《綠色短評》

 | | | 轉寄

「在野大聯盟」、「執政大聯盟」是啥物碗糕？

作者 李南衡, TsoânTâijī/全台字 by Tsng Hūiphêng 2023.08.06




Tsoânbîn Tâioânjī pán/全民台灣字版簡稱TsoânTâiJī

《 le̍ksik toánphêng》　　 Lí Lâmhêng

　　　　"Tsāṳá tōa liânbêng","Tsiptsèng tōa liânbêng" sī siáⁿmi̍h óaⁿko ?

Tshitgue̍h jīsaⁿ, Tiongkok Kokbîntóng tsoânkok tāipiáu tāihōe, tóngtsúse̍k Tsu Li̍plûn suanpò͘, tsit piàn tsóngthóng tōa soán Tiongkok Kokbîntóng beh thoânkiat só͘ū hui Le̍k ê pêngiú kiōng tso͘ "tōa tôngbêng","Tsāṳá tōa liânbêng", bīlâi Tiongkok Kokbîntóng koh tò tńglâi tsiptsèng liáuāu, koh beh kah ta̍kê kiōngtông kiànli̍p tsi̍tê hôpêng, antēng, kongpêⁿ, tsènggī ê "tsiptsèng tōa liânbêng", kiōngtông kā Tâioân péng· kòelâi, hō͘ Tâioân koh khah hó.

Tshitgue̍h jīgō͘, Tiongkok Kokbîntóng tsóngthóng tshamsoánjîn Hāu Iúgî kēngsoán pānkongsik tsiphêngtiúⁿ金溥聰siū hóngbūn ê sî kóng, oântsoân m̄ tsaiiáⁿ siáⁿmi̍h sī "tsiptsèng tōa liânbêng", i kóng, i kah Hāu Iúgî lóng m̄ tsai tsit hāng tāitsì, i mā tùi Tsu tsúse̍k hutjiânkan tàn tshut tsit ê sin miâsû kámkak kîkoài. Hit ēpo͘ Tiongkok Kokbîntóng huatgiânjîn Iûⁿ Tìû to̍h hôeèng kóng, Tsu Li̍plûn tsúse̍k tī tsoântāihōe thêkhí "tsiptsèng tōa liânbêng" ê kài liām, tio̍hsī beh thoânkiat só͘ū hoān Nâ, hui Le̍k, tsāṳá ê le̍kliōng, iā tio̍hsī kiatha̍p só͘ū líliām kāngkhoán ê le̍kliōng, oânsêng hō͘ Bîntsìntóng lo̍htâi, tsèngtóng lûnthè ê bo̍kphiau.

Tiongkok Kokbîntóng huatgiânjîn ánne káisueh, m̄tsai thâunáu itliû ê 金小刀 thiaⁿ ū ah bô? tshiūⁿ goán tsit tsióng phó͘thong lâng si̍ttsāi sī thiaⁿ bô. Tàuté sī tōa soán tsêng beh "tsāṳá tōa liânbêng"? ah sī tōasoán liáu tsiah beh "tsiptsèng tōa liânbêng" leh? nāsī tōasoán tsêng beh "tsāṳá tōa liânbêng", tàuté beh ántsóaⁿ liân ántsóaⁿ bêng? káⁿ ū kah Bîntsiòngtóng tsúse̍k Kua Bûntiat kóng tsi̍tsiaⁿ? bô. Tsu Li̍plûn tsúse̍k kóng Kua Bûntiat tsúse̍k tsin bôêng. Bo̍ktsêng Kua Bûntiat ê bîntiāu sī iâⁿ kòe Tiongkok Kokbîntóng ê Hāu Iúgî, ná ēsái bô kah lâng kóng ·tsi̍tsiaⁿ to̍h beh kah lâng "tsāṳá tōa liânbêng"? Nâ iâⁿ phó͘soán jînsū ū thánpe̍k kóng, hiān kaitōaⁿ soán tsêng ha̍ptsok khongkan bô tōa, kantaⁿ ū khólêng tshuthiān tī soán āu ê Li̍phuatīⁿ. Ánne "tsāṳá tōa liânbêng" sī siáⁿmi̍h óaⁿko ?

　　 Bo̍ktsêng tsāṳá sèle̍k tējī tōa ê Bîntsiòngtóng tsúse̍k Kua Bûntiat jīnûi, hiāntsāi kokhōe 3 tóng lóng bô kòe pòaⁿ ê kilu̍t tsiâⁿ koân, i iûgoân kámkak, kèta̍t, tsèngtshik, líliām saⁿ hāng lóng ē ha̍h tsiah ū pānhuat ha̍ptsok.

　　 Tiongkok Kokbîntóng tsúse̍k Tsu Li̍plûn "tōa liânbêng"ê siūⁿhuat sī ùi tóūi lâi ê?

　　 La̍kgue̍h tsa̍pgō͘, Tiongkok Kokbîntóng Tâipak tshī gīoân, tsit piàn Tāiankhu li̍púi tshamsoánjîn Lô Tìkiông piáusī,I beh tiûpī tso͘tsit "tsèngtóng lûnthè tōa liânbêng", tùikhòng Le̍k iâⁿ ké bîntsú tōa liânbêng, jîtshiáⁿ jīnûi tsāṳátóng tio̍h tshiú khan tshiú ha̍ptsok, siáⁿ lâng tsoh tsóngthóng sī tshùiàu būntê; i mā kiôngtiāu, i bô kóng bô tsitshî Tiongkok Kokbîntóng tsóngthóng tshamsoánjîn Hāu Iúgî, siōng tiōngiàu·ê bo̍kphiau sī tsèngtóng lûnthè. Nā tsiàu Lô Tìkiông ê kónghuat, soán tsêng nā itti̍t îtshî hiāntshúsî ê bîntiāu piáuhiān, kàusî tongjiân tio̍h ē khì Hāu Iúgî pó Kua Bûntiat. Bo̍kkoài ínkhí Nâ iâⁿ lāipō͘ pō͘hūn jînsū kā i tèng kah tshàuthâu. Tējī kang, Lô Tìkiông tī bīntsheh téngbīn huattshut tōkhiam singbêng, goânpún ītēng ê kìtsiáhōe mā tshúsiau.

　　 Tiongkok Kokbîntóng tsúse̍k Tsu Li̍plûn kóng beh thoânkiat só͘ū hui Le̍k ê pêngiú kiōng tso͘ "tsāṳá tōa liânbêng","tsiptsèng tōa liânbêng". Tse tàuté sī siáⁿmi̍h óaⁿ ko? Mài kóng 金小刀 m̄tsai siáⁿ ìsù, lán itpuaⁿ lâng khòaⁿ m̄bat. Lán si̍ttsāi tsin hoâigî, Tsu Li̍plûn tsúse̍k káⁿ tsaiiáⁿ i kakī teh kóng siáⁿ? (230728)


Tsù, 金溥聰 金小刀 tshiáⁿ liām Hôagí


Pe̍h-ōe-jī-pán/白話字版


《 le̍k-sik toán-phêng》　　 Lí Lâm-hêng

　　　　"Tsāi-iá tōa liân-bêng","Tsip-tsèng tōa liân-bêng" sī siáⁿ-mi̍h óaⁿ-ko ?

Tshit-gue̍h jī-saⁿ, Tiong-kok Kok-bîn-tóng tsoân-kok tāi-piáu tāi-hōe, tóng-tsú-se̍k Tsu Li̍p-lûn suan-pò͘, tsit piàn tsóng-thóng tōa soán Tiong-kok Kok-bîn-tóng beh thoân-kiat só͘-ū hui Le̍k ê pêng-iú kiōng tso͘ "tōa tông-bêng","Tsāi-iá tōa liân-bêng", bī-lâi Tiong-kok Kok-bîn-tóng koh tò tńg-lâi tsip-tsèng liáu-āu, koh beh kah ta̍k-ê kiōng-tông kiàn-li̍p tsi̍t-ê hô-pêng, an-tēng, kong-pêⁿ, tsèng-gī ê "tsip-tsèng tōa liân-bêng", kiōng-tông kā Tâi-oân péng-· kòe-lâi, hō͘ Tâi-oân koh khah hó.

Tshit-gue̍h jī-gō͘, Tiong-kok Kok-bîn-tóng tsóng-thóng tsham-soán-jîn Hāu Iú-gî kēng-soán pān-kong-sik tsip-hêng-tiúⁿ金溥聰siū hóng-būn ê sî kóng, oân-tsoân m̄ tsai-iáⁿ siáⁿ-mi̍h sī "tsip-tsèng tōa liân-bêng", i kóng, i kah Hāu Iú-gî lóng m̄ tsai tsit hāng tāi-tsì, i mā tùi Tsu tsú-se̍k hut-jiân-kan tàn tshut tsit ê sin miâ-sû kám-kak kî-koài. Hit ē-po͘ Tiong-kok Kok-bîn-tóng huat-giân-jîn Iûⁿ Tì-û to̍h hôe-èng kóng, Tsu Li̍p-lûn tsú-se̍k tī tsoân-tāi-hōe thê-khí "tsip-tsèng tōa liân-bêng" ê kài- liām, tio̍h-sī beh thoân-kiat só͘-ū hoān Nâ, hui Le̍k, tsāi-iá ê le̍k-liōng, iā tio̍h-sī kiat-ha̍p só͘-ū lí-liām kāng-khoán ê le̍k-liōng, oân-sêng hō͘ Bîn-tsìn-tóng lo̍h-tâi, tsèng-tóng lûn-thè ê bo̍k-phiau.

Tiong-kok Kok-bîn-tóng huat-giân-jîn án-ne kái-sueh, m̄-tsai thâu-náu it-liû ê 金小刀 thiaⁿ ū ah bô? tshiūⁿ goán tsit tsióng phó͘-thong lâng si̍t-tsāi sī thiaⁿ bô. Tàu-té sī tōa soán tsêng beh "tsāi-iá tōa liân-bêng"? ah sī tōa-soán liáu tsiah beh "tsip-tsèng tōa liân-bêng" leh? nā-sī tōa-soán tsêng beh "tsāi-iá tōa liân-bêng", tàu-té beh án-tsóaⁿ liân án-tsóaⁿ bêng? káⁿ ū kah Bîn-tsiòng-tóng tsú-se̍k Kua Bûn-tiat kóng tsi̍t-siaⁿ? bô. Tsu Li̍p-lûn tsú-se̍k kóng Kua Bûn-tiat tsú-se̍k tsin bô-êng. Bo̍k-tsêng Kua Bûn-tiat ê bîn-tiāu sī iâⁿ kòe Tiong-kok Kok-bîn-tóng ê Hāu Iú-gî, ná ē-sái bô kah lâng kóng -·tsi̍t-siaⁿ to̍h beh kah lâng "tsāi-iá tōa liân-bêng"? Nâ iâⁿ phó͘-soán jîn-sū ū thán-pe̍k kóng, hiān kai-tōaⁿ soán tsêng ha̍p-tsok khong-kan bô tōa, kan-taⁿ ū khó-lêng tshut-hiān tī soán āu ê Li̍p-huat-īⁿ. Án-ne "tsāi-iá tōa liân-bêng" sī siáⁿ-mi̍h óaⁿ-ko ?

　　 Bo̍k-tsêng tsāi-iá sè-le̍k tē-jī tōa ê Bîn-tsiòng-tóng tsú-se̍k Kua Bûn-tiat jīn-ûi, hiān-tsāi kok-hōe 3 tóng lóng bô kòe pòaⁿ ê ki-lu̍t tsiâⁿ koân, i iû-goân kám-kak, kè-ta̍t, tsèng-tshik, lí-liām saⁿ hāng lóng ē ha̍h tsiah ū pān-huat ha̍p-tsok.

　　 Tiong-kok Kok-bîn-tóng tsú-se̍k Tsu Li̍p-lûn "tōa liân-bêng"ê siūⁿ-huat sī ùi tó-ūi lâi ê?

　　 La̍k-gue̍h tsa̍p-gō͘, Tiong-kok Kok-bîn-tóng Tâi-pak tshī- gī-oân, tsit piàn Tāi-an-khu li̍p-úi tsham-soán-jîn Lô Tì-kiông piáu-sī,I beh tiû-pī tso͘-tsit "tsèng-tóng lûn-thè tōa liân-bêng", tùi-khòng Le̍k iâⁿ ké bîn-tsú tōa liân-bêng, jî-tshiáⁿ jīn-ûi tsāi-iá-tóng tio̍h tshiú khan tshiú ha̍p-tsok, siáⁿ lâng tsoh tsóng-thóng sī tshù-iàu būn-tê; i mā kiông-tiāu, i bô kóng bô tsi-tshî Tiong-kok Kok-bîn-tóng tsóng-thóng tsham-soán-jîn Hāu Iú-gî, siōng tiōng-iàu-·ê bo̍k-phiau sī tsèng-tóng lûn-thè. Nā tsiàu Lô Tì-kiông ê kóng-huat, soán tsêng nā it-ti̍t î-tshî hiān-tshú-sî ê bîn-tiāu piáu-hiān, kàu-sî tong-jiân tio̍h ē khì Hāu Iú-gî pó Kua Bûn-tiat. Bo̍k-koài ín-khí Nâ iâⁿ lāi-pō͘ pō͘-hūn jîn-sū kā i tèng kah tshàu-thâu. Tē-jī kang, Lô Tì-kiông tī bīn-tsheh téng-bīn huat-tshut tō-khiam sing-bêng, goân-pún ī-tēng ê kì-tsiá-hōe mā tshú-siau.

　　 Tiong-kok Kok-bîn-tóng tsú-se̍k Tsu Li̍p-lûn kóng beh thoân-kiat só͘-ū hui Le̍k ê pêng-iú kiōng tso͘ "tsāi-iá tōa liân-bêng","tsip-tsèng tōa liân-bêng". Tse tàu-té sī siáⁿ-mi̍h óaⁿ ko? Mài kóng 金小刀 m̄-tsai siáⁿ ì-sù, lán it-puaⁿ lâng khòaⁿ m̄-bat. Lán si̍t-tsāi tsin hoâi-gî, Tsu Li̍p-lûn tsú-se̍k káⁿ tsai-iáⁿ i ka-kī teh kóng siáⁿ? (230728)


Tsù, 金溥聰 金小刀 tshiáⁿ liām Hôa-gí




七月二三，中國國民黨全國代表大會，黨主席朱立倫宣布，tsit遍總統大選中國國民黨beh團結所有非綠ê朋友共組「大同盟」、「在野大聯盟」，未來中國國民黨koh倒轉來執政了後，koh beh kahta̍k个共同建立一個和平、安定、公平、正義ê「執政大聯盟」，共同kā台灣péng-·過來，hō͘台灣koh khah好。

七月二五，中國國民黨總統參選人侯友宜競選辦公室執行長金溥聰受訪問ê時講，完全m̄知影啥物是「執政大聯盟」，伊講，伊kah侯友宜lóng m̄知tsit項代誌，伊mā對朱主席忽然間tàn出tsit个新名詞感覺奇怪。Hit下晡中國國民黨發言人楊智伃（û）to̍h回應講，朱立倫主席tī全代會提起「執政大聯盟」ê概念，tio̍h是beh團結所有泛藍、非綠、在野ê力量，也tio̍h是結合所有理念仝款ê力量，完成hō͘民進黨落台、政黨輪替ê目標。

中國國民黨發言人án-ne解說，m̄知頭腦一流ê金小刀聽有ah無？像阮tsit種普通人實在是聽無。到底是大選前beh「在野大聯盟」？ah是大選了tsiahbeh「執政大聯盟」leh？若是大選前beh「在野大聯盟」，到底beh án-tsóaⁿ聯án-tsóaⁿ盟？敢有kah民眾黨主席柯文哲講一聲？無。朱立倫主席講柯文哲主席真無閒。目前柯文哲ê民調是嬴過中國國民黨ê侯有宜，náē-sái無kah人講一聲to̍h beh kah人「在野大聯盟」？藍營輔選人士有坦白講，現階段選前合作空間無大，kan-taⁿ有可能出現tī選後ê立法院。Án-ne「在野大聯盟」是啥物碗糕？

　　目前在野勢力第二大ê民眾黨主席柯文哲認為，現在國會3黨lóng無過半ê機率tsiâⁿ koân，伊猶原感覺，價值、政策、理念三項lóngēha̍htsiah有辦法合作。

　　中國國民黨主席朱立倫「大聯盟」ê想法是ùi tó位來ê？

　　六月十五，中國國民黨台北市議員、tsit遍大安區立委參選人羅智強表示， 伊beh籌備組織「政黨輪替大聯盟」，對抗綠營假民主大聯盟，而且認為在野黨tio̍h手牽手合作，啥人作總統是次要問題；伊mā強調，伊無講無支持中國國民黨總統參選人侯友宜，上重要ê目標是政黨輪替。若照羅智強ê講法，選前若一直維持現此時ê民調表現，到時當然tio̍hē棄侯友宜保柯文哲。莫怪引起藍營內部部分人士kā伊釘kah臭頭。第二工，羅智強tī面冊頂面發出道歉聲明，原本預定ê記者會mā取消。

　　中國國民黨主席朱立倫講beh團結所有非綠ê朋友共組「在野大聯盟」、「執政大聯盟」。Tse到底是啥物碗糕？Mài講金小刀m̄知啥意思，咱一般人看m̄-bat。咱實在真懷疑，朱立倫主席敢知影伊家己teh講啥？ (230728)


註：金溥聰 金小刀　　請唸華語