《綠色短評》

 | | | 轉寄

Kā「中華民國」hit頂「ē變ân ê頭kho͘」pak掉！

作者 李南衡, TsoânTâijī/全台字 by Tsng Hūiphêng 2021.05.02

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　　　　　　　　　　　　　　 Lí Lâmhêng 　　　　　
Kā "Tionghôa Bînkok" hit téng "ē piàn ân ê thâukho͘" pak tiāu!

Bat khòaⁿkòe 《 Seiûkì 》tsit pún tsheh ê lâng, lóng ittēng tùi Sun Ngō͘khong thâukhak téng hit téng "ē piàn ân ê thâukho͘ " ìnsiōng tsiâⁿ tshim. Hōngbēng tsi̍tlō͘ póhō͘ Samtsiōng khì Ìntō͘ tshú king ê Sun Ngō͘khong búgē kokiông, tānsī nā siókhóa bô sūn Santsōng ê ì, Santsōng tio̍h ē sûisî liām "ân kho͘ tsó͘", “omnibeimeihóng”, i jú liām thâukho͘ tio̍h ē jú ân, Sun Ngō͘khong ê thâu tio̍h ē jú thiàⁿ, thiàⁿ kah kiò m̄ káⁿ. Goânlâi Kuanim Jûlâihu̍t tsaiiáⁿ Sun Ngō͘khong ài súi, the̍h tsi̍t téng hue bōá siâⁿ i, Sun Ngō͘khong khòaⁿtio̍h sûisî the̍h khílâi tì, i tongjiân m̄tsaiiáⁿ bōá lāité tshàng tsi̍tê "ē piàn ân ê thâukho͘", tì lo̍hkhì ê sî bô te̍kpia̍t kámkak, ittàn tì lo̍hkhì tio̍h pak bē lo̍hlâi.

　　1971 nî tsa̍pgue̍h jīgō͘, tē 26 kài Liânha̍pkok tāihōe téngbīn, tsiū Alupania téng 23 kok thêàn"hueho̍k Tionghôa Jînbîn Kiōnghôkok tī Liânha̍pkok tso͘tsit tiong ê ha̍phuat khoânlī būntê "tsìnhêng piáukuat, Liânha̍pkok tāihōe tē 2758 hō kuatgī, thongkòe ê kuatgī lāṳông tiōngtiám sī, sêngjīn Tionghôa Jînbîn Kiōnghôkok tsènghú sī Tiongkok tī Liânha̍pkok tso͘tsit ê îit ha̍phuat tāipiáu, jîtshiáⁿ sûisî kā Tsiúⁿ Κàitsio̍h ê tāipiáu ùi i tī Liânha̍pkok tso͘tsit kah só͘ sio̍k ittshè kikò͘ tiong só͘ huihuat tsiàmniá ê se̍kūi kóaⁿ tshut khì. Tsū ánne, Tiongkok tùi Tâioân kakī tì ê hit téng "Tionghôa Bînkok" "ē piàn ân ê thâukho͘"tsiok huaⁿhí, Tiongkok nā bēsóng, i tio̍h liām"ân kho͘ tsó͘", “tsi̍tê Tiongkok”, Tâioân thâukhak tio̍h thiàⁿ·sí, bētàng tī koktsè siāhōe tshunkha tshuttshiú, bētàng tshamka Liânha̍pkok siongkuan ê koktsè tso͘tsit, tsin tsē kokka m̄káⁿ kah Tâioân kiànkau.

　　 Bíkok sîkan sìgue̍h tsa̍pkáu, iû Bíkok Tsiònggīīⁿ Gōakau Úigoânhōe Athài siótso͘ Bîntsútóng tsik tsúse̍k Bela(Ami Bera) , Kiōnghôtóng tsèng Gīoân Khòtisu(Joⁿh Curtis), Tsiònggīīⁿ "Kokhōe Tâioân Liânsòaⁿ" sì ūi kiōngtông tsúse̍k Siahpò(Steve Tsabot), Silesu(Albio Sires), TiaPála̍t(Mario DiazBalart) kah Konnoli(Gerald Connolly) kiōngtông thêtshut "Tâioân Koktsè Thoânkiat Huatàn", huatàn tsítshut, Liânha̍pkok tē 2758 hō kuatgī pēng bô tshúlí Tâioân kah Tâioân jînbîn tī Liânha̍pkok ah sī tsiupiⁿ tso͘tsit tāipiáu koân ê būntê, mā bô tī Tionghôa Jînbîn Kiōnghôkok kah Tâioân kuanhē téngbīn tsháitshú siáⁿ khoán ê li̍ptiûⁿ, ah sī pauhâm jīmhô iúkuan Tâioân tsúkoân ê singbêng. Huatàn piáusī, Bíhong hoántùi jīmhô bô Tâioân jînbîn tôngì hē, siūⁿ beh káipiàn Tâioân tēūi ê tshiònggī; huatàn í "Kokhōe ìkiàn" piáusī, Bíkok tsènghú ingkai kó͘lē bêngiú tângphōaⁿ, hoántùi Tiongkok siahjio̍k Tâioân kah pangkaukok, hui pangkaukok ê kuanhē. Huatàn iaukiû Bíkok Kokbūkhing tī nîtō͘ pòkò tiong, siôngsè kóng Tiongkok kòikhì, hiāntsāi tī koktsè tso͘tsit tiong, ū tsò siáⁿmi̍h siahjio̍k Tâioân hōeoân ahsī kuantshatoân sinhūn ê tsokûi.

　　 Liânha̍pkok tē 2758 hō kuatgī jī thâu jībóe lóng bô kóngtio̍h Tâioân kah Tâioân jînbîn, lán ingkai kóaⁿkín kakī pak tiāu"Tionghôa Bînkok" hit téng "ē piàn ân ê thâukho͘". Tiongkok nā koh liām "ân kho͘ tsó͘ " : “tsi̍tê Tiongkok”, kah lán Tâioân, Tâioân lâng bô kuanhē, thâukhak bē thiàⁿ, Tâioân ē tsiok khinsang.

　　 Lán tsátsá tio̍h ingkai kā "Tionghôa Bînkok" hit téng "ē piàn ân ê thâukho͘" pak tiāu! (210423)
Tsù, Bíkok kokhōe gīoân () lāi ê goânmiâ bián liām

Pe̍h-ōe-jī-pán/白話字版
　　　Kā "Tiong-hôa Bîn-kok" hit téng "ē piàn ân ê thâu-kho͘" pak tiāu!

Bat khòaⁿ-kòe 《 Se-iû-kì 》tsit pún tsheh ê lâng, lóng it-tēng tùi Sun Ngō͘-khong thâu-khak téng hit téng "ē piàn ân ê thâu-kho͘ " ìn-siōng tsiâⁿ tshim. Hōng-bēng tsi̍t-lō͘ pó-hō͘ Sam-tsiōng khì Ìn-tō͘ tshú king ê Sun Ngō͘-khong bú-gē ko-kiông, tān-sī nā sió-khóa bô sūn San-tsōng ê ì, San-tsōng tio̍h ē sûi-sî liām "ân kho͘ tsó͘", “om-ni-bei-mei-hóng”, i jú liām thâu-kho͘ tio̍h ē jú ân, Sun Ngō͘-khong ê thâu tio̍h ē jú thiàⁿ, thiàⁿ kah kiò m̄ káⁿ. Goân-lâi Kuan-im Jû-lâi-hu̍t tsai-iáⁿ Sun Ngō͘-khong ài súi, the̍h tsi̍t téng hue bō-á siâⁿ i, Sun Ngō͘-khong khòaⁿ-tio̍h sûi-sî the̍h khí-lâi tì, i tong-jiân m̄-tsai-iáⁿ bō-á lāi-té tshàng tsi̍t-ê "ē piàn ân ê thâu-kho͘", tì lo̍h-khì ê sî bô te̍k-pia̍t kám-kak, it-tàn tì lo̍h-khì tio̍h pak bē lo̍h-lâi.

　　1971 nî tsa̍p-gue̍h jī-gō͘, tē 26 kài Liân-ha̍p-kok tāi-hōe téng-bīn, tsiū Alupania téng 23 kok thê-àn"hue-ho̍k Tiong-hôa Jîn-bîn Kiōng-hô-kok tī Liân-ha̍p-kok tso͘-tsit tiong ê ha̍p-huat khoân-lī būn-tê "tsìn-hêng piáu-kuat, Liân-ha̍p-kok tāi-hōe tē 2758 hō kuat-gī, thong-kòe ê kuat-gī lāi-iông tiōng-tiám sī, sêng-jīn Tiong-hôa Jîn-bîn Kiōng-hô-kok tsèng-hú sī Tiong-kok tī Liân-ha̍p-kok tso͘-tsit ê î-it ha̍p-huat tāi-piáu, jî-tshiáⁿ sûi-sî kā Tsiúⁿ Κài-tsio̍h ê tāi-piáu ùi i tī Liân-ha̍p-kok tso͘-tsit kah só͘ sio̍k it-tshè ki-kò͘ tiong só͘ hui-huat tsiàm-niá ê se̍k-ūi kóaⁿ tshut khì. Tsū án-ne, Tiong-kok tùi Tâi-oân ka-kī tì ê hit téng "Tiong-hôa Bîn-kok" "ē piàn ân ê thâu-kho͘"tsiok huaⁿ-hí, Tiong-kok nā bē-sóng, i tio̍h liām"ân kho͘ tsó͘", “tsi̍t-ê Tiong-kok”, Tâi-oân thâu-khak tio̍h thiàⁿ-·sí, bē-tàng tī kok-tsè siā-hōe tshun-kha tshut-tshiú, bē-tàng tsham-ka Liân-ha̍p-kok siong-kuan ê kok-tsè tso͘-tsit, tsin tsē kok-ka m̄-káⁿ kah Tâi-oân kiàn-kau.

　　 Bí-kok sî-kan sì-gue̍h tsa̍p-káu, iû Bí-kok Tsiòng-gī-īⁿ Gōa-kau Úi-goân-hōe A-thài sió-tso͘ Bîn-tsú-tóng tsik tsú-se̍k Bela(Ami Bera) , Kiōng-hô-tóng tsèng Gī-oân Khò-ti-su(Joⁿh Curtis), Tsiòng-gī-īⁿ "Kok-hōe Tâi-oân Liân-sòaⁿ" sì ūi kiōng-tông tsú-se̍k Siah-pò(Steve Tsabot), Silesu(Albio Sires), Tia-Pá-la̍t(Mario Diaz-Balart) kah Kon-no-li(Gerald Connolly) kiōng-tông thê-tshut "Tâi-oân Kok-tsè Thoân-kiat Huat-àn", huat-àn tsí-tshut, Liân-ha̍p-kok tē 2758 hō kuat-gī pēng bô tshú-lí Tâi-oân kah Tâi-oân jîn-bîn tī Liân-ha̍p-kok ah sī tsiu-piⁿ tso͘-tsit tāi-piáu koân ê būn-tê, mā bô tī Tiong-hôa Jîn-bîn Kiōng-hô-kok kah Tâi-oân kuan-hē téng-bīn tshái-tshú siáⁿ khoán ê li̍p-tiûⁿ, ah sī pau-hâm jīm-hô iú-kuan Tâi-oân tsú-koân ê sing-bêng. Huat-àn piáu-sī, Bí-hong hoán-tùi jīm-hô bô Tâi-oân jîn-bîn tông-ì hē, siūⁿ beh kái-piàn Tâi-oân tē-ūi ê tshiòng-gī; huat-àn í "Kok-hōe ì-kiàn" piáu-sī, Bí-kok tsèng-hú ing-kai kó͘-lē bêng-iú tâng-phōaⁿ, hoán-tùi Tiong-kok siah-jio̍k Tâi-oân kah pang-kau-kok, hui pang-kau-kok ê kuan-hē. Huat-àn iau-kiû Bí-kok Kok-bū-khing tī nî-tō͘ pò-kò tiong, siông-sè kóng Tiong-kok kòe-khì, hiān-tsāi tī kok-tsè tso͘-tsit tiong, ū tsò siáⁿ-mi̍h siah-jio̍k Tâi-oân hōe-oân ah-sī kuan-tshat-oân sin-hūn ê tsok-ûi.

　　 Liân-ha̍p-kok tē 2758 hō kuat-gī jī thâu jī-bóe lóng bô kóng-tio̍h Tâi-oân kah Tâi-oân jîn-bîn, lán ing-kai kóaⁿ-kín ka-kī pak tiāu"Tiong-hôa Bîn-kok" hit téng "ē piàn ân ê thâu-kho͘". Tiong-kok nā koh liām "ân kho͘ tsó͘ " : “tsi̍t-ê Tiong-kok”, kah lán Tâi-oân, Tâi-oân lâng bô kuan-hē, thâu-khak bē thiàⁿ, Tâi-oân ē tsiok khin-sang.

　　 Lán tsá-tsá tio̍h ing-kai kā "Tiong-hôa Bîn-kok" hit téng "ē piàn ân ê thâu-kho͘" pak tiāu! (210423)
Tsù, Bí-kok kok-hōe gī-oân () lāi ê goân-miâ bián liām

　　　　　Kā「中華民國」hit頂「ē變ân ê頭kho͘」pak掉！

Bat看過《西遊記》tsit本冊ê人，lóng一定對孫悟空頭殼頂hit頂「ē變ân ê頭kho͘」印象誠深。奉命一路保護三藏去印度取經ê孫悟空武藝高強，但是nā小khóa無順三藏ê意，三藏tio̍hē隨時唸「ân kho͘咒」：“om-ni-bei-mei-hóng”，伊jú唸頭kho͘ tio̍hējú ân，孫悟空ê頭tio̍hējú疼，疼kah叫m̄敢。原來觀音如來佛知影孫悟空愛súi，the̍h一頂花帽á siâⁿ伊，孫悟空看tio̍h隨時the̍h起來戴，伊當然m̄知影帽á內底藏一個「ē變ân ê頭kho͘」，戴落去ê時無特別感覺，一旦戴落去tio̍h pak bē落來。

　　1971年十月二五，第26屆聯合國大會頂面，就Alupania等23國提案「恢復中華人民共和國tī聯合國組織中ê合法權利問題」進行表決，聯合國大會第2758號決議，通過ê決議內容重點是：承認中華人民共和國政府是中國tī聯合國組織ê唯一合法代表，而且隨時kā蔣介石ê代表ùi伊tī聯合國組織kah所屬一切機構中所非法佔領ê席位趕出去。自按呢，中國對台灣家己戴êhit頂「中華民國」「ē變ân ê頭kho͘」足歡喜，中國nābē爽，伊tio̍h唸「ân kho͘咒」：“tsi̍t-ê Tiong-kok”，台灣頭殼tio̍h疼死，bē-tàngtī國際社會伸腳出手，bē-tàng參加聯合國相關ê國際組織，真tsē國家m̄敢kah台灣建交。

　　美國時間四月十九，由美國眾議院外交委員會亞太小組民主黨籍主席Bela（Ami Bera）、共和黨眾議員Khò-ti-su（John Curtis）、眾議院「國會台灣連線」四位共同主席Siah-pò（Steve Tsabot）、Silesu（Albio Sires）、Tia-Pá-la̍t（Mario Diaz-Balart）kah Kon-no-li（Gerald Connolly）共同提出「台灣國際團結法案」，法案指出，聯合國第2758號決議並無處理台灣kah台灣人民tī聯合國ah是周邊組織代表權ê問題，mā無tī中華人民共和國kah台灣關係頂面採取啥款ê立場，ah是包含任何有關台灣主權ê聲明。法案表示，美方反對任何無台灣人民同意下，想beh改變台灣地位ê倡議；法案以「國會意見」表示，美國政府應該鼓勵盟友同伴，反對中國削弱台灣kah邦交國、非邦交國ê關係。法案要求美國國務卿tī年度報告中，詳細講中國過去、現在tī國際組織中，有做啥物削弱台灣會員ah是觀察員身分ê作為。

　　聯合國第2758號決議字頭字尾lóng無講tio̍h台灣kah台灣人民，咱應該趕緊家己pak掉「中華民國」hit頂「ē變ân ê頭kho͘」。中國nākoh唸「ân kho͘咒」:“tsi̍t-ê Tiong-kok”，kah咱台灣、台灣人無關係，頭殼bē疼，台灣ē足輕鬆。

　　咱早早tio̍h應該kā「中華民國」hit頂「ē變ân ê頭kho͘」pak掉！ (210423)
註：美國國會議員（）內ê原名免唸