《綠色短評》

 | | | 轉寄

Phô͘中國ê kha-tshng愛phô͘ tio̍h位！

作者 李南衡, TsoânTâijī/全台字 by Tsng Hūiphêng 2023.07.16



Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　 Lí Lâmhêng

　　　　　　　　Phô͘ Tiongkok ê khatshng ài phô͘ tio̍h ūi!

La̍kgue̍h jīsaⁿ, Tiongkok Kokbîntóng tsóngthóng tshamsoánjîn Hâu Iúgî khì Thôhn̂g tshamhiuⁿ, kóngtio̍h nn̄g hōaⁿ gītê ê sî piáusī i ē kèsio̍k ló͘le̍k, hō͘ nn̄g hōaⁿ tsi kan ētàng tshintshiūⁿ tsi̍t ke lâng, hôhâi úntēng, bi̍ttshiat ê tùiōe kah kaulâu. Ēpo͘ mûithé mn̄g khí i nn̄g hōaⁿ lūnsu̍t "兩岸一家人", kah Bîntsiòngtóng tsóngthóng tshamsoánjîn Kua Bûntiat ê "兩岸一家親" ū siáⁿ bô kâng? Hâu Iúgî ti̍ttsiap phue kóng, Kua Bûntiat ê nn̄g hōaⁿ tsèngtshik piànlâi piànkhì, kóng ê ōe tiantian tótó. Tshò·liáu! Kua Bûntiat ùithâu kàubóe tio̍h sī tsi̍t kù ōe "兩岸一家親".

Thiaⁿ Hâu Iúgî ánne kóng, lán tio̍h tsaiiáⁿ i ēng tsit kù ōe beh phô͘ Tiongkok ê khatshng, tsha Kua Bûntiat tsi̍tbān peh tshianlí! ū sinbûn mûithé kóng,"兩岸一家親" m̄ sī Kua Bûntiat thâu tsi̍tê kóng·ê. Tongjiân! nāsī Kua Bûntiat thâu tsi̍tê kóng "兩岸一家親", kah Hâu Iúgî kóng"兩岸一家人" kāngkhoán, ná tshiūⁿ pàng phùi tsi̍tsiaⁿ, bô lâng ē tshap i. Tiōngiàu·ê sī "兩岸一家親" siáⁿ lâng sing kóng·ê? 習近平.

　　 Lán tsaiiáⁿ, 2013 nî tsa̍pgue̍h tshela̍k, Tiongkok kokka tsúse̍k習近平 tī Ìnnî Bâlîtó tshamka Athài kingtsè ha̍ptsok hōegī (APEC) tē 21 kài hōegī, koh hōikiàn Siau Bāntiâng ê sî, tēit piàn tsèngsik thêtshut "兩岸一家親"ê kónghuat. 習近平 kóng,"nn̄g hōaⁿ sianghong ingkai kiantshî kiâⁿ nn̄g hōaⁿ kuanhē hôpêng huattián ê tsèngkhak tōlō͘, suantō “兩岸一家親” ê líliām, kakiông kauliû ha̍ptsok, kiōngtông tshioktsìn Tionghôa Bîntso̍k úitāi ho̍khing. "2014 nî jīgue̍h tsa̍ppeh, 習近平 tī Pakkiaⁿ hōikiàn Tiongkok Kokbîntóng êngū tsúse̍k Liân Tsiàn ê sî, huatpiáu liáu "kiōng îⁿ Tionghôa Bîntso̍k úitāi ho̍khing ê Tiongkok bāng" ê tiōngiàu kóngōe, 習近平 kiôngtiāu,"hibāng nn̄g hōaⁿ sianghong péngtshî “兩岸一家親” ê líliām, sūnsè jîūi, tsêsim hia̍ple̍k, tshuitōng nn̄g hōaⁿ kuanhē hôpêng huattián tshútit koh khah hó ê sêngkó, tsōhok nn̄g hōaⁿ bîntsiòng, kiōng îⁿ Tionghôa Bîntso̍k úitāi ho̍khing ê Tiongkok bāng."tse sī 習近平 tī sin hêngsè hē bīntùi nn̄g hōaⁿ kuanhē huattián só͘ tsoh ê tiōngiàu koh tsoânbīn ê lūnsu̍t.

Kiⁿî tsiaⁿgue̍h tshejī, Tiongkok kokka tsúsik 習近平 huatpiáu 2023 siⁿî tùi Tâioân hōsû, kah kūnî goântàn kiôngtiāu ê "itkoklióngtsè" bô kâng, kiⁿî kantaⁿ thêkhí" 海峽兩岸一家親". Suijiân nátshiūⁿ ū khah hôoān, tānsī Τiongkiōng kunki kunkàm tsiàusiông lâi "tshin", lâi jiáuloān Tâioân. Lán ùi tsittiám mā ētàng khòaⁿtshut 習近平 púnlâng kah Tiongkok tsènghú, jōanī khòaⁿtiōng tsit kù "兩岸一家親"!

Tùi Tiongkok kio̍ksè "hóphīⁿsai" ê Kua Bûntiat tsiok bô kántan, 2014 nî tsa̍pitgue̍h jīkáu tòngsoán Tâipaktshītiúⁿ, huantńgnî (2015) pehgue̍h tsa̍ptshit khì Siōnghái tshamka "siang siâⁿ lūn tôaⁿ", tī hia thâutsi̍t piàn kóngtshut "兩岸一家親". I nátshiūⁿ tsátsá tio̍h phīⁿ tshut 習近平 ū tsi̍t kang ē tsoh hôngtè, Kua Bûntiat kín tī Siōnghái suantho̍k "sèngtsí". Tī Kua Bûntiat suantho̍k "sèngtsí" tsìntsêng, i tongjiân mā tsaiiáⁿ lán Huatbūpō͘ Tiâutsakiok tsiamtùi "兩岸一家親" ū tsoh kòe thóngtsiàn tiâutsa pòkò. Kua Bûntiat ê tiōngtiám sī tī Tâioân itti̍t suantho̍k 習近平 ê sèngtsí "兩岸一家親", só͘í tsiah ē tit Tiongkok sioh, tsiahni̍h tit Tiongkok sioh ê tsèngkheh tī Tâioân tshōe bô tējīê, bo̍kkoài Tiongkok hit hongbīn itti̍t beh ài Kua Bûntiat soán tsóngthóng.

Ánne lán tio̍h tsai, phô͘ Tiongkok ê khatshng ài phô͘ tio̍h ūi! (230707)

Tsù, 兩岸一家人　兩岸一家親　習近平　海峽兩岸一家親 tshiáⁿ liām Hôagí


Pe̍h-ōe-jī-pán/白話字版


《 Le̍k-sik toán-phêng 》　　 Lí Lâm-hêng

　　　　　　　　Phô͘ Tiong-kok ê kha-tshng ài phô͘ tio̍h ūi!

La̍k-gue̍h jī-saⁿ, Tiong-kok Kok-bîn-tóng tsóng-thóng tsham-soán-jîn Hâu Iú-gî khì Thô-hn̂g tsham-hiuⁿ, kóng-tio̍h nn̄g hōaⁿ gī-tê ê sî piáu-sī i ē kè-sio̍k ló͘-le̍k, hō͘ nn̄g hōaⁿ tsi kan ē-tàng tshin-tshiūⁿ tsi̍t ke lâng, hô-hâi ún-tēng, bi̍t-tshiat ê tùi-ōe kah kau-lâu. Ē-po͘ mûi-thé mn̄g khí i nn̄g hōaⁿ lūn-su̍t "兩岸一家人", kah Bîn-tsiòng-tóng tsóng-thóng tsham-soán-jîn Kua Bûn-tiat ê "兩岸一家親" ū siáⁿ bô kâng? Hâu Iú-gî ti̍t-tsiap phue kóng, Kua Bûn-tiat ê nn̄g hōaⁿ tsèng-tshik piàn-lâi piàn-khì, kóng ê ōe tian-tian tó-tó. Tshò-·liáu! Kua Bûn-tiat ùi-thâu kàu-bóe tio̍h sī tsi̍t kù ōe "兩岸一家親".

Thiaⁿ Hâu Iú-gî án-ne kóng, lán tio̍h tsai-iáⁿ i ēng tsit kù ōe beh phô͘ Tiong-kok ê kha-tshng, tsha Kua Bûn-tiat tsi̍t-bān peh tshian-lí! ū sin-bûn mûi-thé kóng,"兩岸一家親" m̄ sī Kua Bûn-tiat thâu tsi̍t-ê kóng-·ê. Tong-jiân! nā-sī Kua Bûn-tiat thâu tsi̍t-ê kóng "兩岸一家親", kah Hâu Iú-gî kóng"兩岸一家人" kāng-khoán, ná tshiūⁿ pàng phùi tsi̍t-siaⁿ, bô lâng ē tshap i. Tiōng-iàu-·ê sī "兩岸一家親" siáⁿ lâng sing kóng-·ê? 習近平.

　　 Lán tsai-iáⁿ, 2013 nî tsa̍p-gue̍h tshe-la̍k, Tiong-kok kok-ka tsú-se̍k習近平 tī Ìn-nî Bâ-lî-tó tsham-ka A-thài king-tsè ha̍p-tsok hōe-gī (APEC) tē 21 kài hōe-gī, koh hōe-kiàn Siau Bān-tiâng ê sî, tē-it piàn tsèng-sik thê-tshut "兩岸一家親"ê kóng-huat. 習近平 kóng,"nn̄g hōaⁿ siang-hong ing-kai kian-tshî kiâⁿ nn̄g hōaⁿ kuan-hē hô-pêng huat-tián ê tsèng-khak tō-lō͘, suan-tō “兩岸一家親” ê lí-liām, ka-kiông kau-liû ha̍p-tsok, kiōng-tông tshiok-tsìn Tiong-hôa Bîn-tso̍k úi-tāi ho̍k-hing. "2014 nî jī-gue̍h tsa̍p-peh, 習近平 tī Pak-kiaⁿ hōe-kiàn Tiong-kok Kok-bîn-tóng êng-ū tsú-se̍k Liân Tsiàn ê sî, huat-piáu liáu "kiōng îⁿ Tiong-hôa Bîn-tso̍k úi-tāi ho̍k-hing ê Tiong-kok bāng" ê tiōng-iàu kóng-ōe, 習近平 kiông-tiāu,"hi-bāng nn̄g hōaⁿ siang-hong péng-tshî “兩岸一家親” ê lí-liām, sūn-sè jî-ūi, tsê-sim hia̍p-le̍k, tshui-tōng nn̄g hōaⁿ kuan-hē hô-pêng huat-tián tshú-tit koh khah hó ê sêng-kó, tsō-hok nn̄g hōaⁿ bîn-tsiòng, kiōng îⁿ Tiong-hôa Bîn-tso̍k úi-tāi ho̍k-hing ê Tiong-kok bāng."tse sī 習近平 tī sin hêng-sè hē bīn-tùi nn̄g hōaⁿ kuan-hē huat-tián só͘ tsoh ê tiōng-iàu koh tsoân-bīn ê lūn-su̍t.

Kin-nî tsiaⁿ-gue̍h tshe-jī, Tiong-kok kok-ka tsú-sik 習近平 huat-piáu 2023 sin-nî tùi Tâi-oân hō-sû, kah kū-nî goân-tàn kiông-tiāu ê "it-kok-lióng-tsè" bô kâng, kin-nî kan-taⁿ thê-khí" 海峽兩岸一家親". Sui-jiân ná-tshiūⁿ ū khah hô-oān, tān-sī Τiong-kiōng kun-ki kun-kàm tsiàu-siông lâi "tshin", lâi jiáu-loān Tâi-oân. Lán ùi tsit-tiám mā ē-tàng khòaⁿ-tshut 習近平 pún-lâng kah Tiong-kok tsèng-hú, jōa-nī khòaⁿ-tiōng tsit kù "兩岸一家親"!

Tùi Tiong-kok kio̍k-sè "hó-phīⁿ-sai" ê Kua Bûn-tiat tsiok bô kán-tan, 2014 nî tsa̍p-it-gue̍h jī-káu tòng-soán Tâi-pak-tshī-tiúⁿ, huan-tńg-nî (2015) peh-gue̍h tsa̍p-tshit khì Siōng-hái tsham-ka "siang siâⁿ lūn tôaⁿ", tī hia thâu-tsi̍t piàn kóng-tshut "兩岸一家親". I ná-tshiūⁿ tsá-tsá tio̍h phīⁿ tshut 習近平 ū tsi̍t kang ē tsoh hông-tè, Kua Bûn-tiat kín tī Siōng-hái suan-tho̍k "sèng-tsí". Tī Kua Bûn-tiat suan-tho̍k "sèng-tsí" tsìn-tsêng, i tong-jiân mā tsai-iáⁿ lán Huat-bū-pō͘ Tiâu-tsa-kiok tsiam-tùi "兩岸一家親" ū tsoh kòe thóng-tsiàn tiâu-tsa pò-kò. Kua Bûn-tiat ê tiōng-tiám sī tī Tâi-oân it-ti̍t suan-tho̍k 習近平 ê sèng-tsí "兩岸一家親", só͘-í tsiah ē tit Tiong-kok sioh, tsiah-ni̍h tit Tiong-kok sioh ê tsèng-kheh tī Tâi-oân tshōe bô tē-jī-ê, bo̍k-koài Tiong-kok hit hong-bīn it-ti̍t beh ài Kua Bûn-tiat soán tsóng-thóng.

Án-ne lán tio̍h tsai, phô͘ Tiong-kok ê kha-tshng ài phô͘ tio̍h ūi! (230707)

Tsù, 兩岸一家人　兩岸一家親　習近平　海峽兩岸一家親 tshiáⁿ liām Hôa-gí




六月二三，中國國民黨總統參選人侯友宜去桃園tsham香，講tio̍h兩岸議題ê時表示伊ē繼續努力，hō͘兩岸之間ē-tàng親像一家人，和諧穩定，密切ê對話kah交流。下晡媒體問起伊兩岸論述「兩岸一家人」，kah民眾黨總統參選人柯文哲ê「兩岸一家親」有啥無仝？侯友宜直接批講，柯文哲ê兩岸政策變來變去，講ê話顛顛倒倒。錯了！柯文哲ùi頭到尾tio̍h是一句話「兩岸一家親」。

聽侯友宜án-ne講，咱tio̍h知影伊用tsit句話beh phô͘中國ê尻川，差柯文哲一萬八千里！有新聞媒體講：「兩岸一家親」m̄是柯文哲頭一個講ê。當然！若是柯文哲頭一個講「兩岸一家親」，kah侯友宜講「兩岸一家人」仝款，ná像放屁一聲，無人ē插伊。重要ê是「兩岸一家親」啥人先講ê？習近平。

　　咱知影，2013年十月初六，中國國家主席習近平tī印尼巴厘島參加亞太經濟合作會議 (APEC) 第21届會議，Koh會見蕭萬長ê時，第一遍正式提出「兩岸一家親」ê講法。習近平講：「兩岸雙方應該堅持行兩岸關係和平發展ê正確道路，宣導『兩岸一家親』ê理念，加強交流合作，共同促進中華民族偉大復興。」2014年二月十八，習近平tī北京會見中國國民黨榮譽主席連戰ê時，發表了「共圓中華民族偉大復興ê中國夢」ê重要講話，習近平強調，「希望兩岸雙方秉持『兩岸一家親』ê理念，順勢而為，齊心協力，推動兩岸關係和平發展取得koh khah好ê成果，造福兩岸民眾，共圓中華民族偉大復興ê中國夢。」這是習近平tī新形勢下面對兩岸關係發展所作ê重要koh全面ê論述。

今年正月初二，中國國家主席習近平發表2023新年對台灣賀詞，kah舊年元旦強調ê「一國兩制」無仝，今年kan-taⁿ提起「海峽兩岸一家親」．雖然ná像有khah和緩，但是中共軍機軍艦照常來「親」、來擾亂台灣。咱ùi tsit點māē-tàng看出習近平本人kah中國政府，jōa-nī看重tsit句「兩岸一家親」！

對中國局勢「好鼻師」ê柯文哲足無簡單，2014年十一月二九當選台北市長，翻轉年（2015）八月十七去上海參加「雙城論壇」，tīhia頭一遍講出「兩岸一家親」。伊ná像早早tio̍h鼻出習近平有一工ē作皇帝，柯文哲緊tī上海宣讀「聖旨」。Tī柯文哲宣讀「聖旨」進前，伊當然mā知影咱法務部調查局針對「兩岸一家親」有作過統戰調查報告。柯文哲ê重點是tī台灣一直宣讀習近平ê聖旨「兩岸一家親」，所以才ē得中國惜，tsiah-ni̍h得中國惜ê政客tī台灣tshōe無第二個，莫怪中國hit方面一直beh愛柯文哲選總統。

Án-ne咱tio̍h知：phô͘中國ê尻川愛phô͘ tio̍h位！ (230707)

註：兩岸一家人　　兩岸一家親　　習近平　　海峽兩岸一家親　請唸華語