《綠色短評》

 | | | 轉寄

郭台銘真正猶未轉大人！

作者 李南衡, TsoânTâijī/全台字 by Tsng Hūi-phêng 2023.09.10


Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》　　 Lí Lâmhêng

　　 Kueh Tâibêng tsintsiàⁿ iáubōe tńg tōalâng!

Pehgue̍h jīpeh, Hônghái tsi̍pthoân tshòngpānjîn Kueh Tâibêng suanpò͘ beh tâuji̍p 2024 tsóngthóng tōasoán, jîtshiáⁿ tsèngsik thiánkhui liânsú, i kiôngtiāu kóng, i ê tshamsoán sī ūitio̍h tshioksêng tsāṳá tīniâⁿ ê tséngha̍p,"tsāṳá nā bô tséngha̍p, hō͘ Lōa Tshingtik siuⁿkòe hótsia̍h khùn". Kueh Tâibêng mā kóng tōasiaⁿ ōe, i beh hō͘ Tâioân tī 20 nî lāi tshiauua̍t Sinkapho, tsiâⁿtsoh Atsiu jînkun GDP siōngkoân·ê" Atsiu tēit hógia̍h".

　　 Kueh Tâibêng suanpò͘ beh tshamsoán tsóngthóng, bô lâng kámkak ìgōa. Hō͘ lâng kámkak ìgōa·ê sī, Kueh Tâibêng sī ántsóaⁿ kàu taⁿ iáu bōe tńg tōalâng? lán ná ē ánni kóng.

　　 Pehgue̍h jīsaⁿ, Hônghái tsi̍pthoân tshòngpānjîn Kueh Tâibêng tshutse̍k " tsúliû bînì tōa liânbêng" Κimmn̂g tiûⁿ, tìsû ê sî suanpò͘, i beh tâuji̍p 2,000 bān bíkim sêngli̍p "Κimmn̂g hôpêng tshiònggī kikimhōe", tshuitōng tshòngsiat "nn̄g hōaⁿ hôpêng hia̍psiong pānkongsik", í bînkan li̍ptiûⁿ tshuitōng nn̄g hōaⁿ í hôpêng ūi bo̍ktik ê hōetâm, íki̍p bô͘hóng bīlâi tshuitōng nn̄g hōaⁿ hôpêng hia̍psiong.

Tùi tsittiám, ū tóngtsèng jînsū piáusī, Kueh Tâibêng ūkàu thiantsin, kah Tiongkok Kiōngsántóng tâm hôpêng hia̍psiong, kanta ē í pikio̍k siu tiûⁿ. Lán lóng tsaiiáⁿ,"thiantsin" ê ìsù sī kóng tsi̍tê lâng kòsèng sûntsin tsūjiân, bô higûi, ásī kóng tsi̍tê lâng thâunáu kántan, khah tsē sī kóng sèhàn gíná, kóng Kueh Tâibêng káná gíná.

1951 nî gō͘gue̍h jīsaⁿ, Tiongkok kiôngpik Setsōng tī Pakkiaⁿ tshiamtēng 《 Tiongiong jînbîn tsènghú kah Setsōng tēhng tsènghú kuanû hôpêng káihòng Setsōng pānhuat ê hia̍pgī 》（ kántshing 《 tsa̍ptshit tiâu hia̍pgī 》）, pótsèng Setsōng la̍ktsa̍p nî bē piàn. Tānsī ōaⁿ·lâi ·ê khiok sī Tiongkok tī 1959, 1989, 2008 saⁿ piàn huehtshiⁿ tìnap Setsōng, kîtiong 1989 hit piàn sī iû tongsî tamjīm Τiongkiōng Setsōng tóngúi sukì ê tsêng Tiongkok kokka tsúse̍k Ô͘ Gímtô hālēng tìnap ê. Tshiamtēng hôpêng hia̍pgī hit tongsî Kueh Tâibêng tsiah tútú tshutsì tshit kò gōa gue̍h, tōahàn liáuāu koh bô àitha̍k le̍ksú, tsin ū khólêng m̄tsai tsit tōaⁿ le̍ksú, m̄tsai iáⁿ Tiongkok Kiōngsántóng ê ōe bē sìn tit.

　　 Lán kóng tsi̍ttōaⁿ Kueh Tâibêng tōahàn liáuāu ē hiáu khòaⁿ pòtsóa khòaⁿ tiānsī hittsūn ê tāitsì, i ingkai tsiok tshingtshó. 1984 nî tsa̍pjīgue̍h tsa̍pkáu, iû Tiongkok Kokbūīⁿ tsónglí Tiō Tsíiông kah Ingkok siúsiòng 瑪格麗特‧柴契爾 tsokûi nn̄g kok tsènghú siúléng tī Pakkiaⁿ tshiamtēng 《 TiongIng liânha̍p singbêng 》, lia̍ttshut 1997 nî tshitgue̍h tsheit Hiangkáng kuihêng Tiongkok liáuāu, Tionghôa Jînbîn Kiōnghôkok tùi Hiangkáng ê kipún hongtsim, tī "itkoklióngtsè" ê goântsik hē, Tionghôa Jînbîn Kiōnghôkok tsènghú ē khakpó i siāhōe tsúgī tsètō͘ bē tī Hiangkáng te̍kpia̍t hêngtsèngkhu si̍thêng, Hiangkáng púnsin ê tsupún tsúgī tsètō͘ kah singua̍h hongsik îtshî "gō͘tsa̍p nî putpiàn", pótsiòng jînsin, giânlūn, tshutpán, tsi̍phōe, kiatsiā, líhêng, tshiansóa, thongsìn, pākang, soánte̍k tsitgia̍p kah ha̍ksu̍t giánkiù íki̍p tsongkàu sìngióng téng kok hāng khoânlī kah tsūiû. Tshiáⁿ Kueh Tâibêng kóng liôngsim ōe, 1997 nî tshitgue̍h tsheit kàu taⁿ jīla̍k nî, Hiangkáng ū piàn bô? Tiongkok Kiōngsántóng káⁿ ū tsiàu ho͘ tsiàu kiâⁿ?

　　 Lán kóng nn̄g tōaⁿ le̍ksú, tio̍h sī beh thêtshéⁿ Kueh Tâibêng tángsūtiúⁿ, Tiongkok Kiōngsántóng ê ōe bē sìn tit. Hibāng Kueh tángsūtiúⁿ tsá tsi̍t ji̍t tshingtshéⁿ·khílâi, mài koh thiantsin. Tsintsiàⁿ ētàng tńg tōalâng. 　(230901)

Tsù, 瑪格麗特‧柴契爾　　 tshiáⁿ liām Hôagí



Pe̍h-ōe-jī-pán/白話字版


《 Le̍k-sik toán-phêng 》　　 Lí Lâm-hêng

　　 Kueh Tâi-bêng tsin-tsiàⁿ iáu-bōe tńg tōa-lâng!

Peh-gue̍h jī-peh, Hông-hái tsi̍p-thoân tshòng-pān-jîn Kueh Tâi-bêng suan-pò͘ beh tâu-ji̍p 2024 tsóng-thóng tōa-soán, jî-tshiáⁿ tsèng-sik thián-khui liân-sú, i kiông-tiāu kóng, i ê tsham-soán sī ūi-tio̍h tshiok-sêng tsāi-iá tīn-iâⁿ ê tséng-ha̍p,"tsāi-iá nā bô tséng-ha̍p, hō͘ Lōa Tshing-tik siuⁿ-kòe hó-tsia̍h khùn". Kueh Tâi-bêng mā kóng tōa-siaⁿ ōe, i beh hō͘ Tâi-oân tī 20 nî lāi tshiau-ua̍t Sin-ka-pho, tsiâⁿ-tsoh A-tsiu jîn-kun GDP siōng-koân-·ê" A-tsiu tē-it hó-gia̍h".

　　 Kueh Tâi-bêng suan-pò͘ beh tsham-soán tsóng-thóng, bô lâng kám-kak ì-gōa. Hō͘ lâng kám-kak ì-gōa-·ê sī, Kueh Tâi-bêng sī án-tsóaⁿ kàu taⁿ iáu bōe tńg tōa-lâng? lán ná ē án-ni kóng.

　　 Peh-gue̍h jī-saⁿ, Hông-hái tsi̍p-thoân tshòng-pān-jîn Kueh Tâi-bêng tshut-se̍k " tsú-liû bîn-ì tōa liân-bêng" Κim-mn̂g tiûⁿ, tì-sû ê sî suan-pò͘, i beh tâu-ji̍p 2,000 bān bí-kim sêng-li̍p "Κim-mn̂g hô-pêng tshiòng-gī ki-kim-hōe", tshui-tōng tshòng-siat "nn̄g hōaⁿ hô-pêng hia̍p-siong pān-kong-sik", í bîn-kan li̍p-tiûⁿ tshui-tōng nn̄g hōaⁿ í hô-pêng ūi bo̍k-tik ê hōe-tâm, í-ki̍p bô͘-hóng bī-lâi tshui-tōng nn̄g hōaⁿ hô-pêng hia̍p-siong.

Tùi tsit-tiám, ū tóng-tsèng jîn-sū piáu-sī, Kueh Tâi-bêng ū-kàu thian-tsin, kah Tiong-kok Kiōng-sán-tóng tâm hô-pêng hia̍p-siong, kan-ta ē í pi-kio̍k siu tiûⁿ. Lán lóng tsai-iáⁿ,"thian-tsin" ê ì-sù sī kóng tsi̍t-ê lâng kò-sèng sûn-tsin tsū-jiân, bô hi-gûi, á-sī kóng tsi̍t-ê lâng thâu-náu kán-tan, khah tsē sī kóng sè-hàn gín-á, kóng Kueh Tâi-bêng ká-ná gín-á.

1951 nî gō͘-gue̍h jī-saⁿ, Tiong-kok kiông-pik Se-tsōng tī Pak-kiaⁿ tshiam-tēng 《 Tiong-iong jîn-bîn tsèng-hú kah Se-tsōng tē-hng tsèng-hú kuan-û hô-pêng kái-hòng Se-tsōng pān-huat ê hia̍p-gī 》（ kán-tshing 《 tsa̍p-tshit tiâu hia̍p-gī 》）, pó-tsèng Se-tsōng la̍k-tsa̍p nî bē piàn. Tān-sī ōaⁿ-·lâi -·ê khiok sī Tiong-kok tī 1959, 1989, 2008 saⁿ piàn hueh-tshiⁿ tìn-ap Se-tsōng, kî-tiong 1989 hit piàn sī iû tong-sî tam-jīm Τiong-kiōng Se-tsōng tóng-úi su-kì ê tsêng Tiong-kok kok-ka tsú-se̍k Ô͘ Gím-tô hā-lēng tìn-ap ê. Tshiam-tēng hô-pêng hia̍p-gī hit tong-sî Kueh Tâi-bêng tsiah tú-tú tshut-sì tshit kò gōa gue̍h, tōa-hàn liáu-āu koh bô ài-tha̍k le̍k-sú, tsin ū khó-lêng m̄-tsai tsit tōaⁿ le̍k-sú, m̄-tsai iáⁿ Tiong-kok Kiōng-sán-tóng ê ōe bē sìn tit.

　　 Lán kóng tsi̍t-tōaⁿ Kueh Tâi-bêng tōa-hàn liáu-āu ē hiáu khòaⁿ pò-tsóa khòaⁿ tiān-sī hit-tsūn ê tāi-tsì, i ing-kai tsiok tshing-tshó. 1984 nî tsa̍p-jī-gue̍h tsa̍p-káu, iû Tiong-kok Kok-bū-īⁿ tsóng-lí Tiō Tsí-iông kah Ing-kok siú-siòng 瑪格麗特‧柴契爾 tsok-ûi nn̄g kok tsèng-hú siú-léng tī Pak-kiaⁿ tshiam-tēng 《 Tiong-Ing liân-ha̍p sing-bêng 》, lia̍t-tshut 1997 nî tshit-gue̍h tshe-it Hiang-káng kui-hêng Tiong-kok liáu-āu, Tiong-hôa Jîn-bîn Kiōng-hô-kok tùi Hiang-káng ê ki-pún hong-tsim, tī "it-kok-lióng-tsè" ê goân-tsik hē, Tiong-hôa Jîn-bîn Kiōng-hô-kok tsèng-hú ē khak-pó i siā-hōe tsú-gī tsè-tō͘ bē tī Hiang-káng te̍k-pia̍t hêng-tsèng-khu si̍t-hêng, Hiang-káng pún-sin ê tsu-pún tsú-gī tsè-tō͘ kah sing-ua̍h hong-sik î-tshî "gō͘-tsa̍p nî put-piàn", pó-tsiòng jîn-sin, giân-lūn, tshut-pán, tsi̍p-hōe, kiat-siā, lí-hêng, tshian-sóa, thong-sìn, pā-kang, soán-te̍k tsit-gia̍p kah ha̍k-su̍t gián-kiù í-ki̍p tsong-kàu sìn-gióng téng kok hāng khoân-lī kah tsū-iû. Tshiáⁿ Kueh Tâi-bêng kóng liông-sim ōe, 1997 nî tshit-gue̍h tshe-it kàu taⁿ jī-la̍k nî, Hiang-káng ū piàn bô? Tiong-kok Kiōng-sán-tóng káⁿ ū tsiàu ho͘ tsiàu kiâⁿ?

　　 Lán kóng nn̄g tōaⁿ le̍k-sú, tio̍h sī beh thê-tshéⁿ Kueh Tâi-bêng táng-sū-tiúⁿ, Tiong-kok Kiōng-sán-tóng ê ōe bē sìn tit. Hi-bāng Kueh táng-sū-tiúⁿ tsá tsi̍t ji̍t tshing-tshéⁿ-·khí-lâi, mài koh thian-tsin. Tsin-tsiàⁿ ē-tàng tńg tōa-lâng. 　(230901)

Tsù, 瑪格麗特‧柴契爾　　 tshiáⁿ liām Hôa-gí




八月二八，鴻海集團創辦人郭台銘宣布beh投入2024總統大選，而且正式展開連署，伊強調講，伊ê參選是為tio̍h促成在野陣營ê整合，「在野若無整合，hō͘賴清德siuⁿ過好食睏」。郭台銘mā講大聲話，伊beh hō͘台灣tī 20年內超越新加坡，成作亞洲人均GDP上koânê「亞洲第一好額」。

　　郭台銘宣布beh參選總統，無人感覺意外。Hō͘人感覺意外ê是：郭台銘是按怎到taⁿ猶未轉大人？咱náē án-ni講。

　　八月二三，鴻海集團創辦人郭台銘出席「主流民意大聯盟」金門場，致詞ê時宣布，伊beh投入2,000萬美金成立「金門和平倡議基金會」，推動創設「兩岸和平協商辦公室」，以民間立場推動兩岸以和平為目的ê會談，以及模仿未來推動兩岸和平協商。

對tsit點，有黨政人士表示，郭台銘有夠天真，kah中國共產黨談和平協商，kan-taē以悲劇收場。咱lóng知影，「天真」ê意思是講一个人個性純真自然、無虛偽，抑是講一个人頭腦簡單，khahtsē是講細漢gín-á，講郭台銘ká-nágín-á。

1951年五月二三，中國強迫西藏tī北京簽訂《中央人民政府kah西藏地方政府關於和平解放西藏辦法ê協議》（簡稱《十七條協議》），保證西藏六十年bē變。但是換來ê卻是中國tī 1959、1989、2008三遍血腥鎮壓西藏，其中1989 hit遍是是由當時擔任中共西藏黨委書記ê前中國國家主席胡錦濤下令鎮壓ê。簽訂和平協議hit當時郭台銘才tú-tú出世七個外月，大漢了後koh無愛讀歷史，真有可能m̄知tsit段歷史，m̄知影中國共產黨ê話bē信得。

　　咱講一段郭台銘大漢了後ē曉看報紙看電視hit陣ê代誌，伊應該足清楚。1984年十二月十九，由中國國務院總理趙紫陽kah英國首相瑪格麗特‧柴契爾作為兩國政府首腦tī北京簽訂《中英聯合聲明》，列出1997年七月初一香港歸還中國了後，中華人民共和國對香港ê基本方針，tī「一國兩制」ê原則下，中華人民共和國政府ē確保伊社會主義制度bētī香港特別行政區實行，香港本身ê資本主義制度kah生活方式維持「五十年不變」，保障人身、言論、出版、集會、結社、旅行、遷徙、通信、罷工、選擇職業kah學術研究以及宗教信仰等各項權利kah自由。請郭台銘講良心話，1997年七月初一到taⁿ二六年，香港有變無？中國共產黨敢有照呼照行？

　　咱講兩段歷史，tio̍h是beh提醒郭台銘董事長，中國共產黨ê話bē信得。希望郭董事長早一日清醒起來，mài koh天真。真正ē-tàng轉大人。　(230901)

註：瑪格麗特‧柴契爾　　請唸華語