《綠色短評》

 | | | 轉寄

馬英九ê國家機密是啥物碗糕？

作者 李南衡, TsoânTâijī/全台字 by Tsng Hūi-phêng 2023.10.15




Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》 Lí Lâmhêng

Má Ingkiú ê kokka kibi̍t sī siáⁿmi̍h óaⁿko?

Tsa̍pgue̍h tshejī tsákhí sinbûn pòtō, Má Ingkiú tsêng tsóngthóng putboán Bîntsìntóng tsènghú kā Siangtsa̍p kokkhèng kiò tsoh “Taiwan National Day”, huane̍k tsoh Hànbûn tio̍h sī "Tâioân kokkhèngji̍t", i jīnûi tse sī tsa̍ptsiok ê "Tâito̍k" lō͘sòaⁿ, i tī Bīntsheh téngbīn huatbûn tsitbūn, kokmiâ tāngsîá kái tsoh Tâioân? "Tionghôa Bînkok" phah m̄ kìⁿ khì ah. Só͘í i kītsua̍t tshutse̍k kiⁿî ê kokkhèng tāihōe.

Má Ingkiú tī bīntsheh ánni kóng, kòikhì lán tsènghú tsū lâi m̄bat súiōng “Taiwan National Day” tsitê Ingbûn miâtshing, hiànhuat kah tsènghú bûnsu lóng bô piànking kok miâ, kokkhèng tāihōe tio̍h ingkai kèsio̍k súiōng "Tionghôa Bînkok kokkhèngji̍t" Ingbûn “Republic of Tsina National Day” tsiah tio̍h. Súiōng "Tâioân kokkhèngji̍t", tûliáu thautō͘ Tâito̍k, káⁿ iáu ū jīmhô si̍ttsit ê ìgī? Tshòa Ingbûn tsóngthóng tī jīmlāi tsòeāu tsi̍t piàn ê kokkhèng tāihōe, iûgoân tsòtshut sionghāi Tionghôa Bînkok ê tāitsì, hō͘ lâng sim tsinthiàⁿ.

I kóng, góa kūnî ū kongkhai ho͘io̍k Tshòa Ingbûn tsóngthóng kahtiûpān kokkhèng tāihōe ê Li̍phuatīⁿ Iû Sikkhun īⁿtiúⁿ, mài koh ēng “Taiwan National Day” (Tâioân kokkhèngji̍t) tsoh kokkhèng ê Ingbûn miâtshing, khósioh in tsún tsoh bô thiaⁿtio̍h, kiⁿî iûgoân kāngkhoán. Kìjiân khó͘khǹg bô hāu, góa jīnûi kiⁿî nā kohtsài tshutse̍k "Tâioân kokkhèngji̍t" tiánlé, ná tshiūⁿ sī ūi tsit khoán se̍huan, thautō͘ ê "Tâito̍k" lō͘sòaⁿ pōesu, ba̍ktsiu kimkim khòaⁿ Bîntsìntóng tsènghú gûihāi Tâioân antsoân, sionghāi Tionghôa Bînkok, só͘í góa kuattēng kītsua̍t tshutse̍k kiⁿî ê kokkhèng tāihōe. Góa beh hiòng koklâng kah sèkài kóng, ūitio̍h Tâioân ê antsoân, kiáⁿsun ê hoklī, goán bētàng tiāmtiām bô tshut siaⁿ, tio̍h kiantēng kah "Tâito̍k" lō͘sòaⁿ tshiat kuah, kiankuat hoántùi Tâito̍k!

Tùi tsittiám, Hêngtsèng Ītiúⁿ Tân Kiànjîn mn̄g kóng ùi 2021 nî tio̍h khaisí súiōng “Taiwan National Day”, tsit kúi nî mā lóng sī ánni, tsûnnî, kūnî, i lóng ū lâi tshamka. Bētàng líkái sī ántsóaⁿ kiⁿî hutjiânkan bô beh tshamka?

Khah kîkoài·ê sī, tsa̍pgue̍h tshejī ēpo͘ Má Ingkiú tshutse̍k tsi̍tê kongkhai ua̍htāng, kìtsiá mn̄g i éngnî lóng ū tshamka kokkhèng tāihōe, sī ántsóaⁿ kiⁿî bô beh tshamka? i ìn kóng,"Tse sī kokka kibi̍t."

1949 nî gō͘gue̍h jītsa̍p khí, Tiongkok Kokbîntóng tsènghú tī Tâioân si̍tsi kàigiâm, kàu 1987 nî tshitgue̍h tsa̍pgō͘ káitû kàigiâmlēng ûitsí, lóng tsóng ū kàigiâm sèkài kú ê 38 nî 56 kang. Tī tsitê kîkan ū bē sǹgtit tsē ê Tâioân lâng, tio̍h sī phāiⁿ tio̍h "siaplāu kokka kibi̍t tsōe" hông lia̍hkhì khó͘hêng, kuaiⁿkaⁿ, sīmtsì pōngtiāu. Mā hō͘ lán siūⁿkhí So͘liân sîtāi Gôlô ê tsi̍tê tsèngtī tshiòōe, ū tsi̍tê lâng tī Bo̍ksukho ângsik kóngtiûⁿ tōasiaⁿ mē So͘liân thâulâng,"布里滋湼夫 sī tsi̍tê pe̍htshi!" i sûisî hông lia̍h·khì, kingkòe hêngkiû khótáⁿ, tsi̍tkò gue̍h āu, huatīⁿ phòaⁿkuat hitê lâng 21 nî ê hêng kî, kîtiong ê 1 nî sī,"bújio̍k kokka goânsiú tsōe", lēnggōa ê 20 nî sī,"siaplāu kokka kibi̍t tsōe".

　　 Má Ingkiú tsêng tsóngthóng kiⁿî bô ài khì tshamka kokkhèng tāihōe, i kòjîn ê tsūiû. I ná ē kóngkah kokka kibi̍t khì leh? lán khah hò͘ⁿkî·ê sī Má Ingkiú ê kokka kibi̍t sī siáⁿmi̍h óaⁿko? 　(231006)


Tsù, 布里滋湼夫　tshiáⁿ liām Hôagí


《 Le̍k-sik toán-phêng 》 Lí Lâm-hêng

Má Ing-kiú ê kok-ka ki-bi̍t sī siáⁿ-mi̍h óaⁿ-ko?

Tsa̍p-gue̍h tshe-jī tsá-khí sin-bûn pò-tō, Má Ing-kiú tsêng tsóng-thóng put-boán Bîn-tsìn-tóng tsèng-hú kā Siang-tsa̍p kok-khèng kiò tsoh “Taiwan National Day”, huan-e̍k tsoh Hàn-bûn tio̍h sī "Tâi-oân kok-khèng-ji̍t", i jīn-ûi tse sī tsa̍p-tsiok ê "Tâi-to̍k" lō͘-sòaⁿ, i tī Bīn-tsheh téng-bīn huat-bûn tsit-būn, kok-miâ tāng-sî-á kái tsoh Tâi-oân? "Tiong-hôa Bîn-kok" phah m̄ kìⁿ khì ah. Só͘-í i kī-tsua̍t tshut-se̍k kin-nî ê kok-khèng tāi-hōe.

Má Ing-kiú tī bīn-tsheh án-ni kóng, kòe-khì lán tsèng-hú tsū lâi m̄-bat sú-iōng “Taiwan National Day” tsit-ê Ing-bûn miâ-tshing, hiàn-huat kah tsèng-hú bûn-su lóng bô piàn-king kok miâ, kok-khèng tāi-hōe tio̍h ing-kai kè-sio̍k sú-iōng "Tiong-hôa Bîn-kok kok-khèng-ji̍t" Ing-bûn “Republic of Tsina National Day” tsiah tio̍h. Sú-iōng "Tâi-oân kok-khèng-ji̍t", tû-liáu thau-tō͘ Tâi-to̍k, káⁿ iáu ū jīm-hô si̍t-tsit ê ì-gī? Tshòa Ing-bûn tsóng-thóng tī jīm-lāi tsòe-āu tsi̍t piàn ê kok-khèng tāi-hōe, iû-goân tsò-tshut siong-hāi Tiong-hôa Bîn-kok ê tāi-tsì, hō͘ lâng sim tsin-thiàⁿ.

I kóng, góa kū-nî ū kong-khai ho͘-io̍k Tshòa Ing-bûn tsóng-thóng kahtiû-pān kok-khèng tāi-hōe ê Li̍p-huat-īⁿ Iû Sik-khun īⁿ-tiúⁿ, mài koh ēng “Taiwan National Day” (Tâi-oân kok-khèng-ji̍t) tsoh kok-khèng ê Ing-bûn miâ-tshing, khó-sioh in tsún tsoh bô thiaⁿ-tio̍h, kin-nî iû-goân kāng-khoán. Kì-jiân khó͘-khǹg bô hāu, góa jīn-ûi kin-nî nā koh-tsài tshut-se̍k "Tâi-oân kok-khèng-ji̍t" tián-lé, ná tshiūⁿ sī ūi tsit khoán se̍h-uan, thau-tō͘ ê "Tâi-to̍k" lō͘-sòaⁿ pōe-su, ba̍k-tsiu kim-kim khòaⁿ Bîn-tsìn-tóng tsèng-hú gûi-hāi Tâi-oân an-tsoân, siong-hāi Tiong-hôa Bîn-kok, só͘-í góa kuat-tēng kī-tsua̍t tshut-se̍k kin-nî ê kok-khèng tāi-hōe. Góa beh hiòng kok-lâng kah sè-kài kóng, ūi-tio̍h Tâi-oân ê an-tsoân, kiáⁿ-sun ê hok-lī, goán bē-tàng tiām-tiām bô tshut siaⁿ, tio̍h kian-tēng kah "Tâi-to̍k" lō͘-sòaⁿ tshiat kuah, kian-kuat hoán-tùi Tâi-to̍k!

Tùi tsit-tiám, Hêng-tsèng Ī-tiúⁿ Tân Kiàn-jîn mn̄g kóng ùi 2021 nî tio̍h khai-sí sú-iōng “Taiwan National Day”, tsit kúi nî mā lóng sī án-ni, tsûn-nî, kū-nî, i lóng ū lâi tsham-ka. Bē-tàng lí-kái sī án-tsóaⁿ kin-nî hut-jiân-kan bô beh tsham-ka?

Khah kî-koài-·ê sī, tsa̍p-gue̍h tshe-jī ē-po͘ Má Ing-kiú tshut-se̍k tsi̍t-ê kong-khai ua̍h-tāng, kì-tsiá mn̄g i éng-nî lóng ū tsham-ka kok-khèng tāi-hōe, sī án-tsóaⁿ kin-nî bô beh tsham-ka? i ìn kóng,"Tse sī kok-ka ki-bi̍t."

1949 nî gō͘-gue̍h jī-tsa̍p khí, Tiong-kok Kok-bîn-tóng tsèng-hú tī Tâi-oân si̍t-si kài-giâm, kàu 1987 nî tshit-gue̍h tsa̍p-gō͘ kái-tû kài-giâm-lēng ûi-tsí, lóng tsóng ū kài-giâm sè-kài kú ê 38 nî 56 kang. Tī tsit-ê kî-kan ū bē sǹg-tit tsē ê Tâi-oân lâng, tio̍h sī phāiⁿ tio̍h "siap-lāu kok-ka ki-bi̍t tsōe" hông lia̍h-khì khó͘-hêng, kuaiⁿ-kaⁿ, sīm-tsì pōng-tiāu. Mā hō͘ lán siūⁿ-khí So͘-liân sî-tāi Gô-lô ê tsi̍t-ê tsèng-tī tshiò-ōe, ū tsi̍t-ê lâng tī Bo̍k-su-kho âng-sik kóng-tiûⁿ tōa-siaⁿ mē So͘-liân thâu-lâng,"布里滋湼夫 sī tsi̍t-ê pe̍h-tshi!" i sûi-sî hông lia̍h-·khì, king-kòe hêng-kiû khó-táⁿ, tsi̍t-kò gue̍h āu, huat-īⁿ phòaⁿ-kuat hit-ê lâng 21 nî ê hêng kî, kî-tiong ê 1 nî sī,"bú-jio̍k kok-ka goân-siú tsōe", lēng-gōa ê 20 nî sī,"siap-lāu kok-ka ki-bi̍t tsōe".

　　 Má Ing-kiú tsêng tsóng-thóng kin-nî bô ài khì tsham-ka kok-khèng tāi-hōe, i kò-jîn ê tsū-iû. I ná ē kóng-kah kok-ka ki-bi̍t khì leh? lán khah hò͘ⁿ-kî-·ê sī Má Ing-kiú ê kok-ka ki-bi̍t sī siáⁿ-mi̍h óaⁿ-ko? 　(231006)


Tsù, 布里滋湼夫　tshiáⁿ liām Hôa-gí





十月初二早起新聞報導，馬英九前總統不滿民進黨政府kā雙十國慶叫作“Taiwan National Day”，翻譯作漢文tio̍h是「台灣國慶日」，伊認為tse是十足ê「台獨」路線，伊tī面冊頂面發文質問，國名tāng時á改作台灣？「中華民國」拍m̄見去ah。所以伊拒絕出席今年ê國慶大會。

馬英九tī面冊án-ni講：過去咱政府自來m̄-bat使用“Taiwan National Day”tsit-ê英文名稱，憲法kah政府文書lóng無變更國名，國慶大會tio̍h應該繼續使用「中華民國國慶日」英文“Republic of Tsina National Day”才tio̍h。使用「臺灣國慶日」，除了偷渡臺獨，敢猶有任何實質ê意義？蔡英文總統tī任內最後一遍ê國慶大會，猶原做出傷害中華民國ê代誌，hō͘人心真thiàⁿ。

伊講，我舊年有公開呼籲蔡英文總統kah籌辦國慶大會ê立法院游錫堃院長，mài koh用“Taiwan National Day”（臺灣國慶日）作國慶ê英文名稱，可惜in準作無聽tio̍h，今年猶原仝款。既然苦勸無效，我認為今年若koh再出席「臺灣國慶日」典禮，ná像是為tsit款旋（se̍h）彎、偷渡ê「臺獨」路線背書，目睭金金看民進黨政府危害臺灣安全、傷害中華民國，所以我決定拒絕出席今年ê國慶大會。我beh向國人kah世界講，為tio̍h臺灣ê安全，子孫ê福利，阮bē-tàng恬恬無出聲，tio̍h堅定kah「臺獨」路線切割，堅決反對臺獨！

對tsit點，行政院長陳建仁問講 ùi 2021年tio̍h開始使用“Taiwan National Day”，tsit幾年mā lóng是án-ni，前年（tsûn-nî）、舊年，伊lóng有來參加。Bē-tàng理解是按怎今年忽然間無beh參加？

Khah奇怪ê是，十月初二下晡馬英九出席一個公開活動，記者問伊永年lóng有參加國慶大會，是按怎今年無beh參加？伊應講：「Tse是國家機密。」

1949年五月二十起，中國國民黨政府tī臺灣實施戒嚴，到1987年七月十五解除戒嚴令為止，lóng總有戒嚴世界久ê38年56工。Tī tsit-ê期間有bē算得tsēê台灣人，tio̍h是背（phāiⁿ）tio̍h「洩漏國家機密罪」hông掠去苦刑、關監，甚至砰掉。Mā hō͘咱想起蘇聯時代俄羅ê一個政治笑話，有一個人tī莫斯科紅色廣場大聲罵蘇聯頭人：「布里滋湼夫是一个白癡！」伊隨時hông掠去，經過刑求拷打，一個月後，法院判決hit-ê人21年ê刑期，其中ê1年是：「侮辱國家元首罪」，另外ê20年是：「洩漏國家機密罪」。

　　馬英九前總統今年無愛去參加國慶大會，伊個人ê自由。伊náē講kah國家機密去咧？咱khah好奇ê是馬英九ê國家機密是啥物碗糕？　(231006)


註：布里滋湼夫　　請唸華語