《綠色短評》

 | | | 轉寄

感謝美國國防授權法案對台灣ê幫助！

作者 李南衡, TsoânTâijī/全台字 by Tsng Hūiphêng 2023.01.22

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　　 Lí Lâmhêng

Kámsiā Bíkok Kokhông Siūkoân Huatàn tùi Tâioân ê pangtsō͘!

　　 Bíkok sîkan 2022 nî tsa̍pjīgue̍h tshepeh, Bíkok Tsiònggīīⁿ í 350 tiuⁿ tsitshî phiò tùi 80 tiuⁿ hoántùi phiò, thongkòe 2023 tsâinî Kokhông Siūkoân Huatàn (NDAA). Tsa̍pjīgue̍h tsa̍pla̍k àm, Bíkok tshamgīīⁿ í 83 phiò tsànsêng tùi 11 phiò hoántùi, thongkòe 2023 tsâitsèng nîtō͘ Kokhông Siūkoân Huatàn. Tsitê huatàn thongkòe ê tsónggia̍h sī bíkim 8,580 ik (iok sin tâipè 26 tiāu 5250 ik). Tsitê huatàn nn̄g tiâu tsîⁿ kah Tâioân ū kuanhē, huatàn siūkoân Bíkok Kokbūīⁿ tī 2023 nî tsì 2027 nî 5 nî tsâitsèng nîtō͘ lāi, thêkiong hō͘ Tâioân bíkim 100 ik (iok sin tâipè 3,064 ik ) bián hêng ê kunsū oântsō͘, múi nî ke̍k ke thêkiong bíkim 20 ik (iok sin tâipè 612.8 ik); lēnggōa tsi̍t tiâu sī siūkoân thêkiong Tâioân bíkim 20 ik (iok sin tâipè 612.8 ik) "gōakok kunsū iôngtsu" (FMF) ti̍ttsiap tāikhoán. Hêngkhoán kîhān sī 12 nî. Lēnggōa iáu ētàng puah ēng siōng tsē bíkim 10 ik ê hôngūi bu̍ttsu á·.sī ho̍kbū hō͘ Tâioân, koh te̍ktēng Tâioân tsoh tsúiàu hui Pakiok bêngkok, ētàng iusian the̍h tio̍h Bíkok "tshiau gia̍h hôngūi bu̍ttsu".

Bíkok sîkan 2022 nî tsa̍pjīgue̍h jīsaⁿ, Bíkok tsóngthóng Pàiting tshiamsú Kokhông Siūkoân Huatàn, tûliáu kunoân ígōa, huatàn mā siūkoân Bíkok ūi Tâioân phah tsō "khue̍k èngpiàn kunpī khò͘" (regional contingency stockpile), ētàng iusian the̍h tio̍h Bíkok tshiau gia̍h hôngūi bu̍ttsu, jîtshiáⁿ iautshiáⁿ Tâioân háikun tshamka 2024 nî khoân Thàipêngiûⁿ kunsū iánsi̍p. Khah khósioh·ê sī, 5 nî thêkiong hō͘ Tâioân bíkim 100 ik ( iok sin tâipè 3,064 ik kho͘ ) bián hêng ê kunsū oântsō͘ tsit tiâu, iáu tī Bíkok Puah khoán Úigoânhōe pêngko͘.

Tsa̍pjīgue̍h jīsì, Tiongkok Koktâipān huatgiânjîn Tsu Hōngliân tap kìtsiá mn̄g piáusī, Tâioân sī Tiongkok ê Tâioân. Tâioân būntê sûnjiân sio̍k Tiongkok lāitsèng. Bíkok "2023 nî Kokhông Siūkoân Huatàn"goânpún sī Bíkok koklāihuat, kongjiân tī Tâioân būntê téngbīn kóngtang kóngsai, sīmtsì pauhâm thêkiong hō͘ Tiongkok Tâioân tēkhu "kunsū iôngtsu" kah bē búkhì hō͘ Tâioân téng lāṳông. Giâmtiōng ûihoán tsi̍tê Tiongkok goântsik kah TiongBí saⁿê Liânha̍p Kongpò kuitēng, giâmtiōng ûipōe Bíhong tī Tâioân būntê téngbīn tùi Tionghong só͘ tsoh ê giâmsiok tsèngtī sênglo̍k, giâmtiōng kansia̍p Tiongkok lāitsèng, hiòng "Tâito̍k" hunlia̍t sèle̍k huattshut giâmtiōng tshògō͘ sìn hō, hō͘ Tâihái hôpêng úntēng tsōsêng giâmtiōng súnhāi. Goán tùi tse piáusī kiônglia̍t putboán kah kiankuat hoántùi.

Lán mā beh tùi Tiongkok thêtshut giâmtiōng khònggī, Tâihái hôpêng úntēng piàntsoh giâmtiōng súnhāi·ê sī Tiongkok jiákhí·ê, Tiongkok ta̍k kang phài kunki kunlām lâi Tâioân ê hângkhong sikpia̍tkhu kah háikiap tiongsòaⁿ pianiân jiáuloān. Tâioân goânpún sī tsi̍tê pótó, bôhoân bôló. Puthēng tshut tsi̍tê pháiⁿ tshùpiⁿ, tsi̍t ji̍t kàu àm huah kóng bô beh hòngkhì búle̍k phah Tâioân. Tiongkok í Tâioân bētàng píphēng·tit ê kiôngtōa kunle̍k uihia̍p Tâioân, Tâioân tsiah tio̍h khai tsiok tsē tsîⁿ bé búkhì, puttikí kā kakī bútsong tsoh tsi̍t lia̍p "tshìti tó", Bíkok tsiah tio̍h kunsū oântsō͘ Tâioân. Kîsi̍t Tiongkok khah iàukín·ê sī Búhàn hìiām tng teh tōa liûhêng, kā Tiongkok lâng ê kiānkhong seⁿmiā kò͘ hō͘ hó, hō͘ puthēng kòesin ê lâng ētàng kínkín hóe tsòng. Tâioân sī Tâioân lâng ê Tâioân, kah Tiongkok oântsoân bô kuanhē, mài tī hia iaupátshá. Tâioân kah Bíkok ê iúhó kuanhē, bián lí Tiongkok koán! (230102)


Pe̍h-ōe-jī-pán/白話字版


《 Le̍k-sik toán-phêng 》　　　　 Lí Lâm-hêng

Kám-siā Bí-kok Kok-hông Siū-koân Huat-àn tùi Tâi-oân ê pang-tsō͘!

　　 Bí-kok sî-kan 2022 nî tsa̍p-jī-gue̍h tshe-peh, Bí-kok Tsiòng-gī-īⁿ í 350 tiuⁿ tsi-tshî phiò tùi 80 tiuⁿ hoán-tùi phiò, thong-kòe 2023 tsâi-nî Kok-hông Siū-koân Huat-àn (NDAA). Tsa̍p-jī-gue̍h tsa̍p-la̍k àm, Bí-kok tsham-gī-īⁿ í 83 phiò tsàn-sêng tùi 11 phiò hoán-tùi, thong-kòe 2023 tsâi-tsèng nî-tō͘ Kok-hông Siū-koân Huat-àn. Tsit-ê huat-àn thong-kòe ê tsóng-gia̍h sī bí-kim 8,580 ik (iok sin tâi-pè 26 tiāu 5250 ik). Tsit-ê huat-àn nn̄g tiâu tsîⁿ kah Tâi-oân ū kuan-hē, huat-àn siū-koân Bí-kok Kok-bū-īⁿ tī 2023 nî tsì 2027 nî 5 nî tsâi-tsèng nî-tō͘ lāi, thê-kiong hō͘ Tâi-oân bí-kim 100 ik (iok sin tâi-pè 3,064 ik ) bián hêng ê kun-sū oân-tsō͘, múi nî ke̍k ke thê-kiong bí-kim 20 ik (iok sin tâi-pè 612.8 ik); lēng-gōa tsi̍t tiâu sī siū-koân thê-kiong Tâi-oân bí-kim 20 ik (iok sin tâi-pè 612.8 ik) "gōa-kok kun-sū iông-tsu" (FMF) ti̍t-tsiap tāi-khoán. Hêng-khoán kî-hān sī 12 nî. Lēng-gōa iáu ē-tàng puah ēng siōng tsē bí-kim 10 ik ê hông-ūi bu̍t-tsu á-·.sī ho̍k-bū hō͘ Tâi-oân, koh te̍k-tēng Tâi-oân tsoh tsú-iàu hui Pak-iok bêng-kok, ē-tàng iu-sian the̍h tio̍h Bí-kok "tshiau gia̍h hông-ūi bu̍t-tsu".

Bí-kok sî-kan 2022 nî tsa̍p-jī-gue̍h jī-saⁿ, Bí-kok tsóng-thóng Pài-ting tshiam-sú Kok-hông Siū-koân Huat-àn, tû-liáu kun-oân í-gōa, huat-àn mā siū-koân Bí-kok ūi Tâi-oân phah tsō "khu-e̍k èng-piàn kun-pī khò͘" (regional contingency stockpile), ē-tàng iu-sian the̍h tio̍h Bí-kok tshiau gia̍h hông-ūi bu̍t-tsu, jî-tshiáⁿ iau-tshiáⁿ Tâi-oân hái-kun tsham-ka 2024 nî khoân Thài-pêng-iûⁿ kun-sū ián-si̍p. Khah khó-sioh-·ê sī, 5 nî thê-kiong hō͘ Tâi-oân bí-kim 100 ik ( iok sin tâi-pè 3,064 ik kho͘ ) bián hêng ê kun-sū oân-tsō͘ tsit tiâu, iáu tī Bí-kok Puah- khoán Úi-goân-hōe pêng-ko͘.

Tsa̍p-jī-gue̍h jī-sì, Tiong-kok Kok-tâi-pān huat-giân-jîn Tsu Hōng-liân tap kì-tsiá mn̄g piáu-sī, Tâi-oân sī Tiong-kok ê Tâi-oân. Tâi-oân būn-tê sûn-jiân sio̍k Tiong-kok lāi-tsèng. Bí-kok "2023 nî Kok-hông Siū-koân Huat-àn"goân-pún sī Bí-kok kok-lāi-huat, kong-jiân tī Tâi-oân būn-tê téng-bīn kóng-tang kóng-sai, sīm-tsì pau-hâm thê-kiong hō͘ Tiong-kok Tâi-oân tē-khu "kun-sū iông-tsu" kah bē bú-khì hō͘ Tâi-oân téng lāi-iông. Giâm-tiōng ûi-hoán tsi̍t-ê Tiong-kok goân-tsik kah Tiong-Bí saⁿ-ê Liân-ha̍p Kong-pò kui-tēng, giâm-tiōng ûi-pōe Bí-hong tī Tâi-oân būn-tê téng-bīn tùi Tiong-hong só͘ tsoh ê giâm-siok tsèng-tī sêng-lo̍k, giâm-tiōng kan-sia̍p Tiong-kok lāi-tsèng, hiòng "Tâi-to̍k" hun-lia̍t sè-le̍k huat-tshut giâm-tiōng tshò-gō͘ sìn hō, hō͘ Tâi-hái hô-pêng ún-tēng tsō-sêng giâm-tiōng sún-hāi. Goán tùi tse piáu-sī kiông-lia̍t put-boán kah kian-kuat hoán-tùi.

Lán mā beh tùi Tiong-kok thê-tshut giâm-tiōng khòng-gī, Tâi-hái hô-pêng ún-tēng piàn-tsoh giâm-tiōng sún-hāi-·ê sī Tiong-kok jiá-khí-·ê, Tiong-kok ta̍k kang phài kun-ki kun-lām lâi Tâi-oân ê hâng-khong sik-pia̍t-khu kah hái-kiap tiong-sòaⁿ pian-iân jiáu-loān. Tâi-oân goân-pún sī tsi̍t-ê pó-tó, bô-hoân bô-ló. Put-hēng tshut tsi̍t-ê pháiⁿ tshù-piⁿ, tsi̍t ji̍t kàu àm huah kóng bô beh hòng-khì bú-le̍k phah Tâi-oân. Tiong-kok í Tâi-oân bē-tàng pí-phēng-·tit ê kiông-tōa kun-le̍k ui-hia̍p Tâi-oân, Tâi-oân tsiah tio̍h khai tsiok tsē tsîⁿ bé bú-khì, put-tik-í kā ka-kī bú-tsong tsoh tsi̍t lia̍p "tshì-ti tó", Bí-kok tsiah tio̍h kun-sū oân-tsō͘ Tâi-oân. Kî-si̍t Tiong-kok khah iàu-kín-·ê sī Bú-hàn hì-iām tng teh tōa liû-hêng, kā Tiong-kok lâng ê kiān-khong seⁿ-miā kò͘ hō͘ hó, hō͘ put-hēng kòe-sin ê lâng ē-tàng kín-kín hóe tsòng. Tâi-oân sī Tâi-oân lâng ê Tâi-oân, kah Tiong-kok oân-tsoân bô kuan-hē, mài tī hia iau-pá-tshá. Tâi-oân kah Bí-kok ê iú-hó kuan-hē, bián lí Tiong-kok koán! (230102)


《綠色短評》　　　　李南衡

感謝美國國防授權法案對台灣ê幫助！

　　美國時間2022年十二月初八，美國眾議院以350張支持票對80張反對票，通過2023財年國防授權法案（NDAA）。十二月十六暗，美國參議院以83票贊成對11票反對，通過2023財政年度國防授權法案。Tsit-ê法案通過ê總額是美金8,580億（約新台幣26兆5250億）。Tsit-ê法案兩條錢kah台灣有關係：法案授權美國國務院tī 2023年至2027年5年財政年度內，提供hō͘台灣美金100億（約新台幣3,064億）免還ê軍事援助，每年極加提供美金20億（約新台幣612.8億）；另外一條是授權提供台灣美金20億美（約新台幣612.8億）「外國軍事融資」（FMF）直接貸款。還款期限是12年。另外猶ē-tàng撥用上tsē美金10億ê防衛物資抑是服務hō͘台灣，koh特定台灣作主要非北約盟國，ē-tàng優先the̍h tio̍h美國「超額防衛物資」。

美國時間2022年十二月二三，美國總統拜登簽署國防授權法案，除了軍援以外，法案mā授權美國為台灣打造「區域應變軍備庫」（regional contingency stockpile），ē-tàng優先the̍h tio̍h美國超額防衛物資，而且邀請台灣海軍參加2024年環太平洋軍事演習。Khah可惜ê是，5年提供hō͘台灣美金100億（約新台幣3,064億元）免還ê軍事援助tsit條，猶tī美國撥款委員會評估。

十二月二四，中國國台辦發言人朱鳳蓮答記者問表示，台灣是中國ê台灣。台灣問題純然屬中國內政。美國「2023年國防授權法案」原本是美國國內法，公然tī台灣問題頂面講東講西，甚至包含提供hō͘中國台灣地區「軍事融資」kah賣武器hō͘台灣等內容。嚴重違反一個中國原則kah中美三個聯合公報規定，嚴重違背美方tī台灣問題頂面對中方所作ê嚴肅政治承諾，嚴重干涉中國內政，向「台獨」分裂勢力發出嚴重錯誤信號，hō͘台海和平穩定造成嚴重損害。阮對tse表示強烈不滿kah堅決反對。

咱mā beh對中國提出嚴重抗議，台海和平穩定變作嚴重損害ê是中國惹起ê，中國逐工派軍機軍艦來台灣ê航空識別區kah海峽中線邊緣擾亂。台灣原本是一個寶島、無煩無惱。不幸出一個pháiⁿ厝邊，一日到暗喝講無beh放棄武力拍台灣。中國以台灣bē-tàng比並得ê強大軍力威脅台灣，台灣才tio̍h開足tsē錢買武器，不得已kā家己武裝作一粒「刺豬島」，美國才tio̍h軍事援助台灣。其實中國khah要緊ê是武漢肺炎當teh大流行，kā中國人ê健康生命顧hō͘好，hō͘不幸過身ê人ē-tàng緊緊火葬。台灣是台灣人ê台灣，kah中國完全無關係，mài tīhia枵飽吵。台灣kah美國ê友好關係，免你中國管！(230102)