《胡文池牧師kap布農族》

 | | | 轉寄

布農教會ê五旬節

作者 胡文池 2009.07.12

主耶穌升天前，bat kā門徒講，伊bueh差遣聖靈來，伊講：「聖靈降臨tī lín身上，lín就必得tio̍h能力，‥作我ê見證。」(使徒行傳一：8)

聖靈就是一個人人信，以及教會興起ê原動力。二千年前，tī猶太ê五旬節時，聖靈降臨，門徒大有能力，kui-ê基督教就誕生了。布農族ê教會mā有tsit種ê日子bat tī玉里發生。

一、洪水「沖走文字」ê故事
自我深入布農族傳教了後，我發現布農族人無文字，in ê先民傳落來一個故事講：「以前有一條大蛇橫跨塞tuà-tī村莊上力ê溪流口，suah致使山下ê人無水thang食。當時有一隻真大ê毛蟹，看tio̍h tsit種情形大為震怒，就用伊ê大剪刀剪斷這可惡ê大蛇，洪水就氾濫到山下，大家只好避難逃往新高山(玉山)去了。因洪水mā沖走了in全部ê冊(文字)suah致使in無了文字。」(註：tī布農話內底，冊本kap文字是同一句話叫Paitasan)

由這故事thang知，kui-ê布農族人有自尊心，而且對文字抱有深切ê關懷kap羨慕。

一九四七年十一月，我到關山以了後，就致力向布農族人學習並研究布農話。

經過一年ê時間，終其尾制定了十七個羅馬字母，並出版一冊「布農羅馬字母」。然了後我開始教授青年寫讀in家己ê姓名kap話語，in lóng感覺十分驚奇有趣味，並熱心學習。

二、聖靈tī玉里工作
卓溪鄉高井先生是一位真開明ê布農族人，平時對基督教mā表示歡迎。阮/咱計劃tī一九四九年一月廿九日tī玉里教會舉辦基督教講習會，主旨tī教授新舊約聖經kap布農羅馬字，高井先生非常贊成，伊命令各村派人來參加。

當時ê講師除了我本人外，另有駱先春、江天順、陳惠昌等四位牧師，學生真巧ê有十二位(tú親像耶穌ê十二門徒)。

講習ê科目為新舊約聖經故事(用大幅掛圖說明)kap教理kap布農羅馬字，mā教in唱日語o-ló詩kap布農話奮興短歌。講習會共五天，每工課程緊湊，每日並有晨禱kap晚拜。

Tsiah-ê布農族各村代表，初次聽tio̍h用布農話唱歌時，大為驚奇。因為in只tī醉酒時tsiah唱歌，tsit種歌是一種有聲調無歌詞ê kap聲合唱。因此這講習會，大家lóng真熱心ê聽講kap唱歌， In天性純真，聽tio̍h用掛圖所講ê故事，像看tio̍h真實人物仝款，lóng一一相信不疑。

第三工講習會結束ê beh暗á，古風村長劉傳說，伊beh tńg去家鄉傳報福音，伊匆匆地行了。翌晨，果然伊koh再tńg來聽講。Tī最後一工ê「決心會」內底，參加講習ê lóng一個接一個地khiā起來發表動人ê見證，m̄-nā決志信主，而且講回鄉了後決心為主作見證。

劉傳說：「我到tsia來，主要因為聽講這講習會是beh教授布農文字，所以tsiah好奇來參加。現在，我tsiah明白，布農族人需要ê m̄-nā是家己ê文字，koh-khah重要ê是基督ê福音，前日，我實在迫不及待地，先回古風一tsuā，kā這大好ê福音傳hō͘村民聽，此了後，我mā beh koh再到各地傳報這美好ê消息。」

經過五天，in個個lóng受聖靈感動，享受生來m̄-bat聽tio̍h ê天國靈性大宴筵外，iáu享受tio̍h玉里教會贈送ê三桌肉體大餐－mā是tī山地m̄-bat食過ê漢民族藝術口味。

Tī精神上、肉體上，in得tio̍h加倍ê能力，快快樂樂地回鄉去了。Tuì-án-ni，參加講習會ê人tī家己ê村內底熱心傳道，每tú-tio̍h禮拜日mā引tshuā別人到附近平地教會參加禮拜。

三、布農族全部歸主ê異象
為tio̍h beh大舉向布農族傳道起見，我tī一九四九年六月，tī關山舉辦五天ê指導者講習會。

參加者有三十名，lóng是東部熱心ê山地布農族信徒。

講習會最後一堂課就是考試，只考教理kap羅馬字二科。結果，選拔出八名成績優良者，任命為囑託宣道師。

我將in分做四組，每組二人，按照主耶穌派遣使徒ê樣式，分派in到東部kap西部四個縣分，負起責任，到各村播種福音種子。In所播下福音ê種子，tī各地發芽、長大，koh再結子，就án-ne接連落去。

聖靈一直充滿tī tsit件事工上，因此，像大火燒山仝款，tī各地ê布農族，陸續興起教會，建設禮拜堂。

由玉里講習會算起十年了後，to̍h是主後一九五九年，全省布農族教會已經有五十所，信徒有八千八百八十一位之多。二十年了後，to̍h是一九一九年，教會有六十一間，信徒有一萬二千二百二一十四位。各種村莊lóng有教會，有族人ê所在就有基督徒，基督徒佔當時人口總數一半以上。感謝上主ê大恩大能，有布農族khiā起ê所在，就有上帝ê教會。榮光歸主名!阿們。

四、為tio̍h福音ê緣故
昔時來中國傳福音ê外國宣教師，m̄-nā學習中國話，有kuá人甚至穿起中國式衫褲、編長髮、穿布鞋，使用中國姓名。

「入鄉tuè俗」就是表示尊重當地人ê生活方式，mā是表現愛當地所有ê人。

我自從達到關山，beh向高山族傳道ê時日起，就致力學習布農話語。二年了後，我就用布農話講道。Án-ne m̄-nā ē-tàng溝通互相ê感情，進一步thang節省翻譯ê時間，koh-khah thang hō͘ in了解所傳ê信息。

我無穿in ê衫褲，這並m̄是表示我無夠謙卑、不尊重in ê生活方式。Tuì án-ne是因為舊時in無論男女lóng m̄穿內衣、內褲。In ê服飾簡要。男人是穿獸皮或粗麻布衣kap烏色短裙。

Tsit種服裝，就連當地比較開明有智識ê少年人lóng感覺不雅。我thang kap in食仝款ê食物、tuà仝款ê厝。若穿in ê衫褲，反tńg會hō͘ in取笑，suah致使所傳ê福音被輕視。

但是，我深感覺有更改姓名ê必要。所以徵求in ê意見，使用in所贈送ê布農族名字「郝爽」(HoSong)為名。布農族是真有禮貌ê人，對上輩lóng冠帶「Tama」(意to̍h是父老)ê尊稱。所以以後in lóng叫我「Tama Hosong」。這姓名比「胡文池」koh-khah好叫而且koh-khah親熱。

「對軟弱ê人，我就作軟弱ê人，為tio̍h beh得tio̍h軟弱ê人。對怎樣樣ê人，我就作怎樣ê人。無論如何，總是ài救一kuá人。我所作ê一切，lóng是為福音ê緣故，thang hō͘我kap別人同享福音ê好處。」 (哥林多前書九：22－23)