《老人kah海》

 | | | 轉寄

《老人kah海》_31, Kàu taⁿ i thiàu tsa̍p gōa pái à/到taⁿ牠跳十gōa pái à

作者 Ernest Hemingway, 台譯：宋麗瓊 林俊育 2019.11.17

I siūⁿ, tse to̍h sī lán teh thiaⁿ 候ê sîkhik à, taⁿ lán lâi piàⁿ lah.

I siūⁿ, Tio̍h hō͘ i ūi thua hîsòaⁿ hùtshut tāikè, tio̍h hō͘ i hùtshut tāikè.

I khòaⁿ bē tio̍h hî teh thiàu, kantaⁿ thiaⁿ ē tio̍h háṳûⁿ piak li̍h kah hî tāngtāng siak lo̍h khì ê sî, tsúi phùntsōaⁿ ê siaⁿ. Hîsòaⁿ liutsáu ê soktō͘ giâmtiōng kuah siong i ê siang tshiú, m̄ koh i tsá to̍h tsaiiáⁿ ē ánne, só͘í i tsīnliōng hō͘ hîsòaⁿ kuah kòe tshiú kiat lan ê só͘tsāi, tsīnliōng m ài khì lù tio̍h tshiúsim á sī kuah tio̍h tséngthâu'á.

I siūⁿ, Gín’á nāsī tī tsia, i to̍h ē ēng tsúi kā hîsòaⁿ khún lâm hō͘ tâm. Sī ah, gín'á nā ū lâi to̍h hó à, i nā ū lâi to̍h hó à.

Hîsòaⁿ itti̍t liu tshutkhì, liu tshutkhì, liu tshutkhì, m̄ koh tsitmá soktō͘ khah bān ā; i hō͘ hî múi thua tshutkhì tsi̍t 吋 hîsòaⁿ, lóng tio̍h ài hùtshut tāikè. I íking ētàng tùi tsûnpang kā thâu gia̍h khí·lâi, līkhui hō͘ i ê tshùiphóe ah nōakhì ê hit phìⁿ hî bah. I sing kūi lo̍hkhì, tsiah koh bānbān'á khiā khí·lâi. I iáu teh pàng soh'á, m̄ koh soktō͘ jú lâi jú bān. I sóa tńgkhì i ēng kha thàm ē tio̍h hia ê hîsòaⁿ khún ê só͘tsāi, tsísī ba̍ktsiu khòaⁿ bē tio̍h in. Iáu ū tsin tsē hîsòaⁿ tī hia, tsitmá, hî tio̍h ài koh khah tshutla̍t lâi thua hiahê sin hîsòaⁿ tī tsúi ·nih ê mô͘tshat la̍t.

I siūⁿ, sī ā. Jîtshiáⁿ kàu taⁿ i íking thiàu tsa̍p gōa pái à, i khatsiah lāi ê khùi lông íking koànmóa khongkhì, só͘í i bô huattō͘ koh thiāmlo̍h tshimhái, sí tī góa giú i bē tńglâi ê só͘tsāi. I tsin kín to̍h ē khaisí se̍h kho͘á, góa ài lâi tùihù i. Góa m̄ tsai sī ántsóaⁿ i ē hutjiân kan ánne. Kám sī iaugō hō͘ i bô kò͘ sèⁿmiā, á sī i hō͘ àmsî ê siáⁿmi̍h hehⁿ kiaⁿ tio̍h? Á ·sī i thu̍tjiân king kámkak kiaⁿhiâⁿ? M̄ koh i sī tsi̍t bóe léngtsēng koh ióngtsòng ê hî, hó tshintshiūⁿ siáⁿmi̍h lóng m̄ kiaⁿ, koh hiahni̍h ū tsūsìn. Tse si̍ttsāi sī tsin kîkoài.

I kóng,"lāulâng ah, lí kakī siōng hó sī mài kiaⁿ, ài ū tsūsìn. Lí koh kā i lia̍htiâu ā, m̄ koh lí giú i bē óa lâi. Tsóng sī, tsin kín i to̍h ē puttik put ài se̍h kho͘á à."

Lāulâng ēng tò tshiú kah siang king phāiⁿ hîsòaⁿ, liáuāu uan sin, ēng tsiàⁿ tshiú khat tsúi, sé tiāu liâm tī i ê bīn, íking hông ah nōakhì ê pueo͘hó͘ bah. I tamsim he ē hāi i péngpak, hō͘ i áuthò͘, súnsit théla̍t. Bīn sé tshingkhì liáuāu, i tī tsûnpiⁿ ê tsúi ·nih sé i ê tsiàⁿ tshiú, liáuāu kā tshiú lâu tī iâm tsúi ·nih, tsi̍t bīn tsùsī ji̍t tshut tsìntsêng ê thâutsi̍t tō phú kng. I siūⁿ, i tshaputto sī ǹgtang tsiântsìn, tse piáusī hî thiám à, só͘í sūn háilâu teh kiâⁿ. Tsin kín i to̍h puttik put ē se̍h kho͘á, goán tsintsiàⁿ ê kangtsok to̍h beh khaisí à.

I kó͘kè i ê tsiàⁿ tshiú tsìm tī tsúi ·nih ū kàu kú à, to̍h kā i kiu tńglâi, koh siôngsè kuantshat. I kóng,"khòaⁿ khí·lâi bē bái. Thiàⁿ tùi lâmtsúhàn lâi kóng, bô sǹgsī siáⁿ."

I siósim la̍k tiâu hîsòaⁿ, tsùì mài hō͘ hîsòaⁿ khì kuah tio̍h sin ê khangtshùi, liáuāu tiâutséng singkhu ê tiōngsim, hō͘ i ētàng kā tò tshiú tsìm ji̍p khì tsûn lēnggōa hit pêng ê háitsúi nih.

I kā tò tshiú kóng,"tùi bô lō͘ēng ê lí lâi kóng, lí tútsiah piáuhiān bē bái neh, m̄ koh ū tsi̍t khùn á góa tshōe bô lí thang lâi tàukhatshiú."

I siūⁿ, sī ántsóaⁿ góa m̄ sī thiansing to̍h ū nn̄g ki hó tshiú? Kiámtshái sī góa m̄ tio̍h, bô kā hit ki tshiú hùnliān hósè. M̄ koh, thiⁿ ah, i ū tsin tsē kihōe thang ha̍ksi̍p ā. Tsóng sī, àmsî i ê piáuhiān bē bái, kantaⁿ kiùkin tsi̍t pái. I nā koh kiùkin, hō͘ i khì hō͘ hîsòaⁿ kuahtn̄g hó lah.

伊想：這to̍h是咱teh聽候ê時刻à，taⁿ咱來拚lah。

伊想：Tio̍h hō͘ 牠為拖魚線付出代價，tio̍h hō͘ 牠付出代價。

伊看bē tio̍h魚teh跳，kantaⁿ聽ē tio̍h海洋piak裂kah魚重重siak落去ê時，水噴濺（phùntsōaⁿ）ê聲。魚線溜走ê速度嚴重割傷伊ê雙手，m̄ koh伊早to̍h知影ē ánne，所以伊盡量hō͘ 魚線割過手結lan ê所在，盡量mài去lù tio̍h手心á是割tio̍h指頭á。

伊想：Gín’á若是tī tsia，伊to̍h ē用水kā魚線綑lâm hō͘ tâm。是ah，gín’á若有來to̍h好à，伊若有來to̍h好à。

魚線一直溜出去，溜出去，溜出去，m̄ koh tsitmá速度khah慢ā；伊hō͘ 魚每拖出去一吋魚線，lóng tio̍h ài付出代價。伊已經ētàng tùi船枋kā頭gia̍h起來，離開hō͘ 伊ê嘴phóe押爛去ê hit片魚肉。伊先跪落去，tsiah koh慢慢á khiā起來。伊iáu teh放索á，m̄ koh速度jú來jú慢。伊徙tńg去伊用腳探ē tio̍h hia ê魚線綑ê所在，只是目tsiu看bē tio̍h in。Iáu有真tsē魚線tī hia，tsitmá，魚tio̍h ài koh khah出力來拖hiahê新魚線tī水裡ê摩擦力。

伊想：是ā。而且到taⁿ牠已經跳十gōa pái à，牠kha脊內ê氣囊已經灌滿空氣，所以牠無法度koh沉落深海，死tī我giú牠bētńg來ê所在。牠真緊to̍h ē開始se̍h箍á，我ài來對付牠。我m̄知是án怎牠ē忽然間ánne。Kám是iau餓hō͘ 牠無顧性命，á是牠hō͘ 暗時ê啥物嚇驚tio̍h？Á是牠突然間感覺驚惶？M̄ koh牠是一尾冷靜koh勇壯ê魚，好親像啥物lóng m̄驚，koh hiahni̍h有自信。這實在是真奇怪。

伊講：「老人ah，你kakī siōng好是mài驚，ài有自信。你koh kā牠掠tiâu ā，m̄ koh你giú牠bē óa來。總是，真緊牠to̍h ē不得不ài se̍h箍á à。」

老人用倒手kah雙肩phāiⁿ魚線，了後彎身，用正手khat水，洗掉黏tī伊ê面，已經hông押爛去ê飛烏虎肉。伊擔心he ē害伊péng腹，hō͘ 伊嘔吐，損失體力。面洗清氣了後，伊tī船邊ê水裡洗伊ê正手，了後kā手留tī鹽水裡，一面注視日出tsìn前ê頭一道phú光。伊想：牠差不多是ǹg東前進，這表示魚thiám à，所以順海流teh行。真緊伊to̍h不得不ē se̍h箍á，阮真正ê工作to̍h beh開始à。

伊估計伊ê正手浸tī水裡有夠久à，to̍h kā它kiu tńg來，koh詳細觀察。伊講：「看起來bē bái。痛對男子漢來講，無算是啥。」

伊小心la̍k tiâu魚線，注意mài hō͘ 魚線去割tio̍h新ê空嘴，了後調整身軀ê重心，hō͘ 伊ētàng kā倒手浸入去船另外hit pêng ê海水裡。

伊kā倒手講：「對無路用ê你來講，你tútsiah表現bē bái neh，m̄ koh有一睏á我tshōe無你thang來tàu腳手。」

伊想：是án怎我m̄是天生to̍h有兩支好手？Kiámtshái是我m̄ tio̍h，無kā hit支手訓練好勢。M̄ koh，天ah，它有真tsē機會thang學習ā。總是，暗時它ê表現bē bái，kantaⁿ kiù筋一pái。它若koh kiù筋，hō͘ 它去hō͘ 魚線割斷好lah。