《綠色短評》

 | | | 轉寄

中國國民黨眾人soān！

作者 李南衡, TsoânTâijī/全台字 by Tsng Hūiphêng 2023.03.05

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

Tiongkok Kokbîntóng tsèng lâng soān!

　　Hônghái tángsūtiúⁿ Kueh Tâibêng tsòikīn pióthài ū siūⁿ beh koh tńgkhì Tiongkok Kokbîntóng tsham soán tsóngthóng, Jīgue̍h tsa̍pla̍k, tsêng li̍púi Tshòa Tsènggoân tī bīntsheh téngbīn tshiàng siaⁿ,"Tiongkok Kokbîntóng m̄ sī kongkiōng piānsó͘, suiàu ê sî tshiong ji̍pkhì pàng tsi̍t pû jiō, pàng liáu koh hiâm piānsó͘ tshàu, līkhui ê sî koh phùi tsi̍t kô͘ thâm, tán kàu lâng kā piānsó͘ piàⁿ sàu tshingkhì, i jīnûi kakī tsin tōabóe, koh tsáu tò tńglâi ngē beh koh pàng tsi̍t pû jiō."suijiân Tshòa Tsènggoân ùi thâu kàu bóe lóng bô kiò miâ kiò sèⁿ, tānsī ta̍kê mā lóng tsaiiáⁿ i sī teh kóng Kueh Tâibêng.

　　 Tâioân ōe pàng jiō ū lâng kóng tsoh"soān jiō", Tâioân ū tsi̍t kù sio̍kgí ōe kóng,"gíná lâng pàng jiō soān kòe khe, lāulâng pàng jiō ti̍h tio̍h ê."lēnggōa tsit jī"soān"jī ū sî mā hông the̍h lâi tsoh tsiok siūkhì mē lâng ê ìsù. Tshiūⁿkóng ū lâng tsò huisiông m̄tio̍hê tāitsì, tio̍h ū khólêng ínkhí tsin tsē lâng kā mē, itpuaⁿ sī kóng"tsèng lâng soān".

　　2005 nî saⁿgue̍h tsa̍psì, Tiongkok " Jîntāihōe siôngbū úigoânhōe" thongkòe "hoán hunlia̍t kokka huat", kâng tsi̍t ji̍t singhāu si̍tsi. Tiongkok beh tsètēng siáⁿmi̍h huatlu̍t, beh tsètēng kúi tshing tiâu lóng sī in tau ê tāitsì. Būntê sī tsitê huatlu̍t tēit tiâu tio̍hkóng, ūitio̍h hoántùi kah attsè "Tâito̍k" hunlia̍t sèle̍k hunlia̍t kokka, tshioktsìn tsó͘kok hôpêng thóngit, îhō͘ Tâioân háikiap tēkhu hôpêng úntēng, îhō͘ kokka tsúkoân kah léngthó͘ oântséng, îhō͘ Tionghôa bîntso̍k kinpún līik, kinkì hiànhuat, tsètèng pún huat. Tējī tiâu kóng, sèkài siōng tsíū tsi̍tê Tiongkok, tāilio̍k kah Tâioân kâng sio̍k tsi̍tê Tiongkok, Tiongkok ê tsúkoân kah léngthó͘ oântséng put iông hunkuah. Îhō͘ kok ketsú koân kah léngthó͘ oântséng sī paukuat Tâioân tôngpau tsāilāi ê tsoân Tiongkok jînbîn ê kiōngtông gībū.

　　 tsintsiàⁿ sī khíiútshúlí! saⁿgue̍h jīla̍k,"Saⁿjīla̍k bîntsú hôpêng hō͘ Tâioân tōa iûhêng", Tân Tsúipíⁿ tsóngthóng kah Tâioân bîntsiòng tsòhóe iûhêng, hiòng Tâioân háikiap tùihōaⁿ kah koktsè siāhōe huah tshut "ài bîntsú","ài hôpêng","tio̍h tsūiû","hoán tshimlio̍k","hoán uihia̍p","pó kahn̂g","hō͘ Tâioân" téng tsa̍p ê tōa tūi. Piáuta̍t hùnkhài kah putboán. Hoántùi Tiongkok tsètēng "Hoán hunlia̍t kokka huat".

Sìgue̍h jīla̍k, Tiongkok Kokbîntóng tsúse̍k, kakī kóng sī "sûntséng Tiongkok lâng" ê Liân Tsiàn tshōa 70 lâng khì Tiongkok, kóng sī "Tiongkok Kokbîntóng hôpêng tsi lú", khì kìⁿ Τiongkiōng tiongiong tsóngsukì, kokka tsúsik, tiongiong kunúi tsúse̍k Ô͘ Gímtō, tī Pakkiaⁿ jînbîn tāihōetn̂g tsìnhêng hōetâm, ū ta̍tsêng gō͘ tiám kiōngsik, tôngì tī kiújī nn̄g kiōngsik téngbīn tshuitōng nn̄g hōaⁿ tâmphòaⁿ. Tiongkok Kokbîntóng ánne tsò, tongjiân ē hō͘ koktsè siāhōe gō͘hōe, Tâioân lâng pēng bô hoántùi Tiongkok tsètēng "Hoán hunlia̍t kokka huat". Tī Tâioân, Tiongkok Kokbîntóng tongjiân hō͘ tsènglâng soān.

　　2022 nî pehgue̍h, Tiongkok tsiàkháu Bíkok Tsiònggīīⁿ gītiúⁿ tshejī hóngbūn Tâioân, tī Tâioân sìkho͘ûi phah huitôaⁿ, pehgue̍h tshetsa̍p Tiongkok Kokbîntóng phài hù tsúse̍k Hā Li̍pgiân tshōa thoân khì Tiongkok hóngbūn, suijiân i kiôngtiāu sī hui kuaⁿhong, kò͘ bînsing. Tānsī tī tsiahni̍h bínkám ê sî tīn khì Tiongkok hóngbūn, bo̍kkoài hō͘ tsèng lâng soān.

　　 Tiongkok Kokbîntóng sī m̄ sī kongkiōng piānsó͘, hō͘ in ê tóngoân kakī kóng khah tsún, tānsī Tiongkok Kokbîntóng tsèng lâng"soān"ê tāitsì, tsē kah kóng bē liáu. 　　(230224)


Pe̍h-ōe-jī-pán/白話字版


《 Le̍k-sik toán-phêng 》 Lí Lâm-hêng

Tiong-kok Kok-bîn-tóng tsèng lâng soān!

　　Hông-hái táng-sū-tiúⁿ Kueh Tâi-bêng tsòe-kīn pió-thài ū siūⁿ beh koh tńg-khì Tiong-kok Kok-bîn-tóng tsham soán tsóng-thóng, Jī-gue̍h tsa̍p-la̍k, tsêng li̍p-úi Tshòa Tsèng-goân tī bīn-tsheh téng-bīn tshiàng siaⁿ,"Tiong-kok Kok-bîn-tóng m̄ sī kong-kiōng piān-só͘, su-iàu ê sî tshiong ji̍p-khì pàng tsi̍t pû jiō, pàng liáu koh hiâm piān-só͘ tshàu, lī-khui ê sî koh phùi tsi̍t kô͘ thâm, tán kàu lâng kā piān-só͘ piàⁿ sàu tshing-khì, i jīn-ûi ka-kī tsin tōa-bóe, koh tsáu tò tńg-lâi ngē beh koh pàng tsi̍t pû jiō."sui-jiân Tshòa Tsèng-goân ùi thâu kàu bóe lóng bô kiò miâ kiò sèⁿ, tān-sī ta̍k-ê mā lóng tsai-iáⁿ i sī teh kóng Kueh Tâi-bêng.

　　 Tâi-oân ōe pàng jiō ū lâng kóng tsoh"soān jiō", Tâi-oân ū tsi̍t kù sio̍k-gí ōe kóng,"gín-á lâng pàng jiō soān kòe khe, lāu-lâng pàng jiō ti̍h tio̍h ê."lēng-gōa tsit jī"soān"jī ū sî mā hông the̍h lâi tsoh tsiok siū-khì mē lâng ê ì-sù. Tshiūⁿ-kóng ū lâng tsò hui-siông m̄-tio̍hê tāi-tsì, tio̍h ū khó-lêng ín-khí tsin tsē lâng kā mē, it-puaⁿ sī kóng"tsèng lâng soān".

　　2005 nî saⁿ-gue̍h tsa̍p-sì, Tiong-kok " Jîn-tāi-hōe siông-bū úi-goân-hōe" thong-kòe "hoán hun-lia̍t kok-ka huat", kâng tsi̍t ji̍t sing-hāu si̍t-si. Tiong-kok beh tsè-tēng siáⁿ-mi̍h huat-lu̍t, beh tsè-tēng kúi tshing tiâu lóng sī in tau ê tāi-tsì. Būn-tê sī tsit-ê huat-lu̍t tē-it tiâu tio̍h-kóng, ūi-tio̍h hoán-tùi kah at-tsè "Tâi-to̍k" hun-lia̍t sè-le̍k hun-lia̍t kok-ka, tshiok-tsìn tsó͘-kok hô-pêng thóng-it, î-hō͘ Tâi-oân hái-kiap tē-khu hô-pêng ún-tēng, î-hō͘ kok-ka tsú-koân kah léng-thó͘ oân-tséng, î-hō͘ Tiong-hôa bîn-tso̍k kin-pún lī-ik, kin-kì hiàn-huat, tsè-tèng pún huat. Tē-jī tiâu kóng, sè-kài siōng tsí-ū tsi̍t-ê Tiong-kok, tāi-lio̍k kah Tâi-oân kâng sio̍k tsi̍t-ê Tiong-kok, Tiong-kok ê tsú-koân kah léng-thó͘ oân-tséng put iông hun-kuah. Î-hō͘ kok ke-tsú koân kah léng-thó͘ oân-tséng sī pau-kuat Tâi-oân tông-pau tsāi-lāi ê tsoân Tiong-kok jîn-bîn ê kiōng-tông gī-bū.

　　 tsin-tsiàⁿ sī khí-iú-tshú-lí! saⁿ-gue̍h jī-la̍k,"Saⁿ-jī-la̍k bîn-tsú hô-pêng hō͘ Tâi-oân tōa iû-hêng", Tân Tsúi-píⁿ tsóng-thóng kah Tâi-oân bîn-tsiòng tsò-hóe iû-hêng, hiòng Tâi-oân hái-kiap tùi-hōaⁿ kah kok-tsè siā-hōe huah tshut "ài bîn-tsú","ài hô-pêng","tio̍h tsū-iû","hoán tshim-lio̍k","hoán ui-hia̍p","pó ka-hn̂g","hō͘ Tâi-oân" téng tsa̍p ê tōa tūi. Piáu-ta̍t hùn-khài kah put-boán. Hoán-tùi Tiong-kok tsè-tēng "Hoán hun-lia̍t kok-ka huat".

Sì-gue̍h jī-la̍k, Tiong-kok Kok-bîn-tóng tsú-se̍k, ka-kī kóng sī "sûn-tséng Tiong-kok lâng" ê Liân Tsiàn tshōa 70 lâng khì Tiong-kok, kóng sī "Tiong-kok Kok-bîn-tóng hô-pêng tsi lú", khì kìⁿ Τiong-kiōng tiong-iong tsóng-su-kì, kok-ka tsú-sik, tiong-iong kun-úi tsú-se̍k Ô͘ Gím-tō, tī Pak-kiaⁿ jîn-bîn tāi-hōe-tn̂g tsìn-hêng hōe-tâm, ū ta̍t-sêng gō͘ tiám kiōng-sik, tông-ì tī kiú-jī nn̄g kiōng-sik téng-bīn tshui-tōng nn̄g hōaⁿ tâm-phòaⁿ. Tiong-kok Kok-bîn-tóng án-ne tsò, tong-jiân ē hō͘ kok-tsè siā-hōe gō͘-hōe, Tâi-oân lâng pēng bô hoán-tùi Tiong-kok tsè-tēng "Hoán hun-lia̍t kok-ka huat". Tī Tâi-oân, Tiong-kok Kok-bîn-tóng tong-jiân hō͘ tsèng-lâng soān.

　　2022 nî peh-gue̍h, Tiong-kok tsià-kháu Bí-kok Tsiòng-gī-īⁿ gī-tiúⁿ tshe-jī hóng-būn Tâi-oân, tī Tâi-oân sì-kho͘-ûi phah hui-tôaⁿ, peh-gue̍h tshe-tsa̍p Tiong-kok Kok-bîn-tóng phài hù tsú-se̍k Hā Li̍p-giân tshōa thoân khì Tiong-kok hóng-būn, sui-jiân i kiông-tiāu sī hui kuaⁿ-hong, kò͘ bîn-sing. Tān-sī tī tsiah-ni̍h bín-kám ê sî tīn khì Tiong-kok hóng-būn, bo̍k-koài hō͘ tsèng lâng soān.

　　 Tiong-kok Kok-bîn-tóng sī m̄ sī kong-kiōng piān-só͘, hō͘ in ê tóng-oân ka-kī kóng khah tsún, tān-sī Tiong-kok Kok-bîn-tóng tsèng lâng"soān"ê tāi-tsì, tsē kah kóng bē liáu. 　　(230224)



　　鴻海董事長郭台銘最近表態有想beh koh轉去中國國民黨參選總統，二月十六，前立委蔡正元tī面冊頂面唱聲：「中國國民黨m̄是公共便所，需要ê時衝入去放一pû尿，放了koh嫌便所臭，離開ê時koh phùi一糊痰，等到人kā便所拼掃清氣，伊認為家己真大尾，koh走倒轉來硬beh koh放一pû尿。」雖然蔡正元ùi頭到尾lóng無叫名叫姓，但是ta̍k个mā lóng知影伊是teh講郭台銘。

　　台灣話放尿有人講作「soān尿」，台灣有一句俗語話講：「gín-á人放尿soān過溪，老人放尿滴tio̍h鞋。」另外tsit字「soān」字有時mā hông the̍h來作足受氣罵人ê意思。像講有人做非常m̄-tio̍h ê代誌，tio̍h有可能引起真tsē人kā罵，一般是講「眾人soān」。

　　2005年三月十四，中國「人代會常務委員會」通過「反分裂國家法」，仝一日生效實施。中國beh制訂啥物法律、beh制訂幾千條lóng是intauê代誌。問題是tsit-ê法律第一條tio̍h講：為tio̍h反對kah遏制「台獨」分裂勢力分裂國家，促進祖國和平統一，維護台灣海峽地區和平穩定，維護國家主權kah領土完整，維護中華民族根本利益，根據憲法，制定本法。 第二條講：世界上只有一个中國，大陸kah台灣仝屬一个中國，中國ê主權kah領土完整不容分割。 維護國家主權kah領土完整是包括台灣同胞在內ê全中國人民ê共同義務。

　　真正是豈有此理！三月二六，「三二六民主和平護台灣大遊行」，陳水扁總統kah台灣民眾做夥遊行，向台灣海峽對岸kah國際社會喝出「愛民主」、「愛和平」、「要自由」、「反侵略」、「反威脅」、「保家園」、「護台灣」等十个大隊。表達憤慨kah不滿。反對中國制訂「反分裂國家法」。

四月二六，中國國民黨主席、家己講是「純種中國人」ê連戰tshōa 70人去中國，講是「中國國民黨和平之旅」，去見中共中央總書記、國家主席、中央軍委主席胡錦濤，tī北京人民大會堂進行會談，有達成五點共識，同意tī九二共識頂面推動兩岸談判。中國國民黨án-ne做，當然會hō͘國際社會誤會：台灣人並無反對中國制訂「反分裂國家法」。Tī台灣，中國國民黨當然hō͘眾人soān。

　　2022年八月，中國藉口美國眾議院誐長初二訪問台灣，tī台灣四箍圍拍飛彈，八月初十中國國民黨派副主席夏立言tshōa團去中國訪問，雖然伊強調是非官方、顧民生。但是tī tsiah-ni̍h敏感ê時陣去中國訪問，莫怪hō͘眾人soān。

　　中國國民黨是m̄是公共便所，hō͘ inê黨員家己講khah準，但是中國國民黨眾人「soān」ê代誌，tsē kah講bē了。　　(230224)