《綠色短評》

 | | | 轉寄

台灣人hông háⁿ bē驚！hông騙bē行！

作者 李南衡, TsoânTâijī/全台字 by Tsng Hūiphêng 2023.04.30



Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　 Lí Lâmhêng

　　　 Tâioân lâng hông háⁿ bē kiaⁿ! hông phiàn bē kiâⁿ!

Tshòa Ingbûn tsóngthóng tshōa thoân thiánkhui 10 kang ê "Bîntsú tâng phōaⁿ kiōng iông tsi lú", hôe têng kòikéng Bíkok Lo̍ksanki, Bí sai sîkan sìgue̍h tshegō͘ tsákhí kah Bíkok Tsiònggīīⁿ gītiúⁿ 麥卡錫 hōetâm. Sìgue̍h tshetshit, Tshòa Ingbûn tsóngthóng tńglâi kàu Tâioân. Tējī kang, Tiongkok to̍h tī Tâioân sìkho͘ûi tsìnhêng saⁿ kang tōa kuibô͘ kunián. Ná tshiūⁿ kūnî (2022) pehgue̍h tshejī tshesaⁿ Bíkok liânpang Tsiònggīīⁿ gītiúⁿ 裴洛西 (Nancy Pelosi) tshōa tsin tsē ūi Bíkok kokhōe tāngliōng kip gīoân lâi Tâioân hóngbūn. Tńgkhì ê tējī kang, Tiongkok tī Tâioân sìkho͘ûi phah huitôaⁿ. Iáu koh ū ta̍kê tsiok se̍ksāi ê Tiongkok kunki kunlām, saⁿ gō͘ tâi, tsa̍p gōa tâi, sīmtsì ū sî ū kúi tsa̍p tâi, lâi lán Tâioân sailâm pêng ê Hângkhong sikpia̍t khu, kah Tâioân háikiap tiongsòaⁿ hūkīn jiáuloān, ēsái kóng sī làng sî bô làng ji̍t. Tse tio̍h sī ēng bú·ê lâi khiónghat uihia̍p lán Tâioân.

　　 Ū sî, Tiongkok ē káiōaⁿ tsi̍tê bô kâng ê hongsik, ēng bûn·ê lâi iúkoái khiphiàn lán Tâioân.

　　 Má Ingkiú tsêng tsóngthóng khì Tiongkok "tsè tsó͘ hôpêng tsi lú" ê tô͘tiong, saⁿgue̍h jīpeh, Koktâipān tsújīm Sòng Tô tsuankang khì Kangso͘ séng Khunsan tshī kah Má Ingkiú tsêng tsóngthóng, Tâi khì, Tâi tsheⁿ tsō tâm. Ū lâng mn̄g kóng,"nn̄g hōaⁿ thóngit ū siáⁿ hótshù?" Sòng Tô kóng tsíiàu tī "tsi̍tê Tiongkok goântsik" khingkè ēbīn, Tâioân tôngpau hibāng tit kàu siáⁿmi̍h lóng ēsái tshamsiông. Saⁿgue̍h jīkáu, Koktâipān huatgiânjîn Tsu Hōngliân, tī tsi̍tê lēhêng kìtsiáhōe téngbīn tsìn tsi̍tpō͘ kóng,"thóngit liáuāu, Tâioân tôngpau ētàng hióngsiūtio̍h si̍tsi̍t tsāitsāi ê hótshù."

　　Tsu Hōngliân kóng,"thóngit liáuāu, Tâioân ētàng si̍thêng kah Tāilio̍k bô kâng ê siāhōe tsètō͘. Tī khakpó kokka tsúkoân, antsoân, huattián līik ê tsiântê hā, Tâioân tôngpau ê siāhōe tsètō͘ kah singua̍h hongsik téng lóng ē tittio̍h tshionghun ê tsuntiōng, Tâioân tôngpau ê sujîn tsâisán, tsongkàu sìngióng, ha̍phuat koânik lóng ē tittio̍h tshionghun pótsiòng. Tâioân ê tsâitsèng siuji̍p lóng tsóng ēsái ēng tī káisiān bînsing."

　　Tsu Hōngliân kóng thóngit liáuāu, Tâioân lâng ē tittio̍h ê hótshù, Tâioân lâng tsitmá tio̍h sī ánne, ná tio̍h tán kàu thóngit? tsin túhó i kóng tsiahê mā lóng sī Tiongkok só͘ bô ê. Beh kóng m̄tio̍hkóng tsi̍t kóa Tiongkok ū ê, lán Tâioân hiānsî bô ê, jîtshiáⁿ tsiok kîthāi, tsiok ǹgbāng ū ê, tshiūⁿkóng bo̍ktsêng lán Tâioân "jînkin só͘tik" sī bíkim 32,811 kho͘, i nā kóng thóngit liáuāu, Tâioân ētàng kah Tiongkok kāngkhoán "jinku só͘tik" bíkim 5,000 kho͘. Ū lâng thiaⁿtio̍h tsîⁿ ba̍ktsiu tio̍h kim·khílâi, kikiám ū iúhe̍k sèng. Khósioh Tsu Hōngliân kóng bē tshut tshùi, inūi bo̍ktsêng Tiongkok " jinku só͘tik "bíkim 12,741 kho͘, sī Tâioân ê 38.9%," jinku só͘tik "tsoân kok tē 1 miâ ê Pakkiaⁿ tshī sī bíkim 25,789 kho͘, sī Tâioân ê 78.6%.

Tsu Hōngliân kóng,"thóngit liáuāu, Tâioân ê tsâitsèng siuji̍p lóng tsóng ēsái ēng tī káisiān bînsing."i bô kóng bêng, sūsi̍t siōng i sī àmsī thóngit liáuāu, Tâioân bô pitiàu khui hiah tsē tsîⁿ bé kunhóe bé búkhì. I káⁿ m̄tsai iáⁿ, Tio̍h sī ū Tiongkok tsitê pháiⁿ tshùpiⁿ, tsi̍t ji̍t kàu àm phài kunki kunlām lâi loān Tâioân, koh kóng bô beh hòngkhì ēng búle̍k káikuat Tâioân, Tâioân tsiah suiàu khai hiah tsē tsîⁿ bé kunhóe bé búkhì!

　　 Hòngsim, Tâioân lâng hông háⁿ bē kiaⁿ! hông phiàn bē kiâⁿ! 　　 (230421)

Tsù, 麥卡錫 　裴洛西 tshiáⁿ liām Hôagí


Pe̍h-ōe-jī-pán/白話字版

《 Le̍k-sik toán-phêng 》　 Lí Lâm-hêng

　　　 Tâi-oân lâng hông háⁿ bē kiaⁿ! hông phiàn bē kiâⁿ!

Tshòa Ing-bûn tsóng-thóng tshōa thoân thián-khui 10 kang ê "Bîn-tsú tâng phōaⁿ kiōng iông tsi lú", hôe têng kòe-kéng Bí-kok Lo̍k-san-ki, Bí sai sî-kan sì-gue̍h tshe-gō͘ tsá-khí kah Bí-kok Tsiòng-gī-īⁿ gī-tiúⁿ 麥卡錫 hōe-tâm. Sì-gue̍h tshe-tshit, Tshòa Ing-bûn tsóng-thóng tńg-lâi kàu Tâi-oân. Tē-jī kang, Tiong-kok to̍h tī Tâi-oân sì-kho͘-ûi tsìn-hêng saⁿ kang tōa kui-bô͘ kun-ián. Ná tshiūⁿ kū-nî (2022) peh-gue̍h tshe-jī tshe-saⁿ Bí-kok liân-pang Tsiòng-gī-īⁿ gī-tiúⁿ 裴洛西 (Nancy Pelosi) tshōa tsin tsē ūi Bí-kok kok-hōe tāng-liōng kip gī-oân lâi Tâi-oân hóng-būn. Tńg-khì ê tē-jī kang, Tiong-kok tī Tâi-oân sì-kho͘-ûi phah hui-tôaⁿ. Iáu koh ū ta̍k-ê tsiok se̍k-sāi ê Tiong-kok kun-ki kun-lām, saⁿ gō͘ tâi, tsa̍p gōa tâi, sīm-tsì ū sî ū kúi tsa̍p tâi, lâi lán Tâi-oân sai-lâm pêng ê Hâng-khong sik-pia̍t khu, kah Tâi-oân hái-kiap tiong-sòaⁿ hū-kīn jiáu-loān, ē-sái kóng sī làng sî bô làng ji̍t. Tse tio̍h sī ēng bú-·ê lâi khióng-hat ui-hia̍p lán Tâi-oân.

　　 Ū sî, Tiong-kok ē kái-ōaⁿ tsi̍t-ê bô kâng ê hong-sik, ēng bûn-·ê lâi iú-koái khi-phiàn lán Tâi-oân.

　　 Má Ing-kiú tsêng tsóng-thóng khì Tiong-kok "tsè tsó͘ hô-pêng tsi lú" ê tô͘-tiong, saⁿ-gue̍h jī-peh, Kok-tâi-pān tsú-jīm Sòng Tô tsuan-kang khì Kang-so͘ séng Khun-san tshī kah Má Ing-kiú tsêng tsóng-thóng, Tâi khì, Tâi tsheⁿ tsō tâm. Ū lâng mn̄g kóng,"nn̄g hōaⁿ thóng-it ū siáⁿ hó-tshù?" Sòng Tô kóng tsí-iàu tī "tsi̍t-ê Tiong-kok goân-tsik" khing-kè ē-bīn, Tâi-oân tông-pau hi-bāng tit kàu siáⁿ-mi̍h lóng ē-sái tsham-siông. Saⁿ-gue̍h jī-káu, Kok-tâi-pān huat-giân-jîn Tsu Hōng-liân, tī tsi̍t-ê lē-hêng kì-tsiá-hōe téng-bīn tsìn tsi̍t-pō͘ kóng,"thóng-it liáu-āu, Tâi-oân tông-pau ē-tàng hióng-siū-tio̍h si̍t-si̍t tsāi-tsāi ê hó-tshù."

　　Tsu Hōng-liân kóng,"thóng-it liáu-āu, Tâi-oân ē-tàng si̍t-hêng kah Tāi-lio̍k bô kâng ê siā-hōe tsè-tō͘. Tī khak-pó kok-ka tsú-koân, an-tsoân, huat-tián lī-ik ê tsiân-tê hā, Tâi-oân tông-pau ê siā-hōe tsè-tō͘ kah sing-ua̍h hong-sik téng lóng ē tit-tio̍h tshiong-hun ê tsun-tiōng, Tâi-oân tông-pau ê su-jîn tsâi-sán, tsong-kàu sìn-gióng, ha̍p-huat koân-ik lóng ē tit-tio̍h tshiong-hun pó-tsiòng. Tâi-oân ê tsâi-tsèng siu-ji̍p lóng tsóng ē-sái ēng tī kái-siān bîn-sing."

　　Tsu Hōng-liân kóng thóng-it liáu-āu, Tâi-oân lâng ē tit-tio̍h ê hó-tshù, Tâi-oân lâng tsit-má tio̍h sī án-ne, ná tio̍h tán kàu thóng-it? tsin tú-hó i kóng tsiah-ê mā lóng sī Tiong-kok só͘ bô ê. Beh kóng m̄-tio̍h-kóng tsi̍t kóa Tiong-kok ū ê, lán Tâi-oân hiān-sî bô ê, jî-tshiáⁿ tsiok kî-thāi, tsiok ǹg-bāng ū ê, tshiūⁿ-kóng bo̍k-tsêng lán Tâi-oân "jîn-kin só͘-tik" sī bí-kim 32,811 kho͘, i nā kóng thóng-it liáu-āu, Tâi-oân ē-tàng kah Tiong-kok kāng-khoán "jin-ku só͘-tik" bí-kim 5,000 kho͘. Ū lâng thiaⁿ-tio̍h tsîⁿ ba̍k-tsiu tio̍h kim-·khí-lâi, ke-kiám ū iú-he̍k sèng. Khó-sioh Tsu Hōng-liân kóng bē tshut tshùi, in-ūi bo̍k-tsêng Tiong-kok " jin-ku só͘-tik "bí-kim 12,741 kho͘, sī Tâi-oân ê 38.9%," jin-ku só͘-tik "tsoân kok tē 1 miâ ê Pak-kiaⁿ tshī sī bí-kim 25,789 kho͘, sī Tâi-oân ê 78.6%.

Tsu Hōng-liân kóng,"thóng-it liáu-āu, Tâi-oân ê tsâi-tsèng siu-ji̍p lóng tsóng ē-sái ēng tī kái-siān bîn-sing."i bô kóng bêng, sū-si̍t siōng i sī àm-sī thóng-it liáu-āu, Tâi-oân bô pit-iàu khui hiah tsē tsîⁿ bé kun-hóe bé bú-khì. I káⁿ m̄-tsai iáⁿ, Tio̍h sī ū Tiong-kok tsit-ê pháiⁿ tshù-piⁿ, tsi̍t ji̍t kàu àm phài kun-ki kun-lām lâi loān Tâi-oân, koh kóng bô beh hòng-khì ēng bú-le̍k kái-kuat Tâi-oân, Tâi-oân tsiah su-iàu khai hiah tsē tsîⁿ bé kun-hóe bé bú-khì!

　　 Hòng-sim, Tâi-oân lâng hông háⁿ bē kiaⁿ! hông phiàn bē kiâⁿ! 　　 (230421)

Tsù, 麥卡錫 　裴洛西 tshiáⁿ liām Hôa-gí




蔡英文總統tshōa團展開10天ê「民主同伴共榮之旅」，回程過境美國洛杉磯，美西時間四月初五早起kah美國眾議院議長麥卡錫會談。四月初七，蔡英文總統轉來到台灣。第二工，中國tio̍htī台灣四箍圍進行三工大規模軍演。Ná像舊年（2022）八月初二初三美國聯邦眾議院議長裴洛西（Nancy Pelosi）tshōa真tsē位美國國會重量級議員來台灣訪問。轉去ê第二工，中國tī台灣四箍圍拍飛彈。猶koh有ta̍k个足熟似ê中國軍機軍艦，三五台、十外台、甚至有時有幾十台，來咱台灣西南旁ê航空識別區、kah台灣海峽中線附近擾亂，ē-sái講是làng時無làng日。Tse tio̍h是用武ê來恐嚇威脅咱台灣。

　　有時，中國ē改換一個無仝ê方式，用文ê來誘拐欺騙咱台灣。

　　馬英九前總統去中國「祭祖和平之旅」ê途中，三月二八，國台辦主任宋濤專工去江蘇省昆山市kah馬英九前總統、台企、台青座談。有人問講：「兩岸統一有啥好處？」宋濤講只要tī「一個中國原則」框架下面，台灣同胞希望得到啥物lóng ē-sái參詳。三月二九，國台辦發言人朱鳳蓮，tī一個例行記者會頂面進一步講，「統一了後，台灣同胞ētàng享受tio̍h實實在在ê好處。」

　　朱鳳蓮講：「統一了後，台灣ē-tàng實行kah大陸無仝ê社會制度。tī確保國家主權、安全、發展利益ê前提下，台灣同胞ê社會制度kah生活方式等lóngē得tio̍h充分ê尊重，台灣同胞ê私人財產、宗教信仰、合法權益lóngē得tio̍h充分保障。台灣ê財政收入lóng總ē-sái用tī改善民生。」

　　朱鳳蓮講統一了後，台灣人ē得tio̍hê好處，台灣人tsit-má tio̍h是án-ne，ná tio̍h等到統一？真tú好伊講tsiah-ê mā lóng是中國所無ê。Beh講m̄-tio̍h講一kóa中國有ê、咱台灣現時無ê，而且足期待、足ǹg望有ê，像講目前咱台灣「人均所得」是美金32,811 kho͘，伊若講統一了後，台灣ētàng kah中國仝款「人均所得」美金5,000 kho͘。有人聽tio̍h錢目睭tio̍h金起來，加減有誘惑性。可惜朱鳳蓮講bē出嘴，因為目前中國「人均所得」美金12,741 kho͘，是台灣ê 38.9%，「人均所得」全國第1名ê北京市是美金25,789 kho͘，是台灣ê 78.6%。

朱鳳蓮講：「統一了後，台灣ê財政收入lóng總ē-sái用tī改善民生。」伊無講明，事實上伊是暗示統一了後，台灣無必要開hiahtsē錢買軍火買武器。伊敢m̄知影：Tio̍h是有中國tsit-ê pháiⁿ厝邊，一日到暗派軍機軍艦來亂台灣，koh講無beh放棄用武力解決台灣，台灣tsiah需要開hiahtsē錢買軍火買武器！

　　放心，台灣人hôngháⁿbē驚！hông騙bē行！　　 (230421)

註：麥卡錫　　裴洛西　　　請唸華語