《綠色短評》

 | | | 轉寄

郭台銘kah中國lóng假ná m̄-tsiâⁿgín-á！

作者 李南衡, TsoânTâijī/全台字 by Tsng Hūi-phêng 2023.11.05




Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng

　　 Kueh Tâibêng kah Tiongkok lóng ké ná m̄tsiâⁿ gíná!

　　 Tsa̍pgue̍h jījī, Tiongkok kuaⁿhong mûithé 《 khoân kiû sîpò 》 ínsu̍t siausit pòtō, sòebū pō͘mn̂g kīnkî íhuat tùi Pùsūkhong tsi̍pthoân, tī Kńgtang, Kangso͘ ê tiōngtiám khìgia̍p tsìnhêng sòebū khétshâ, Tsūjiân Tsugoân Pō͘mn̂g tùi Pùsūkhong tī Hôlâm, Ô͘pak ê tiōngtiám khìgia̍p ēng tē tsênghóng, tsìnhêng hiāntiûⁿ tiâutsa.

　　 Tsa̍pgue̍h jīsaⁿ àm, tsâiking tsuanka Siā Kimhô tī bīntsheh kóng, Τiongkiōng tùi Pùsūkhong tsoânbīn tshâ sòe ê siausit, pàṳt siausit thoântshut liáuāu hō͘ tsoânkiû kimiông tshītiûⁿ tōa tio̍hkiaⁿ, koktsè mûithé siotseⁿ pòtō,"tī Siōnghái kó͘tshī tsiūⁿtshī ê kanggia̍p Pùliân khui pôaⁿ to̍h lo̍hthêng, jîtshiáⁿ tsi̍t kè kàuté, kó͘ kè pua̍h 1.62 jînbîn pè, tshīta̍t tsinghuat kiutsúi 321 ik jînbînpè, Tâioân ê Hônghái pua̍h 3 kho͘, kó͘kè biānlîm 100 kho͘ póūitsiàn, tsit kang, kuiê Hônghái tsi̍pthoân tshīta̍t tsìtsió tsiatsún tshiaukòe 2,000 ik sintâipè, tse sī tùi Kuehtáng tsiâⁿū satsiongla̍t ê tsi̍t kang."

　　 Tiongkok ná ē ánne ka siulí? kiⁿî pehgue̍h jīpeh, Kueh Tâibêng suanpò͘ tshamsoán tsóngthóng ê sî, hôeèng mûithé the̍hmn̄g, siatsú Τiongkiōng nā inūi lí Kueh Tâibêng bô thiaⁿ ōe, to̍h beh kā Hônghái ê tsâisán bu̍tsiu, lí beh ántsóaⁿ? Kueh Tâibêng khòaⁿ·khí·lāi ná tshiūⁿ tsiâⁿ ū pàkhùi, ìn kóng"Yes, Please do it, nāsī Τiongkiōng bô phah Tâioân, góa ēsài tiôngsin tsò bô͘á kanglâng, góa bētàng thiaⁿ i (Τiongkiōng) ê tsíphài, góa tsū lâi m̄bat siū Τiongkiōng ê khòngtsè, lí lâi phah góa, bu̍tsiu góa ê tsâisán, góa iûgoân bô siū uihia̍p."Kueh Tâibêng kinpún sī teh kóng gíná ōe. Tiongkok khòaⁿ Kueh Tâibêng tsintsiàⁿ teh piàⁿ beh soán tsóngthóng, jîtshiáⁿ tsa̍pgue̍h tsa̍pkáu hùtshiú Lōa Phòehâ tī bīntsheh suanpò͘ íking tsèngsik the̍h tio̍h sòngsit Bíkok koktsik tsèngsu, Tiongkok to̍h tshuttshiú kā i siulí.

　　 Ji̍tpún “ Sánking Sinbûn” Tāipak tsikio̍ktiúⁿ Yaita Akio kikiám khue kóng, tsit piàn Kueh Tâibêng kah Τiongkiōng ê hō͘tōng, ná tshintshiūⁿ "Tiongkok tangpak ê m̄tsiâⁿ gíná teh uanke siophah". A kóng,"lí khòaⁿ siáⁿ?" B kóng,"khòaⁿ lí, sī ántsóaⁿ?"A kóng,"hótáⁿ koh khòaⁿ tsi̍t piàn khòaⁿ māi!" B kóng,"khòaⁿ to̍h khòaⁿ sī ántsóaⁿ!" kipún siōng kàu tsit ê sîtsūn, nn̄g pêng tio̍h ē khaisí khíkha tāngtshiú, siàn tshùiphóe, tsing paktó͘, kiatkó tāikhài sianghong lóng ū tio̍hsiong, bô lâng phah iâⁿ.

Tsènglūnka 汪浩 ti̍tpe̍h kóng,"Tsitmá Τiongkiōng lâi tshâ tsúipió, Kuehtáng íking 24 tiámtsing tiāmtiām m̄ káⁿ tshut siaⁿ! Tsit tsióng lâng kóng beh kah Xíjìnpíng tâm hôpêng hia̍pgī? Khah tsá khùn khah ū bîn!"

Siā Kimhô kóng,"Τiongkiōng giâm tshâ Pùsūkhong, sī m̄ sī beh hō͘ Kuehtáng tilân jîthè, kaji̍p tséngha̍p Nâpe̍h ê hânglia̍t. Τiongkiōng giâm tshâ Pùsūkhong lēnggōa tsi̍tê ìhâm sī Tâisiong mā sī tī kiōngtông hùjū tsi lia̍t. Tsit piàn tshâ sòe, Pùsūkhong khólêng mā tio̍h tshintshiūⁿ Alí Pápah, Thn̂gsìn, kautshut tsi̍t tōa pit tsukim tsiah ē suah."

Thiaⁿkóng Hônghái tī Tiongkok ê khìgia̍p Pùsūkhong hō͘ Tiongkok tshâ tsúipió, Bîntsìntóng Lōa Tshingtik kóng, góa hibāng lán tsoânkok bîntsiòng ingkai to̍h tsitshî Hônghái, tsitshî Tâioân ê khìgia̍p. Pêⁿpêⁿ sī tsit piàn tsóngthóng tshamsoánjîn, Tiongkok Kokbîntóng ê Hâu Iúgî kah Bîntsiòngtóng ê Kua Bûntiat, tiām tsiⁿtsiⁿ kuai kah ná niauá leh!

　　 Tiongkok nā khòaⁿ lâng bē sóng to̍h beh tshuttshiú phah lâng, Kueh Tâibêng kantaⁿ tshut tsi̍t ki tshùi ké ióng. Nn̄gê lóng ké ná m̄tsiâⁿ gíná! 　　(231027)


Tsù, 汪浩 tshiáⁿ liām Hôagí



Pe̍h-ōe-jī-pán/白話字版


《 Le̍k-sik toán-phêng 》 Lí Lâm-hêng

　　 Kueh Tâi-bêng kah Tiong-kok lóng ké ná m̄-tsiâⁿ gín-á!

　　 Tsa̍p-gue̍h jī-jī, Tiong-kok kuaⁿ-hong mûi-thé 《 khoân kiû sî-pò 》 ín-su̍t siau-sit pò-tō, sòe-bū pō͘-mn̂g kīn-kî í-huat tùi Pù-sū-khong tsi̍p-thoân, tī Kńg-tang, Kang-so͘ ê tiōng-tiám khì-gia̍p tsìn-hêng sòe-bū khé-tshâ, Tsū-jiân Tsu-goân Pō͘-mn̂g tùi Pù-sū-khong tī Hô-lâm, Ô͘-pak ê tiōng-tiám khì-gia̍p ēng tē tsêng-hóng, tsìn-hêng hiān-tiûⁿ tiâu-tsa.

　　 Tsa̍p-gue̍h jī-saⁿ àm, tsâi-king tsuan-ka Siā Kim-hô tī bīn-tsheh kóng, Τiong-kiōng tùi Pù-sū-khong tsoân-bīn tshâ sòe ê siau-sit, pài-it siau-sit thoân-tshut liáu-āu hō͘ tsoân-kiû kim-iông tshī-tiûⁿ tōa tio̍h-kiaⁿ, kok-tsè mûi-thé sio-tseⁿ pò-tō,"tī Siōng-hái kó͘-tshī tsiūⁿ-tshī ê kang-gia̍p Pù-liân khui pôaⁿ to̍h lo̍h-thêng, jî-tshiáⁿ tsi̍t kè kàu-té, kó͘ -kè pua̍h 1.62 jîn-bîn pè, tshī-ta̍t tsing-huat kiu-tsúi 321 ik jîn-bîn-pè, Tâi-oân ê Hông-hái pua̍h 3 kho͘, kó͘-kè biān-lîm 100 kho͘ pó-ūi-tsiàn, tsit kang, kui-ê Hông-hái tsi̍p-thoân tshī-ta̍t tsì-tsió tsiat-sún tshiau-kòe 2,000 ik sin-tâi-pè, tse sī tùi Kueh-táng tsiâⁿ-ū sat-siong-la̍t ê tsi̍t kang."

　　 Tiong-kok ná ē án-ne ka siu-lí? kin-nî peh-gue̍h jī-peh, Kueh Tâi-bêng suan-pò͘ tsham-soán tsóng-thóng ê sî, hôe-èng mûi-thé the̍h-mn̄g, siat-sú Τiong-kiōng nā in-ūi lí Kueh Tâi-bêng bô thiaⁿ ōe, to̍h beh kā Hông-hái ê tsâi-sán bu̍t-siu, lí beh án-tsóaⁿ? Kueh Tâi-bêng khòaⁿ-·khí-·lāi ná tshiūⁿ tsiâⁿ ū pà-khùi, ìn kóng"Yes, Please do it, nā-sī Τiong-kiōng bô phah Tâi-oân, góa ē-sài tiông-sin tsò bô͘-á kang-lâng, góa bē-tàng thiaⁿ i (Τiong-kiōng) ê tsí-phài, góa tsū lâi m̄-bat siū Τiong-kiōng ê khòng-tsè, lí lâi phah góa, bu̍t-siu góa ê tsâi-sán, góa iû-goân bô siū ui-hia̍p."Kueh Tâi-bêng kin-pún sī teh kóng gín-á ōe. Tiong-kok khòaⁿ Kueh Tâi-bêng tsin-tsiàⁿ teh piàⁿ beh soán tsóng-thóng, jî-tshiáⁿ tsa̍p-gue̍h tsa̍p-káu hù-tshiú Lōa Phòe-hâ tī bīn-tsheh suan-pò͘ í-king tsèng-sik the̍h tio̍h sòng-sit Bí-kok kok-tsik tsèng-su, Tiong-kok to̍h tshut-tshiú kā i siu-lí.

　　 Ji̍t-pún “ Sán-king Sin-bûn” Tāi-pak tsi-kio̍k-tiúⁿ Yaita Akio ke-kiám khue kóng, tsit piàn Kueh Tâi-bêng kah Τiong-kiōng ê hō͘-tōng, ná tshin-tshiūⁿ "Tiong-kok tang-pak ê m̄-tsiâⁿ gín-á teh uan-ke sio-phah". A kóng,"lí khòaⁿ siáⁿ?" B kóng,"khòaⁿ lí, sī án-tsóaⁿ?"A kóng,"hó-táⁿ koh khòaⁿ tsi̍t piàn khòaⁿ māi!" B kóng,"khòaⁿ to̍h khòaⁿ sī án-tsóaⁿ!" ki-pún siōng kàu tsit ê sî-tsūn, nn̄g pêng tio̍h ē khai-sí khí-kha tāng-tshiú, siàn tshùi-phóe, tsing pak-tó͘, kiat-kó tāi-khài siang-hong lóng ū tio̍h-siong, bô lâng phah iâⁿ.

Tsèng-lūn-ka 汪浩 ti̍t-pe̍h kóng,"Tsit-má Τiong-kiōng lâi tshâ tsúi-pió, Kueh-táng í-king 24 tiám-tsing tiām-tiām m̄ káⁿ tshut siaⁿ! Tsit tsióng lâng kóng beh kah Xíjìnpíng tâm hô-pêng hia̍p-gī? Khah tsá khùn khah ū bîn!"

Siā Kim-hô kóng,"Τiong-kiōng giâm tshâ Pù-sū-khong, sī m̄ sī beh hō͘ Kueh-táng ti-lân jî-thè, ka-ji̍p tséng-ha̍p Nâ-pe̍h ê hâng-lia̍t. Τiong-kiōng giâm tshâ Pù-sū-khong lēng-gōa tsi̍t-ê ì-hâm sī Tâi-siong mā sī tī kiōng-tông hù-jū tsi lia̍t. Tsit piàn tshâ sòe, Pù-sū-khong khó-lêng mā tio̍h tshin-tshiūⁿ A-lí Pá-pah, Thn̂g-sìn, kau-tshut tsi̍t tōa pit tsu-kim tsiah ē suah."

Thiaⁿ-kóng Hông-hái tī Tiong-kok ê khì-gia̍p Pù-sū-khong hō͘ Tiong-kok tshâ tsúi-pió, Bîn-tsìn-tóng Lōa Tshing-tik kóng, góa hi-bāng lán tsoân-kok bîn-tsiòng ing-kai to̍h tsi-tshî Hông-hái, tsi-tshî Tâi-oân ê khì-gia̍p. Pêⁿ-pêⁿ sī tsit piàn tsóng-thóng tsham-soán-jîn, Tiong-kok Kok-bîn-tóng ê Hâu Iú-gî kah Bîn-tsiòng-tóng ê Kua Bûn-tiat, tiām tsiⁿ-tsiⁿ kuai kah ná niau-á leh!

　　 Tiong-kok nā khòaⁿ lâng bē sóng to̍h beh tshut-tshiú phah lâng, Kueh Tâi-bêng kan-taⁿ tshut tsi̍t ki tshùi ké ióng. Nn̄g-ê lóng ké ná m̄-tsiâⁿ gín-á! 　　(231027)


Tsù, 　汪浩 tshiáⁿ liām Hôa-gí




　　十月二二，中國官方媒體《環球時報》引述消息報導，稅務部門近期依法對富士康集團，tī廣東、江蘇ê重點企業進行稅務稽查，自然資源部門對富士康tī河南、湖北ê重點企業用地情況，進行現場調查。

　　十月二三暗，財經專家謝金河tī面冊講，中共對富士康全面查稅ê消息，拜一消息傳出了後hō͘全球金融市場大tio̍h驚，國際媒體相爭報導，「tī上海股市上市ê工業富聯開盤to̍h跌停，而且一價到底，股價跋1.62人民幣，市值蒸發321億人民幣，台灣ê鴻海跋3元，股價面臨100元保衞戰，tsit工，kui个鴻海集團市值至少折損超過2,000億新台幣，tse是對郭董tsiâⁿ有殺傷力ê一工。」

　　中國náēán-ne ka修理？今年八月二八，郭台銘宣布參選總統ê時，回應媒體提問，設使中共若因為你郭台銘無聽話，to̍h beh kā鴻海ê財產沒收，你beh按怎？郭台銘看起來ná像tsiâⁿ有霸氣，應講「Yes、Please do it，若是中共無拍台灣，我ē-sài重新做模á工人，我bētàng聽伊（中共）ê指派，我自來m̄bat受中共ê控制，你來拍我，沒收我ê財產，我猶原無受威脅。」郭台銘根本是teh講gín-á話。中國看郭台銘真正teh拚beh選總統，而且十月十九副手賴佩霞tī面冊宣布已經正式the̍h tio̍h喪失美國國籍證書，中國to̍h出手kā伊修理。

　　日本《產經新聞》台北支局長Yaita Akio（矢板明夫）加減khue講，tsit遍郭台銘kah中共ê互動，ná親像「中國東北êm̄tsiâⁿgín-á teh冤家相拍」。A講：「你看啥？」B講：「看你，是按怎？」A講：「好膽koh看一遍看māi！」B講：「看to̍h看是按怎！」基本上到tsitê時陣，兩旁tio̍hē開始起腳動手，siàn嘴phóe、舂腹肚，結果大概雙方lóng有tio̍h傷，無人拍嬴。

政論家汪浩直剖講：「Tsitmá中共來查水表，郭董已經24點鐘恬恬m̄敢出聲！Tsit種人講beh kah習近平談和平協議？Khah早睏khah有眠！」

謝金河講，「中共嚴查富士康，是m̄是beh hō͘郭董知難而退，加入整合藍白ê行列。中共嚴查富士康另外一个意涵是台商mā是tī共同富裕之列。Tsit遍查稅，富士康可能mā tio̍h親像阿里巴巴、騰訊，交出一大筆資金才ē煞。」

聽講鴻海tī中國ê企業富士康hō͘中國查水表，民進黨賴清德講：我希望咱全國民眾應該to̍h支持鴻海、支持台灣ê企業。平平是tsit遍總統參選人，中國國民黨ê候友宜kah民眾黨ê柯文哲，恬tsiⁿtsiⁿ乖kah ná貓á咧！

　　中國若看人bē爽to̍h beh出手拍人，郭台銘kan-taⁿ出一枝嘴ké勇。兩个lóng假ná m̄tsiâⁿgín-á！ 　　(231027)


註：跌停　　汪浩 請唸華語