《陳雷文選》

 | | | 轉寄

寫hō͘學生朋友 ê 代誌 28 - 台灣路

作者 陳雷 2019.12.08

（Siá hō͘ ha̍k-sing pîng-iú ê tāi-tsì 28）（寫hō͘學生朋友 ê 代誌 28）

Tâi-uân lō͘ / 台灣路

Kuè--lâi ê gō͘-tsa̍p nî, tuì Tâi-uân íng-hióng siōng-tuā ê ing-kai sī tē-kiû ê khuân-kíng piàn-huà. Put-kò tse m̄-sī lán kin-á-ji̍t thó-lūn ê būn-tê. Lán beh kóng--ê sī Tâi-uân ê tsìng-tī khuân-kíng.

過--來 ê 50 年, 對台灣影響上大 ê應該是地球 ê 環境變化.不過tse m̄是咱今 á日討論 ê 問題. 咱beh講 ê 是台灣 ê 政治環境.

Lán ū sì-pah tang pī si̍t-bîn ê li̍k-sú, tsin-tsai Tâi-uân lâng ê an-tsuân kap tsū-iû su-iàu to̍k-li̍p tsú-kuân ê kok-ka tsiah ē-tàng pó-tsìng. Tsit-tiâu tō-sī lán beh kiâⁿ ê Tâi-uân lō͘. Tān-sī tsit-tiâu lō͘ m̄-sī e̍h-tsiⁿ ê kok-ka tsú-gī. In-uī lán ê tē-lí sī hái-iûⁿ, lán ê hái sì-piⁿ khai-hòng, lâng-lâng lâi-óng, lán iā-sī kok-tsè tsú-gī tsiá. Kap tsuân-sè-kài ê kok-ka pîng-tíng lâi-óng. Kok-tsè tsú-gī hō͘ lán tsìn-pō͘, hù-jū, an-tsuân. Só͘-í Tâi-uân lō͘ ū siang-tsuā, tsú-kuân kok-ka kap ha̍p-tsok ê kok-tsè tsú-gī.

咱有400 冬被殖民 ê 歷史, 真知台灣人 ê 安全kap 自由需要獨立主權 ê 國家tsiah 會當保証. 這條tō是咱beh行 ê 台灣路. 但是這條路 m̄是e̍h-tsiⁿ ê 國家主義. 因為咱 ê 地理是海洋, 咱 ê海四邊開放,人人來往, 咱也是自然 ê國際主義者. Kap 全世界 ê 國家平等來往. 國際主義hō͘咱進步,富裕,安全. 所以台灣路有雙tsuā, 主權國家kap合作 ê 國際主義.

Siōng-kài huán-tuì Tâi-uân lō͘ ê sī Tiong-kok kiōng-sán-tóng tsìng-kuân. In beh tshim-tsiàm Tâi-uân, khòng-tsè Tâi-uân. In ê iá-sim sī tsuè-āu khòng-tsè tsuân sè-kài ê lâng kap tsu-guân, tshin-tshiūⁿ in tsit-má khòng-tsè tsuân Tiong-kok kâng-khuán. Tse sī bo̍k-tsîng Tâi-uân siōng-tuā ê huî-hiám, tē-it ti̍k-jîn. Lán it-tīng tio̍h khuàⁿ-tsin in ê pún-tsit, tsiah ē-tàng pó-hō͘ ka-tī.

上蓋反對台灣路ê是中國共產黨政權. In beh侵佔台灣, 控制台灣. In ê野心是最後控制全世界ê人kap資源, 親像in tsit-má控制全中國仝款. Tse是目前台灣上大ê危險, 第一敵人. 咱一定tio̍h看真in ê本質, tsiah ē-tàng保護家己.

Tâi-uân lō͘ kham-kham-khik-khik, iōng lán ê tì-huī, gán-kong, kuat-sim ná-kiâⁿ ná khui-lō͘. Tse sī lán to̍k-to̍k tsi̍t-tiâu hó koh tn̂g ê tshut-lō͘.

台灣路坎坎坷坷, 用咱ê智慧, 眼光, 決心ná行ná開路. Tse是咱獨獨一條好koh tn̂g ê出路.
（Tsok-tsiá tsù:tshiáⁿ-iōng pe̍h-uē-jī)（作者注：請用白話字）