《綠色短評》

 | | | 轉寄

Siáng ài去中國ah！？

作者 李南衡, TsoânTâijī/全台字 by Tsng Hūiphêng 2023.08.20




Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　 Lí Lâmhêng

　　　　　　　　　　Siáng ài khì Tiongkok ah!?

　　 Pehgue̍h tshetshit, Bíkok《華爾街ji̍tpò 》tsuantê pòtō kóng, gōakok lâng bēgiàn lâi ah, sī Tiongkok kingtsè huattiánsiōng sin ê thiautsiàn. Pòtō kóng, e̍ktsêng kái hong jîtshiáⁿ koh tiôngsin khaihòng piankéng pòaⁿ nî liáuāu, khì Tiongkok ê koktsè lúkheh tsin tsió.《華爾街ji̍t pò》jīnûi, tse sī Tiongkok kah sehong kokka lú kiâⁿ lú hn̄g ê tsi̍tê hiānsiōng, khólêng ē tī tsi̍ttōaⁿ tsin tn̂g ê sîkan tsōsêng hūbīn ê énghióng. Tī Pakkiaⁿ, Siōnghái téng tōa to͘tshī bô khòaⁿtio̍h gōakok lúkheh ê lângiáⁿ te̍kpia̍t bênghián, ùi tsoân kok hoānûi lâi khòaⁿ, kiⁿî tēit kùi lúhêngsiā ji̍pkéng lúiû tsiapthāi jîntshù kanta ū 5 bān 2,000 lâng, 2019 nî tēit kùi ji̍pkéng lúiû tsiapthāi ū 370 bān jîntshù. 張家界kokka konghn̂g kiⁿî kàu 5 gue̍h tiongsûn, háigōa iûkheh jînsò͘ kanta 2 bān 5,600 lâng, 2019 nî tsêng 5 kògue̍h ê háigōa iûkheh jînsò͘ sī 50 bān lâng. Kah éngnî kāngkhoán, kîtiong ū tsiongkīn tsi̍tpòaⁿ ê iûkheh sī ùi Tâioân, Hiangkáng kah Òmn̂g lâi·ê, m̄ sī úi Bíkok ah sī Autsiu kokka lâi·ê.

Gōakok iûkheh siámkhui Tiongkok ê tsi̍tê tiōngiàu goânin, sī Tiongkok kah sehong ê kuanhē kèsio̍k okhòa, tse mā hō͘ in siūⁿ beh khì Tiongkok lúhêng ē koh khah kínsīn. Bíkok tsènghú 6 gue̍hhūn ū huatpò͘ tsi̍t hūn lúhêng kéngsī, kéngkò Bíkok lâng nā beh khì Tiongkok lúhêng tio̍h tiôngsin khólū, líiû sī Bíkok tsènghú só͘ kóng ê Tiongkok "sûiì tsiphuat", paukuat tshutkéng kìmlēng kah bô tsèngtong khuliû ê khólêngsèng. Bíkok tsi̍t ūi sionggia̍p kò͘būn kóng, siatsú sī góa goânpún só͘ se̍ksāi ê Tiongkok, góa ē koh khì! tānsī tsitmá, Tiongkok ná tshiūⁿ tsintsiàⁿ kā kakī pānián tsoh tsi̍tê huisiông hoán sehong, te̍kpia̍t sī hoán Bíkok ê kokka. Tse hō͘ góa tsin putan."

Tiongkok tsènghú phianphian tī kiⁿî tshitgue̍h tsheit huat pò͘ "Tiongkok hoán kantia̍phuat", ná tshiūⁿ tng nî gûgōng ê Tiongkok Kokbîntóng tsènghú só͘ kóng ê "匪諜就在你身邊", kā só͘ū ê lâng lóng tsúntsoh kantia̍p, paukuat gōakok kuankongkheh, ua̍h beh hông kiaⁿ sí! Tiongkok ná kantia̍p tsi̍tê tōa niáutshítngá, gōakok iûkheh nā hoān tio̍h "Tiongkok hoán kantia̍phuat", ētàng ji̍pkhì, bētàng tshutlâi.. lí sûipiān lo̍kim lio̍kiáⁿ hipsiōng, lí sûipiān ōe tētô͘, lí kah Tiongkok lâng tâmlūn Hiangkáng Tâioân Sinkiang Se tsōng, sī siáⁿmi̍h khìtô͘? Tâioân lâng koh khah tio̍h siósim, lí tī Tâioân bat tī bānglō͘ téngbīn bôkoán sī bīntsheh ahsī Twitter phuephêng kòe Tiongkok ah bô? nā ū, Tiongkok tio̍h ē kā lí tsún tsoh " kantia̍p" pān! Tiongkok tsènghú ho͘io̍k tsoânbîn kiōngtông kaji̍p hoán kan hông tia̍p ê tàutsing, khì Tiongkok ê lâng tsèngtī honghiám tōatōa sing koân.

Gōakok lâng bô ài khì Tiongkok lúiû mā énghióng tio̍h gōasiong tâutsu. 2022 nî tēit kùi sī bíkim 1,000 ik, 2023 nî tēit kùi gōakok tùi Tiongkok ti̍ttsiap tâutsu lo̍h kàu tshun bíkim 200 ik. Tiongkok piáubīn siōng huangêng gōakok khìgia̍p khì Tiongkok tâutsu, tānsī Tiongkok tsènghú tiāⁿtiāⁿ àmtiong í pàihóng tiâutsa téng tshiútōaⁿ, tùi tī Tiongkok ê gōakok khìgia̍p si ap. Tsin tsē ê Bísiong Ji̍tsiong ê oânkang siūtio̍h kanjiáu sīmtsì khuliû, ū gōakok oânkang sin tshéng beh tńgkhì kò͘hiong, mā siūtio̍h pahpuaⁿ thiaulân. Íking ū tsi̍t tōatui gōakok khìgia̍p thiatlī Tiongkok, bo̍ktsêng iáu ū 27% tâutsu tsiá khólū beh tsáulī Tiongkok, gōatsu thiattshut liōng ū Sintâipè 970 ik tsóiū.

Kóngtio̍h Tiongkok, kúi mā kiaⁿ. Siáng ài khì Tiongkok ah? 　　　　(230811)


Tsù, 華爾街 　張家界 "匪諜就在你身邊" tshiáⁿ liām Hôagí


Pe̍h-ōe-jī-pán/白話字版


《 Le̍k-sik toán-phêng 》　　 Lí Lâm-hêng

　　　　　　　　　　Siáng ài khì Tiong-kok ah!?

　　 Peh-gue̍h tshe-tshit, Bí-kok《華爾街ji̍t-pò 》tsuan-tê pò-tō kóng, gōa-kok lâng bē-giàn lâi ah, sī Tiong-kok king-tsè huat-tián-siōng sin ê thiau-tsiàn. Pò-tō kóng, e̍k-tsêng kái hong jî-tshiáⁿ koh tiông-sin khai-hòng pian-kéng pòaⁿ nî liáu-āu, khì Tiong-kok ê kok-tsè lú-kheh tsin tsió.《華爾街ji̍t- pò》jīn-ûi, tse sī Tiong-kok kah se-hong kok-ka lú kiâⁿ lú hn̄g ê tsi̍t-ê hiān-siōng, khó-lêng ē tī tsi̍t-tōaⁿ tsin tn̂g ê sî-kan tsō-sêng hū-bīn ê éng-hióng. Tī Pak-kiaⁿ, Siōng-hái téng tōa to͘-tshī bô khòaⁿ-tio̍h gōa-kok lú-kheh ê lâng-iáⁿ te̍k-pia̍t bêng-hián, ùi tsoân kok hoān-ûi lâi khòaⁿ, kin-nî tē-it kùi lú-hêng-siā ji̍p-kéng lú-iû tsiap-thāi jîn-tshù kan-ta ū 5 bān 2,000 lâng, 2019 nî tē-it kùi ji̍p-kéng lú-iû tsiap-thāi ū 370 bān jîn-tshù. 張家界 kok-ka kong-hn̂g kin-nî kàu 5 gue̍h tiong-sûn, hái-gōa iû-kheh jîn-sò͘ kan-ta 2 bān 5,600 lâng, 2019 nî tsêng 5 kò-gue̍h ê hái-gōa iû-kheh jîn-sò͘ sī 50 bān lâng. Kah éng-nî kāng-khoán, kî-tiong ū tsiong-kīn tsi̍t-pòaⁿ ê iû-kheh sī ùi Tâi-oân, Hiang-káng kah Ò-mn̂g lâi-·ê, m̄ sī úi Bí-kok ah sī Au-tsiu kok-ka lâi-·ê.

Gōa-kok iû-kheh siám-khui Tiong-kok ê tsi̍t-ê tiōng-iàu goân-in, sī Tiong-kok kah se-hong ê kuan-hē kè-sio̍k ok-hòa, tse mā hō͘ in siūⁿ beh khì Tiong-kok lú-hêng ē koh khah kín-sīn. Bí-kok tsèng-hú 6 gue̍h-hūn ū huat-pò͘ tsi̍t hūn lú-hêng kéng-sī, kéng-kò Bí-kok lâng nā beh khì Tiong-kok lú-hêng tio̍h tiông-sin khó-lū, lí-iû sī Bí-kok tsèng-hú só͘ kóng ê Tiong-kok "sûi-ì tsip-huat", pau-kuat tshut-kéng kìm-lēng kah bô tsèng-tong khu-liû ê khó-lêng-sèng. Bí-kok tsi̍t ūi siong-gia̍p kò͘-būn kóng, siat-sú sī góa goân-pún só͘ se̍k-sāi ê Tiong-kok, góa ē koh khì! tān-sī tsit-má, Tiong-kok ná tshiūⁿ tsin-tsiàⁿ kā ka-kī pān-ián tsoh tsi̍t-ê hui-siông hoán se-hong, te̍k-pia̍t sī hoán Bí-kok ê kok-ka. Tse hō͘ góa tsin put-an."

Tiong-kok tsèng-hú phian-phian tī kin-nî tshit-gue̍h tshe-it huat pò͘ "Tiong-kok hoán kan-tia̍p-huat", ná tshiūⁿ tng nî gû-gōng ê Tiong-kok Kok-bîn-tóng tsèng-hú só͘ kóng ê "匪諜就在你身邊", kā só͘-ū ê lâng lóng tsún-tsoh kan-tia̍p, pau-kuat gōa-kok kuan-kong-kheh, ua̍h beh hông kiaⁿ sí! Tiong-kok ná kan-tia̍p tsi̍t-ê tōa niáu-tshí-tng-á, gōa-kok iû-kheh nā hoān tio̍h "Tiong-kok hoán kan-tia̍p-huat", ē-tàng ji̍p-khì, bē-tàng tshut-lâi.. lí sûi-piān lo̍k-im lio̍k-iáⁿ hip-siōng, lí sûi-piān ōe tē-tô͘, lí kah Tiong-kok lâng tâm-lūn Hiang-káng Tâi-oân Sin-kiang Se- tsōng, sī siáⁿ-mi̍h khì-tô͘? Tâi-oân lâng koh khah tio̍h sió-sim, lí tī Tâi-oân bat tī bāng-lō͘ téng-bīn bô-koán sī bīn-tsheh ah-sī Twitter phue-phêng kòe Tiong-kok ah bô? nā ū, Tiong-kok tio̍h ē kā lí tsún tsoh " kan-tia̍p" pān! Tiong-kok tsèng-hú ho͘-io̍k tsoân-bîn kiōng-tông ka-ji̍p hoán kan hông tia̍p ê tàu-tsing, khì Tiong-kok ê lâng tsèng-tī hong-hiám tōa-tōa sing koân.

Gōa-kok lâng bô ài khì Tiong-kok lú-iû mā éng-hióng tio̍h gōa-siong tâu-tsu. 2022 nî tē-it kùi sī bí-kim 1,000 ik, 2023 nî tē-it kùi gōa-kok tùi Tiong-kok ti̍t-tsiap tâu-tsu lo̍h kàu tshun bí-kim 200 ik. Tiong-kok piáu-bīn siōng huan-gêng gōa-kok khì-gia̍p khì Tiong-kok tâu-tsu, tān-sī Tiong-kok tsèng-hú tiāⁿ-tiāⁿ àm-tiong í pài-hóng tiâu-tsa téng tshiú-tōaⁿ, tùi tī Tiong-kok ê gōa-kok khì-gia̍p si ap. Tsin tsē ê Bí-siong Ji̍t-siong ê oân-kang siū-tio̍h kan-jiáu sīm-tsì khu-liû, ū gōa-kok oân-kang sin- tshéng beh tńg-khì kò͘-hiong, mā siū-tio̍h pah-puaⁿ thiau-lân. Í-king ū tsi̍t tōa-tui gōa-kok khì-gia̍p thiat-lī Tiong-kok, bo̍k-tsêng iáu ū 27% tâu-tsu tsiá khó-lū beh tsáu-lī Tiong-kok, gōa-tsu thiat-tshut liōng ū Sin-tâi-pè 970 ik tsó-iū.

Kóng-tio̍h Tiong-kok, kúi mā kiaⁿ. Siáng ài khì Tiong-kok ah? 　　　　(230811)


Tsù, 華爾街 　張家界 "匪諜就在你身邊" tshiáⁿ liām Hôa-gí



　　八月初七，美國《華爾街日報》專題報導講：外國人bē-giàn來ah，是中國經濟發展上新ê挑戰。報導講，疫情解封而且koh重新開放邊境半年了後，去中國ê國際旅客真少。《華爾街日報》認為，tse是中國kah西方國家lú行lú遠ê一個現象，可能ē tī一段真長ê時間造成負面ê影響。tī北京、上海等大都市無看tio̍h外國旅客ê人影特別明顯，ùi全國範圍來看，今年第一季旅行社入境旅遊接待人次kan-ta有5萬2,000人，2019年第一季入境旅遊接待有370萬人次。張家界國家公園今年到5月中旬，海外遊客人數kan-ta 2萬5,600人，2019年前5個月ê海外遊客人數是50萬人。Kah往（éng）年仝款，其中有將近一半ê遊客是ùi台灣、香港kah澳門來ê，m̄是úi美國ah是歐洲國家來ê。

外國遊客閃開中國ê一個重要原因，是中國kah西方ê關係繼續惡化，tse mā hō͘ in想beh去中國旅行ēkoh khah謹慎。美國政府6月份有發布一份旅行警示，警告美國人若beh去中國旅行tio̍h重新考慮，理由是美國政府所講ê中國「隨意執法」，包括出境禁令kah無正當拘留ê可能性。美國一位商業顧問講，設使是我原本所熟sāiê中國，我ēkoh去！但是tsit-má，中國ná像真正kā家己扮演作一個非常反西方、特別是反美國ê國家。Tse hō͘我真不安。」

中國政府偏偏tī今年七月初一發布「中國反間諜法」，那像當年愚戇ê中國國民黨政府所講ê「匪諜就在你身邊」，kā所有ê人lóng準作間諜，包括外國觀光客，活beh hông驚死！中國ná像一个大「老鼠tng-á」（niáu-tshí-tng-á），外國遊客若犯tio̍h「中國反間諜法」，ē-tàng入去、bē-tàng出來.。你隨便錄音錄影hip相、你隨便畫地圖、你kah中國人談論香港台灣新疆西藏，是啥物企圖？台灣人koh khah tio̍h小心，你tī台灣bat tī網路頂面無管是面冊ah是Twitter批評過中國ah無？若有，中國tio̍hē kā你準作「間諜」辦！ 中國政府呼籲全民共同加入反間防諜ê鬥爭，去中國ê人政治風險大大升koân。

外國人無ài去中國旅遊mā影響tio̍h外商投資。2022年第一季是美金1,000億，2023年第一季外國對中國直接投資落到tshun美金200億。中國表面上歡迎外國企業去中國投資，但是中國政府tiāⁿ-tiāⁿ暗中以拜訪調查等手段，對tī中國ê外國企業施壓。真tsē个美商日商ê員工受tio̍h干擾甚至拘留，有外國員工申請beh轉去故鄉，mā受tio̍h百般刁難。已經有一大堆外國企業撤離中國，目前猶有27%投資者考慮beh走離中國，外資撤出量有新台幣970億左右。

講tio̍h中國，鬼mā驚。Siáng ài去中國ah？　　　　(230811)


註：華爾街　張家界 「匪諜就在你身邊」 請唸華語