《胡文池牧師kap布農族》

 | | | 轉寄

一雙運動鞋

作者 胡文池 2009.04.12

伊-m̄是猶大，貪財自私，伊是大猷；伊-對家己khiām koh樸實，對上帝慷慨大方。

我tī大甲牧會期間，王大猷長老每tú-tio̍h禮拜日，真早就來到禮拜堂。伊雖穿插不值錢ê烏色粗布衫褲，卻整齊清潔，看會出來是一位樸實、敬虔ê老信徒。伊ê腳上穿插運動鞋，煞無穿襪á。這雙運動鞋kap ta̍k-ê無仝，並m̄是因為伊是當時ê名牌「華盛頓鞋」，有美國總統ê大名，卻是這雙鞋深藏tio̍h王長老偉大ê信仰kap i克己ê作為kap動人ê故事。

七十年前，工業iáu未發達，人人lóng是kui工赤腳不穿鞋。只有極少數富人、孔門弟子、書房老師tsiah穿ē起一雙布鞋。以前ê布鞋，頂面使用好看ê布料，男人用烏色，女人用彩色ê綢緞。鞋底是用數十層粗布，用人工一針一針、密密地縫成一塊硬硬、厚厚ê鞋底。Tsit種開了真長ê人工時間製成ê鞋，m̄-nā價錢貴得驚人，而且無實用，雨天buē-sái穿，緊lah-sap koh緊破。

跋涉遠路ê商人，因為伊經不起冬夏ê冷燒熱，以及腳底磨損ê痛苦，只好買一雙sio̍k ê稻草鞋來穿。

大猷長總是大甲地方有名ê大地主，mā是自耕農，伊雖然好額，to̍h是一位性情溫和、勤勞、khiām ê人。伊常講：「大富由天，小富由勤儉。」以伊ê經濟富有來講，m̄-nā一雙、十雙、甚至百雙千雙鞋，伊mā買得起，奈因伊khiām，謙卑ê天性，加上伊是一般人看做下等ê農人，非士紳顯官，那有膽量，mā m̄敢向老祖宗借膽，tī平時mā穿起布鞋來。

工業發達以了後，橡皮製品紛紛出現，橡皮(台灣人叫伊樹乳)做ê運動鞋mā應運á生，而且借用美國總統華盛頓ê大名為商標。Tsit種鞋是鞋類ê大改革，m̄-nā價錢sio̍k，而且美觀大方，十分受歡迎，一般人叫伊「華盛頓鞋」。

一、華盛頓佳ê美談
一向khiām ê王長老，經不起家人ê慫恿，下定決心，mā順tio̍h流行買來一雙華盛頓鞋，感覺無比欣喜。誰mā m̄-bat想tio̍h，伊買這雙鞋，並m̄是為tio̍h享受，或者提高身份，卻是為tio̍h敬拜上帝之用。所以除非禮拜日m̄敢穿伊。而且由甲南農舍步行到大甲，伊ma7m7-kam坐火車，行路大約一小時ê路，途中必須行經新開墾ê溪底石頭路，伊lóng是赤腳，beh到街市時tsiah洗腳穿起運動鞋。婦人人笑笑á對伊講：「王長老ah!你ê運動鞋為什麼手theh8m7-kam穿neh?」王長老講：「牧師娘，tsit-ê您就m̄知影，溪底石頭凹凸不平，鞋子容易壞，自我出生，造物主就賜hō͘我這雙siōng自然、siōng真實ê『皮鞋』，永遠穿不壞，運動鞋穿破總是ài開錢ah! 」

1934年，大甲實施市區計劃，舊禮拜堂必須拆除。有一工牧師探訪王長老談起tsit件事，王長老十分瞭解會友lóng是貧困者，無力負擔重建新堂ê經費，就答應獨自奉獻一間新禮拜堂。因此出售良田一甲多，全數奉獻為建堂之用，並且ta̍k工帶伊ê次子王守信到工地監工。第二年，完成了一座全島獨一無二ê五層鐘塔禮拜堂，伊kā這座神聖獨有特殊ê新堂獻hō͘了伊所崇敬ê神。

1935年4月，離大甲無遠ê墩á腳發生驚天動地ê大地震，墩á腳禮拜堂全毀，附近ê教會mā lóng嚴重ê損壞，其他ê民房損失koh-khah慘重，惟獨大甲禮拜堂保全完整，一時被稱做奇蹟，大家異口同聲o-ló主!

二、菜脯就是伊ê高麗參
王大猷長老性情溫柔，身軀強壯，忠厚寡言，但有時tsūn mā真幽默。有一pái，我問伊：
「王長老身軀án-ne好，雖然年紀mā bē少，iáu ē-tàng tī田地工作，m̄知有食高麗參?或者食什麼補藥來補身軀無?」
「heh heh!什麼補!」伊笑笑á講「只有家己做ê菜脯lah!什麼補!」

王長老每禮拜比其他會友早到教會，中頓未到飯店食飯菜，lóng是家己帶飯包來食。伊每pái lóng躲到無人ê所在，獨自享受午餐，無歡喜人家看伊食飯。有一pái某會友經過伊身邊，順續偷看伊所食ê飯，tsiah發現伊果然只是食白飯配菜脯(to̍h是蘿葡干)。

王長老tī厝mā愛食菜脯，有一pái伊ê媳婦mā證實講：「家人tī桌頂享受魚肉，伊卻獨自在牆邊食菜脯，伊就是án-ne khiām ê人。」

雖然王長老不注重家己ê衣食，上帝iáu是特別祝福伊，賜伊長壽，享受伊一生快樂ê信仰生活八十七年：á善終歸回天堂。上帝mā祝福王長老子孫，伊ê二個kiáⁿ兒就是王守勇kap王守信。王守勇是眾人lóng知有名ê牧師，tuì日本同志社神學院kap同志社大學畢業，是當時牧師中siōng高學業、siōng有名氣ê牧師。

順續一提---一件siōng奇怪ê事，就是王牧師一連生了八位千金了後tsiah得一公子。相反地，守信一連生了八位公子了後tsiah得一tsa-bó͘-kiáⁿ。

上帝ah!「你ê作為奇妙非凡。」(詩篇一三九：14)

三、另外ê美談
王大猷長老自幼研習漢文，初tī馬鳴埔經商，到壯年時tsiah轉業為農，所以伊雖是農民，無像當時一般農民是一個文盲。伊因老實、寬大；待人接物不kap別人斤斤計較，致使外人認為伊好欺負，傳有口頭語講，「咱去食豆油膏」(音通大猷哥)。

伊做事謹慎不馬虎。初次到禮拜堂聽道時，數個月m̄敢飲用教會ê茶水。因為聽信謠言。認為教會ê茶水是由信徒ê「心肝粉」泡成，會迷惑人。了後來漸漸悟道tsiah決心信主，終身當長老。伊bat開設實費病院，救濟貧苦患者，發揚基督博愛精神。