng真緊to̍h接tī其它備用ê魚線綑，所以，需要ê時，一尾魚ētàng拖出約550公尺ê魚線。

Taⁿ，老人ná注意teh看船邊ê三支釣杆ê動靜，ná輕輕á teh划船，thang hō͘ 魚線保持直直，koh有沉落去到適當ê深度。天已經真光ā，日頭隨時to̍h beh浮出海面。

日頭tùi海面浮出淡薄á，老人ētàng看tio̍h其它ê船，離水面kēkē，離海岸無遠，tòe海流四散開去。了後，日頭koh khah光ā，強烈ê光線照tī水面。當日頭kui个浮出來ê時，平坦ê海面kā光線反射到伊ê目tsiu，ná刀teh鑿，m̄ koh，伊專心划船，無去看它。伊àⁿ頭看入海水，看直直沉落黑暗深海ê魚線；伊hō͘ 伊ê魚線保持比別人ê lóng khah直，所以tī黑暗海流ê每一个深度，伊lóng有一个魚餌tī伊設定ê所在，teh等待tùi hia泅過ê魚；別ê討海人是放魚線tòe海流漂動，致使有時in想講魚餌是tī 約185公尺ê深海，事實上，有可能是kantaⁿ 約110公尺niāniā。

總是，伊想：我ê魚線bē精差，只是我ê好運用盡ā。M̄ koh，siáng ē知leh？Hoānsè今á日好運to̍h來。Ta̍k工lóng是新ê一工，若是有好運siōng好，m̄ koh，我寧可照步來，ánne，好運若來ê時，你已經準備好勢à。 Taⁿ日頭已經出來兩點鐘，ǹg東pêng看，mā bē hiahni̍h鑿目ā。Tsitmá，伊看ē tio̍h ê，已經kantaⁿ tshun三隻船á，而且in因為載重，船身lóng離水面真低，koh離海岸無遠。

伊想，我ê目tsiu kui世人lóng hō͘ 透早ê日頭傷害，m̄ koh in iáu好好；beh暗á ê時，我ētàng直目看日頭，目tsiu mā bē烏暗去。Beh暗á ê日頭mā是真猛，m̄ koh，早起時ê日頭是ē hō͘ 目tsiu刺痛。 Hit時，伊看tio̍h一隻軍艦鳥（manofwar bird），展開長長ê烏翼tī伊頭前ê天頂teh se̍hkho͘lìn。牠忽然kā翼iap後，快速斜斜tshih落來，了後隨koh開始se̍h箍á。