《綠色短評》

 | | | 轉寄

猶有人m̄知影侯友宜是草包！

作者 李南衡, TsoânTâijī/全台字 by Tsng Hūi-phêng 2023.12.17





Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　　 Lí Lâmhêng

　　　 Iáuū lâng m̄tsai iáⁿ Hāu Iúgî sī tsháupau!

Tsa̍pjīgue̍h tshesì, Tiongkok Kokbîntóng tsiàⁿ, hù tsóngthóng tshamsoánjîn Hāu Iúgî, Tiō Siáukhong kah kēngpān tso͘tsitpō͘ hù tiàutsi̍pjîn Tsiā Liôngkài, khì kàu Tâilâmtshī Tshitkó͘khu kuansim kngtiān, lô͘tsa būntê, jîtshiáⁿ tshiamsú "hoán puttong tsèngtiān ê liânsúsu". Hāu Iúgî kóng, i khòaⁿtio̍h hóhó tshân, hîun lóng hông ēng lâi tsèngtiān, Tâilâm bílē ê thó͘tē, singthài lóng hông phòhoāi liáuliáu, oântsoân lóng bô khólī lônghîbîn ê seⁿkè, jîtshiáⁿ ē tsōsêng Jia̍ttó Hāuèng, siàuliân lâng siūⁿ beh tńgkhì kò͘hiong phahpiàⁿ, lóng khòaⁿ bē tio̍h kihōe kah hibāng.

　　Hit àm, Tâilâm tshītsènghú tio̍h piáusī,"M̄thang ūitio̍h tsèngtī bo̍ktik ittsài hoāntshò jîtshiáⁿ tshò kah siuⁿ līphó͘!" 2019 nî saⁿgue̍h, Môatāu bûntàn tngteh khuihue iáu bōe kiatkó, Tsiā Liôngkài bat loān kóng ū 200 bān kin bûntàn hông hiatsak tī Tsanbûnkhe po͘ , koh ū phah iáⁿphìⁿ,"tiantò sīhui". Tsit piàn kā iâmthuaⁿ tē kóng tsoh hîtiān kiōngseⁿ àn tiûⁿ,"lóng sī lāmsám kóng"! Tâilâm tshītsènghú mā ū tsètsok"thàṳông kngtiān káⁿ ē tsōsêng Jia̍ttó hāuèng?" "káⁿ ūiáⁿ tsin tsē hóhó tshân hông ēng lâi tsèngtiān?" téng kngtiān sió tsaibat tô͘khah,têngtshing iâugiân m̄ sī sūsi̍t, tshiáⁿ m̄thang thiaⁿ sìn!"Jia̍ttó hāuèng" sī tsí to͘tshī pí tsiuûi tēkhu untō͘ khah koân ê hiānsiōng, Tâioân thàṳông kngtiānpán bīntsik pēng bô ta̍tkàu to͘tshī kuibô͘, m̄ sī thôaⁿgiân só͘ kóng ê. Jîtshiáⁿ hóhó tshân mā bē hông ēng lâi tsèngtiān, kinkì 2020 nî tshitgue̍h siutsèng ê "lônggia̍p tsúkoán kikuan tôngì lônggia̍p ēng tē piànking súiōng símtsa tsokgia̍p iàutiám" kuitēng, hāntsè te̍ktēng lônggia̍pkhu kah ióngsi̍t hîgia̍p singsán khu lāi, lóng bē sái piànking siattì kngtiān.

Iúkuan Tiongkok Kokbîntóng tsóngthóng tshamsoánjîn Hāu Iúgî kóng "kngtiānpán ē tsōsêng Jia̍ttó hāuèng", "phòhoāi singthài". Tsa̍pjīgue̍h tshegō͘, Bîntsìntóng tsóngthóng tshamsoánjîn Lōa Tshingtik hoánkik kóng, kngtiān sángia̍p bô hun Nâ Le̍k tsiptsèng lóng sī kokka tsèngtshik, kngtiān bē tòalâi Jia̍ttó hāuèng, bē énghióng kànghō͘ liōng, mā bē tsōsêng thiankáujia̍t, tse sī kipún ê khoha̍k siôngsik. Tsi̍tê tsóngthóng tshamsoánjîn "ingkai ū kipún ê khoha̍k siôngsik", jīmhô hāusoánjîn to bē sái ūitio̍h soánkí līik thiaukang kā Tâilâmtshī, kngtiān sángia̍p " tah phiauthâu".

　　 Tsa̍pjīgue̍h tshegō͘, Tâilâm tshītiúⁿ N̂g Úitiat tùi tsittiám ti̍t tshiàng, Hāu Iúgî "bô siôngsik koh m̄ tha̍ktsheh", kinpún sī "tshiauua̍t Hân Kokjû ê tōa tsháupau". N̂g tshītiúⁿ kóng liáu tsha tsi̍ttiámá, bô kàu khùi. Lán thiaⁿ Lâu Katshiong ántsóaⁿ kóng,

La̍kgue̍h tsa̍psì tsákhí, ithiòng tsitshî Tiongkok Kokbîntóng ê tsutshim imga̍k lâng Lâu Katshiong tī bīntsheh huat bûn piáusī, i kakī khòaⁿliáu Hāu Iúgî tī Tsèngtī Tāiha̍k kah ha̍ksing ê tappiān liáuāu, tsiah thiatté liáukái, Hāu Iúgî "M̄nā sī tsi̍tê tsháupau, i tsháupau lāité liân tsi̍t ki tsháu to bô","lâng mn̄g tang i ìn sai, līphó͘ kàu tsīnpōng, o͘pe̍h loān kóng". Lâu Katshiong kóng, bīntùi tâikha Tāiha̍ksing ê the̍hmn̄g, Hāu Iúgî ê ìntap nátshiūⁿ "tsho͘tiongsing" ê thêngtō͘, sūāu ha̍ksing kā Hāu Iúgî tsù 56 pun bô ki̍pkeh. Lâu Katshiong jīnûi ánne sǹg sī "tsiok tionghō͘"ah.

　　 Tsin tsē lâng iáu m̄tsai iáⁿ Hāu Iúgî sī tsháupau! Koh khah m̄tsai iáⁿ Hāu Iúgî sī tsi̍tê lāité liân tsi̍t ki tsháu to bô ê tsháupau! 　　　　(231208)



Pe̍h-ōe-jī-pán/白話字版



《 Le̍k-sik toán-phêng 》　　 Lí Lâm-hêng

　　　 Iáu-ū lâng m̄-tsai iáⁿ Hāu Iú-gî sī tsháu-pau!

Tsa̍p-jī-gue̍h tshe-sì, Tiong-kok Kok-bîn-tóng tsiàⁿ, hù tsóng-thóng tsham-soán-jîn Hāu Iú-gî, Tiō Siáu-khong kah kēng-pān tso͘-tsit-pō͘ hù tiàu-tsi̍p-jîn Tsiā Liông-kài, khì kàu Tâi-lâm-tshī Tshit-kó͘-khu kuan-sim kng-tiān, lô͘-tsa būn-tê, jî-tshiáⁿ tshiam-sú "hoán put-tong tsèng-tiān ê liân-sú-su". Hāu Iú-gî kóng, i khòaⁿ-tio̍h hó-hó tshân, hî-un lóng hông ēng lâi tsèng-tiān, Tâi-lâm bí-lē ê thó͘-tē, sing-thài lóng hông phò-hoāi liáu-liáu, oân-tsoân lóng bô khó-lī lông-hî-bîn ê seⁿ-kè, jî-tshiáⁿ ē tsō-sêng Jia̍t-tó Hāu-èng, siàu-liân lâng siūⁿ beh tńg-khì kò͘-hiong phah-piàⁿ, lóng khòaⁿ bē tio̍h ki-hōe kah hi-bāng.

　　Hit àm, Tâi-lâm tshī-tsèng-hú tio̍h piáu-sī,"M̄-thang ūi-tio̍h tsèng-tī bo̍k-tik it-tsài hoān-tshò jî-tshiáⁿ tshò kah siuⁿ lī-phó͘!" 2019 nî saⁿ-gue̍h, Môa-tāu bûn-tàn tng-teh khui-hue iáu bōe kiat-kó, Tsiā Liông-kài bat loān kóng ū 200 bān kin bûn-tàn hông hiat-sak tī Tsan-bûn-khe po͘ , koh ū phah iáⁿ-phìⁿ,"tian-tò sī-hui". Tsit piàn kā iâm-thuaⁿ tē kóng tsoh hî-tiān kiōng-seⁿ àn tiûⁿ,"lóng sī lām-sám kóng"! Tâi-lâm tshī-tsèng-hú mā ū tsè-tsok"thài-iông kng-tiān káⁿ ē tsō-sêng Jia̍t-tó hāu-èng?" "káⁿ ū-iáⁿ tsin tsē hó-hó tshân hông ēng lâi tsèng-tiān?" téng kng-tiān sió tsai-bat tô͘-khah,têng-tshing iâu-giân m̄ sī sū-si̍t, tshiáⁿ m̄-thang thiaⁿ sìn!"Jia̍t-tó hāu-èng" sī tsí to͘-tshī pí tsiu-ûi tē-khu un-tō͘ khah koân ê hiān-siōng, Tâi-oân thài-iông kng-tiān-pán bīn-tsik pēng bô ta̍t-kàu to͘-tshī kui-bô͘, m̄ sī thôaⁿ-giân só͘ kóng ê. Jî-tshiáⁿ hó-hó tshân mā bē hông ēng lâi tsèng-tiān, kin-kì 2020 nî tshit-gue̍h siu-tsèng ê "lông-gia̍p tsú-koán ki-kuan tông-ì lông-gia̍p ēng tē piàn-king sú-iōng sím-tsa tsok-gia̍p iàu-tiám" kui-tēng, hān-tsè te̍k-tēng lông-gia̍p-khu kah ióng-si̍t hî-gia̍p sing-sán khu lāi, lóng bē sái piàn-king siat-tì kng-tiān.

Iú-kuan Tiong-kok Kok-bîn-tóng tsóng-thóng tsham-soán-jîn Hāu Iú-gî kóng "kng-tiān-pán ē tsō-sêng Jia̍t-tó hāu-èng", "phò-hoāi sing-thài". Tsa̍p-jī-gue̍h tshe-gō͘, Bîn-tsìn-tóng tsóng-thóng tsham-soán-jîn Lōa Tshing-tik hoán-kik kóng, kng-tiān sán-gia̍p bô hun Nâ Le̍k tsip-tsèng lóng sī kok-ka tsèng-tshik, kng-tiān bē tòa-lâi Jia̍t-tó hāu-èng, bē éng-hióng kàng-hō͘ liōng, mā bē tsō-sêng thian-káu-jia̍t, tse sī ki-pún ê kho-ha̍k siông-sik. Tsi̍t-ê tsóng-thóng tsham-soán-jîn "ing-kai ū ki-pún ê kho-ha̍k siông-sik", jīm-hô hāu-soán-jîn to bē sái ūi-tio̍h soán-kí lī-ik thiau-kang kā Tâi-lâm-tshī, kng-tiān sán-gia̍p " tah phiau-thâu".

　　 Tsa̍p-jī-gue̍h tshe-gō͘, Tâi-lâm tshī-tiúⁿ N̂g Úi-tiat tùi tsit-tiám ti̍t tshiàng, Hāu Iú-gî "bô siông-sik koh m̄ tha̍k-tsheh", kin-pún sī "tshiau-ua̍t Hân Kok-jû ê tōa tsháu-pau". N̂g tshī-tiúⁿ kóng liáu tsha tsi̍t-tiám-á, bô kàu khùi. Lán thiaⁿ Lâu Ka-tshiong án-tsóaⁿ kóng,

La̍k-gue̍h tsa̍p-sì tsá-khí, it-hiòng tsi-tshî Tiong-kok Kok-bîn-tóng ê tsu-tshim im-ga̍k lâng Lâu Ka-tshiong tī bīn-tsheh huat bûn piáu-sī, i ka-kī khòaⁿ-liáu Hāu Iú-gî tī Tsèng-tī Tāi-ha̍k kah ha̍k-sing ê tap-piān liáu-āu, tsiah thiat-té liáu-kái, Hāu Iú-gî "M̄-nā sī tsi̍t-ê tsháu-pau, i tsháu-pau lāi-té liân tsi̍t ki tsháu to bô","lâng mn̄g tang i ìn sai, lī-phó͘ kàu tsīn-pōng, o͘-pe̍h loān kóng". Lâu Ka-tshiong kóng, bīn-tùi tâi-kha Tāi-ha̍k-sing ê the̍h-mn̄g, Hāu Iú-gî ê ìn-tap ná-tshiūⁿ "tsho͘-tiong-sing" ê thêng-tō͘, sū-āu ha̍k-sing kā Hāu Iú-gî tsù 56 pun bô ki̍p-keh. Lâu Ka-tshiong jīn-ûi án-ne sǹg sī "tsiok tiong-hō͘"ah.

　　 Tsin tsē lâng iáu m̄-tsai iáⁿ Hāu Iú-gî sī tsháu-pau! Koh khah m̄-tsai iáⁿ Hāu Iú-gî sī tsi̍t-ê lāi-té liân tsi̍t ki tsháu to bô ê tsháu-pau! 　　　　(231208)




十二月初四，中國國民黨正、副總統參選人侯友宜、趙少康kah競辦組織部副召集人謝龍介，去到台南市七股區關心光電、爐碴問題，而且簽署「反不當種電ê連署書」。侯友宜講，伊看tio̍h好好田、魚塭lóng hông用來種電，台南美麗ê土地、生態lóng hông破壞了了，完全lóng無考慮農漁民ê生計，而且ē造成熱島效應，少年人想beh轉去故鄉拍拚，lóng看bē tio̍h機會kah希望。

　　Hit暗，台南市政府tio̍h表示，「M̄-thang為tio̍h政治目的一再犯錯而且錯kahsiuⁿ離譜！」2019年三月，麻豆文旦當teh開花猶未結果，謝龍介bat亂講有200萬斤文旦hông hiat-saktī曾文溪埔、koh有拍影片，「顚倒是非」。Tsit遍kā鹽灘地講作漁電共生案場，「lóng是濫糝講」！台南市政府mā有製作「太陽光電敢ē造成熱島效應？」「敢有影真tsē好好田hông用來種電？」等光電小知識圖卡，澄清謠言m̄是事實，請m̄-thang聽信！「熱島效應」是指都市比周圍地區溫度khah koânê現象，台灣太陽光電板面積並無達到都市規模，m̄是傳言所講ê。而且好好田mā bē hông用來種電，根據2020年七月修正ê「農業主管機關同意農業用地變更使用審查作業要點」規定，限制特定農業區kah養殖漁業生產區内，lóng bē使變更設置光電。

有關中國國民黨總統參選人侯友宜講「光電板ē造成熱島效應」、「破壞生態」。十二月初五，民進黨總統參選人賴清德反擊講，光電產業無分藍綠執政lóng是國家政策，光電bē帶來熱島效應、bē影響降雨量，mā bē造成天狗熱，tse是基本ê科學常識。一個總統參選人「應該有基本ê科學常識」，任何候選人都bē使為tio̍h選舉利益刁工kā台南市、光電產業「貼標頭」。

　　十二月初五，台南市長黃偉哲對tsit點直唱，侯友宜「無常識koh m̄讀冊」，根本是「超越韓國瑜ê大草包」。黃市長講了差一點á、無夠氣。咱聽劉家昌按怎講：

六月十四早起，一向支持中國國民黨ê資深音樂人劉家昌tī面冊發文表示，伊家己看了侯友宜tī政治大學kah學生ê答辯了後，才徹底瞭解，侯友宜「M̄-nā是一個草包，伊草包內底連一枝草都無」、「人問東伊應西、離譜到盡磅，烏白亂講」。劉家昌講，面對台腳大學生ê提問，侯友宜ê應答那像「初中生」ê程度，事後學生kā侯友宜注56分無及格。劉家昌認為án-ne算是「足忠厚」ah。

　　真tsē人猶m̄知影侯友宜是草包！Koh khah m̄知影侯友宜是一個內底連一枝草都無ê草包！　　　　(231208)