《綠色短評》

 | | | 轉寄

中國國民黨gōng話講bē suah！

作者 李南衡, TsoânTâijī/全台字 by Tsng Hūiphêng 2023.07.23



Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　 Lí Lâmhêng

　　　 Tiongkok Kokbîntóng gōng ōe kóng bē suah!

Tiongkok Kokbîntóng tsóngthóng tshamsoánjîn Hâu Iúgî tsòikīn ê bîntiāu bô khísik, tshitgue̍h tshepeh, khiok thoântshut Tiongkok Kokbîntóng ànsǹg Kueh Tâibêng tsi loān káugue̍h tiong ē suah, kàusî Kueh Tâibêng nā kui tūi, Hâu Iúgî ê bîntiāu tio̍h ē tòtńglâi kàu tējī, tio̍h ē khaisí kah Kua Bûntiat tâm ha̍ptsok, tsìnhêng hui Le̍k tōa tséngha̍p, jîtshiáⁿ bô pâithik "Hāu Kua phòe". Tiongkok Kokbîntóng kotsàn ùithâu kàubóe ê thāitō͘, tio̍h sī beh ài Bîntsiòngtóng tsóngthóng tshamsoánjîn Kua Bûntiat "bô tiâukiāⁿ tâuhâng", Tiongkok Kokbîntóng bôkhólêng tsiapsiū "Kua Hâu phòe".

Tshitgue̍h tshepeh ēpo͘, Kua Bûntiat tshutse̍k iliâu singki sángia̍p kìⁿbīnhōe koh ū huatpiáu iánkáng. Kìtsiá kā Kua Bûntiat kóng, Tiongkok Kokbîntóng kóng beh ài I "bô tiâukiāⁿ tâuhâng". Kua Bûntiat thiaⁿ·tsi̍tē suah gāng·khì, ba̍ktsiu tián tōatōa lúi tò mn̄g kóng,"bô tiâukiāⁿ tâuhâng?" nátshiūⁿ siongtong tio̍hkiaⁿ. Kìtsiá mn̄g kóng, lí káⁿ ē tâuhâng? Kua Bûntiat suah haha tōatshiò kóng,"Ná ē ánne mn̄g? ‧‧ kuikhì ‧‧mài kóng tshiò." tsiah ko͘h tshiòtshiòá kóng, ē huat line taphok kìtsiá.

Mài kóng Kua Bûntiat púnlâng thiaⁿtio̍h "bô tiâukiāⁿ tâuhâng" ē gāng·khì, lán bô sū lâng thiaⁿtio̍h mā kámkak thiⁿ o͘ tsi̍t pêng. Lán sing lâi liáukái siáⁿmi̍h kiò tsoh "bô tiâukiāⁿ tâuhâng". Siotsiàn sianghong, tsiànsu ê hit pêng ūitio̍h hibāng kiatsok tsiàntsing, ē thêtshut "bô tiâukiāⁿ tâuhâng", íntsún tsiàn iâⁿ hit pêng sûi tsāi ántsóaⁿ tshúlí, beh tsian beh tsú beh ántsóaⁿ koánlí khòngtsè inê tsèngtī kah siāhōe, lóng bô ìkiàn. Tānsī, nāsī khah iâⁿ hit pêng iaukiû tùihong "bô tiâukiāⁿ tâuhâng", ū khólêng ē ínkhí khah su hit pêng bē sóng kah hoânló, tìsú tsiàntsing bô huattō͘ kín kiatsok, tiantò kā tsiàntsing thua tn̂g.

　　 Nā tsiàu tshitgue̍h tshetshit《Hōelâu sinbûn bāng 》kongpò͘ siōng sin 7 gue̍hhūn tsóngthóng tōasoán bîntiāu, tiâutsa kiatkó hiánsī, ha̍ppèng tshīlāi tiānōe kah tshiúkiá ê tōaiūⁿpún tiāutshâ tiong, Bîntsiòngtóng Kua Bûntiat tsitshî tō͘ í 30.8% tit tēit miâ, siókhóa niásing tsitshî tō͘ 29.3% ê Bîntsìntóng Lōa Tshingtik, sianghong tshikū 1.5%, Tiongkok Kokbîntóng Hâu Iúgî phua̍h phòa nn̄g siâⁿ, tsitshî tō͘ kanta 18.5% siōngbóeá miâ.

Hônghái tsi̍pthoân tshòngpānjîn Kueh Tâibêng tsêng tsi̍ttsām thoântshut kóng, iúì "Pēngkò͘ " Bîntsiòngtóng. Tshitgue̍h tshetsa̍p Bîntsiòngtóng tsúse̍k, tsóngthóng tshamsoánjîn Kua Bûntiat tsèngsi̍t, koh kóng Kueh Tâibêng tsòikīn iáu ū phah tiānōe hō͘ i, tānsī i tsi̍tē khòaⁿ sī Kueh Tâibêng, i tio̍hkiaⁿ kah m̄ káⁿ tsiap tiānōe. Ùi tsittiám lán tsaiiáⁿ, Kueh Tâibêng siūⁿ beh kah Kua Bûntiat ha̍ptsok, m̄ sī kiò Kua Bûntiat "bô tiâukiāⁿ tâuhâng", sī tsháitshú " Pēngkò͘ " Bîntsiòngtóng ê hongsik, ìsù sī kóng Kua Bûntiat ētàng the̍h tio̍h tsi̍t tōa pé kho͘ kho͘. Kueh Tâibêng sǹg sī ū sêngì.

　　 Tsiàu Tiongkok Kokbîntóng kakī sóng ê sǹgpôaⁿ ánne phah, kàu bo̍ktsêng ûitsí tsiànkó tēit miâ ê Kua Bûntiat, tio̍h hiòng tsiànkó tēsaⁿ miâ ê Hâu Iúgî "bô tiâukiāⁿ tâuhâng". Tiongkok Kokbîntóng gōngōe kóng bē suah!

　　Khah kîkoài·ê sī, hoānnā tú tio̍h bô boánì ê tāitsì, á·sī thiaⁿtio̍h bô ha̍hì ê ōe tio̍h ē sûisî thiàu khílâi mē lâng ê Kua Bûntiat, tsit piàn Tiongkok Kokbîntóng kā i ánne sé bīn, kiò I "bô tiâukiāⁿ tâuhâng", Kua Bûntiat kèngjiân tiām tsiⁿtsiⁿ. Tsit tiám ū siókhóa kîkoài. 　(230714)


Pe̍h-ōe-jī-pán/白話字版


《 Le̍k-sik toán-phêng 》　 Lí Lâm-hêng

　　　 Tiong-kok Kok-bîn-tóng gōng ōe kóng bē suah!

Tiong-kok Kok-bîn-tóng tsóng-thóng tsham-soán-jîn Hâu Iú-gî tsòe-kīn ê bîn-tiāu bô khí-sik, tshit-gue̍h tshe-peh, khiok thoân-tshut Tiong-kok Kok-bîn-tóng àn-sǹg Kueh Tâi-bêng tsi loān káu-gue̍h tiong ē suah, kàu-sî Kueh Tâi-bêng nā kui tūi, Hâu Iú-gî ê bîn-tiāu tio̍h ē tò-tńg-lâi kàu tē-jī, tio̍h ē khai-sí kah Kua Bûn-tiat tâm ha̍p-tsok, tsìn-hêng hui Le̍k tōa tséng-ha̍p, jî-tshiáⁿ bô pâi-thik "Hāu Kua phòe". Tiong-kok Kok-bîn-tóng ko-tsàn ùi-thâu kàu-bóe ê thāi-tō͘, tio̍h sī beh ài Bîn-tsiòng-tóng tsóng-thóng tsham-soán-jîn Kua Bûn-tiat "bô tiâu-kiāⁿ tâu-hâng", Tiong-kok Kok-bîn-tóng bô-khó-lêng tsiap-siū "Kua Hâu phòe".

Tshit-gue̍h tshe-peh ē-po͘, Kua Bûn-tiat tshut-se̍k i-liâu sing-ki sán-gia̍p kìⁿ-bīn-hōe koh ū huat-piáu ián-káng. Kì-tsiá kā Kua Bûn-tiat kóng, Tiong-kok Kok-bîn-tóng kóng beh ài I "bô tiâu-kiāⁿ tâu-hâng". Kua Bûn-tiat thiaⁿ-·tsi̍t-ē suah gāng-·khì, ba̍k-tsiu tián tōa-tōa lúi tò mn̄g kóng,"bô tiâu-kiāⁿ tâu-hâng?" ná-tshiūⁿ siong-tong tio̍h-kiaⁿ. Kì-tsiá mn̄g kóng, lí káⁿ ē tâu-hâng? Kua Bûn-tiat suah ha-ha tōa-tshiò kóng,"Ná ē án-ne mn̄g? ‧‧ kui-khì ‧‧mài kóng tshiò." tsiah ko͘h tshiò-tshiò-á kóng, ē huat line tap-hok kì-tsiá.

Mài kóng Kua Bûn-tiat pún-lâng thiaⁿ-tio̍h "bô tiâu-kiāⁿ tâu-hâng" ē gāng-·khì, lán bô sū lâng thiaⁿ-tio̍h mā kám-kak thiⁿ o͘ tsi̍t pêng. Lán sing lâi liáu-kái siáⁿ-mi̍h kiò tsoh "bô tiâu-kiāⁿ tâu-hâng". Sio-tsiàn siang-hong, tsiàn-su ê hit pêng ūi-tio̍h hi-bāng kiat-sok tsiàn-tsing, ē thê-tshut "bô tiâu-kiāⁿ tâu-hâng", ín-tsún tsiàn iâⁿ hit pêng sûi tsāi án-tsóaⁿ tshú-lí, beh tsian beh tsú beh án-tsóaⁿ koán-lí khòng-tsè in-ê tsèng-tī kah siā-hōe, lóng bô ì-kiàn. Tān-sī, nā-sī khah iâⁿ hit pêng iau-kiû tùi-hong "bô tiâu-kiāⁿ tâu-hâng", ū khó-lêng ē ín-khí khah su hit pêng bē sóng kah hoân-ló, tì-sú tsiàn-tsing bô huat-tō͘ kín kiat-sok, tian-tò kā tsiàn-tsing thua tn̂g.

　　 Nā tsiàu tshit-gue̍h tshe-tshit《Hōe-lâu sin-bûn bāng 》kong-pò͘ siōng sin 7 gue̍h-hūn tsóng-thóng tōa-soán bîn-tiāu, tiâu-tsa kiat-kó hián-sī, ha̍p-pèng tshī-lāi tiān-ōe kah tshiú-ki-á ê tōa-iūⁿ-pún tiāu-tshâ tiong, Bîn-tsiòng-tóng Kua Bûn-tiat tsi-tshî tō͘ í 30.8% tit tē-it miâ, sió-khóa niá-sing tsi-tshî tō͘ 29.3% ê Bîn-tsìn-tóng Lōa Tshing-tik, siang-hong tshe-kū 1.5%, Tiong-kok Kok-bîn-tóng Hâu Iú-gî phua̍h phòa nn̄g siâⁿ, tsi-tshî tō͘ kan-ta 18.5% siōng-bóe-á miâ.

Hông-hái tsi̍p-thoân tshòng-pān-jîn Kueh Tâi-bêng tsêng tsi̍t-tsām thoân-tshut kóng, iú-ì "Pēng-kò͘ " Bîn-tsiòng-tóng. Tshit-gue̍h tshe-tsa̍p Bîn-tsiòng-tóng tsú-se̍k, tsóng-thóng tsham-soán-jîn Kua Bûn-tiat tsèng-si̍t, koh kóng Kueh Tâi-bêng tsòe-kīn iáu ū phah tiān-ōe hō͘ i, tān-sī i tsi̍t-ē khòaⁿ sī Kueh Tâi-bêng, i tio̍h-kiaⁿ kah m̄ káⁿ tsiap tiān-ōe. Ùi tsit-tiám lán tsai-iáⁿ, Kueh Tâi-bêng siūⁿ beh kah Kua Bûn-tiat ha̍p-tsok, m̄ sī kiò Kua Bûn-tiat "bô tiâu-kiāⁿ tâu-hâng", sī tshái-tshú " Pēng-kò͘ " Bîn-tsiòng-tóng ê hong-sik, ì-sù sī kóng Kua Bûn-tiat ē-tàng the̍h tio̍h tsi̍t tōa pé kho͘ -kho͘. Kueh Tâi-bêng sǹg sī ū sêng-ì.

　　 Tsiàu Tiong-kok Kok-bîn-tóng ka-kī sóng ê sǹg-pôaⁿ án-ne phah, kàu bo̍k-tsêng ûi-tsí tsiàn-kó tē-it miâ ê Kua Bûn-tiat, tio̍h hiòng tsiàn-kó tē-saⁿ miâ ê Hâu Iú-gî "bô tiâu-kiāⁿ tâu-hâng". Tiong-kok Kok-bîn-tóng gōng-ōe kóng bē suah!

　　Khah kî-koài-·ê sī, hoān-nā tú tio̍h bô boán-ì ê tāi-tsì, á-·sī thiaⁿ-tio̍h bô ha̍h-ì ê ōe tio̍h ē sûi-sî thiàu khí-lâi mē lâng ê Kua Bûn-tiat, tsit piàn Tiong-kok Kok-bîn-tóng kā i án-ne sé bīn, kiò I "bô tiâu-kiāⁿ tâu-hâng", Kua Bûn-tiat kèng-jiân tiām tsiⁿ-tsiⁿ. Tsit tiám ū sió-khóa kî-koài. 　(230714)




中國國民黨總統參選人侯友宜最近ê民調無起色，七月初八，卻傳出中國國民黨預計郭台銘之亂九月中ēsuah，到時郭台銘若歸隊，侯友宜ê民調tio̍hē回轉來到第二，tio̍hē開始kah柯文哲談合作，進行非綠大整合，而且無排斥「侯柯配」。中國國民黨高層ùi頭到尾ê態度，tio̍h是beh愛民眾黨總統參選人柯文哲「無條件投降」，中國國民黨無可能接受「柯侯配」。

七月初八下晡，柯文哲出席醫療生技產業見面會koh有發表演講。記者kā柯文哲講，中國國民黨講beh愛伊「無條件投降」。柯文哲聽一下suah gāng去，目睭展大大蕊倒問講：「無條件投降？」ná-tshiūⁿ相當tio̍h驚。記者問講：你敢ē投降？柯文哲suah哈哈大笑講：「Ná ē án-ne問？‧‧歸氣‧‧mài講笑。」才ko͘h笑笑á講，ē發line答覆記者。

Mài講柯文哲本人聽tio̍h「無條件投降」ē gāng去，咱無事人聽tio̍h mā感覺天烏一旁。咱先來瞭解啥物叫作「無條件投降」。相戰雙方，戰輸ê hit pêng為tio̍h希望結朿戰爭，ē提出「無條件投降」，允准戰嬴hit pêng隨在按怎處理，beh煎beh煮beh按怎管理控制in-ê政治kah社會，lóng無意見。但是，若是khah嬴hit pêng要求對方「無條件投降」，有可能ē引起khah輸hit旁bē爽kah煩惱，致使戰爭無法度緊結束，顛倒kā戰爭拖長。

　　若照七月初七《匯流新聞網》公布上新7月份總統大選民調，調查結果顯示，合併市內電話kah手機á ê大樣本調查中，民眾黨柯文哲支持度以30.8%得第一名，小可領先支持度29.3% ê民進黨賴清德，雙方差距1.5%，中國國民黨侯友宜phua̍h破兩成，支持度kan-ta18.5%上尾á名。

鴻海集團創辦人郭台銘前一站傳出講，有意「併購」民眾黨。七月初十民眾黨主席、總統參選人柯文哲證實，koh講郭台銘最近猶有拍打電話hō͘伊，但是伊一下看是郭台銘，伊tio̍h驚kah m̄敢接電話。Ùi tsit點咱知影，郭台銘想beh kah柯文哲合作，m̄是叫柯文哲「無條件投降」，是採取「併購」民眾黨ê方式，意思是講柯文哲ē-tàng the̍h tio̍h一大把箍箍。郭台銘算是有誠意。

　　照中國國民黨家己爽ê算盤án-ne拍，到目前為止戰果第一名ê柯文哲，tio̍h向戰果第三名ê侯友宜「無條件投降」。中國國民黨gōng話講bēsuah！

　　Khah奇怪-·ê是，凡若抵tio̍h無滿意ê代誌，抑是聽tio̍h無合意ê話tio̍hē隨時跳起來罵人ê柯文哲，tsit遍中國國民黨kā伊án-ne洗面、叫伊「無條件投降」，柯文哲竟然恬tsiⁿ-tsiⁿ。Tsit點有小khóa奇怪。　(230714)