《綠色短評》

 | | | 轉寄

中國有夠bē見笑！

作者 李南衡, TsoânTâijī/全台字 by Tsng Hūiphêng 2023.02.26



Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tiongkok ūkàu bē kiànsiàu!

　　 Jīgue̍h tshela̍k thàutsá 4 tiám 17 hun tsìniong tī Thó͘níkî lâmpō͘ kah Sūlīa piankài ê só͘tsāi, huatsing kuibô͘ 7.8 tshiau kiôngtōa tētāng, tshimtō͘ kanta 17.9 konglí, hiān tsai ū kúi tshing lâng síbông kah siūsiong, kasiōng îtsìn bô thêng, siongsìn sísiong jînsò͘ ē itti̍t tsēngka, siūⁿkhí 1999 nî 921 tōa tētāng ê sî, Thó͘níkî tī tēit sîkan phài kiùtshiau tūi lâi Tâioân thêkiong oântsō͘, lán kok Siauhôngsú sûisî thàukòe Gōakaupō͘ liânhē, khaktēng beh phài "Tâioân koktsè sokiù tūi" tsiânóng Thó͘níkî kiùoān, tēit the pái 40 lâng, 3 tsiah sokiùkhián kah tōa phue sokiù khìkū, Sokiùtūi iû gōakau pō͘tiúⁿ Gô͘ Tsiausiat, lāitsèng pō͘tiúⁿ Lîm Iūtshiong siūkî liáuāu, tshela̍k àm tah tsa̍p tiám 30 hun panki tshuthuat. Tējī the phài khián 90 lâng, 2 tsiah sokiùkhián kah tōa phue sokiù khìkū, iliâu io̍hphín, sokiùtūi iû Hêngtsèng īⁿtíⁿ Tân Kiànjîn siūkî liáuāu tī jīgue̍h tshetshit tshuthuat.

　　 Tēit the 40 lâng sokiùtūi tī Jīgue̍h tshepeh tiongtàu tio̍h kàu tāngtsaikhu, kah Bíkok, Czets, Pholân téng kok tsòhóe tsiphêng sokiù hêngtōng, m̄nā Bíkok CNN te̍kpia̍t pòtō, Ingkok BBC IG tah bûn hongbīn siòngphìⁿ tio̍h sī giâ kokkî ê Tâioân sokiùtūi. Téngbīn siá kóng, tētāng liáuāu, ùi sèkài kok só͘tsāi lâi Thó͘níkî kah Sūlīa ê kok kok sokiùtūi.. Liânha̍pkok mā kā lánkok sokiùtūi tsèngsik lia̍t tī kuaⁿhong bāngtsām, piomiâ sī "Tâioân (Taiwan) sokiùtūi".

　　 Sàng unloán khì Thó͘níkî, Tâioânlâng kā kok tsióng tsīntsài bu̍ttsu sàng kàu Thó͘níkî tsùTâi pānsūtshù Lāiô͘ tshngkhò͘ íking tsē kah móa·tshutlâi, pānsūtshù kóaⁿkín huah thêng. Thó͘níkî mûithé tōa phiⁿ pòtō "Tâioân bô bē kìtit 1999 nî 921 tōa tētāng ê sî, Thó͘níkî ê pangbâng", jîtshiáⁿ tōatōa oló Tshòa Ingbûn tsóngthóng kah tsētsē ê hêngtsèng siútiúⁿ kuankhoán siān kí. Ōesing Hoklī Pō͘ Jīgue̍h 15 kong pò͘, khaihòng tsíntsai tsuanhō͘ lúikè thóngkè kàu 14 ēpo͘ 5 tiám ûitsí, íking ū tsóngkè kuankhoán 13 bān 8,696 pit, sintâipè 6 ik 8,224 bān gōa kho͘.

　　 Kok kok kiùlântūi siosòa thiatthè, Iāitsèngpō͘ Siauhôngsú mā kuattēng sokiùtūi thiatlī. Ūitio̍h kèsio̍k hia̍ptsō͘ Thô͘ kok siūtsai bîntsiòng, kah ūitio̍h bīlâi khólêng tshàngtsûn ê tsìntsai tsò tsúnpī, Tâioân sokiùtūi tī Jīgue̍h tsa̍psì thiat tshut tsaikhu tsêng, kā só͘ tòalâi ê 4 tùn sokiù tsongpī khìtsâi, tsēngsàng hō͘ Thô͘ kok sokiùtūi (AKUT), tôngsî kàutō, tsítō súiōng honghuat; Tâioân sokiùtūi ītēng ē tī Jīgue̍h tsa̍pgō͘ hôikok.

　　 Tsin·ê, Tâioân ētàng pangbâng （TAIWAN CAN HELP）

　　 Tiongkok tiāntsú mûithé "Bîpua̍h" thau ēng Tâioân sokiùtūi tshuthuat tsêng ê siòngphìⁿ, siá kóng, Thó͘níkî tētāng, Tiongkok Tâioân tūi tshōa thâu tshuthuat! Tiongkok Tâioân tēkhu tēit phue phài 40 miâ te̍kso͘ tūioân kah saⁿ tsiah kiùoān káu, Jīgue̍h tshela̍k àm tshuthuat tsiânóng Thó͘níkî tētāng tsaikhu. Siongkuan hūtsikjîn piáusī, Tâioân tī 921 tētāng ê sî, Thó͘níkî kiùoântūi sī siōng tsá kàuūi ê koktsè kiùoântūi. Tsit piàn Thó͘níkî ū tsailān, goán Tâioân lâi tàu siokāng.

Tâioân sī Tâioân, Tiongkok sī Tiongkok, kóng siáⁿmi̍h"Tiongkok Tâioân tūi". Phúi! Phúi! Phúi! Tiongkok si̍ttsāi ūkàu bē kiànsiàu! (230217))


Pe̍h-ōe-jī-pán/白話字版


《 Le̍k-sik toán-phêng 》 Lí Lâm-hêng

Tiong-kok ū-kàu bē kiàn-siàu!

　　 Jī-gue̍h tshe-la̍k thàu-tsá 4 tiám 17 hun tsìn-iong tī Thó͘-ní-kî lâm-pō͘ kah Sū-lī-a pian-kài ê só͘-tsāi, huat-sing kui-bô͘ 7.8 tshiau kiông-tōa tē-tāng, tshim-tō͘ kan-ta 17.9 kong-lí, hiān tsai ū kúi tshing lâng sí-bông kah siū-siong, ka-siōng î-tsìn bô thêng, siong-sìn sí-siong jîn-sò͘ ē it-ti̍t tsēng-ka, siūⁿ-khí 1999 nî 921 tōa tē-tāng ê sî, Thó͘-ní-kî tī tē-it sî-kan phài kiù-tshiau -tūi lâi Tâi-oân thê-kiong oân-tsō͘, lán kok Siau-hông-sú sûi-sî thàu-kòe Gōa-kau-pō͘ liân-hē, khak-tēng beh phài "Tâi-oân kok-tsè so-kiù tūi" tsiân-óng Thó͘-ní-kî kiù-oān, tē-it -the pái 40 lâng, 3 tsiah so-kiù-khián kah tōa phue so-kiù khì-kū, So-kiù-tūi iû gōa-kau pō͘-tiúⁿ Gô͘ Tsiau-siat, lāi-tsèng pō͘-tiúⁿ Lîm Iū-tshiong siū-kî liáu-āu, tshe-la̍k àm tah tsa̍p tiám 30 hun pan-ki tshut-huat. Tē-jī the phài khián 90 lâng, 2 tsiah so-kiù-khián kah tōa phue so-kiù khì-kū, i-liâu io̍h-phín, so-kiù-tūi iû Hêng-tsèng īⁿ-tíⁿ Tân Kiàn-jîn siū-kî liáu-āu tī jī-gue̍h tshe-tshit tshut-huat.

　　 Tē-it the 40 lâng so-kiù-tūi tī Jī-gue̍h tshe-peh tiong-tàu tio̍h kàu tāng-tsai-khu, kah Bí-kok, Czets, Pho-lân téng kok tsò-hóe tsip-hêng so-kiù hêng-tōng, m̄-nā Bí-kok CNN te̍k-pia̍t pò-tō, Ing-kok BBC IG tah bûn hong-bīn siòng-phìⁿ tio̍h sī giâ kok-kî ê Tâi-oân so-kiù-tūi. Téng-bīn siá kóng, tē-tāng liáu-āu, ùi sè-kài kok só͘-tsāi lâi Thó͘-ní-kî kah Sū-lī-a ê kok kok so-kiù-tūi.. Liân-ha̍p-kok mā kā lán-kok so-kiù-tūi tsèng-sik lia̍t tī kuaⁿ-hong bāng-tsām, pio-miâ sī "Tâi-oân (Taiwan) so-kiù-tūi".

　　 Sàng un-loán khì Thó͘-ní-kî, Tâi-oân-lâng kā kok tsióng tsīn-tsài bu̍t-tsu sàng kàu Thó͘-ní-kî tsù-Tâi pān-sū-tshù Lāi-ô͘ tshng-khò͘ í-king tsē kah móa-·tshut-lâi, pān-sū-tshù kóaⁿ-kín huah thêng. Thó͘-ní-kî mûi-thé tōa phiⁿ pò-tō "Tâi-oân bô bē kì-tit 1999 nî 921 tōa tē-tāng ê sî, Thó͘-ní-kî ê pang-bâng", jî-tshiáⁿ tōa-tōa o-ló Tshòa Ing-bûn tsóng-thóng kah tsē-tsē ê hêng-tsèng siú-tiúⁿ kuan-khoán siān kí. Ōe-sing Hok-lī Pō͘ Jī-gue̍h 15 kong pò͘, khai-hòng tsín-tsai tsuan-hō͘ lúi-kè thóng-kè kàu 14 ē-po͘ 5 tiám ûi-tsí, í-king ū tsóng-kè kuan-khoán 13 bān 8,696 pit, sin-tâi-pè 6 ik 8,224 bān gōa kho͘.

　　 Kok kok kiù-lân-tūi sio-sòa thiat-thè, Iāi-tsèng-pō͘ Siau-hông-sú mā kuat-tēng so-kiù-tūi thiat-lī. Ūi-tio̍h kè-sio̍k hia̍p-tsō͘ Thô͘ kok siū-tsai bîn-tsiòng, kah ūi-tio̍h bī-lâi khó-lêng tshàng-tsûn ê tsìn-tsai tsò tsún-pī, Tâi-oân so-kiù-tūi tī Jī-gue̍h tsa̍p-sì thiat tshut tsai-khu tsêng, kā só͘ tòa-lâi ê 4 tùn so-kiù tsong-pī khì-tsâi, tsēng-sàng hō͘ Thô͘ kok so-kiù-tūi (AKUT), tông-sî kàu-tō, tsí-tō sú-iōng hong-huat; Tâi-oân so-kiù-tūi ī-tēng ē tī Jī-gue̍h tsa̍p-gō͘ hôe-kok.

　　 Tsin-·ê, Tâi-oân ē-tàng pang-bâng （TAIWAN CAN HELP）

　　 Tiong-kok tiān-tsú mûi-thé "Bî-pua̍h" thau ēng Tâi-oân so-kiù-tūi tshut-huat tsêng ê siòng-phìⁿ, siá kóng, Thó͘-ní-kî tē-tāng, Tiong-kok Tâi-oân tūi tshōa thâu tshut-huat! Tiong-kok Tâi-oân tē-khu tē-it phue phài 40 miâ te̍k-so͘ tūi-oân kah saⁿ tsiah kiù-oān káu, Jī-gue̍h tshe-la̍k àm tshut-huat tsiân-óng Thó͘-ní-kî tē-tāng tsai-khu. Siong-kuan hū-tsik-jîn piáu-sī, Tâi-oân tī 921 tē-tāng ê sî, Thó͘-ní-kî kiù-oân-tūi sī siōng tsá kàu-ūi ê kok-tsè kiù-oân-tūi. Tsit piàn Thó͘-ní-kî ū tsai-lān, goán Tâi-oân lâi tàu sio-kāng.

Tâi-oân sī Tâi-oân, Tiong-kok sī Tiong-kok, kóng siáⁿ-mi̍h"Tiong-kok Tâi-oân tūi". Phúi! Phúi! Phúi! Tiong-kok si̍t-tsāi ū-kàu bē kiàn-siàu! (230217))




　　二月初六透早4點17分震央tī土耳其南部kah敍利亞邊界ê所在，發生規模7.8超強大地動，深度kan-ta17.9公里，現知有幾千人死亡kah受傷，加上餘震無停，相信死傷人數會一直增加，想起1999年921大地動ê時，土耳其tī第一時間派遣救搜隊來台灣提供援助，咱國消防署隨時透過外交部連繫，確定beh派遣「台灣國際搜救隊」前往土耳其救援，第一梯40人、3隻搜救犬kah大批搜救器具，搜救隊由外交部長吳釗燮、內政部長林右昌授旗了後，初六暗搭十點30分班機出發。第二梯派遣90人、2隻搜救犬kah大批搜救器具、醫療藥品，搜救隊由行政院長陳建仁授旗了後tī二月初七出發。

　　第一梯40人搜救隊tī 二月初八中晝tio̍h到重災區，kah美國、捷克、波蘭等國做夥執行搜救行動，m̄-nā美國CNN特別報導，英國BBC IG貼文封面相片tio̍h是giâ國旗ê台灣搜救隊。頂面寫講：地動了後，ùi世界各所在來土耳其kah敍利亞ê各國搜救隊.。聯合國mā kā咱國搜救隊正式列tī官方網站，標名是「台灣（Taiwan）搜救隊」。

　　送溫暖去土耳其，台灣人kā各種賑災物資送到土耳其駐台辦事處內湖倉庫已經tsē kah滿出來，辦事處趕緊喝停。土耳其媒體大篇報導「台灣無bē記得1999年921大地動ê時，土耳其ê幫忙」，而且大大o-ló蔡英文總統kahtsētsēê行政首長捐款善舉。衛生福利部二月15公布，開放賑災專戶累計統計到14下晡5點為止，已經有總計捐款13萬8,696筆、新台幣6億8,224萬外元。

　　各國救難隊相續撤退，內政部消防署mā決定搜救隊撤離。為tio̍h繼續協助土國受災民眾，kah為tio̍h未來可能潛存ê震災做準備，台灣搜救隊tī二月十四撤出災區前，kā所帶來ê4噸搜救裝備器材，贈送hō͘土國搜救隊（AKUT），同時教導、指導使用方法；台灣搜救隊預定會tī二月十五回國。

　　真ê，台灣會tàng幫忙（TAIWAN CAN HELP）

　　中國電子媒體「微博」偷用台灣搜救隊出發前ê相片，寫講：土耳其地動，中國台灣隊tshōa頭出發！中國台灣地區第一批次40名特搜隊員kah三隻救援狗，二月初六暗出發前往土耳其地動災區。相關負責人表示，台灣tī 921地動ê時，土耳其救援隊是siōng早到位ê國際救援隊。Tsit遍土耳其有災難，阮台灣來鬥相仝。

台灣是台灣，中國是中國，講啥物「中國台灣隊」。Phúi！Phúi！Phúi！中國實在有夠bē見笑！ (230217))