《綠色短評》

 | | | 轉寄

柯文哲講人kā i抹烏！

作者 李南衡, TsoânTâijī/全台字 by Tsng Hūiphêng 2023.07.09



Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　 Lí Lâmhêng

　　　　　　　　　　Kua Bûntiat kóng lâng kā i buah o͘ !

　　 La̍kgue̍h jījī, 《 Tsūiû Sîpò 》 phiautê siá, Kua Bûntiat kóng,"sī Tiongkok hit hongbīn itti̍t beh ài góa soán tsóngthóng". Lāi bûn kóng, Bîntsiòngtóng tsóngthóng tshamsoánjîn Kua Bûntiat tī 2016 nî, Tâipaktshītiúⁿ jīmlāi, tsiapsiū 《 Tâitāi Isìn 》hóngbūn, tùi hóngbūn tsiá thêtshut kám ē soán tsóngthóng ê būntê, Kua Bûntiat ê hôetap sī,"kakī ingkai bē tshutlâi soán tsóngthóng, suijiân Tiongkok hit hongbīn itti̍t beh ài góa soán. Suijiân kakī khólêng soán ē tiâu, tānsī tsúiàu inūi kakī bô tsúnpī, jîtshiáⁿ soán tsóngthóng tsit hāng tāitsì ê bo̍ktik sī beh hō͘ pa̍t lâng kòe tio̍h koh khah hó ê singua̍h, góa kámkak kakī tsò bē pí kîtha ê lâng tsò koh khah hó."tshamkhó i tsiapsiū hóngbūn só͘ kóng ê ōe, gōakài tio̍hkóng Kua Bûntiat sī Tiongkok siū ì ê hāusoánjîn.

La̍kgue̍h jījī ēpo͘, Kua Bûntiat hôeèng piáusī, inūi soánkí teh beh kàu ah, ittēng ē ū buah âng, buah o͘ ê suanthoân tsiamtùi i lâi, i kiôngtiāu tse sī 2016 nî káugue̍h tī《 Tâitāi Isìn 》téngbīn ê hóngbūn, i tongsî sī Tâipaktshītiúⁿ, inūi kípān Siangsiâⁿ lūntôaⁿ（Tāipak, Siōng hái ）ê sî, ittēng ē kah Tiongkok ū tsi̍tkóa kauthong, hit tongsî Tiongkok hongbīn ū mn̄g i, íóng tsohkòe Tâipaktshītiúⁿ·ê lóng ē siūⁿ beh soán tsóngthóng, mn̄g i sī m̄ sī ē siūⁿ beh soán tsóngthóng? Kua Bûntiat piáusī, hit tongsî i sī kiôngtiāu i tongsî tsoh Tâipaktshītiúⁿ, mā bē soán tsóngthóng, tānsī gōakài beh ántsóaⁿ kóng, i mā bô pānhuat.

Lán the̍h la̍kgue̍h jījī ê sinbûn pòtō kah 2016 nî káugue̍h tī《 Tâitāi Isìn 》téngbīn ê hóngbūn sio tùitsiàu, si̍ttsāi m̄tsai iáⁿ, Kua Bûntiat ná ē kóng lâng kā i buah o͘. Tàuté tó kúi tōaⁿ ōe, tó kúi kù ōe kā I buah o͘ á·sī buah âng. Tsoân phiⁿ lóng sī Kua Bûntiat tsátsêng kóng ê ōe, ùṳt tsi̍t kù sī liânsióng,"gōakài tio̍hkóng Kua Bûntiat sī Tiongkok siū ì ê hāusoánjîn."inūi Kua Bûntiat kakī kóng,"Tiongkok hit hongbīn itti̍t beh ài góa soán."i tsit kù ōe, hông kámkak sī i teh tián kóng, Tiongkok hit hongbīn tsin kahì i. Tongjiân ē hông liânsióng kóng"Kua Bûntiat sī Tiongkok siūì ê hāusoánjîn." Tse ná sī siáⁿmi̍h buah o͘ leh?

　　 Lán beh ài hō͘ Kua Bûntiat tsaiiáⁿ siáⁿmi̍h sī bua̍h o͘ ? buah o͘ tio̍h sī ēng bô kingkòe tsèngsi̍t ê giânsû kongkik tùitshiú, paukuat tsōiâu, tiòngsiong, tshiúhòa, uaikhiok sūsi̍t, á·sī kā pō͘hūn sūsi̍t thiⁿ iû ke bīsò͘, ēng pe̍htsha̍t ōe tsoh jînsin kongkik, hō͘ tùihong ê miâsiaⁿ bêngū kah khósìnsèng siūtio̍h tsitgî. Lán kí tsi̍tê lē lâi suatbêng, tsátsêng ū tsi̍t ūi Tâipaktshītiúⁿ miâ kiò tsoh Kua Bûntiat, 2018 nî saⁿgue̍h tsa̍pgō͘ àmsî, tī tsi̍tê “Yo͘tuber” ti̍t pò tsiatbo̍k téngbīn siūkhì khílâi mē pùnsòōe, i hiônghiông mē kóng,"bésiu miâtshùi tio̍h tsîⁿ, bô siūⁿ beh khai hit tiâu tsîⁿ. In tio̍h sī ánne loān kóng, lâng tio̍h tsia̍h pn̄g, tio̍h ài hithō."ta̍kê miâtshùi lóng tio̍h tshèng. Hit ūi Kua Bûntiat tshītiúⁿ kàu taⁿ iáu bô kóngtshut siáⁿmi̍h sîkan, siáⁿmi̍h lâng tī siáⁿmi̍h só͘tsāi, khui jōatsē tsîⁿ, siubé tó tsi̍tê miâtshùi á·sī tó kúiê ê miâtshùi. Hit ūi Kua Bûntiat tshītiúⁿ íking lo̍hjīm ah, tānsī kàu kináji̍t iáubōe hêng Tâioân só͘ū ê miâtshùi tshingpe̍h. Tse kiò tsoh buah o͘.

　　Kua Bûntiat kóng lâng kā i buah o͘ ! Kám ū?

　　 Ū tsintsē miâtshùi kóng Kua Bûntiat tshītiúⁿ kā in buah o͘ ! kám bô? 　　(230630)


Pe̍h-ōe-jī-pán/白話字版


《 Le̍k-sik toán-phêng 》　 Lí Lâm-hêng

　　　　　　　　　　Kua Bûn-tiat kóng lâng kā i buah o͘ !

　　 La̍k-gue̍h jī-jī, 《 Tsū-iû Sî-pò 》 phiau-tê siá, Kua Bûn-tiat kóng,"sī Tiong-kok hit hong-bīn it-ti̍t beh ài góa soán tsóng-thóng". Lāi bûn kóng, Bîn-tsiòng-tóng tsóng-thóng tsham-soán-jîn Kua Bûn-tiat tī 2016 nî, Tâi-pak-tshī-tiúⁿ jīm-lāi, tsiap-siū 《 Tâi-tāi I-sìn 》hóng-būn, tùi hóng-būn tsiá thê-tshut kám ē soán tsóng-thóng ê būn-tê, Kua Bûn-tiat ê hôe-tap sī,"ka-kī ing-kai bē tshut-lâi soán tsóng-thóng, sui-jiân Tiong-kok hit hong-bīn it-ti̍t beh ài góa soán. Sui-jiân ka-kī khó-lêng soán ē tiâu, tān-sī tsú-iàu in-ūi ka-kī bô tsún-pī, jî-tshiáⁿ soán tsóng-thóng tsit hāng tāi-tsì ê bo̍k-tik sī beh hō͘ pa̍t lâng kòe tio̍h koh khah hó ê sing-ua̍h, góa kám-kak ka-kī tsò bē pí kî-tha ê lâng tsò koh khah hó."tsham-khó i tsiap-siū hóng-būn só͘ kóng ê ōe, gōa-kài tio̍h-kóng Kua Bûn-tiat sī Tiong-kok siū ì ê hāu-soán-jîn.

La̍k-gue̍h jī-jī ē-po͘, Kua Bûn-tiat hôe-èng piáu-sī, in-ūi soán-kí teh beh kàu ah, it-tēng ē ū buah âng, buah o͘ ê suan-thoân tsiam-tùi i lâi, i kiông-tiāu tse sī 2016 nî káu-gue̍h tī《 Tâi-tāi I-sìn 》téng-bīn ê hóng-būn, i tong-sî sī Tâi-pak-tshī-tiúⁿ, in-ūi kí-pān Siang-siâⁿ lūn-tôaⁿ（Tāi-pak, Siōng hái ）ê sî, it-tēng ē kah Tiong-kok ū tsi̍t-kóa kau-thong, hit tong-sî Tiong-kok hong-bīn ū mn̄g i, í-óng tsoh-kòe Tâi-pak-tshī-tiúⁿ-·ê lóng ē siūⁿ beh soán tsóng-thóng, mn̄g i sī m̄ sī ē siūⁿ beh soán tsóng-thóng? Kua Bûn-tiat piáu-sī, hit tong-sî i sī kiông-tiāu i tong-sî tsoh Tâi-pak-tshī-tiúⁿ, mā bē soán tsóng-thóng, tān-sī gōa-kài beh án-tsóaⁿ kóng, i mā bô pān-huat.

Lán the̍h la̍k-gue̍h jī-jī ê sin-bûn pò-tō kah 2016 nî káu-gue̍h tī《 Tâi-tāi I-sìn 》téng-bīn ê hóng-būn sio tùi-tsiàu, si̍t-tsāi m̄-tsai iáⁿ, Kua Bûn-tiat ná ē kóng lâng kā i buah o͘. Tàu-té tó kúi tōaⁿ ōe, tó kúi kù ōe kā I buah o͘ á-·sī buah âng. Tsoân phiⁿ lóng sī Kua Bûn-tiat tsá-tsêng kóng ê ōe, ùi-it tsi̍t kù sī liân-sióng,"gōa-kài tio̍h-kóng Kua Bûn-tiat sī Tiong-kok siū ì ê hāu-soán-jîn."in-ūi Kua Bûn-tiat ka-kī kóng,"Tiong-kok hit hong-bīn it-ti̍t beh ài góa soán."i tsit kù ōe, hông kám-kak sī i teh tián kóng, Tiong-kok hit hong-bīn tsin kah-ì i. Tong-jiân ē hông liân-sióng kóng"Kua Bûn-tiat sī Tiong-kok siū-ì ê hāu-soán-jîn." Tse ná sī siáⁿ-mi̍h buah o͘ leh?

　　 Lán beh ài hō͘ Kua Bûn-tiat tsai-iáⁿ siáⁿ-mi̍h sī bua̍h o͘ ? buah o͘ tio̍h sī ēng bô king-kòe tsèng-si̍t ê giân-sû kong-kik tùi-tshiú, pau-kuat tsō-iâu, tiòng-siong, tshiú-hòa, uai-khiok sū-si̍t, á-·sī kā pō͘-hūn sū-si̍t thiⁿ iû ke bī-sò͘, ēng pe̍h-tsha̍t ōe tsoh jîn-sin kong-kik, hō͘ tùi-hong ê miâ-siaⁿ bêng-ū kah khó-sìn-sèng siū-tio̍h tsit-gî. Lán kí tsi̍t-ê lē lâi suat-bêng, tsá-tsêng ū tsi̍t ūi Tâi-pak-tshī-tiúⁿ miâ kiò tsoh Kua Bûn-tiat, 2018 nî saⁿ-gue̍h tsa̍p-gō͘ àm-sî, tī tsi̍t-ê “Yo͘tuber” ti̍t pò tsiat-bo̍k téng-bīn siū-khì khí-lâi mē pùn-sò-ōe, i hiông-hiông mē kóng,"bé-siu miâ-tshùi tio̍h tsîⁿ, bô siūⁿ beh khai hit tiâu tsîⁿ. In tio̍h sī án-ne loān kóng, lâng tio̍h tsia̍h pn̄g, tio̍h ài hit-hō."ta̍k-ê miâ-tshùi lóng tio̍h tshèng. Hit ūi Kua Bûn-tiat tshī-tiúⁿ kàu taⁿ iáu bô kóng-tshut siáⁿ-mi̍h sî-kan, siáⁿ-mi̍h lâng tī siáⁿ-mi̍h só͘-tsāi, khui jōa-tsē tsîⁿ, siu-bé tó tsi̍t-ê miâ-tshùi á-·sī tó kúi-ê ê miâ-tshùi. Hit ūi Kua Bûn-tiat tshī-tiúⁿ í-king lo̍h-jīm ah, tān-sī kàu kin-á-ji̍t iáu-bōe hêng Tâi-oân só͘-ū ê miâ-tshùi tshing-pe̍h. Tse kiò tsoh buah o͘.

　　Kua Bûn-tiat kóng lâng kā i buah o͘ ! Kám ū?

　　 Ū tsin-tsē miâ-tshùi kóng Kua Bûn-tiat tshī-tiúⁿ kā in buah o͘ ! kám bô? 　　(230630)



　　六月二二，《自由時報》標題寫，柯文哲講：「是中國hit方面一直beh ài我選總統」。內文講：民眾黨總統參選人柯文哲tī 2016年，台北市長任內，接受《台大醫訊》訪問，對訪問者提出敢ē選總統ê問題，柯文哲ê回答是：「家己應該bē出來選總統，雖然中國hit方面一直beh ài我選。雖然家己可能選ē tiâu，但是主要因為家己無準備，而且選總統這項代誌ê目的是beh hō͘ 別人過著koh khah好ê生活，我感覺家己做bē比其他ê人做koh khah好。」參考i接受訪問所講ê話，外界tio̍h講柯文哲是中國授意ê候選人。

六月二二下晡，柯文哲回應表示，因為選舉teh beh到ah，一定ē有抹紅、抹烏ê宣傳針對i來，伊強調tse是2016年九月tī《台大醫訊》頂面ê訪問，伊當時是台北市長，因為舉辦雙城論壇（台北、上海）ê時，一定ē kah中國有一kóa溝通，hit當時中國方面有問i，以往作過台北市長ê lóngē想beh選總統，問i是m̄是ē想beh選總統？柯文哲表示，hit當時i是強調i當時作台北市長，mā bē選總統，但是外界beh按怎講，i mā無辦法。

咱the̍h六月二二ê新聞報導kah 2016年九月tī《台大醫訊》頂面ê訪問相對照，實在m̄知影，柯文哲ná ē講人kā伊抺烏。到底tó幾段話、tó幾句話kā i抺烏抑是抺紅。全篇lóng是柯文哲早前講ê話，唯一一句是聯想：「外界tio̍h講柯文哲是中國授意ê候選人。」因為柯文哲家己講：「中國hit方面一直beh ài我選。」i tsit句話，hông感覺是I teh展講：中國hit方面真合意i。當然ē hông聯想講「柯文哲是中國授意ê候選人。」Tse ná那是啥物抺烏咧？

　　咱beh ài hō͘柯文哲知影啥物是抺烏？抺烏tio̍h是用無經過證實ê言詞攻擊對手，包括造謠、中傷、醜化、歪曲事實、抑是kā部份事實添油加味素、用白賊話作人身攻擊，hō͘對方ê名聲名譽kah可信性受tio̍h質疑。咱舉一個例來說明：早前有一位台北市長名叫作柯文哲，2018年三月十五暗時，tī一個“Yootuber”直播節目頂面受氣起來罵垃圾話，伊雄雄罵講，「買收名嘴tio̍h錢，無想beh開hit條錢。In tio̍h是án-ne亂講，人tio̍h食飯、tio̍h ài hit號。」Ta̍k个名嘴lóng tio̍h銃。Hit位柯文哲市長到taⁿ猶無講出啥物時間、啥物人tī啥物所在，開jōa-tsē錢，收買tó一个名嘴抑是tó幾个個名嘴。Hit位柯文哲市長已經落任ah，但是到今á日猶未還台灣所有ê名嘴清白。Tse叫作抺烏。

　　柯文哲講人kā i抹烏！敢有？

　　有真tsē名嘴講柯文哲市長kā in抹烏！敢無？　　(230630)