《陳雷文選》

 | | | 轉寄

寫hō͘學生朋友ê代誌 36 - 我ê某阿tiⁿ

作者 陳雷 2019.12.22

（Siá hō͘ ha̍k-sing pîng-iú ê tāi-tsì 36）（寫hō͘學生朋友ê代誌 36）

Guá ê bó͘ A-tiⁿ / 我ê某阿tiⁿ

Guá ê bó͘ kiò-tsò A-tiⁿ, khuàⁿ--khí-lâi jī-tsa̍p thóng huè. Lō͘--nih khuàⁿ-tio̍h guá hn̄g-hn̄g tō siám, m̄ kap guá kong-uē. Guá siūⁿ I m̄-ài hō͘ lâng tsai-iáⁿ, guá sī I ê ang. Tsa-bó͘ gín-á sioh bīn-phuê kiaⁿ-kiàn-siàu ê kuan-hē. In tau ê lâng mā kâng-khuán, kóng I iáu-buē tsò--lâng. In kui-ke lóng tsin kò͘-khiam. Put-kò tāi-ke lóng tsai-iáⁿ, guá sī I ê ang. Bē-hî ê Kiok--a bat kā guá kóng:「 Tiong--a, A-tiⁿ kóng I iáu-buē tsò--lâng.」Guá kā I suat-bîng, A-tiⁿ kiaⁿ-kiàn-siàu, pháiⁿ-sè kóng. Guá ū khì má-tsó͘-king thiu-tshiam, mā-sī kóng “thian-sing tsù-tiāⁿ”. In lóng tsai-iáⁿ--lah….Ah-bô, Kiok--a thài-ē tng-bīn kā guá kóng:「 Bô-tshái tsit-ê hó-ang….」M̄-sī kóng guá sī teh kóng siáⁿ-lâng?Hāi keh-piah bē-bah ê A-puî tshiò kah uai-io. In lóng tsai-iáⁿ--lah….

我ê某叫做阿tiⁿ, 看--起-來20 thóng歲. 路--裡看 tio̍h我 hn̄g-hn̄g tō 閃, m̄ kap我講話. 我想伊m̄愛hō͘人知影, 我是伊 ê 翁. 查某gín-á惜面皮驚見笑 ê 關係. In tau ê人mā仝款, 講伊iáu-buē做--人. In規家攏真顧謙. 不過大家攏知影, 我是伊ê翁. 賣魚ê菊--a bat kā我講：「忠--a, 阿tiⁿ 講伊iáu未做--人.」我kā伊說明, 阿 tiⁿ驚見笑, pháiⁿ勢講. 我有去媽祖宮抽籤, mā是講 “天生注定”. In攏知影--lah…Ah無, 菊--a thài-ē當面kā我講 ：「無彩一个好翁…..」M̄是講我是teh講啥人？害隔壁賣肉ê阿肥笑kah歪腰. In攏知影--lah….

M̄-kú kiàn uì in-tau mn̂g-kháu kuè, khuàⁿ-tio̍h guá tō tsáu khì bih. Lí khuàⁿ ū-lâng tsiah pì-sù? Ū tsi̍t-hāng guá bē siáⁿ liáu-kái, I kap pa̍t-lâng lóng bē seⁿ-hūn, lâng-lâng hó, ū kóng ū tshiò….Uâ!hit ê tshiò, bûn-bûn-á tshiò, ….hue-sim ê tiⁿ-bi̍t tshin-tshiūⁿ I ê miâ. Lâng-lâng khuàⁿ--tio̍h, bē-su phang phīⁿ-tio̍h bi̍t, òⁿ-òⁿ kiò, tòng-bē-tiâu pue uá--khì.

M̄-kú見uì in tau門口過, 看tio̍h我tō走入去bih. 你看有人tsiah pì-sù? 有一項我bē啥瞭解, 伊kap別人攏 bē生份, 人人好, 有講有笑…. Uâ!hit个笑, 文文 á 笑…..花心ê tiⁿ蜜親像伊ê名. 人人看--tio̍h, bē輸蜂phīⁿ tio̍h蜜, òⁿ-òⁿ叫, 擋bē-tiâu飛uá--去.

Kin-á-ji̍t tī tshài-tshī-á gū--tio̍h, ná kiâⁿ ná tsia̍p-tsia̍p ua̍t-thâu kuè--lâi kā guá khuàⁿ. Tn̂g thâu-tsang, pe̍h-saⁿ pe̍h-kûn tshap âng-hue, buah ian-tsi. Uâ!hit-tuì ba̍k-tsiu, ài koh kiaⁿ, kiaⁿ koh ài, lú kiâⁿ lú kín…..Guá tsin-tsai, I ê sim-lāi, kiaⁿ ê āu-bīn tsa̍h-tio̍h ài, ài ê thâu-tsîng tō-sī kiaⁿ. I ê sim-kuaⁿ tah-té kìⁿ-tsin sī tuì guá ū-sim, tsa-bó͘ gín-á pháiⁿ-sè piáu-sī. Kin-á-ji̍t I tsai-iáⁿ guá ē khì tshài-tshī á, tiau-kang tsng suí-suí, thâu-tsi̍t-pái buah ian-tsi hō͘ guá khuàⁿ. I ê sim-ì guá thài-ē m̄-tsai?Uâ!hit tuì ba̍k-tsiu….tsa̍h tī āu-bīn, khuàⁿ bē-tio̍h--ê tō-sī ài. Ū-tsi̍t-kang I ē tsai-iáⁿ guá guā-hó, bô-tàng koh tshuē--a. Má-tsó͘-pô kóng ‘thian-sing tsù-tiāⁿ’. Kiok--a mā kóng ‘bô-tshái tsi̍t-ê hó-ang…..’.

今á日tī菜市á遇--tio̍h, ná行ná捷捷ua̍t 頭過--來 kā我看. Tn̂g頭鬃, 白衫白裙tshap紅花, 抹胭脂. Uâ!hit對目睭, 愛koh驚, 驚koh愛, lú行lú緊..…… 我真知, 伊ê心內, 驚ê後面遮tio̍h愛, 愛ê頭前tō是驚. 伊ê心肝 tah底見真是對我有心, 查某gín-á pháiⁿ勢表示 . 今á日伊知影我ē去菜市á, 刁工裝 suí-suí, 頭一擺抹胭脂hō͘我看. 伊ê心意我thài-ē m̄知？Uâ!hit對目睭….遮tī後面, 看 bē tio̍h--ê tō是愛. 有一工伊ē知影我外好, 無tàng koh tshuē--a. 媽祖婆講 ‘天生注定’. 菊--a mā講 ‘無彩一个好翁…..’.

Kin-á-ji̍t, Kiok--a kā guá kóng, A-tiⁿ beh kè--lâng-a. In bú-a tshī-á bé tuā-hî tuā-bah, in tau pān hí-sū. Tsiong-kî-bé-lâi…..tsiong-kî-bué--lâi…. tsiong-kî-bué--lâi….guá tsá tō kóng--a, má-tsó͘-pô mā kóng, thian-sing tsù-tiāⁿ…..kín-lâi-khì tsún-pī…..tsián thâu-tsang, se-bí-loh, sin phuê-ê…..Guá kā Kiok--a huan-hù, it-tīng lâi hō͘ guá kap A-tiⁿ tshiáⁿ. Kiok--a, A-puî tshiò kah uai-io, kui-ê tshài-tshī á lóng teh tshiò…..「 M̄-sī lí--lah！……M̄-sī lí--lah！….」

今á日, 菊--a kā我講, 阿tiⁿ beh 嫁--人-a. In母--a市á買大魚大肉, in tau辦喜事. 終其尾--來…..終其尾--來….我早 tō講--a, 媽祖婆mā講, 天生注定….. 緊來去準備, ...剪頭鬃, se-bí-loh, 新皮鞋….我kā菊--a吩咐, 一定來hō͘我kap阿tiⁿ請. 菊--a, 阿肥笑kah歪腰, 規个菜市á攏teh笑…..「 M̄是你--lah！…. M̄是你--lah！…..」

（Tsok-tsiá tsù:tshiáⁿ-iōng pe̍h-uē-jī)（作者注：請用白話字）