《綠色短評》 |
 |
 |
|
 轉寄 |
中國上gâu騙kah假！
作者 李南衡, TsoânTâijī/全台字 by Tsng Hūi-phêng 2023.08.27
Tsoânbîn Tâioânjī pán/全民台灣字版簡稱TsoânTâiJī
《 Le̍ksik toánphêng 》 Lí Lâmhêng
Tiongkok siōng gâu phiàn kah ké!
Phiàn kah ké sī Tiongkok ê nn̄g tōa phiat pō͘. Ē kìtit 1981 nî Tiongkok jînkháu ta̍tkàu 10 ik, tsiàm sèkài jînkháu 22%, bô jōa kú Tiongkok tio̍h liûthoân tsi̍tê 順口溜,"十億人口九億騙", lí siūⁿ kóng iáu ū tsi̍t siâⁿ láusi̍t lâng? tshò·liáu! inūi āu pòaⁿkù sī "還有一億在訓練." Téngsi phiàn ēsi, ēsi phiàn téngsi, tsènghú phiàn jînbîn, jînbîn phiàn tsènghú, jînbîn hō͘siong phiàn. Ēng siáⁿ phiàn? kóng ké tsō ké lâi phiàn tùihong.
Siongsìn tsin tsē lâng lóng bat thiaⁿkòe tsitê Tiongkok tsō ké ê kò͘sū, tsi̍tê lôngpeh·á khì bé tsi̍t tōa pau tsiéngtsí, sinkhó͘ kúiá kang lo̍hkhì tsèng koh ak tsúi, kúi tsa̍p kang āu huattshut tsi̍t tōa phiàn ê tsa̍ptsháu, inūi i bé ê tséngtsí sī ké·ê. Lôngpeh·á sêng siongsim, siūⁿ beh tsūsat tio̍h khì bé lôngio̍h lâi lim, kiatkó bô sí, inūi lôngio̍h sī ké·ê. Ūitio̍h lôngpeh·á bô sí, khioh tio̍h miā, tshù·ni̍h ê lâng khì bé tsiú lâi khèngtsiok, kiatkó tsoânke tiòngto̍k sí·khì, inūi tsiú sī ké·ê.
Tsō ké pēng m̄ sī kanta Tiongkok ū niāniā, tsoân sèkài sìkè lóng ū lâng teh tsō ké. Tānsī bô tsi̍tê kokka tshintshiūⁿ Tiongkok tsō ké tsō kah tsiahni̍h tsiâuûn tsiahni̍h thiatté. Kéhòe biánkóng, bûnpêng mā ké. Nāsī liân tsènghú huatpò͘ ê sò͘kù mā sī ké·ê tio̍h ē hông kiaⁿ! Tiongkok tsènghú kongpò͘ kiⁿî la̍kgue̍h hūn siâⁿtìn 16 tsì 24 hòe sitgia̍p lu̍t 21.3% sī le̍ksú siōng kài koân·ê. Tānsī Tiongkok
Pehgue̍htshe, sèkài Tiânkéng Tsónghōe kongpò͘ tsòe sin sèkài pâi miâ, khiok bô khòaⁿtio̍h Tiongkok nn̄gūi gōapiáu tsapo͘thé ê lú soántshiú Liāu Bēngseh kah Tông Tsanhuan, mā hō͘ nn̄g lâng sèngpia̍t gî hûn tsài tō͘ ínkhí thólūn. Liāu Bēngseh sī nn̄gpah kongtshioh kah sìpah kongtshioh kotshiú, Tông Tsanhuan tsuan kong sìpah kongtshioh, nn̄g lâng kòikhì inūi bênghián ê āmkúntsu siuⁿkòe tōalia̍p téng lâmsèng ê gōa hêng, hông tsitgî sī "tsâpo͘ sin". Sèkài Tiânkèng Tsónghōe ū tī la̍kgue̍h iaukiû Tiongkok Tiânkèng Hia̍phōe, tùi kok séngtūi ê lú soántshiú tsìnhêng "血睪酮" kiámtshik, ittàn tshiau pio tio̍h kìm sài. Só͘í tsit nn̄g lâng hông tûmiâ khólêng kah tsitê kuitēng iúkuan. Liân sèngpia̍t mā beh phiàn, khóliân!
Tiongkok tī in koklāi ántsóaⁿ phiàn ántsóaⁿ ké, sī in tau ê tāitsì. Pàithok mài phiàn mài ké kàu Tâioân lâi! 2021 nî gō͘gue̍h, lán Tâioân tng bôêng phahpiàⁿ hôngtī Búhàn hìiām, tio̍h ū lâng ké tsoh .《 Tsūiû Sîpò 》ê miâ khui siat Twitter siàuhō͘, sànpò͘ iâugiân kóng"Tāipak Sinpak tsi̍t bió piàntsoh kúiá siâⁿ, nátshiūⁿ sī Bānhôa tōaliōng hìiām ûithé tsi̍ptiong hûnsio." Hêngsūkio̍k ū kàiji̍p tsingpān, sī tùihōaⁿ bāngkun só͘ tsò ê ké sinbûn.
Mênî tsiaⁿgue̍h tsa̍psaⁿ, Tâioân beh soán tsóngthóng hù tsóngthóng kah li̍phuat úigoân, Tiongkok kakī ê jînbîn bô ài tsiàukò͘ hō͘ hó, khiok tsiâⁿ ū khólêng ē ēng phiàn kah ké ê siausit lâi jiáuloān Tâioân, lán bēsái bô tsùì. (230818)
Tsù, 順口溜 十億人口九億騙 還有一億在訓練 血睪酮 tshiáⁿ liām Hôagí
Pe̍h-ōe-jī-pán/白話字版
《 Le̍k-sik toán-phêng 》 Lí Lâm-hêng
Tiong-kok siōng gâu phiàn kah ké!
Phiàn kah ké sī Tiong-kok ê nn̄g tōa phiat pō͘. Ē kì-tit 1981 nî Tiong-kok jîn-kháu ta̍t-kàu 10 ik, tsiàm sè-kài jîn-kháu 22%, bô jōa kú Tiong-kok tio̍h liû-thoân tsi̍t-ê 順口溜,"十億人口九億騙", lí siūⁿ kóng iáu ū tsi̍t siâⁿ láu-si̍t lâng? tshò-·liáu! in-ūi āu pòaⁿ-kù sī "還有一億在訓練." Téng-si phiàn ē-si, ē-si phiàn téng-si, tsèng-hú phiàn jîn-bîn, jîn-bîn phiàn tsèng-hú, jîn-bîn hō͘-siong phiàn. Ēng siáⁿ phiàn? kóng ké tsō ké lâi phiàn tùi-hong.
Siong-sìn tsin tsē lâng lóng bat thiaⁿ-kòe tsit-ê Tiong-kok tsō ké ê kò͘-sū, tsi̍t-ê lông-peh-·á khì bé tsi̍t tōa pau tsiéng-tsí, sin-khó͘ kúi--á kang lo̍h-khì tsèng koh ak tsúi, kúi tsa̍p kang āu huat-tshut tsi̍t tōa phiàn ê tsa̍p-tsháu, in-ūi i bé ê tséng-tsí sī ké-·ê. Lông-peh-·á sêng siong-sim, siūⁿ beh tsū-sat tio̍h khì bé lông-io̍h lâi lim, kiat-kó bô sí, in-ūi lông-io̍h sī ké-·ê. Ūi-tio̍h lông-peh-·á bô sí, khioh tio̍h miā, tshù-·ni̍h ê lâng khì bé tsiú lâi khèng-tsiok, kiat-kó tsoân-ke tiòng-to̍k sí-·khì, in-ūi tsiú sī ké-·ê.
Tsō ké pēng m̄ sī kan-ta Tiong-kok ū niā-niā, tsoân sè-kài sì-kè lóng ū lâng teh tsō ké. Tān-sī bô tsi̍t-ê kok-ka tshin-tshiūⁿ Tiong-kok tsō ké tsō kah tsiah-ni̍h tsiâu-ûn tsiah-ni̍h thiat-té. Ké-hòe bián-kóng, bûn-pêng mā ké. Nā-sī liân tsèng-hú huat-pò͘ ê sò͘-kù mā sī ké-·ê tio̍h ē hông kiaⁿ! Tiong-kok tsèng-hú kong-pò͘ kin-nî la̍k-gue̍h hūn siâⁿ-tìn 16 tsì 24 hòe sit-gia̍p lu̍t 21.3% sī le̍k-sú siōng kài koân-·ê. Tān-sī Tiong-kok
Peh-gue̍h-tshe, sè-kài Tiân-kéng Tsóng-hōe kong-pò͘ tsòe sin sè-kài pâi miâ, khiok bô khòaⁿ-tio̍h Tiong-kok nn̄g-ūi gōa-piáu tsa-po͘-thé ê lú soán-tshiú Liāu Bēng-seh kah Tông Tsan-huan, mā hō͘ nn̄g lâng sèng-pia̍t gî hûn tsài tō͘ ín-khí thó-lūn. Liāu Bēng-seh sī nn̄g-pah kong-tshioh kah sì-pah kong-tshioh ko-tshiú, Tông Tsan-huan tsuan kong sì-pah kong-tshioh, nn̄g lâng kòe-khì in-ūi bêng-hián ê ām-kún-tsu siuⁿ-kòe tōa-lia̍p téng lâm-sèng ê gōa hêng, hông tsit-gî sī "tsâ-po͘ sin". Sè-kài Tiân-kèng Tsóng-hōe ū tī la̍k-gue̍h iau-kiû Tiong-kok Tiân-kèng Hia̍p-hōe, tùi kok séng-tūi ê lú soán-tshiú tsìn-hêng "血睪酮" kiám-tshik, it-tàn tshiau pio tio̍h kìm sài. Só͘-í tsit nn̄g lâng hông tû-miâ khó-lêng kah tsit-ê kui-tēng iú-kuan. Liân sèng-pia̍t mā beh phiàn, khó-liân!
Tiong-kok tī in kok-lāi án-tsóaⁿ phiàn án-tsóaⁿ ké, sī in tau ê tāi-tsì. Pài-thok mài phiàn mài ké kàu Tâi-oân lâi! 2021 nî gō͘-gue̍h, lán Tâi-oân tng bô-êng phah-piàⁿ hông-tī Bú-hàn hì-iām, tio̍h ū lâng ké tsoh .《 Tsū-iû Sî-pò 》ê miâ khui siat Twitter siàu-hō͘, sàn-pò͘ iâu-giân kóng"Tāi-pak Sin-pak tsi̍t bió piàn-tsoh kúi-á siâⁿ, ná-tshiūⁿ sī Bān-hôa tōa-liōng hì-iām ûi-thé tsi̍p-tiong hûn-sio." Hêng-sū-kio̍k ū kài-ji̍p tsing-pān, sī tùi-hōaⁿ bāng-kun só͘ tsò ê ké sin-bûn.
Mê-nî tsiaⁿ-gue̍h tsa̍p-saⁿ, Tâi-oân beh soán tsóng-thóng hù tsóng-thóng kah li̍p-huat úi-goân, Tiong-kok ka-kī ê jîn-bîn bô ài tsiàu-kò͘ hō͘ hó, khiok tsiâⁿ ū khó-lêng ē ēng phiàn kah ké ê siau-sit lâi jiáu-loān Tâi-oân, lán bē-sái bô tsù-ì. (230818)
Tsù, 順口溜 十億人口九億騙 還有一億在訓練 血睪酮 tshiáⁿ liām Hôa-gí
騙kah假是中國ê兩大phiat步。Ē記得1981年中國人口達到10億，佔世界人口22%，無jōa久中國tio̍h流傳一个順口溜：「十億人口九億騙」，你想講iáu有一成老實人？錯了！因為後半句是「還有一億在訓練。」頂司騙下司，下司騙頂司，政府騙人民，人民騙政府，人民互相騙。用啥騙？講假造假來騙對方。
相信真tsē人lóng bat聽過tsit-ê中國造假ê故事：一个農伯á去買一大包種子，辛苦幾á工落去種koh沃水，幾十工後發出一大片ê雜草，因為伊買ê種子是假ê。農伯á誠傷心，想beh自殺tio̍h去買農藥來lim，結果無死，因為農藥是假ê。為tio̍h農伯á無死、拾（khioh）tio̍h命，厝裡ê人去買酒來慶祝，結果全家中毒死去，因為酒是假ê。
造假並m̄是kan-ta中國有niā-niā，全世界四界lóng有人teh造假。但是無一个國家親像中國造假造kah tsiah-ni̍h齊勻（tsiâu-ûn）tsiah-ni̍h徹底。假貨免講，文憑mā假。若是連政府發佈ê數據mā是假ê tio̍hēhông驚！中國政府公佈今年六月份城鎮16至24歲失業率21.3%是歷史上kài koân-·ê。但是中國《財新網》引述北京大學副教授張丹丹研究指出，若將大約1,600萬名倒平平、kah食父母m̄做工課ê青年lóng看作失業，中國今年三月份青年實際失業率有46.5%。八月十五，中國國家統計局tī記者會宣佈，ùi今年八月起無beh koh發佈青年失業ê數據。繼續公佈ē真pháiⁿ看。Mài公佈總是比公佈假ê數據有khah好，但是án-nemā koh騙人講是為tio̍h調查統計工作ê「健全優化」。Tse tio̍h是中國。
八月初，世界田徑總會公佈最新世界排名，卻無看tio̍h中國兩位外表查埔體ê女選手廖孟雪kah童曾歡，mā hō͘兩人性別疑雲再度引起討論。廖孟雪是二百公尺kah四百公尺高手、童曾歡專攻四百公尺，兩人過去因為明顯ê頷頸珠siuⁿ過大粒等男性ê外型，hông質疑是「查埔身」。世界田徑總會有tī六月要求中國田徑協會，對各省隊ê女選手進行「血睪酮」檢測，一旦超標tio̍h禁賽。所以tsit兩人hông除名可能kah tsit-ê規定有關。連性別mā beh騙，可憐！
中國tī in國內án怎騙án怎假，是in兜ê代誌。拜託mài騙mài假到台灣來！2021年五月，咱台灣tng無閒拍拼防治武漢肺炎，tio̍h有人假作《自由時報》ê名開設Twitter帳戶，散布謠言講「台北新北一秒變作鬼á城，ná像是萬華大量肺炎遺體集中焚燒。」刑事局有介入偵辦，是對岸網軍所做ê假新聞。
明年正月十三，台灣beh選總統副總統kah立法委員，中國家己ê人民無ài照顧hō͘好，卻tsiâⁿ有可能ē用騙kah假ê消息來擾亂台灣，咱bē-sái無注意。 (230818)
註：順口溜 十億人口九億騙 還有一億在訓練 血睪酮 請唸華語
- 《綠色短評》文章索引 | RSS | 寄給朋友
- « 上一篇 | 下一篇 »
