《老人kah海》

 | | | 轉寄

《老人kah海》_29, I kakī kiông beh khùn khì /伊kakī kiông beh睏去

作者 Ernest Hemingway, 台譯：宋麗瓊 林俊育 2019.11.03

I siūⁿ, góa ê thâukhak tsin tshingtshéⁿ, tsin tshingtshéⁿ leh; kah góa hiahê tsheⁿsîn hiaⁿtī pêⁿ tshingtshéⁿ. M̄ koh, góa iáusī suiàu khùnbîn. Tsheⁿsîn teh khùn, gue̍hniû kah ji̍tthâu mā teh khùn; sīmtsì ū sî bô háilâu, háibīn tsēngtsēng bô éng ê sî, háṳûⁿ mā teh khùn.

I siūⁿ, tsóng ·sī, ài ē kìtit khì khùn, ài kiôngpik kakī khì khùn, ài siatkè tshut kántan koh khókhò ê honghuat lâi khòaⁿkò͘ hîsòaⁿ. Taⁿ sing lâikhì thâi pueo͘hó͘. Nāsī lí ittēng ài khì khùn, ánne, pa̍k tsûntsiúⁿ lâi tsingka tsó͘la̍t, to̍h siuⁿkòe gûihiám à.

I kā kakī kóng, góa ēsái mài khùn, m̄ koh ánne siuⁿ gûihiám à. I ēng siang tshiú kah khathâuu pê tńgkhì tsûnbóe, sèjī m ài khì kiaⁿ tāngtio̍h hî'á. I siūⁿ, i khólêng mā teh pòaⁿ khùn à, m̄ koh, góa bô ài hō͘ i hiohkhùn, i ài thua kàu sí ûitsí.

Tńg kàu tsûnbóe, i tńgsin, ēng tò tshiú la̍k tio̍h kingkahthâu ê hîsòaⁿ, tsiàⁿ tshiú kā to thiutshut tosiù. Tsit sî thiⁿtsheⁿ kng iàⁿiàⁿ, i ētàng tsin tshingtshó khòaⁿ tio̍h hit bóe pueo͘hó͘. I kā to bah tu̍h ji̍p khì i ê thâukhak, kā i tùi tsûnbóe thua kòelâi. I ēng tsi̍t kha kā hî ta̍h leh, ēng to kā i tùi肛 mn̂g itti̍t kàu ēhoâi phòakhui, liáuāu kā to khǹg.Leh, ēng tsiàⁿ tshiú tshing paklāi, koh kā sai the̍h kah tsin tshingkhì. I kámkak hî ê ūi tī tshiú ·ni̍h tāngtāng koh ku̍t liuliu, tsiū kā i phòakhui, lāibīn ū nn̄g tsiah pueo͘, in iáu tsin tshiⁿ, tsin kiatsi̍t, i kā in pēngpâi khǹg tī tsûnpang, kā kîtha ê paklāi kah sai hiat tshut tsûn gōa. In tîm lo̍h khì ê sî, tī tsúi ·nih thua tshut tsi̍t tiâu lînkng. Pueo͘hó͘ léng kiki, tī tsheⁿkng hā khòaⁿ khí·lâi ná tháiko hiahni̍h sí pe̍h. Lāulâng tsiàⁿ khata̍h hî thâu, kā tsi̍t pêng ê hî phôe pak tiāu, liáuāu, i kā hî péng sin, pak lēnggōa tsi̍t pêng ê phôe, liáuāu tùithâu kàubóe kā nn̄g pêng ê hî bah liô lo̍hlâi.

I hō͘ hî ê sikut tùi tsûn kîⁿ liu lo̍hkhì, koh tsùì khòaⁿ tsúi ·nih sī m̄ sī ū kńglêá, m̄ koh i kantaⁿ khòaⁿ tio̍h i bānbān'á tîm lo̍h khì ê kng. I ua̍t tńgsin, kā hit nn̄g tsiah pueo͘ gia̍p tī hit nn̄g phìⁿ pueo͘hó͘ ê bah ni̍h, koh kā to tshahji̍p tosiù, tsiah bānbān'á sóa tńgkhì tsûnthâu; i ê tsiàⁿ tshiú the̍h hiahê hî bah, i ê khatsiahphiaⁿ hō͘ hîsòaⁿ ê khiú la̍t ap kah kuku.

Tńg kàu tsûnthâu, i kā hit nn̄g phìⁿ hî bah khǹg tī tsûnpang, koh kā pueo͘ khǹg tī in ê piⁿ'á. Liáuāu, i kā kingkahthâu ê hîsòaⁿ sóa ūi, koh ēng khò tī tsûn kîⁿ ê tò tshiú nih.Leh. I thàm sin tī tsúi ·nih sé pueo͘, koh tsùì háitsúi tshiong tshiú ê soktō͘. I ê tshiú inūi pak hî phôe suah ū lînkng, i tsùbo̍k khòaⁿ teh tshiong tshiú ê tsúilâu, tsúilâu bô hiah kiông ā, tng i tī tsûnpang tshat tshiú ê sî, lînkng to̍h tsi̍t tiám tsi̍t tiám'á lī tshiú, bānbān'á phiau hiòng tsûnbóe khì.

Lāulâng kóng,"i thiám à, nā bô to̍h sī i teh hiohkhùn. Tsitmá, góa tio̍h thàn tsitê kihōe lâi tsia̍h pueo͘hó͘, liáuāu sió hioh leh, koh khùn tsi̍tē."

Tī tsheⁿkng hā, kah tī jú lâi jú léng ê àmmê, i tsia̍h pòaⁿ phìⁿ pueo͘hó͘ ê bah, kah tsi̍t bóe khì paklāi kah thâu ê pueo͘.


伊想：我ê頭殼真清醒，真清醒leh；kah我hiahê星辰兄弟平清醒。M̄ koh，我iáu是需要睏眠。星辰teh睏，月娘kah日頭mā teh睏；甚至有時無海流，海面靜靜無湧ê時，海洋mā teh睏。

伊想：總是，ài ē記得去睏，ài強迫kakī去睏，ài設計出簡單koh可靠ê方法來看顧魚線。Taⁿ先來去thâi飛烏虎。若是你一定ài去睏，ánne，縛船槳來增加阻力，to̍h siuⁿ過危險à。

伊 kā kakī講：我ēsái mài睏，m̄ koh ánne siuⁿ危險à。 伊用雙手kah腳頭u爬tńg去船尾，細膩mài去驚動tio̍h魚á。伊想：牠可能mā teh半睏à，m̄ koh，我無ài hō͘ 牠歇睏，牠ài拖到死為止。

Tńg到船尾，伊tńg身，用倒手la̍k tio̍h肩胛頭ê魚線，正手kā刀抽出刀鞘。Tsit時天星光iàⁿiàⁿ，伊ētàng真清楚看tio̍h hit尾飛烏虎。伊kā刀肉tu̍h入去牠ê頭殼，kā牠tùi船尾拖過來。伊用一腳kā魚踏leh，用刀kā牠tùi肛門一直到下頦破開，了後kā刀khǹg.leh，用正手清腹內，koh kā鰓the̍h kah真清氣。伊感覺魚ê胃tī手裡重重koh滑溜溜，就kā它破開，內面有兩隻飛烏，in iáu真tshiⁿ，真結實，伊kā in並排khǹg tī船枋，kā其它ê腹內kah鰓hiat出船外。In沉落去ê時，tī水裡拖出一條磷光。飛烏虎冷kiki，tī星光下看起來ná tháiko hiahni̍h死白。老人正腳踏魚頭，kā一pêng ê魚皮剝掉，了後，伊 kā魚 péng 身，剝另外一pêng ê皮，了後tùi頭到尾kā兩pêng ê魚肉liô落來。

伊hō͘ 魚ê屍骨tùi船墘溜落去，koh注意看水裡是m̄是有捲螺á，m̄ koh伊kantaⁿ看tio̍h它慢慢á沉落去ê光。伊ua̍t tńg身，kā hit兩隻飛烏夾tī hit兩片飛烏虎ê肉裡，koh kā刀插入刀鞘，tsiah慢慢á徙tńg去船頭；伊ê正手the̍h hiahê魚肉，伊ê kha脊phiaⁿ hō͘ 魚線 ê khiú力壓kah kuku。

Tńg到船頭，伊 kā hit兩片魚肉khǹg tī船枋，koh kā飛烏khǹg tī in ê邊á。了後，伊kā肩胛頭ê魚線徙位，koh用靠tī船墘ê倒手nih.leh。伊探身tī水裡洗飛烏，koh注意海水沖手ê速度。伊ê手因為剝魚皮suah有磷光，伊注目看teh沖手ê水流，水流無hiah強ā，當伊tī船枋擦手ê時，磷光to̍h一點一點á離手，慢慢á漂向船尾去。

老人講：「牠thiám à，若無to̍h是牠teh歇睏。Tsitmá，我tio̍h趁tsitê機會來食飛烏虎，了後小歇leh，koh睏一下。」

Tī星光下，kah tī jú來jú冷ê暗暝，伊食半片飛烏虎ê肉，kah一尾去腹內kah頭ê飛烏。