《綠色短評》

 | | | 轉寄

中國國民黨náē無骨頭到tsit款？

作者 李南衡, TsoânTâijī/全台字 by Tsng Hūi-phêng 2023.11.26




Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　　 Lí Lâmhêng

　　 Tiongkok Kokbîntóng náē bô kutthâu kàu tsit khoán?

2024 nî tsóngthóng tōa soán, tsi̍t khaisí, Tiongkok Kokbîntóng tsúse̍k Tsu Li̍plûn thêtshut "hui Le̍k tōa liânbêng", tio̍h íking piáubêng Tiongkok Kokbîntóng phah bē iâⁿ Bîntsìntóng, kiaⁿ kah bōe tsiàn tio̍h singjīn su, si̍ttsāi sī bô kutkhì. I hibāng tsio pa̍t tóng tàu tshutla̍t, tsòhóe phah iâⁿ Bîntsìntóng. Lán bô ingkai kóng Tiongkok Kokbîntóng bô kutthâu nńg siôsiô. Lán khòaⁿ Tiongkok Kokbîntóng li̍phuat úigoân ū 37 se̍k, bîntsìntóng ū 62 se̍k, kanta tsit hāng su niāniā. Kîtha tshiūⁿkóng tsoân kok koāntshītiúⁿ Tiongkok Kokbîntóng ū 14 ê, Bîntsìntóng 5 ê; koāntshī gītiúⁿ hùgītiúⁿ Tiongkok Kokbîntóng ū 26 ê, Bîntsìntóng 6 ê; koāntshī gīoân Tiongkok Kokbîntóng ū 394 ê, Bîntsìntóng ū 238 ê; tsoân kok hiongtìn tshītiúⁿ Tiongkok Kokbîntóng ū 80 ê, Bîntsìntóng 40 ê; tsoân kok tshunlítiúⁿ Tiongkok Kokbîntóng ū 1,221 ê, Bîntsìntóng 285 ê. Lí khòaⁿ, Tiongkok Kokbîntóng tī tēhng ê tso͘tsit tōngoân le̍kliōng násī Bîntsìntóng ē pítit·ê? Tsiahni̍h tsho͘ióng ê Tiongkok Kokbîntóng náē m̄ káⁿ kah Bîntsìntóng ko͘ tùisiah soán tsóngthóng leh? sió siūⁿ tsi̍tē, goânlâi sī i bô kutthâu!

　　 Tiongkok Kokbîntóng lāi m̄ sī ta̍kê lóng bô kutthâu. Hâu Iúgî kēngsoán pānkongsik tsiphêngtiúⁿ Kim Phó͘tshong tio̍h siongtong bô jīntông soán tsóngthóng tio̍h kah lâng ha̍p, tsátsá tī tshitgue̍h jīgō͘ tio̍h ti̍t peh,"Pe̍h tsiàⁿ Nâ hù" bôkhólêng, bô huattō͘ tsiapsiū Tiongkok Kokbîntóng hông tsia̍htiāu ê miāūn. Kah Bîntsìntóng tèng ko͘ki, tsún nāsī soán su "mātio̍h khiā thêngthêng tó·lo̍hkhì." khósioh ū kutkhì ê Kim sióto hông tèng kah móasin sī siong!

Tiongkok Kokbîntóng ê Tsu Li̍plûn thâutsi̍tê tshōe Bîntsiòngtóng ê Kua Bûntiat lâi "Nâ Pe̍h ha̍p", ha̍p lâi ha̍p khì ha̍p bē hósè,"Nâ Pe̍h ha̍p" suah piàn tsoh "Nâ Pe̍h thua". Bô gîgō͘ tsa̍pitgue̍h tshetsa̍p, Má Ingkiú tsêng tsóngthóng thiàutshut suantho̍k "sèngtsí", Nâ Pe̍h ha̍p tio̍h ēng Kua Bûntiat thêtshut ê tsoân bîntiāu, Nâ Pe̍h bô ha̍h tsua̍ttùi bē iâⁿ. Tsu Li̍plûn, Hāu Iúgî, Kua Bûntiat lóng kūi teh huah kóng, niá tsí. Siā hôngun! Tiongkok Kokbîntóng kah Bîntsiòngtóng lóng bô kutthâu kah tsit khoán!

Má Ingkiú tsêng tsóngthóng jīmlāi ê Hêngtsèngīⁿtiúⁿ Lâu Tiāuhiân, tsa̍pitgue̍h tsa̍psì beh khì Lâmkiaⁿ tshamka "2023 nn̄g hōaⁿ khìgia̍pka honghōe nîhōe" tshuthuat tsêng, tsuankang pàithok Má Ingkiú tsêng tsóngthóng tio̍h tshutlâi tshioksêng "Nâ Pe̍h ha̍p"; tsin túhó, Má Ingkiú kikimhōe tsiphêngtiúⁿ Siau Hiokgîm tī tsa̍pitgue̍h tshejī tsì tshegō͘, khì Pakkiaⁿ hóngbūn saⁿ kang, tshutse̍k tī Tiòhîtâi pinkoán kíhêng ê Pakkiaⁿ lūntôaⁿ, tńglâi Tâioân liáuāu, Má Ingkiú tio̍h tshuttshiú tshioksêng tsa̍pitgue̍h tsa̍pgō͘ tējī tshù "Nâ Pe̍h ha̍p" tsèngtóng hia̍psiong hōegī, tī Má Ingkiú tsêng tsóngthóng kiàntsèng ē ta̍tsêng 6 tiám kiōngsik. Ū tsi̍t tiám kóng tôngì tsoânbîntiāu, tānsī bîntiāu kiatkó tī gō͘tsha hoānûi 3% í lāi, Bîntsiòngtóng tio̍h niū Tiongkok Kokbîntóng. Pah nî lāutiàm ê Tiongkok Kokbîntóng, káⁿ kóngtshut tsiahni̍h bô kutthâu ê ōe!

Tsa̍pitgue̍h tsa̍pgō͘, Tiongkok "tsoân kok Tâikhìliân" kiônglia̍t kiàngī, ūitio̍h káisiān Tâihái ê kíntiuⁿ kuanhē, tshioktsìn nn̄ghōaⁿ ê hôpêng huattián kah kingtsè ê iôngha̍p huattián, Nâ Pe̍h nn̄g pêng ingkai í tāikio̍k ūi tiōng, bô hòngkhì jīmhô phah khui kiongkio̍k ê hongàn, kóaⁿkín oânsêng thóngha̍p, si̍thiān tsèngtóng lûnthè. Tse sī lēnggōa tsi̍t tō sèngtsí.

Ánne lán tio̍h tsaiiáⁿ, sī ántsóaⁿ náē m̄nā Tiongkok Kokbîntóng, liân Bîntsiòngtóng mā bô kutthâu! (231117)


Pe̍h-ōe-jī-pán/白話字版



《 Le̍k-sik toán-phêng 》　　 Lí Lâm-hêng

　　 Tiong-kok Kok-bîn-tóng náē bô kut-thâu kàu tsit khoán?

2024 nî tsóng-thóng tōa soán, tsi̍t khai-sí, Tiong-kok Kok-bîn-tóng tsú-se̍k Tsu Li̍p-lûn thê-tshut "hui Le̍k tōa liân-bêng", tio̍h í-king piáu-bêng Tiong-kok Kok-bîn-tóng phah bē iâⁿ Bîn-tsìn-tóng, kiaⁿ kah bōe tsiàn tio̍h sing-jīn su, si̍t-tsāi sī bô kut-khì. I hi-bāng tsio pa̍t tóng tàu tshut-la̍t, tsò-hóe phah iâⁿ Bîn-tsìn-tóng. Lán bô ing-kai kóng Tiong-kok Kok-bîn-tóng bô kut-thâu nńg siô-siô. Lán khòaⁿ Tiong-kok Kok-bîn-tóng li̍p-huat úi-goân ū 37 se̍k, bîn-tsìn-tóng ū 62 se̍k, kan-ta tsit hāng su niā-niā. Kî-tha tshiūⁿ-kóng tsoân kok koān-tshī-tiúⁿ Tiong-kok Kok-bîn-tóng ū 14 ê, Bîn-tsìn-tóng 5 ê; koān-tshī gī-tiúⁿ hù-gī-tiúⁿ Tiong-kok Kok-bîn-tóng ū 26 ê, Bîn-tsìn-tóng 6 ê; koān-tshī gī-oân Tiong-kok Kok-bîn-tóng ū 394 ê, Bîn-tsìn-tóng ū 238 ê; tsoân kok hiong-tìn tshī-tiúⁿ Tiong-kok Kok-bîn-tóng ū 80 ê, Bîn-tsìn-tóng 40 ê; tsoân kok tshun-lí-tiúⁿ Tiong-kok Kok-bîn-tóng ū 1,221 ê, Bîn-tsìn-tóng 285 ê. Lí khòaⁿ, Tiong-kok Kok-bîn-tóng tī tē-hng ê tso͘-tsit tōng-oân le̍k-liōng ná-sī Bîn-tsìn-tóng ē pí-tit-·ê? Tsiah-ni̍h tsho͘-ióng ê Tiong-kok Kok-bîn-tóng ná-ē m̄ káⁿ kah Bîn-tsìn-tóng ko͘ tùi-siah soán tsóng-thóng leh? sió siūⁿ tsi̍t-ē, goân-lâi sī i bô kut-thâu!

　　 Tiong-kok Kok-bîn-tóng lāi m̄ sī ta̍k-ê lóng bô kut-thâu. Hâu Iú-gî kēng-soán pān-kong-sik tsip-hêng-tiúⁿ Kim Phó͘-tshong tio̍h siong-tong bô jīn-tông soán tsóng-thóng tio̍h kah lâng ha̍p, tsá-tsá tī tshit-gue̍h jī-gō͘ tio̍h ti̍t peh,"Pe̍h tsiàⁿ Nâ hù" bô-khó-lêng, bô huat-tō͘ tsiap-siū Tiong-kok Kok-bîn-tóng hông tsia̍h-tiāu ê miā-ūn. Kah Bîn-tsìn-tóng tèng ko͘-ki, tsún nā-sī soán su "mā-tio̍h khiā thêng-thêng tó-·lo̍h-khì." khó-sioh ū kut-khì ê Kim sió-to hông tèng kah móa-sin sī siong!

Tiong-kok Kok-bîn-tóng ê Tsu Li̍p-lûn thâu-tsi̍t-ê tshōe Bîn-tsiòng-tóng ê Kua Bûn-tiat lâi "Nâ Pe̍h ha̍p", ha̍p lâi ha̍p khì ha̍p bē hó-sè,"Nâ Pe̍h ha̍p" suah piàn tsoh "Nâ Pe̍h thua". Bô gî-gō͘ tsa̍p-it-gue̍h tshe-tsa̍p, Má Ing-kiú tsêng tsóng-thóng thiàu-tshut suan-tho̍k "sèng-tsí", Nâ Pe̍h ha̍p tio̍h ēng Kua Bûn-tiat thê-tshut ê tsoân bîn-tiāu, Nâ Pe̍h bô ha̍h tsua̍t-tùi bē iâⁿ. Tsu Li̍p-lûn, Hāu Iú-gî, Kua Bûn-tiat lóng kūi teh huah kóng, niá tsí. Siā hông-un! Tiong-kok Kok-bîn-tóng kah Bîn-tsiòng-tóng lóng bô kut-thâu kah tsit khoán!

Má Ing-kiú tsêng tsóng-thóng jīm-lāi ê Hêng-tsèng-īⁿ-tiúⁿ Lâu Tiāu-hiân, tsa̍p-it-gue̍h tsa̍p-sì beh khì Lâm-kiaⁿ tsham-ka "2023 nn̄g hōaⁿ khì-gia̍p-ka hong-hōe nî-hōe" tshut-huat tsêng, tsuan-kang pài-thok Má Ing-kiú tsêng tsóng-thóng tio̍h tshut-lâi tshiok-sêng "Nâ Pe̍h ha̍p"; tsin tú-hó, Má Ing-kiú ki-kim-hōe tsip-hêng-tiúⁿ Siau Hiok-gîm tī tsa̍p-it-gue̍h tshe-jī tsì tshe-gō͘, khì Pak-kiaⁿ hóng-būn saⁿ kang, tshut-se̍k tī Tiò-hî-tâi pin-koán kí-hêng ê Pak-kiaⁿ lūn-tôaⁿ, tńg-lâi Tâi-oân liáu-āu, Má Ing-kiú tio̍h tshut-tshiú tshiok-sêng tsa̍p-it-gue̍h tsa̍p-gō͘ tē-jī tshù "Nâ Pe̍h ha̍p" tsèng-tóng hia̍p-siong hōe-gī, tī Má Ing-kiú tsêng tsóng-thóng kiàn-tsèng ē ta̍t-sêng 6 tiám kiōng-sik. Ū tsi̍t tiám kóng tông-ì tsoân-bîn-tiāu, tān-sī bîn-tiāu kiat-kó tī gō͘-tsha hoān-ûi 3% í lāi, Bîn-tsiòng-tóng tio̍h niū Tiong-kok Kok-bîn-tóng. Pah nî lāu-tiàm ê Tiong-kok Kok-bîn-tóng, káⁿ kóng-tshut tsiah-ni̍h bô kut-thâu ê ōe!

Tsa̍p-it-gue̍h tsa̍p-gō͘, Tiong-kok "tsoân kok Tâi-khì-liân" kiông-lia̍t kiàn-gī, ūi-tio̍h kái-siān Tâi-hái ê kín-tiuⁿ kuan-hē, tshiok-tsìn nn̄g-hōaⁿ ê hô-pêng huat-tián kah king-tsè ê iông-ha̍p huat-tián, Nâ Pe̍h nn̄g pêng ing-kai í tāi-kio̍k ūi tiōng, bô hòng-khì jīm-hô phah khui kiong-kio̍k ê hong-àn, kóaⁿ-kín oân-sêng thóng-ha̍p, si̍t-hiān tsèng-tóng lûn-thè. Tse sī lēng-gōa tsi̍t tō sèng-tsí.

Án-ne lán tio̍h tsai-iáⁿ, sī án-tsóaⁿ ná-ē m̄-nā Tiong-kok Kok-bîn-tóng, liân Bîn-tsiòng-tóng mā bô kut-thâu! (231117)




2024年總統大選，一開始，中國國民黨主席朱立倫提出「非綠大聯盟」，tio̍h已經表明中國國民黨拍bē嬴民進黨，驚kah未戰tio̍h先認輸，實在是無骨氣。伊希望招別黨鬥出力、做夥拍嬴民進黨。咱無應該講中國國民黨無骨頭軟siô-siô。咱看中國國民黨立法委員有37席，民進黨有62席，kan-ta tsit項輸niā-niā。其他像講全國縣市長中國國民黨有14个、民進黨5个；縣市議長副議長中國國民黨有26个、民進黨6个；縣市議員中國國民黨有394个、民進黨有238个；全國鄉鎮市長中國國民黨有80个、民進黨40个；全國村里長中國國民黨有1,221个、民進黨285个。你看，中國國民黨tī地方ê組織動員力量ná是民進黨ē比得ê？Tsiah-ni̍h粗勇ê中國國民黨ná-ēm̄敢kah民進黨孤對削選總統咧？小想一下，原來是伊無骨頭！

　　中國國民黨內m̄是ta̍k个lóng無骨頭。侯友宜競選辦公室執行長金溥聰tio̍h相當無認同選總統tio̍h kah人合，早早tī七月二五tio̍h直剖：「白正藍副」無可能，無法度接受中國國民黨hông食掉ê命運。Kah民進黨釘孤枝，準若是選輸「mā-tio̍h khiā挺挺倒落去。」可惜有骨氣ê金小刀hông釘kah滿身是傷！

中國國民黨ê朱立倫頭一个tshōe民眾黨ê柯文哲來「藍白合」，合來合去合bē好勢，「藍白合」煞變作「藍白拖」。無疑誤十一月初十，馬英九前總統跳出宣讀「聖旨」：藍白合tio̍h用柯文哲提出ê全民調，藍白無合絕對bē嬴。朱立倫、侯有宜、柯文哲lóng跪teh喝講：領旨。謝皇恩！中國國民黨kah民眾黨lóng無骨頭kah tsit款！

馬英九前總統任內ê行政院長劉兆玄，十一月十四beh去南京參加「2023兩岸企業家峰會年會」出發前，專工拜託馬英九前總統tio̍h出來促成「藍白合」；真tú好，馬英九基金會執行長蕭旭岑tī 十一月初二至初五，去北京訪問三工，出席tī釣魚台賓館舉行ê北京論壇，轉來台灣了後，馬英九tio̍h出手促成十一月十五第二次「藍白合」政黨協商會議，tī馬英九前總統見證下達成6點共識。有一點講同意全民調，但是民調結果tī誤差範圍3%以內，民眾黨tio̍h讓中國國民黨。百年老店ê中國國民黨，敢講出tsiah-ni̍h無骨頭ê話！

十一月十五，中國「全國台企聯」強烈建議，為tio̍h改善台海ê緊張關係，促進兩岸ê和平發展kah經濟ê融合發展，藍白二旁應該以大局為重，無放棄任何拍開僵局ê方案，趕緊完成統合，實現政黨輪替。Tse是另外一道聖旨。

Án-ne咱tio̍h知影，是按怎náēm̄-nā中國國民黨、連民眾黨mā無骨頭！ (231117)