《陳雷文選》

 | | | 轉寄

寫hō͘學生朋友 ê 代誌 19 - 年歲人生

作者 陳雷 2019.11.24

（Siá hō͘ ha̍k-sing pîng-iú ê tāi-tsì 19）（寫hō͘學生朋友 ê 代誌 19）

Nî-huè jîn-sing / 年歲人生

Guá kóng nî-huè lú tsē jîn-sing ê tsu-bī lú kāu lú kam, kám m̄-sī? Tsuè-kīn kap guán khan--ê khìng-tsiok khan-tshiú 50 nî, kám m̄-sī pí 20 tsiu-nî khah kam-tiⁿ, koh-khah ū kám-siū?Tong-jiân jîn-sing ū kam iā-ū khó͘, tshin-tshiūⁿ sit-khì tshin-lâng ê khó͘. Khiok-sī nî-tang luí-tsik, khó͘ ê tsiām-tsiām tām-po̍h--khì, tshun kam-bī ê kì-tî. Ū-sî tām-po̍h-á khó͘ ē hō͘ tiⁿ-bī koh-khah tiⁿ. Guá siūⁿ lán lâng pún-lîng ê sing-lí(physiological）kap sim-lí kò͘-tsō tō-sī án-ne, tui-kiû huaⁿ-hí khuài-lo̍k, phiah-bián khó͘-thàng siong-hāi. Tse tuì lán lâng ê sing-tsûn iú-lī.

我講年歲lú tsē人生 ê 滋味lú kāu lú 甘, 敢m̄是？最近kap 阮牽 ê 慶祝牽手50 年, 敢m̄是比20 週年khah甘khah tiⁿ, koh-khah 有感受？當然人生有甘也有苦, 親像失去親人 ê 苦. 卻是年冬累積, 苦--ê 漸漸淡薄--去, tshun甘味 ê 記持. 有時淡薄 á苦ē hō͘ tiⁿ味koh-khah tiⁿ. 我想咱人本能 ê 生理（physiological）kap 心理構造tō是按呢, 追求歡喜快樂, 避免苦痛傷害. Tse 對咱人 ê 生存有利.

Lâng-kóng nî-huè lú tuā, sî-kan kuè-liáu lú kín. Khak-si̍t ū-iáⁿ. Uī-siáⁿ-mi̍h ē án-ne, guá bô tap-àn. Sī-m̄-sī nî-huè tuā--lâi, té-kî ê kì-ik tsiām-tsiām thè-huà, tíng lé-pài, tíng kó-gue̍h huat-sing ê tāi-tsì ē kì--tit-ê lú-tsió, só͘-í thâu-khak lāi kám-kak sî-kan khah té, kuè-liáu khah kín.

人講年歲lú 大, 時間過了lú 緊. 確實有影. 為啥物ē按呢, 我無答案. 是m̄是年歲大--來, té期 ê 記憶漸漸退化, 頂禮拜, 頂個月發生 ê 代誌ē記--得-ê lú少, 所以頭殼內感覺時間khah té, 過了khah 緊.

Lán lâng lāu--lâi, tsū-jiân sin-thé kok-tsióng kong-lîng tsiām-tsiām lāu-tò-kiu, phuê-hu jiâu--khì, kut-thâu phàⁿ--khì, khin-ni-khuh pó͘--khì, kì-tî bái--khì, kiâⁿ-lō͘ bān--khì…..put-kò tsia-ê piàn-huà long-ū tshun-kiu ê lūn-sìng. Pí-jū lāu-lâng kiâⁿ-lō͘ bān--khì, I nā ta̍k-ji̍t jīn-tsin liān kiâⁿ, tō-ē lú kiâⁿ lú kín. I nā kui-ji̍t tsē í, lú bô kiâⁿ tō lú bē-kiâⁿ. Lán lâng só͘-ū sing-lí ê kong-lîng long-ū tsit-khuán ê lūn-sìng, lú iōng lú kiông, lú bô-iōng lú jio̍k, kì-tî, náu-li̍k, thé-li̍k, sim-lí…..tsióng-tsióng hong-bīn. Hó-pí sī lí ē-tàng ke hi̍k-tsiá kiám sing-lí ê nî-huè. Guá kin-nî 80 huè, 6 tang tsîng sim-tsōng pēⁿ tī-liâu hó liáu, kè-siok ta̍k-ji̍t tsáu ūn-tōng. 2 tang tsîng kuâⁿ--lâng ū tsi̍t-pái sik-guā lîng-hā 27 tō͘, guá tsáu 50 hun-tsing. Tse sī tsū-jiân sù lán sin-thé ê lūn-sìng.

咱人老--來, 自然身體各種功能漸漸老倒kiu. 皮膚jiâu--去, 骨頭phàⁿ--去, khin-ni-khuk pó͘--去, 記持 bái--去, 行路慢--去….. 不過tsia ê 變化攏有tshun-kiu ê lūn性. 比如老人行路慢--去, 伊若ta̍k日認真訓練行, tō ē lú行lú緊. 伊若規日坐椅, lú無行tō lú bē行. 咱人所有生理 ê 功能攏有這款lūn性, lú用tō強, lú無用tō 弱, 記持, 腦力, 體力, 心理…..種種方面. 好比是你 ē-tàng 加或者減生理 ê年歲. 我今年80 歲, 6 冬前心臟病治療好了. 繼續ta̍k日走運動. 2 冬前寒--人有一擺室外零下27 度, 我走50分鐘. Tse 是自然賜hō͘咱身體 ê lūn性.

Siàu-liân pîng-iú iáu m̄-bián khó-lū tsia-ê būn-tê. Put-kò guá tsin-ū sìn-sim kā lín sîng-kóng, khak-si̍t lín lāu--lâi ē-tàng ū ua̍h-li̍k ê sin-thé, kam-bī ê jîn-sing, m̄-kú tse su-iàu tē-kiû ê tuā khuân-kíng an-tīng, bô tsin-kín piàn bái--khì.

少年朋友iáu m̄免考慮tsia ê 問題. 不過我真有信心kā 恁先講, 確實恁老--來iáu ē-tàng有活力 ê 身體, 甘味 ê 人生, m̄-kú tse需要地球ê大環境安定, 無真緊變真bái--去.

（Tsok-tsiá tsù:tshiáⁿ iōng pe̍h-uē-jī) （作者注：請用白話字）