《綠色短評》

 | | | 轉寄

一位日本人按怎看咱四位可能ê總統參選人？

作者 李南衡, TsoânTâijī/全台字 by Tsng Hūi-phêng 2023.09.03

Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　 Lí Lâmhêng

　 Tsi̍t ūi Ji̍tpún lâng ántsóaⁿ khòaⁿ lán sì ūi khólêng ê tsóngthóng tshamsoánjîn?

Pehgue̍h tsa̍ptshit, Ji̍tpún 《 Sánking sinbûnsiā》Tāipak tsikio̍ktiúⁿ Yaita Akio（矢板明夫）tī i ê bīntsheh téngbīn kóng, tiongtàu tī《Hôasī》"Saⁿkok iángī" ê ti̍tpò tsiatbo̍k tiong, túhó kóng kàu kúiūi khólêng ê tsóngthóng tshamsoánjîn. Hō͘ góa siūⁿtio̍h ēng búkiap siósuat tiong ê búlîm jînsū lâi tsò pílū. I tsin khehkhì kóng, m̄tsai kóng liáu ū tùitâng ah bô? khòaⁿkòe i bīntsheh ê lâng, lóng oló kah ē taktsi̍h.

Yaita tsikio̍ktiúⁿ tī bīntsheh téngbīn kóng, tsòikīn ê 2024 tsóngthóng tōasoán bîntiāu, Lōa Tshingtik kèsio̍k pótshî niásian ê tēūi. Kua Bûntia̍t ū siókhóa lo̍h, Hâu Iúgî ū hôe sing, Kueh Tâibêng kèsio̍k teh sńg i ê bôngbông būbū tsiànlio̍k. Tùi tsit kúiūi i ū tsò tsi̍tê pílū, i kóng Lōa Tshingtik nátshiūⁿ sī miâ mn̂g tōa phài ê tētsú. Bôlūn sī lāila̍t, kiàmhuat, khinkang, àmkhì, ta̍k hāng lóng tī tsúitsún ísiōng. Suijiân i m̄ sī tsua̍ttùi ê kotshiú, tānsī khí kha tāng tshiú mā lóng ū tsiàu pō͘ lâi, tsin tsió hoāntshò. Jîtshiáⁿ tsòikīn itti̍t kiantshî khûn o̍h khó͘ liān, búkong tī i tsin tsāi ê kitshó͘ téngbīn ū teh thêsing.

Iā bô tso͘tsit iā bô tsîⁿ ê Kua Bûntia̍t, nátshiūⁿ sī tsi̍tê kangô͘ gē lâng （ lán Tâioân lâng kóng·ê phah kûnthâu bē koio̍h ）. Yaita tsikio̍ktiúⁿ piáusī Kua Bûntia̍t tiāⁿtiāⁿ kā búsu̍t, tsa̍pki, mô͘su̍t kap kap tsòhóe, tsìnhêng piáuián. Khòaⁿ·khílâi tshiaiāⁿ tshùbī, só͘í tiāⁿtiāⁿ ē ín khip tsin tsē lâng ûi lâi khòaⁿ, tānsī " lāila̍t pêⁿpêⁿ, tsin tsē tsiausò͘ kanta hó khòaⁿthâu niāniā bô siáⁿmi̍h lō͘ēng." Kah lâng kòe tsiau, siatsú tsêng kúi tsiau nā bô huattō͘ kā tùihong háⁿ tò, tio̍h ū khólêng tiantò hō͘ tùihong aptsè tiâu.

Yaita tsikio̍ktiúⁿ kóng, tittio̍h Tiongkok Kokbîntóng thêmiâ ê Hâu Iúgî, nátshiūⁿ sī tī bó͘tsióng iniân khiáuha̍p ēbīn tittio̍h pátsiok lāila̍t ê hui búlîm jînsū. Khósioh oântsoân bē hiáu tsiausò͘, kakī koh bē hiáu khòngtsè lāila̍t. Sinthé lāi ê kúi kó͘ lāila̍t kingsiông hō͘siong phah lâi phah khì, kā i kakī tshiong kah o͘ thiⁿ àm tē. Tsòikīn ū tshiàⁿ tsi̍t ūi sèⁿ Kim ê kàuliān, kà i tsi̍t kóa siōng kipún ê thò͘la̍p ho͘khip ê honghuat, nátshiūⁿ tsiāmtsiām antēng·lo̍hlâi, tānsī ētàng tsiūⁿtiûⁿ ah bē iûgoân tsin pháiⁿ kóng.

Yaita tsikio̍ktiúⁿ kóng, Kueh Tâibêng nátshiūⁿ sī tsi̍t ūi thoânsuat tiong ê búlîm kotshiú, itti̍t tī tiûⁿ gōa kuankhòaⁿ. Tsi̍t ki tshùi ti̍tti̍t kóng siūⁿ beh ji̍ptiûⁿ, tānsī tio̍h sī itti̍t bô beh hiòngtsêng ta̍h tshut tsi̍t pō͘. Tsin tsē lâng kóng i līhāi, tānsī mā ū lâng kóng i kîsi̍t sī tsi̍t kûn bô kàu sí. Tàuté si̍t la̍t ántsóaⁿ, ta̍kê lóng iáu m̄tsai.

Yaita tsikio̍ktiúⁿ kóng, siatsú in saⁿê liântshiú·khílâi, kiámtshái ū khólêng phah iâⁿ. Tānsī in saⁿê lâng hō͘siong bô sìnjīm, tsitmá khòaⁿ·khílâi saⁿê lâng liântshiú ê khólêngsèng bô siáⁿ tōa.

　　 Suijiân Yaita tsikio̍ktiúⁿ só͘ tsò ê pílū tsiâⁿ si̍ttsāi, tānsī i mā kiaⁿ ū lâng khòaⁿliáu bô huaⁿhí, só͘í i tī bûntsiuⁿ siōng āubīn te̍kpia̍t singbêng, ísiōng ê pílū, sûnjiân sī hó sńg·ê, oântsoân bô okì. Hibāng hō͘ ta̍kê khòaⁿliáu tshiò· tsi̍tē.

Khah tshùbī·ê sī, Tiongkok Kokbîntóng tsúse̍k Tsu Li̍plûn kóng, m̄tsai iáⁿ Yaita Akio teh kóng siáⁿmi̍h. Lán tī tsia kā Yaita tsikio̍ktiúⁿ kóng ê ōe ēng Tâioân ōe liām·tshutlâi, m̄tsai Tsu tsúse̍k thiaⁿ ū ah bô? (230825)


Pe̍h-ōe-jī-pán/白話字版



《 Le̍k-sik toán-phêng 》　 Lí Lâm-hêng

　 Tsi̍t ūi Ji̍t-pún lâng án-tsóaⁿ khòaⁿ lán sì ūi khó-lêng ê tsóng-thóng tsham-soán-jîn?

Peh-gue̍h tsa̍p-tshit, Ji̍t-pún 《 Sán-king sin-bûn-siā》Tāi-pak tsi-kio̍k-tiúⁿ Ya-ita Aki-o（矢板明夫）tī i ê bīn-tsheh téng-bīn kóng, tiong-tàu tī《Hôa-sī》"Saⁿ-kok ián-gī" ê ti̍t-pò tsiat-bo̍k tiong, tú-hó kóng kàu kúi-ūi khó-lêng ê tsóng-thóng tsham-soán-jîn. Hō͘ góa siūⁿ-tio̍h ēng bú-kiap sió-suat tiong ê bú-lîm jîn-sū lâi tsò pí-lū. I tsin kheh-khì kóng, m̄-tsai kóng liáu ū tùi-tâng ah bô? khòaⁿ-kòe i bīn-tsheh ê lâng, lóng o-ló kah ē tak-tsi̍h.

Ya-ita tsi-kio̍k-tiúⁿ tī bīn-tsheh téng-bīn kóng, tsòe-kīn ê 2024 tsóng-thóng tōa-soán bîn-tiāu, Lōa Tshing-tik kè-sio̍k pó-tshî niá-sian ê tē-ūi. Kua Bûn-tia̍t ū sió-khóa lo̍h, Hâu Iú-gî ū hôe sing, Kueh Tâi-bêng kè-sio̍k teh sńg i ê bông-bông bū-bū tsiàn-lio̍k. Tùi tsit kúi-ūi i ū tsò tsi̍t-ê pí-lū, i kóng Lōa Tshing-tik ná-tshiūⁿ sī miâ mn̂g tōa phài ê tē-tsú. Bô-lūn sī lāi-la̍t, kiàm-huat, khin-kang, àm-khì, ta̍k hāng lóng tī tsúi-tsún í-siōng. Sui-jiân i m̄ sī tsua̍t-tùi ê ko-tshiú, tān-sī khí kha tāng tshiú mā lóng ū tsiàu pō͘ lâi, tsin tsió hoān-tshò. Jî-tshiáⁿ tsòe-kīn it-ti̍t kian-tshî khûn o̍h khó͘ liān, bú-kong tī i tsin tsāi ê ki-tshó͘ téng-bīn ū teh thê-sing.

Iā bô tso͘-tsit iā bô tsîⁿ ê Kua Bûn-tia̍t, ná-tshiūⁿ sī tsi̍t-ê kang-ô͘ gē lâng （ lán Tâi-oân lâng kóng-·ê phah kûn-thâu bē ko-io̍h ）. Ya-ita tsi-kio̍k-tiúⁿ piáu-sī Kua Bûn-tia̍t tiāⁿ-tiāⁿ kā bú-su̍t, tsa̍p-ki, mô͘-su̍t kap- kap tsò-hóe, tsìn-hêng piáu-ián. Khòaⁿ-·khí-lâi tshia-iāⁿ tshù-bī, só͘-í tiāⁿ-tiāⁿ ē ín khip tsin tsē lâng ûi lâi khòaⁿ, tān-sī " lāi-la̍t pêⁿ-pêⁿ, tsin tsē tsiau-sò͘ kan-ta hó khòaⁿ-thâu niā-niā bô siáⁿ-mi̍h lō͘-ēng." Kah lâng kòe tsiau, siat-sú tsêng kúi tsiau nā bô huat-tō͘ kā tùi-hong háⁿ tò, tio̍h ū khó-lêng tian-tò hō͘ tùi-hong ap-tsè tiâu.

Ya-ita tsi-kio̍k-tiúⁿ kóng, tit-tio̍h Tiong-kok Kok-bîn-tóng thê-miâ ê Hâu Iú-gî, ná-tshiūⁿ sī tī bó͘-tsióng in-iân khiáu-ha̍p ē-bīn tit-tio̍h pá-tsiok lāi-la̍t ê hui bú-lîm jîn-sū. Khó-sioh oân-tsoân bē hiáu tsiau-sò͘, ka-kī koh bē hiáu khòng-tsè lāi-la̍t. Sin-thé lāi ê kúi kó͘ lāi-la̍t king-siông hō͘-siong phah lâi phah khì, kā i ka-kī tshiong kah o͘ thiⁿ àm tē. Tsòe-kīn ū tshiàⁿ tsi̍t ūi sèⁿ Kim ê kàu-liān, kà i tsi̍t kóa siōng ki-pún ê thò͘-la̍p ho͘-khip ê hong-huat, ná-tshiūⁿ tsiām-tsiām an-tēng-·lo̍h-lâi, tān-sī ē-tàng tsiūⁿ-tiûⁿ ah bē iû-goân tsin pháiⁿ kóng.

Ya-ita tsi-kio̍k-tiúⁿ kóng, Kueh Tâi-bêng ná-tshiūⁿ sī tsi̍t ūi thoân-suat tiong ê bú-lîm ko-tshiú, it-ti̍t tī tiûⁿ gōa kuan-khòaⁿ. Tsi̍t ki tshùi ti̍t-ti̍t kóng siūⁿ beh ji̍p-tiûⁿ, tān-sī tio̍h sī it-ti̍t bô beh hiòng-tsêng ta̍h tshut tsi̍t pō͘. Tsin tsē lâng kóng i lī-hāi, tān-sī mā ū lâng kóng i kî-si̍t sī tsi̍t kûn bô kàu sí. Tàu-té si̍t la̍t án-tsóaⁿ, ta̍k-ê lóng iáu m̄-tsai.

Ya-ita tsi-kio̍k-tiúⁿ kóng, siat-sú in saⁿ-ê liân-tshiú-·khí-lâi, kiám-tshái ū khó-lêng phah iâⁿ. Tān-sī in saⁿ-ê lâng hō͘-siong bô sìn-jīm, tsit-má khòaⁿ-·khí-lâi saⁿ-ê lâng liân-tshiú ê khó-lêng-sèng bô siáⁿ tōa.

　　 Sui-jiân Ya-ita tsi-kio̍k-tiúⁿ só͘ tsò ê pí-lū tsiâⁿ si̍t-tsāi, tān-sī i mā kiaⁿ ū lâng khòaⁿ-liáu bô huaⁿ-hí, só͘-í i tī bûn-tsiuⁿ siōng āu-bīn te̍k-pia̍t sing-bêng, í-siōng ê pí-lū, sûn-jiân sī hó sńg-·ê, oân-tsoân bô ok-ì. Hi-bāng hō͘ ta̍k-ê khòaⁿ-liáu tshiò-· tsi̍t-ē.

Khah tshù-bī-·ê sī, Tiong-kok Kok-bîn-tóng tsú-se̍k Tsu Li̍p-lûn kóng, m̄-tsai iáⁿ Ya-ita Aki-o teh kóng siáⁿ-mi̍h. Lán tī tsia kā Ya-ita tsi-kio̍k-tiúⁿ kóng ê ōe ēng Tâi-oân ōe liām-·tshut-lâi, m̄-tsai Tsu tsú-se̍k thiaⁿ ū ah bô? (230825)



八月十七，日本《產經新聞社》台北支局長Ya-ita Aki-o（矢板明夫）tī伊ê面冊頂面講：中晝tī《華視》「三國演議」ê直播節目中，tú好講到幾位可能ê總統參選人。Hō͘我想tio̍h用武俠小說中ê武林人士來做比喻。伊真客氣講，m̄知講了有對同ah無？看過伊面冊ê人，lóng o-ló kahē觸舌（tak-tsi̍h）。

Ya-ita支局長tī面冊頂面講，最近ê 2024總統大選民調，賴清德繼續保持領先ê地位。柯文哲有小khóa落、侯友宜有回升，郭台銘繼續teh玩（sńg）伊ê矇矇霧霧戰略。對tsit幾位伊有做一个比喻，伊講賴清德ná像是名門大派ê弟子。無論是內力、劍法、輕功、暗器，ta̍k項lóngtī水準以上。雖然伊m̄是絕對ê高手，但是起腳動手mālóng有照步來，真少犯錯。而且最近一直堅持勤學苦練、武功tī伊真在ê基礎頂面有teh提升。

也無組織也無錢ê柯文哲，ná像是一个江湖藝人（咱台灣人講ê拍拳頭賣膏藥）。Ya-ita支局長表示柯文哲tiāⁿ-tiāⁿ kā武術、雜技、魔術kap- kap做夥，進行表演。看起來奢iāⁿ趣味，所以定定ē引吸真tsē人圍來看，但是「內力平平，真tsē招數kan-ta好看頭niā-niā無啥物路用。」Kah人過招，設使前幾招若無法度kā對方háⁿ倒，tio̍h有可能顚倒hō͘對方壓制tiâu。

Ya-ita支局長講，得tio̍h中國國民黨提名ê侯友宜，ná像是tī某種因緣巧合下面得tio̍h飽足內力ê非武林人士。可惜完全bē曉招數，家己koh bē曉控制內力。身體內ê幾股內力經常互相拍來拍去、kā伊家己衝kah烏天暗地。最近有tshiàⁿ一位姓金ê教練，教伊一寡上基本ê吐納呼吸ê方法，ná像漸漸安定落來，但是ē-tàng上場ah bē猶原真pháiⁿ講。

Ya-ita支局長講，郭台銘ná像是一位傳說中ê武林高手，一直tī埸外觀看。一枝嘴直直講想beh入場，但是tio̍h是一直無beh向前踏出一步。真tsē人講伊厲害，但是mā有人講伊其實是一拳無夠死。到底實力按怎，ta̍k个lóng猶m̄知。

Ya-ita支局長講，設使in三个聯手起來，檢彩有可能拍嬴。但是in三个人互相無信任，tsit-má看起來三个人聯手ê可能性無啥大。

　　雖然Ya-ita支局長所做ê比喻誠實在，但是伊mā驚有人看了無歡喜，所以伊tī文章上後面特別聲明：以上ê比喻，純然是好sńg-·ê，完全無惡意。希望hō͘ta̍k个看了笑一下。

Khah趣味ê是，中國國民黨主席朱立倫講，m̄知影Ya-ita Aki-o teh講啥物。咱tītsia kā Ya-ita支局長講ê話用台灣話唸出來，m̄知朱主席聽有ah無？ (230825)