《胡文池牧師kap布農族》

 | | | 轉寄

平地教會牧會有感

作者 胡文池 2009.05.24

摩西bat命令以色列人民ê後代，每年tio̍h遵守住棚節(申命記十六：13)，就是七日tuà守tī簡陋ê草棚屋，來記念古時in ê祖先tī出埃及時所經過ê苦難。

上帝mā tī差派我到貧苦落了後ê山地傳福音tsìn前，先hō͘我體驗tio̍h種種苦難，以操練我ê身心。 中國賢人bat講：「天將降大任tī斯人也，必先苦其心志，勞其筋骨，餓其體膚，空乏其身．行拂亂其所為；所以動心忍性，增益其所不能。」

傳福音hō͘「萬民」是每一位基督徒對主所受ê大責任。對「高山族」傳福音就是我所受ê大任。主耶穌bat tī曠野受磨練四十工，保羅也bat tī亞拉伯曠野一段時間準備身心(加拉太冊一：18)，á我，煞tī平地四所教會受操練十二年，tsiah前往山地工作。

一、信徒增加多捷徑
我tī平地教會工作十二年，雖然所獲ê果子無tsē，但是我家己所得tio̍h ê子女總共有八個。In lóng是熱心ê基督徒。我有二個男孩，長子khiā起tī美國，是大學教授，tī教會執事。上細漢kiáⁿ tī台灣服務tī教會機構。六個kiáⁿ婿中，大kiáⁿ婿是牧師，其他五位lóng是教會長老，tsa-bó͘-kiáⁿ tī教會中mā lóng有重要ê服事，孫兒們mā lóng不偏離主道，年長ê漸漸參與學習服事。這ē-sái講是上帝bueh補足我tī平地教會工作ê不足。

二十五年前，我tī美國留學時，時常美國人問我：「你有幾個gín-á?」我就答講：「有八個」。In lóng大驚小怪ê講：「hiah-ni̍h tsē ah!」因為in lóng是生一、兩個gín-á就避孕。我講：「tī異邦裡，傳福音得人是非常無容易ê事，不如家己生iáu卡緊。你看，我生了八個，in長大以了後結婚就變成十六個，koh過三十年，in ê子女照án-ne生育就變成一大群了。Tsit種幾何級數ê增多，實在是驚人ê數目ah!你講是m̄是?你一生中，thang由傳道得tio̍h tsiah-ni̍h-tsē人信主mah?」in lóng講：「嗯，講得一點mā無m̄-tio̍h。」講完了，大家lóng哈哈大笑。

反觀台灣教會近年來不增長，原因雖然真tsē，但lóng ē-sái講是教會全體ê責任。由非基督徒入信ê暫時無算，單靠會友ê自然生產率，會友mā會增多tsiah是，可惜多數不冷不熱ê會友，或掛名ê基督徒，m̄-nā不傳福音，甚至mā不好好á引tshuā家己ê子女，suah致使子女離開教會。Tsit點實在需要tī上主面前纖悔認罪。

二、tī平地教會ê磨練
回想我tī平地教會ê種種體驗，其實就是上主對我ê磨練。

Tī猫盂教會遇tio̍h大地震，看tio̍h墩á腳全村覆滅，體驗tio̍h上帝ê能力是何等偉大。

「伊看地，地便震動。」(詩篇一0四：32)

Tī震災了後，所tuà ê斗室小屋，阮夫婦學習了簡單樸素ê sàn-tshiah生活。

Tī頭城kap觀音山ê庄腳小教會mā hō͘我學習偏僻貧乏ê庄腳生活。

雖然大甲教會比較富裕，但是戰爭中，各項物資lóng缺乏，猶原脫離不了khiām koh樸素ê日子。由此可見，我tī平地教會ê服事，lóng是萬軍之主tī磨練小兵，以備將來thang適應山地sàn-tshiah ê生活。

我ê身材天生就修長輕爽，mā m̄-bat患腳痛症。我bat真欣羨肥胖體壯ê身材，朋友卻安慰我講：「你是鐵骨á生，無關係，只要無病就好。」

我是平凡ê傳道人，所牧ê平地教會lóng是庄腳教會，探訪會友tio̍h行路一、二小時遠涉道路。因此我ê腳koh-khah堅強，koh-khah適合tī將來登山傳教之用，這mā是主ê旨意。

我tī頭城mā親眼看tio̍h舊時phah馬煙教會ê所在地變為滄海。這光景hō͘我體認酒親像海洋大湧，會淹信主ê山胞。全能慈愛ê上帝mā無願意拯救掛名ê基督徒。

「凡稱呼我主阿，主阿ê人buē-sái lóng進天國。惟獨遵行我天父旨意ê人才ē-tàng入去。」(馬太福音七：21)