《老人kah海》

 | | | 轉寄

《老人kah海》_30, Saⁿ sì kang lāi beh piànthiⁿ ā三四工內beh變天ā

作者 Ernest Hemingway, 台譯：宋麗瓊 林俊育 2019.11.10

I kóng, "Pueo͘hó͘ nā tsú kòe tsiah tsia̍h, gōa hó leh, m̄ koh, tsheⁿtsia̍h si̍ttsāi sī ū kàu pháiⁿ tsia̍h. Āupái tshut hái, tsua̍ttùi ài tsah iâm á sī sng tèng."

I siūⁿ, góa nā ū thâunáu, ji̍tsî to̍h ē kui kang tī tsûnthâu phuah tsúi koh ho͘ i pha̍k ta, ánne góa to̍h ē ū iâm ā. M̄ koh, góa sī tshaputto itti̍t kàu ji̍t beh lo̍h hái ê sî tsiah tiò tio̍h hit bóe pueo͘hó͘. Tsóng ·sī, góa iáusī khiàm tsúnpī, m̄ koh, góa ū kā i pō͘ tsin nōa, jîtshiáⁿ bô kámkak péngpak.

Tang pêng ê thiⁿténg khaisí o͘hûn ba̍t pò͘, i bat ê thiⁿtsheⁿ tsi̍t lia̍p tsi̍t lia̍p hua ·khì. I tsitmá khòaⁿ khí·lâi kahn á sī teh kiâⁿ ji̍p tsi̍tê ke̍ktōa ê hûnkiapkok; hong khah sè à. I kóng,"saⁿ sìkang lāi beh piànthiⁿ ā; êngàm iáu bē, bîn'átsài mā bē. Lāulâng ah, thàn hî pêngtsēng koh úntēng ê sî, tsitmá kín tsīnliōng sió khùn leh."

I ēng tsiàⁿ tshiú kā hîsòaⁿ ni̍h ânân, ēng tsiàⁿ pêng ê tōathúi khì tú tiâu tsiàⁿ tshiú, koh kā kui singkhu ê tāngliōng khò tī tsûnthâu pang. Liáuāu, i kā kingkahthâu ê hîsòaⁿ sóa khah kē leh, koh ēng tò tshiú kā i thèⁿ.Leh.

I siūⁿ, tsíiàu hîsòaⁿ ū tò tshiú thèⁿ.Leh, góa ê tsiàⁿ tshiú to̍h ni̍h i ētiâu. Tsiàⁿ tshiú nāsī tī khùnbîn tiong pàngsang, hō͘ hîsòaⁿ liu khì, góa ê tò tshiú to̍h ē kā góa kiò tshéⁿ. Tsiàⁿ tshiú tsin sinkhó͘, m̄ koh, i tsia̍h khó͘ koànsì à. Góa nā ētàng khùn jītsa̍p pun á sī pòaⁿtiámtsing mā bē bái. I phak leh, kui singkhu kā hîsòaⁿ gia̍p leh, kā i só͘ū ê tāngliōng lóng ah tī tsiàⁿ tshiú, tsiū ánne khùnkhì.

I bô bāngkìⁿ saiá, khiok sī bāngkìⁿ tsi̍t tōatīn ê háitiá （porpoise）, liân mî puttoān, tī hái nih iânsin 1316 konglí. Tse sī in kau phòe ê sîtsūn, in ē koânkoân thiàu ji̍p khongtiong, tsiah koh thiàu tńgkhì in thiàutshut lâi ê kāng tsi̍tê tsúi tōng.

Sòa lo̍hlâi, i koh bāngkìⁿ i tī tsng ni̍h, tó tī i ê bîntshn̂g téng, pakhong tsin thàu, i kámkak tsin kôaⁿ, jîtshiáⁿ i ê tsiàⁿ tshiú lóng môa khì, inūi i ēng tshiú tsò tsímthâu.

Liáuāu, i khaisí bāng kiàntiông tn̂g ê n̂gsik suapo͘, koh khòaⁿ tio̍h tē tsi̍t tsiah saiá tī thiⁿ tsho͘ àm ê sî lâi kàu hia, āu ·lâi kîtha ê saiá mā lâi ā. Tsûn tī hia pha tiàⁿ, i kā i ê ēhoâi khò tī tsûnthâu pang,, tī tùi hōaⁿténg tshue hiòng háṳûⁿ ê àmsî hong tiong, i teh tán khòaⁿ sī m̄ sī iáu ū koh khah tsē saiá ē lâi, simlāi kámkak huisiông huaⁿhí. Gue̍hniû íking tsá to̍h tshutlâi, m̄ koh i iáu teh khùn. Hî kèsio̍k únún á teh thua, kā sió tsûn thua ji̍p hûn tiong ê pōngkhang.

I tsiàⁿ tshiú ê kûnthâubú hutjiân khì lòng tio̍h i ê bīn, hō͘ i tshéⁿ khí lâi, jîtshiáⁿ hîsòaⁿ tùi tsiàⁿ tshiú itti̍t liu tshutkhì, tshiú ná tshiūⁿ hō͘ hóe sioto̍h hiahni̍h tshìthiàⁿ. I ê tò tshiú lóng bô kámkak, só͘í i ēng tsiàⁿ tshiú piàⁿmiā tsó͘tòng, m̄ koh hîsòaⁿ iáusī itti̍t liu bô thêng. Āu ·lâi, tò tshiú mā giú tio̍h hîsòaⁿ à, i singkhu tò hiaⁿh kiong hîsòaⁿ, só͘í tsitmá i ê khatsiahphiaⁿ kah tò tshiú mā ná hóe teh sio; iûkî sī sêngsiū ittshè giú la̍t ê tò tshiú, hō͘ hîsòaⁿ kuah kah tsin līhāi. I ua̍t thâu khòaⁿ hîsòaⁿ khún, in sūnsūn á teh liu tshutkhì. Hit sî, háṳûⁿ piak li̍h, hî thiàutshut tsúibīn, koh tāngtāng siak lo̍hkhì. Liáuāu, i tsi̍t pái koh tsi̍t pái thiàutshut tsúibīn, suijiân hîsòaⁿ itti̍t khoàisok liu tshutkhì, m̄ koh sió tsûn iáusī hō͘ i thua kah kiâⁿ tsin kín; lāulâng mā sī tsi̍t pái koh tsi̍t pái, itti̍t kā hîsòaⁿ giú kah kiōngbeh tn̄g khì. I íking khì ho͘ hî giú tó tī tsûnthâu, bīn ah tī hit phìⁿ pueo͘hó͘ bah téngbīn, oântsoân bô huattō͘ tíntāng.


伊講：「飛烏虎若煮過tsiah食，gōa好leh，m̄ koh，生食實在是有夠pháiⁿ食。後pái出海，絕對ài tsah鹽á是酸橙。」

伊想：我若有頭腦，日時to̍h ē kui工tī船頭潑水koh ho͘ 它pha̍k ta，ánne我to̍h ē有鹽ā。M̄ koh，我是差不多一直到日beh落海ê時tsiah釣tio̍h hit尾飛烏虎。總是，我iáu是欠準備，m̄ koh，我有kā它pō͘ 真爛，而且無感覺péng腹。

東pêng ê天頂開始烏雲密布，伊bat ê天星一粒一粒hua去。伊tsitmá看起來kahná是teh行入一个極大ê雲峽谷；風khah細à。 伊講：「三四工內beh變天ā；êng暗iáu bē，明á載mā bē。老人ah，趁魚平靜koh穩定ê時，tsitmá緊盡量小睏leh。」

伊用正手kā魚線ni̍h ânân，用正pêng ê大腿去抵tiâu正手，koh kā kui身軀ê重量靠tī船頭枋。了後，伊kā肩胛頭ê魚線徙khah kē leh，koh用倒手kā它thèⁿ.leh。

伊想：只要魚線有倒手thèⁿ.leh，我ê正手to̍h ni̍h它ētiâu。正手若是tī睏眠中放鬆，hō͘ 魚線溜去，我ê倒手to̍h ē kā我叫醒。正手真辛苦，m̄ koh，伊食苦慣勢à。我若ētàng睏二十分á是半點鐘mā bē bái。伊仆leh，kui身軀kā魚線夾leh，kā伊所有ê重量lóng押tī正手，就ánne睏去。

伊無夢見獅á，卻是夢見一大陣ê海豬á（porpoise），連綿不斷，tī海裡延伸1316公里。這是in交配ê時tsūn，in ē koânkoân跳入空中，tsiah koh跳tńg去in跳出來ê仝一個水洞。

續落來，伊koh夢見伊tī庄裡，倒tī伊ê眠床頂，北風真透，伊感覺真寒，而且伊ê正手lóng麻去，因為伊用手做枕頭。

了後，伊開始夢見長長ê黃色沙埔，koh看tio̍h第一隻獅á tī天初暗ê時來到hia，後來其他ê獅á mā來ā。船tī hia拋碇，伊kā伊ê下頦靠tī船頭枋，，tī tùi岸頂吹向海洋ê暗時風中，伊teh等看是m̄是iáu有koh khah tsē獅á ē來，心內感覺非常歡喜。 月娘已經早to̍h出來，m̄ koh伊iáu teh睏。魚繼續穩穩á teh拖，kā小船拖入雲中ê pōng孔。

伊正手ê拳頭母忽然去lòng tio̍h伊ê面，hō͘ 伊醒起來，而且魚線tùi正手一直溜出去，手ná像hō͘ 火燒tio̍h hiahni̍h刺痛。伊ê倒手lóng無感覺，所以伊用正手拚命阻擋，m̄ koh魚線iáu是一直溜無停。後來，倒手mā giú tio̍h魚線à，伊身軀倒hiaⁿh弓魚線，所以tsitmá伊ê kha脊phiaⁿ kah倒手mā ná火teh燒；尤其是承受一切giú力ê倒手，hō͘ 魚線割kah真厲害。伊ua̍t頭看魚線綑，in順順á teh溜出去。Hit時，海洋piak裂，魚跳出水面，koh重重siak落去。了後，牠一pái koh一pái跳出水面，雖然魚線一直快速溜出去，m̄ koh小船iáu是hō͘ 牠拖kah行真緊；老人mā是一pái koh一pái，一直kā魚線giú kah kiōngbeh斷去。伊已經去ho͘ 魚giú倒tī船頭，面押tī hit片飛烏虎肉頂面，完全無法度振動。