《綠色短評》

 | | | 轉寄

中國開國門放毒出去，ē hông驚！

作者 李南衡, TsoânTâijī/全台字 by Tsng Hūiphêng 2023.01.29

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tiongkok khui kokmn̂g pàng to̍k tshutkhì, ē hông kiaⁿ!

　　 Kòikhì tshing gōa kang Tiongkok tùi tsoânkiû kuaiⁿ tiāu piankéng, Tiongkok lâng tsosiūtio̍h hongsó, bētàng tshutkok ê khó͘lān. Tiongkok tsènghú suanpò͘ ùi 2023 nî tsiaⁿgue̍h tshepeh khí, tsèngsik khàihòng piankéng, tsin tsē Tiongkok lâng huaⁿhí ēsái tshutkok. Tānsī kantāⁿ thiaⁿtio̍h tsitê pàng to̍k khì gōakok ê siausit, hō͘ tsoân sèkài kokkok sînking peⁿ ânân, tsìtsió ū 21 kok siosòa siattēng "piankéng koántsè tshòsi", beh hôngtsí tsó͘tòng Búhàn hìiām piànītsu ji̍ptshim. Tsa̍pjīgue̍h jītshit, Tiongkok gōakaupō͘ kóng, Tiongkok tsènghú itti̍t lóng sī í "khoha̍k hônge̍k", kok ok tùi sinhêng kuantsōng pēⁿ (Búhàn hìiām) pēⁿto̍k hônge̍k tshòsi mā ingkai "ēng khoha̍k tsingtsún goântsik","tú hó tio̍h hó, bô ingkai kòethâu", énghióng jînoân ê tsèngsiông ónglâi.

　　 Sèkài kokkok ná ē hiah kíntiuⁿ? inūi tsūtsiông 2020 nî tshunthiⁿ, Búhàn hìiām ùi Tiongkok pàng tshutkhì tsoân sèkài liáuāu, ùi siōng khítsho͘ ê Alpha piàn sin tsoh Beta, itti̍t piàn sin, kàu Delta tsoân sèkài tōa kíntiuⁿ, siōng sin ê Omicron kok tsióng piànītsu kohkhah līhāi. Hó katsài tsit tiongkan ū kok tsióng e̍kbiâu giánkiù sêngkong, tsù tsi̍t tsiam bô kàu la̍t, tsù nn̄g tsiam tsù saⁿ tsiam tsù sì tsiam. Itgue̍h, lán tsènghú kó͘lē lāutōalâng kín koh ka tsù "tshù sètāi e̍kbiâu", kiaⁿ nn̄g, saⁿgue̍h Omicron piàntsióng pēⁿto̍k ē tōa liûhêng. Ánne tsiah jīntsin hônge̍k, tsoân sèkài kàu 2022 nî tsa̍pitgue̍h tshetshit ûitsí, ū 6.37 ik lâng khaktsín, 660 bān lâng síbông. Tiongkok khah te̍kpia̍t, kiantshî tshing lêng, hong siâⁿ, tsū jīnūi Tiongkok génghuat tshut lâi ê e̍kbiâu sèkàṳt·ê, sūsi̍t siōng kàu Delta tio̍h bô i huat ah, mài kóng lō͘bóe ê Omicron kok tsióng piànītsu. Jîtshiáⁿ tsù e̍kbiâu ê pílu̍t mā siuⁿ kē, tsin tsē lâng khaktsín liáu mā bô hóhó tīliâu, tìsú kok tsióng pēⁿto̍k ê piànītsu hō͘siong énghióng sánsing sin ê pēⁿto̍k, kasiōng Tiongkok e̍ktsêng oântsoân sit khòng ê sî hutjiânkan khàihòng, oântsoân bô phòethò ê tshòsi, kok tōa to͘tshī ê pēⁿīⁿ kiptsín hoāntsiá piak móa, puthēng síbông ê lâng tsē kah hóetsòngtiûⁿ bē hù sio. Tiongkok koklāi tng teh tōa liûhêng ê sîtsūn, hutjiânkan khàihòng Tiongkok lâng tshutkok, sèkài kokkok ná ē bē kiaⁿ?

　　 Tsintsē kokka kuitēng ùi Tiongkok pue·lâi ê lúkheh, tī tingki tsìntsêng tio̍h thêkiong Sinkoàn kiámtshik imsèng tsèngbêng. Ū ê kokka te̍kpia̍t kuitēng ùi Pakkiaⁿ, Siōnghái lâi ê lúkheh lo̍h huiki tio̍h koh tsò PCR tsháikiám. Siōng līhāi·ê sī Bíkok kah Tikkok, tsátsá tī 2022 nî tsa̍pjīgue̍h tsa̍pgō͘, tsa̍pla̍k, siosòa thêngtsí Tiongkok lâng ê tshiamtsèng, tn̄g tiāu goânthâu, m̄tsai kiámtsió kúi bān Tiongkok lâng khì in kok pàng to̍k, si̍ttsāi ū kàu khiáu. Itgue̍h tshetsa̍p, Ji̍tpún kah Hânkok mā kuattēng tsiāmsî thêngtsí Tiongkok lâng khì in nn̄g kok ê tshiamtsèng, Tiongkok gōakaupō͘ sûisî hoánèng, thêngtsí Ji̍tpún lâng kah Hânkok lâng khì Tiongkok ê tshiamtsèng. Khah tshùbī·ê sī, Bíkok kah Tikkok suanpò͘ thêngtsí Tiongkok lâng tshiamtsèng ê sî, nátshiūⁿ bô thiaⁿtio̍h Tiongkok hng· tsi̍tsiaⁿ. Kah Tiongkok itlia̍pit ê Huitsiu kokka Morocco kuitēng ùi itgue̍h tshesaⁿ khaisí kìmtsí só͘ū Tiongkok lâi ê panki kànglo̍h, siōng béng·ê sī Tiongkok ê hiaⁿtī kok Pak Tiâusián, itgue̍h tsheit khaisí kìmtsí Tiongkok lâng ji̍pkéng. Lóng bô thiaⁿ Tiongkok kóng ántsóaⁿ.

Sèkài kokkok tùi Tiongkok lúkheh tsháitshú giâmkeh kiámtshik tshòsi, Tiongkok mē kóng sī "khîsī sèng hāntsè", tānsī sèkài ōesing tso͘tsit ti̍tpeh kóng m̄ sī khîsī, sī inūi Tiongkok e̍ktsêng sìnsik bô thàubêng, ē hông kiaⁿ. (230113)


Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

Tiong-kok khui kok-mn̂g pàng to̍k tshut-khì, ē hông kiaⁿ!

　　 Kòe-khì tshing gōa kang Tiong-kok tùi tsoân-kiû kuaiⁿ tiāu pian-kéng, Tiong-kok lâng tso-siū-tio̍h hong-só, bē-tàng tshut-kok ê khó͘-lān. Tiong-kok tsèng-hú suan-pò͘ ùi 2023 nî tsiaⁿ-gue̍h tshe-peh khí, tsèng-sik khài-hòng pian-kéng, tsin tsē Tiong-kok lâng huaⁿ-hí ē-sái tshut-kok. Tān-sī kan-tāⁿ thiaⁿ-tio̍h tsit-ê pàng to̍k khì gōa-kok ê siau-sit, hō͘ tsoân sè-kài kok-kok sîn-king peⁿ ân-ân, tsì-tsió ū 21 kok sio-sòa siat-tēng "pian-kéng koán-tsè tshò-si", beh hông-tsí tsó͘-tòng Bú-hàn hì-iām piàn-ī-tsu ji̍p-tshim. Tsa̍p-jī-gue̍h jī-tshit, Tiong-kok gōa-kau-pō͘ kóng, Tiong-kok tsèng-hú it-ti̍t lóng sī í "kho-ha̍k hông-e̍k", kok -ok tùi sin-hêng kuan-tsōng pēⁿ (Bú-hàn hì-iām) pēⁿ-to̍k hông-e̍k tshò-si mā ing-kai "ēng kho-ha̍k tsing-tsún goân-tsik","tú hó tio̍h hó, bô ing-kai kòe-thâu", éng-hióng jîn-oân ê tsèng-siông óng-lâi.

　　 Sè-kài kok-kok ná ē hiah kín-tiuⁿ? in-ūi tsū-tsiông 2020 nî tshun-thiⁿ, Bú-hàn hì-iām ùi Tiong-kok pàng tshut-khì tsoân sè-kài liáu-āu, ùi siōng khí-tsho͘ ê Alpha piàn sin tsoh Beta, it-ti̍t piàn sin, kàu Delta tsoân sè-kài tōa kín-tiuⁿ, siōng sin ê Omicron kok tsióng piàn-ī-tsu koh-khah lī-hāi. Hó ka-tsài tsit tiong-kan ū kok tsióng e̍k-biâu gián-kiù sêng-kong, tsù tsi̍t tsiam bô kàu la̍t, tsù nn̄g tsiam tsù saⁿ tsiam tsù sì tsiam. It-gue̍h, lán tsèng-hú kó͘-lē lāu-tōa-lâng kín koh ka tsù "tshù sè-tāi e̍k-biâu", kiaⁿ nn̄g, saⁿ-gue̍h Omicron piàn-tsióng pēⁿ-to̍k ē tōa liû-hêng. Án-ne tsiah jīn-tsin hông-e̍k, tsoân sè-kài kàu 2022 nî tsa̍p-it-gue̍h tshe-tshit ûi-tsí, ū 6.37 ik lâng khak-tsín, 660 bān lâng sí-bông. Tiong-kok khah te̍k-pia̍t, kian-tshî tshing lêng, hong siâⁿ, tsū jīn-ūi Tiong-kok géng huat tshut-lâi ê e̍k-biâu sè-kài-it-·ê, sū-si̍t siōng kàu Delta tio̍h bô i huat ah, mài kóng lō͘-bóe ê Omicron kok tsióng piàn-ī-tsu. Jî-tshiáⁿ tsù e̍k-biâu ê pí-lu̍t mā siuⁿ kē, tsin tsē lâng khak-tsín liáu mā bô hó-hó tī-liâu, tì-sú kok tsióng pēⁿ-to̍k ê piàn-ī-tsu hō͘-siong éng-hióng sán-sing sin ê pēⁿ-to̍k, ka-siōng Tiong-kok e̍k-tsêng oân-tsoân sit khòng ê sî hut-jiân-kan khài-hòng, oân-tsoân bô phòe-thò ê tshò-si, kok tōa to͘-tshī ê pēⁿ-īⁿ kip-tsín hoān-tsiá piak móa, put-hēng sí-bông ê lâng tsē kah hóe-tsòng-tiûⁿ bē hù sio. Tiong-kok kok-lāi tng teh tōa liû-hêng ê sî-tsūn, hut-jiân-kan khài-hòng Tiong-kok lâng tshut-kok, sè-kài kok-kok ná ē bē kiaⁿ?

　　 Tsin-tsē kok-ka kui-tēng ùi Tiong-kok pue-·lâi ê lú-kheh, tī ting-ki tsìn-tsêng tio̍h thê-kiong Sin-koàn kiám-tshik im-sèng tsèng-bêng. Ū ê kok-ka te̍k-pia̍t kui-tēng ùi Pak-kiaⁿ, Siōng-hái lâi ê lú-kheh lo̍h hui-ki tio̍h koh tsò PCR tshái-kiám. Siōng lī-hāi-·ê sī Bí-kok kah Tik-kok, tsá-tsá tī 2022 nî tsa̍p-jī-gue̍h tsa̍p-gō͘, tsa̍p-la̍k, sio-sòa thêng-tsí Tiong-kok lâng ê tshiam-tsèng, tn̄g tiāu goân-thâu, m̄-tsai kiám-tsió kúi bān Tiong-kok lâng khì in kok pàng to̍k, si̍t-tsāi ū kàu khiáu. It-gue̍h tshe-tsa̍p, Ji̍t-pún kah Hân-kok mā kuat-tēng tsiām-sî thêng-tsí Tiong-kok lâng khì in nn̄g kok ê tshiam-tsèng, Tiong-kok gōa-kau-pō͘ sûi-sî hoán-èng, thêng-tsí Ji̍t-pún lâng kah Hân-kok lâng khì Tiong-kok ê tshiam-tsèng. Khah tshù-bī-·ê sī, Bí-kok kah Tik-kok suan-pò͘ thêng-tsí Tiong-kok lâng tshiam-tsèng ê sî, ná-tshiūⁿ bô thiaⁿ-tio̍h Tiong-kok hng-· tsi̍t-siaⁿ. Kah Tiong-kok it-lia̍p-it ê Hui-tsiu kok-ka Morocco kui-tēng ùi it-gue̍h tshe-saⁿ khai-sí kìm-tsí só͘-ū Tiong-kok lâi ê pan-ki kàng-lo̍h, siōng béng-·ê sī Tiong-kok ê hiaⁿ-tī kok Pak Tiâu-sián, it-gue̍h tshe-it khai-sí kìm-tsí Tiong-kok lâng ji̍p-kéng. Lóng bô thiaⁿ Tiong-kok kóng án-tsóaⁿ.

Sè-kài kok-kok tùi Tiong-kok lú-kheh tshái-tshú giâm-keh kiám-tshik tshò-si, Tiong-kok mē kóng sī "khî-sī sèng hān-tsè", tān-sī sè-kài ōe-sing tso͘-tsit ti̍t-peh kóng m̄ sī khî-sī, sī in-ūi Tiong-kok e̍k-tsêng sìn-sik bô thàu-bêng, ē hông kiaⁿ. (230113)



　　過去千外工中國對全球關掉邊境，中國人遭受tio̍h封鎖、bē-tàng出國ê苦難。中國政府宣布ùi 2023年正月初八起，正式開放邊境，真tsē中國人歡喜ē-sái出國。但是kan-tāⁿ聽tio̍h tsit-ê放毒去外國ê消息，hō͘全世界各國神經繃ân-ân，至少有21國相續設定「邊境管制措施」，beh防止阻擋武漢肺炎變異株入侵。十二月二七，中國外交部講，中國政府一直lóng是以「科學防疫」，各國對新型冠狀病（武漢肺炎）病毒防疫措施mā應該「用科學精準原則」，「抵好tio̍h好，無應該過頭」，影響人員ê正常往來。

　　世界各國ná ē hiah緊張？因為自從2020年春天，武漢肺炎ùi中國放出去全世界了後，ùi上起初ê Alpha變身作Beta，一直變身，到Delta全世界大緊張，上新ê Omicron各種變異株koh-khah厲害。好ka-tsài tsit中間有各種疫苗研究成功，注一針無夠力，注兩針注三針注四針。一月，咱政府鼓勵老大人緊koh加注「次世代疫苗」，驚二、三月Omicron變種病毒ē 大流行。Án-ne tsiah認真防疫，全世界到2022年十一月初七為止，有6.37億人確診、660萬人死亡。中國khah特別，堅持清零、封城，自認為中國研發出來ê疫苗世界一-·ê，事實上到Delta tio̍h無伊法ah，mài講路尾ê Omicron各種變異株。而且注疫苗ê比率mā siuⁿ低，真tsē人確診了mā無好好治療，致使各種病毒ê變異株互相影響產生新ê病毒，加上中國內疫情完全失控ê時忽然間開放，完全無配套ê措施，各大都市ê病院急診患者爆滿，不幸死亡ê人tsē kah火葬場bē赴燒。中國國內當teh大流行ê時陣，忽然間開放中國人出國，世界各國ná ē bē驚？

　　真tsē國家規定ùi中國飛來ê旅客，tī登機進前tio̍h提供新冠檢測陰性證明。有ê國家特別規定ùi北京、上海來ê旅客落飛機tio̍h koh做PCR採檢。上厲害-·ê是美國kah德國，早早tī 2022年十二月十五、十六，相續停止中國人ê簽證，斷掉源頭，m̄知減少幾萬中國人去in國放毒，實在有夠巧。一月初十，日本kah韓國mā決定暫時停止中國人去in兩國ê簽證，中國外交部隨時反應，停止日本人kah韓國人去中國ê簽證。Khah趣味-·ê是，美國kah德國宣布停止中國人簽證ê時，ná-tshiūⁿ無聽tio̍h中國hng一聲。Kah中國一粒一ê非洲國家Morocco規定ùi 一月初三開始禁止所有中國來ê班機降落，上猛-·ê是中國ê兄弟國北朝鮮，一月初一開始禁止中國人入境。Lóng無聽中國講án-tsóaⁿ。

世界各國對中國旅客採取嚴格檢測措施，中國罵講是「歧視性限制」，但是世界衛生組織直剖講m̄是歧視，是因為中國疫情訊息無透明，ē hông驚。 (230113)