《綠色短評》

 | | | 轉寄

好厲害ê翁茂鍾！

作者 李南衡, TsoânTâijī/全台字 by Tsng Hūiphêng 2021.04.25

Tsoânbîn Tâioânjī pán/全民台灣字版簡稱TsoânTâiJī

Hó līhāi ê Ang Bō͘tsiong!

Sìgue̍h tsheit sinbûn pòtō, pùsiong Ang Bō͘tsiong bat inūi ûihoán tsèngkoàn kaue̍khuat tsi̍t àn, hông phòaⁿ tsi̍t nî tô͘hêng khaktēng, king tsún kái ho̍k siāhōe lôtōng káu kògue̍h, ho̍k oân 2,196 siósî lôtōng. Putkò, ū tsi̍tkóa kongbūoân tī i kái ho̍k lôtōng tsiphêng ê sî ū sia̍phiâm higûi tsohké, Lâmkiámsú kináji̍t thôaⁿhoàn tsa̍ptshit miâ sia̍p àn kongbūoân kàu àn, í gūitsō bûnsu tsōe tsingpān. Tsintsē nî tsêng, Ang Bō͘tsiong sia̍phiâm kah kó͘tshī miâtshùi "kó͘tóng Tiuⁿ " Tiuⁿ Sèkiat, tsò hóe tshá tsoh Kahô kó͘phiò, 2012 nî gō͘gue̍h Tsòiko Huatīⁿ í ûihoán tsèngkauhuat phòaⁿ Tiuⁿ Sèkiat tsi̍t nî tsa̍pi̍t kò gue̍h tô͘hêng, phòaⁿ Ang Bō͘tsiong tsi̍t nî tô͘hêng khaktēng. 2012 nî itgue̍h tsì káugue̍h kan, ētàng kā 2,196 siósî ê siāhōe lôtōng tsiphêng oân, kái ho̍k siāhōe lôtōng 6 siósî ētàng tú hêngkî tsi̍t ji̍t, múi ji̍t bēsái tshiaukòe 8 siósî, Ang Bō͘tsiong káu kògue̍h lāi ho̍k oân 2,196 siósî, tsho͘pō͘ ōaⁿsǹg múi ji̍t lôtōng tshiaukòe 8 siósî, liânsòa lôtōng 270 ji̍t, tiongkan bô hiohkhùn tsiah ū pānhuat ta̍tsêng tsitê bôkhólêng ê jīmbū, kongbū kikuan tsiu hiu nn̄g ji̍t pàngká kîkan, thongsiông bē anpâi kái ho̍k siāhōe lôtōng, só͘í kiámhong jīmtēng Ang Bō͘tsiongê tsiphêng soktō͘ siuⁿkòe kín, bô ha̍h siônglí. Liân kanta ūitio̍h ētàng thêtsá tshutga̍k, Ang Bō͘tsiong tio̍h ū huattō͘ tshōa tsa̍ptshit tsiah ba̍ktsiu kô͘ tio̍h lâábah ê pih lo̍hlàm, tsi̍t kōaⁿ ná bahtsàng.

Kóngtio̍h bahtsàng, tsa̍ptshit lia̍p iáu sǹg sī sèkōaⁿ·ê.

Sìgue̍h tshela̍k sinbûn pòtō, Kahô tsi̍pthoân hūtsikjîn Ang Bō͘tsiong kah tsintsē suhuatkuaⁿ kautsêng tsiâⁿ hó, Suhuatīⁿ íking tiâutsa bat kah Ang Bō͘tsiong tsiaptshiok·kòe ê suhuatkuaⁿ tāiiok ū sìtsa̍p ūi, Suhuatīⁿ Jînsū Símgī Úigoânhōe tshegō͘ khaisí símgī, tio̍h ēng saⁿ kang nn̄g mê lâi thólūn, phahphòa Tâioân iúsú ílâi sîkan siōng tn̂g ê kìlio̍k. Suhuatīⁿ tēit pho tiâutsa íking tī itgue̍h tsa̍ppeh kongpò͘, tongsî ū sàng tshitūi huatkuaⁿ khì Jînsímhōe símgī, tsòeāu la̍k ūi sàng Kàmtshatīⁿ; lēnggōa tsa̍pjī ūi tsêngtsat khahkhin, goânpún ingkai hêngtsèng tshúhua̍t, tānsī inūi ûisit sîkan tiám tshiaukòe gō͘ nî, íking tshiaukòe sîhāu, tsòeāu bô siū tshùhūn. Tsit piàn sī tējī pho tiâutsa, Suhuatīⁿ kuattēng kah tēit pho bô siū tshúhua̍t ê tsa̍pjī ūi, tsòhóe sàngkau Jînsímhōe símgī, só͘í tsóng jînsò͘ tsiah ē ū sìtsa̍p ūi.

　　 Lēnggōa, ū gō͘ ūi tōahuatkuaⁿ bat tshuthiān tī Ang Bō͘tsiong ê "kìsū phō͘" lāi, tānsī inūi tōahuatkuaⁿ tsióngtêng pēng m̄ sī Jînsímhōe só͘ ētàng kuattēng·ê, tsòeāu kau hō͘ Suhuatīⁿ tiúⁿ kiam Tōahuatkuaⁿ hōegī tsúse̍k Khó͘ Tsongle̍k tshinsin tiàukhui tōahuatkuaⁿ tsūlu̍t ioktâm, kîtiong ū tsi̍t ūi íking kòesin, só͘í kanta ū sì ūi tōahuatkuaⁿ ē kàu tōahuatkuaⁿ hōegī suatbêng.

Phángtsit pùsiong Ang Bō͘tsiong bat í iànkheh, sàng saⁿ, kah tsi̍tkóa kiámtshatkuaⁿ, kéngtshat, tiâutsa jînoân, suhuat jînoân bô tsèngtong ê kauóng, līhāi ê só͘tsāi sī siáⁿmi̍h sîkan, tī siáⁿmi̍h só͘tsāi, kah siáⁿmi̍h siáⁿmi̍h lâng tsòhóe tsia̍hpn̄g limtsiú, sàng siáⁿmi̍h lémi̍h, lóngtsóng kì tī i kúitsa̍p pún ê " kìsū phó͘" lāité, kéngkuaⁿ tsi̍t tōa kōaⁿ, kiámtshatkuaⁿ tsi̍t tōa kōaⁿ, tiâutsa jînoân tsi̍t tōa kōaⁿ, suhuatkuaⁿ tsi̍t tōa kōaⁿ, liân tōahuatkuaⁿ mā tsi̍t kōaⁿ.

Hó līhāi ê Ang Bō͘tsiong lâi tsò siáⁿ siōng sikha̍p? Nā lâi khui bahtsàng tiàm ittēng ē tsin se̍ktshiú! 　(210416)

Pe̍h-ōe-jī-pán/白話字版


Hó lī-hāi ê Ang Bō͘-tsiong!

Sì-gue̍h tshe-it sin-bûn pò-tō, pù-siong Ang Bō͘-tsiong bat in-ūi ûi-hoán tsèng-koàn kau-e̍k-huat tsi̍t àn, hông phòaⁿ tsi̍t nî tô͘-hêng khak-tēng, king tsún kái ho̍k siā-hōe lô-tōng káu kò-gue̍h, ho̍k oân 2,196 sió-sî lô-tōng. Put-kò, ū tsi̍t-kóa kong-bū-oân tī i kái ho̍k lô-tōng tsip-hêng ê sî ū sia̍p-hiâm hi-gûi tsoh-ké, Lâm-kiám-sú kin-á-ji̍t thôaⁿ-hoàn tsa̍p-tshit miâ sia̍p àn kong-bū-oân kàu àn, í gūi-tsō bûn-su tsōe tsing-pān. Tsin-tsē nî tsêng, Ang Bō͘-tsiong sia̍p-hiâm kah kó͘-tshī miâ-tshùi "kó͘-tóng Tiuⁿ " Tiuⁿ Sè-kiat, tsò -hóe tshá tsoh Ka-hô kó͘-phiò, 2012 nî gō͘-gue̍h Tsòe-ko Huat-īⁿ í ûi-hoán tsèng-kau-huat phòaⁿ Tiuⁿ Sè-kiat tsi̍t nî tsa̍p-i̍t kò gue̍h tô͘-hêng, phòaⁿ Ang Bō͘-tsiong tsi̍t nî tô͘-hêng khak-tēng. 2012 nî it-gue̍h tsì káu-gue̍h kan, ē-tàng kā 2,196 sió-sî ê siā-hōe lô-tōng tsip-hêng oân, kái ho̍k siā-hōe lô-tōng 6 sió-sî ē-tàng tú hêng-kî tsi̍t ji̍t, múi ji̍t bē-sái tshiau-kòe 8 sió-sî, Ang Bō͘-tsiong káu kò-gue̍h lāi ho̍k oân 2,196 sió-sî, tsho͘-pō͘ ōaⁿ-sǹg múi ji̍t lô-tōng tshiau-kòe 8 sió-sî, liân-sòa lô-tōng 270 ji̍t, tiong-kan bô hioh-khùn tsiah ū pān-huat ta̍t-sêng tsit-ê bô-khó-lêng ê jīm-bū, kong-bū ki-kuan tsiu hiu nn̄g ji̍t pàng-ká kî-kan, thong-siông bē an-pâi kái ho̍k siā-hōe lô-tōng, só͘-í kiám-hong jīm-tēng Ang Bō͘-tsiongê tsip-hêng sok-tō͘ siuⁿ-kòe kín, bô ha̍h siông-lí. Liân kan-ta ūi-tio̍h ē-tàng thê-tsá tshut-ga̍k, Ang Bō͘-tsiong tio̍h ū huat-tō͘ tshōa tsa̍p-tshit tsiah ba̍k-tsiu kô͘ tio̍h lâ-á-bah ê pih lo̍h-làm, tsi̍t kōaⁿ ná bah-tsàng.

Kóng-tio̍h bah-tsàng, tsa̍p-tshit lia̍p iáu sǹg sī sè-kōaⁿ-·ê.

Sì-gue̍h tshe-la̍k sin-bûn pò-tō, Ka-hô tsi̍p-thoân hū-tsik-jîn Ang Bō͘-tsiong kah tsin-tsē su-huat-kuaⁿ kau-tsêng tsiâⁿ hó, Su-huat-īⁿ í-king tiâu-tsa bat kah Ang Bō͘-tsiong tsiap-tshiok-·kòe ê su-huat-kuaⁿ tāi-iok ū sì-tsa̍p ūi, Su-huat-īⁿ Jîn-sū Sím-gī Úi-goân-hōe tshe-gō͘ khai-sí sím-gī, tio̍h ēng saⁿ kang nn̄g mê lâi thó-lūn, phah-phòa Tâi-oân iú-sú í-lâi sî-kan siōng tn̂g ê kì-lio̍k. Su-huat-īⁿ tē-it pho tiâu-tsa í-king tī it-gue̍h tsa̍p-peh kong-pò͘, tong-sî ū sàng tshit-ūi huat-kuaⁿ khì Jîn-sím-hōe sím-gī, tsòe-āu la̍k ūi sàng Kàm-tshat-īⁿ; lēng-gōa tsa̍p-jī ūi tsêng-tsat khah-khin, goân-pún ing-kai hêng-tsèng tshú-hua̍t, tān-sī in-ūi ûi-sit sî-kan tiám tshiau-kòe gō͘ nî, í-king tshiau-kòe sî-hāu, tsòe-āu bô siū tshù-hūn. Tsit piàn sī tē-jī pho tiâu-tsa, Su-huat-īⁿ kuat-tēng kah tē-it pho bô siū tshú-hua̍t ê tsa̍p-jī ūi, tsò-hóe sàng-kau Jîn-sím-hōe sím-gī, só͘-í tsóng jîn-sò͘ tsiah ē ū sì-tsa̍p ūi.

　　 Lēng-gōa, ū gō͘ ūi tōa-huat-kuaⁿ bat tshut-hiān tī Ang Bō͘-tsiong ê "kì-sū phō͘" lāi, tān-sī in-ūi tōa-huat-kuaⁿ tsióng-têng pēng m̄ sī Jîn-sím-hōe só͘ ē-tàng kuat-tēng-·ê, tsòe-āu kau hō͘ Su-huat-īⁿ tiúⁿ kiam Tōa-huat-kuaⁿ hōe-gī tsú-se̍k Khó͘ Tsong-le̍k tshin-sin tiàu-khui tōa-huat-kuaⁿ tsū-lu̍t iok-tâm, kî-tiong ū tsi̍t ūi í-king kòe-sin, só͘-í kan-ta ū sì ūi tōa-huat-kuaⁿ ē kàu tōa-huat-kuaⁿ hōe-gī suat-bêng.

Pháng-tsit pù-siong Ang Bō͘-tsiong bat í iàn-kheh, sàng saⁿ, kah tsi̍t-kóa kiám-tshat-kuaⁿ, kéng-tshat, tiâu-tsa jîn-oân, su-huat jîn-oân bô tsèng-tong ê kau-óng, lī-hāi ê só͘-tsāi sī siáⁿ-mi̍h sî-kan, tī siáⁿ-mi̍h só͘-tsāi, kah siáⁿ-mi̍h siáⁿ-mi̍h lâng tsò-hóe tsia̍h-pn̄g lim-tsiú, sàng siáⁿ-mi̍h lé-mi̍h, lóng-tsóng kì tī i kúi-tsa̍p pún ê " kì-sū phó͘" lāi-té, kéng-kuaⁿ tsi̍t tōa kōaⁿ, kiám-tshat-kuaⁿ tsi̍t tōa kōaⁿ, tiâu-tsa jîn-oân tsi̍t tōa kōaⁿ, su-huat-kuaⁿ tsi̍t tōa kōaⁿ, liân tōa-huat-kuaⁿ mā tsi̍t kōaⁿ.

Hó lī-hāi ê Ang Bō͘-tsiong lâi tsò siáⁿ siōng sik-ha̍p? Nā lâi khui bah-tsàng tiàm it-tēng ē tsin se̍k-tshiú! 　(210416)


四月初一新聞報導：富商翁茂鍾bat因為違反證券交易法一案，hông判一年徒刑確定，經准改服社會勞動九個月，服完2,196小時勞動。不過，有一寡公務員tī伊改服勞動執行ê時有涉嫌虛偽作假，南檢署今á日傳喚十七名涉案公務員到案，以偽造文書罪偵辦。真tsē年前，翁茂鍾涉嫌kah股市名嘴「古董張」張世傑，做夥炒作佳和股票，2012年五月最高法院以違反證交法判張世傑一年十一個月徒刑，判翁茂鍾一年徒刑確定。2012年一月至九月間，會tàng kā 2,196小時ê社會勞動執行完，改服社會勞動6小時ē-tàng抵刑期一日，每日bē-sái超過8小時，翁茂鍾九個月內服完2,196小時，初步換算每日勞動超過8小時，連續勞動270日，中間無歇睏才有辦法達成tsit-ê無可能ê任務，公務機關週休兩日放假期間，通常bē安排改服社會勞動，所以檢方認定翁茂鍾ê執行速度siuⁿ過緊，無合常理。連kan-ta為tio̍hē-tàng提早出獄，翁茂鍾tio̍h有法度tshōa十七隻目睭糊tio̍h 蜊á肉ê鼈落坔（làm），一kōaⁿ若肉粽。

講tio̍h肉粽，十七粒猶算是細kōaⁿ-·ê。

　　四月初六新聞報導，佳和集團負責人翁茂鍾kah真tsē司法官交情誠好，司法院已經調查bat kah翁茂鍾接觸過ê司法官大約有四十位，司法院人事審議委員會初五開始審議，tio̍h用三工兩暝來討論，拍破台灣有史以來時間上長ê紀錄。司法院第一波調查已經tī 一月十八公布，當時有送七位法官去人審會審議，最後六位送監察院；另外十二位情節khah輕，原本應該行政處罰，但是因為違失時間點超過五年，已經超過時效，最後無受處分。Tsit遍是第二波調查，司法院決定kah第一波無受處罰ê十二位，做夥送交人審會審議，所以總人數才ē有四十位。

　　另外，有五位大法官bat出現tī翁茂鍾ê「記事簿」內，但是因為大法官獎懲並m̄是人審會所ē-tàng決定ê，最後交hō͘司法院長兼大法官會議主席許宗力親身召開大法官自律約談，其中有一位已經過身，所以kan-ta有四位大法官ē到大法官會議說明。

紡織富商翁茂鍾bat以宴客、送衫，kah一寡檢察官、警察、調查人員、司法人員無正當ê交往，厲害ê所在是啥物時間、tī啥物所在、kah啥物啥物人做夥食飯lim酒、送啥物禮物，lóng總記tī伊幾十本ê「記事簿」內底，警官一大kōaⁿ、檢察官一大kōaⁿ、調查人員一大kōaⁿ、司法官一大kōaⁿ，連大法官mā一kōaⁿ。

好厲害ê翁茂鍾來做啥上適合？若來開肉粽店一定ē真熟手！　(210416)