《綠色短評》

 | | | 轉寄

Tsit款ê柯文哲講伊是深綠ê，m̄驚笑破人ê嘴！

作者 李南衡, TsoânTâijī/全台字 by Tsng Hūi-phêng 2023.12.24




Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　 Lí Lâmhêng

　Tsitkhoán ê Kua Bûntiat kóng i sī tshim le̍k·ê, m̄ kiaⁿ tshiò phòa lâng ê tshùi!

Tsa̍pjīgue̍h tshela̍k pòtshut ê Hôasī sinbûn tsuanhông tiong, Bîntsiòngtóng tsóngthóng tshamsoánjîn Kua Bûntiat kóng "góa lāisim púntsit iûgoân sī tshim le̍k· ê!" tsin tsē lâng thiaⁿliáu lóng gāng·khì.

　　2014 nî tsa̍pitgue̍h tshetshit, Tâipaktshītiúⁿ soánkí tiānsī piānlūn hōe, Tiongkok Kokbîntóng hāusoánjîn Liân Sèngbûn tsitgî bô tóngphài hāusoánjîn Kua Bûntiat kòikhì bat kóng kakī sī "kimkule̍k", tsitmá khiok kóng beh têng khuiki, tshiauua̍t Nâle̍k, thāitō͘ péngkhí péngtó. Kua Bûntiat hoánpo̍k kóng "góa kóng kòe góa sī kimkule̍k, hit tongsî sī ūitio̍h hiòng tsitê siāhōe tsèngbêng lí ê tshèng siong sī tsin·ê, góa ánne kóng sī ūitio̍h Tâioân siāhōe ê hôhâi, lí kináji̍t kóng góa sī kimkule̍k, lí sī teh thiahli̍h tsitê siāhōe, ūitio̍h lí kòjîn ê tsèngtī līik!"Kua Bûntiat sī kóng 2010 nî tsa̍pitgue̍h jīla̍k, Gō͘ to͘ soánkí tsêng tsi̍t àm, Liân Sèngbûn tī Énghôtshī tsō͘soán, hông khui tshèng gō͘ siong tio̍h sàngkhì Tâitāi pēⁿīⁿ, ū lâng hoâigî Liân Sèngbûn tio̍hsiong sī ké·ê, tongsî Tâitāi Tshòngsiong Iha̍kpō͘ tsújīm Kua Bûntiat tshut bīn tēngtshing "góa sī tshimle̍k·ê, góa sī siōng tōa ê tsèngjîn, tsitê bôkhólêng tsō ké". Ta̍kê oló Kua Bûntiat, hit piàn Tâipaktshī tiúⁿ soánkí tsin tsē Tâipak tshībîn tâuphiò soán hō͘ Kua Bûntiat.

2014 nî Kua Bûntiat tòngsoán tshītiúⁿ liáuāu, ittsài singbêng i sī tshēng pe̍hphâu ê ising, tāipiáu Pe̍ksik le̍kliōng, tshiauua̍t Nâ Le̍k ok tàu. Tsin tsē tshībîn siongsìn Pe̍hsik mā bē bái. 2015 nî pehgue̍h tsa̍ppeh, Kua Bûntiat tshītiúⁿ tē it piàn khì Siōnghái tshamka Siangsiâⁿ Lūntôaⁿ, khuibō͘ tìsû kóng i tsitshî "兩岸一家親" ê tsingsîn kah "sìê hō͘siong" goântsik, ta̍tkàu tshioktsìn kaulâu, tsēngka siānì ê bo̍kphiau. Hông tōa kiaⁿ tsi̍ttiô ê sī, 2013 nî tsa̍pgue̍h tshela̍k, Tiongkok kokka tsúsik 習近平 tī Ìnnî Bâlîtó tsèngsik thêtshut "兩岸一家親" ê kónghuat liáuāu, Kua Bûntiat sī tēitê tòe 習近平 ê tshùibóe kóng "兩岸一家親" ê Tâioân tsèngtī jînbu̍t, 習近平 thiaⁿliáu liông sim tōa hí, Tiongkok kín kā Kua Bûntiat tòngtsoh "kakī ê lâng". Tshúāu, Kua Bûntiat ittsài huatpiáu pô͘ Τiongkiōng khatshng ê giânlūn. Tâipak tshībîn kā Kua Bûntiat kóng tsoh sī "Italíah kok kî"— le̍k, pe̍h, âng saⁿ sik, khólêng ū lâng thiaⁿ khah bô, kóng Kua Bûntiat sī pinⁿ̂g khah tshingtshó, gōapiáu sī le̍k·ê, lāité pe̍h·ê, pō͘ pō͘ tsi̍tē kui tshùi sī âng·ê. 2019 nî pehgue̍h tshela̍k, Tâioân Bîntsiòngtóng sêngli̍p, kiaⁿ hông kóng kah Le̍kiâⁿ jú kiâⁿ jú hn̄g. Káugue̍h tshesaⁿ, Kua Bûntiat tsiapsiū 《POP Tōakokbîn 》tsuanhóng ê sî, bat pióthài kòe sī tshimle̍k ê Kua Bûntiat kóng i kakī ê tésik bô piàn, iûgoân sī le̍kté·ê.

　　 Kua Bûntiat káⁿ ūiáⁿ sī tshimle̍k· ê? i nā tsintsiàⁿ sī tshimle̍k·ê, bôkhólêng tī gō͘gue̍h huatpiáu koktsèng pe̍hphôesu, lāṳông the̍h kàu Nn̄ghōaⁿ tio̍h tiôngsin khétāng Hòeba̍uh kah Ho̍kba̍uh tâmphòaⁿ; Kua Bûntiat nā tsintsiàⁿ sī tshimle̍k·ê, bôkhólêng ē khì kah Nâsik ê Tiongkok Kokbîntóng tàukhang soán tsóngthóng hùtsóngthóng, siūⁿ beh ián tò le̍ksik ê Bîntsìntóng; tsa̍pitgue̍h tsa̍pgō͘, ū lâng mn̄g kóng, Kua Bûntiat kòeóng bat kóng tshutsì kàu taⁿ kakī siōng thóià ê sī bángá, katsua̍h kah Tiongkok Kokbîntóng. Kináji̍t khiok beh kah Tiongkok Kokbîntóng tséngha̍p? Kua Bûntiat nā tsintsiàⁿ sī tshimle̍k·ê, bôkhólêng ìn kóng, kakī tsin thóià Kokbîntóng, tānsī koh khah thònghūn Bîntsìntóng; Kua Bûntiat nā tsintsiàⁿ sī tshimle̍k·ê, bôkhólêng ē tī tsa̍pjīgue̍h tshepeh kóng Bîntsìntóng tsúse̍k, tsóngthóng hāusoánjîn Lōa Tshingtik "lâng tshingho͘ i sī Tâito̍k kimsun, góa khòaⁿ i tsitmá íking sī Tâito̍k kusun".

Tsitkhoán ê Kua Bûntiat kóng i sī tshimle̍k·ê, m̄ kiaⁿ tshiò phòa lâng ê tshùi! (231215)

Tsù, 兩岸一家親 　習近平 tshiáⁿ liām Hôagí



Pe̍h-ōe-jī-pán/白話字版




《 Le̍k-sik toán-phêng 》　 Lí Lâm-hêng

　Tsit-khoán ê Kua Bûn-tiat kóng i sī tshim le̍k-·ê, m̄ kiaⁿ tshiò phòa lâng ê tshùi!

Tsa̍p-jī-gue̍h tshe-la̍k pò-tshut ê Hôa-sī sin-bûn tsuan-hông tiong, Bîn-tsiòng-tóng tsóng-thóng tsham-soán-jîn Kua Bûn-tiat kóng "góa lāi-sim pún-tsit iû-goân sī tshim le̍k-· ê!" tsin tsē lâng thiaⁿ-liáu lóng gāng-·khì.

　　2014 nî tsa̍p-it-gue̍h tshe-tshit, Tâi-pak-tshī-tiúⁿ soán-kí tiān-sī piān-lūn hōe, Tiong-kok Kok-bîn-tóng hāu-soán-jîn Liân Sèng-bûn tsit-gî bô tóng-phài hāu-soán-jîn Kua Bûn-tiat kòe-khì bat kóng ka-kī sī "kim-ku-le̍k", tsit-má khiok kóng beh têng khui-ki, tshiau-ua̍t Nâ-le̍k, thāi-tō͘ péng-khí péng-tó. Kua Bûn-tiat hoán-po̍k kóng "góa kóng kòe góa sī kim-ku-le̍k, hit tong-sî sī ūi-tio̍h hiòng tsit-ê siā-hōe tsèng-bêng lí ê tshèng siong sī tsin-·ê, góa án-ne kóng sī ūi-tio̍h Tâi-oân siā-hōe ê hô-hâi, lí kin-á-ji̍t kóng góa sī kim-ku-le̍k, lí sī teh thiah-li̍h tsit-ê siā-hōe, ūi-tio̍h lí kò-jîn ê tsèng-tī lī-ik!"Kua Bûn-tiat sī kóng 2010 nî tsa̍p-it-gue̍h jī-la̍k, Gō͘ -to͘ soán-kí tsêng tsi̍t àm, Liân Sèng-bûn tī Éng-hô-tshī tsō͘-soán, hông khui tshèng gō͘ siong tio̍h sàng-khì Tâi-tāi pēⁿ-īⁿ, ū lâng hoâi-gî Liân Sèng-bûn tio̍h-siong sī ké-·ê, tong-sî Tâi-tāi Tshòng-siong I-ha̍k-pō͘ tsú-jīm Kua Bûn-tiat tshut bīn tēng-tshing "góa sī tshim-le̍k-·ê, góa sī siōng tōa ê tsèng-jîn, tsit-ê bô-khó-lêng tsō ké". Ta̍k-ê o-ló Kua Bûn-tiat, hit piàn Tâi-pak-tshī -tiúⁿ soán-kí tsin tsē Tâi-pak tshī-bîn tâu-phiò soán hō͘ Kua Bûn-tiat.

2014 nî Kua Bûn-tiat tòng-soán tshī-tiúⁿ liáu-āu, it-tsài sing-bêng i sī tshēng pe̍h-phâu ê i-sing, tāi-piáu Pe̍k-sik le̍k-liōng, tshiau-ua̍t Nâ Le̍k ok tàu. Tsin tsē tshī-bîn siong-sìn Pe̍h-sik mā bē bái. 2015 nî peh-gue̍h tsa̍p-peh, Kua Bûn-tiat tshī-tiúⁿ tē it piàn khì Siōng-hái tsham-ka Siang-siâⁿ Lūn-tôaⁿ, khui-bō͘ tì-sû kóng i tsi-tshî "兩岸一家親" ê tsing-sîn kah "sì-ê hō͘-siong" goân-tsik, ta̍t-kàu tshiok-tsìn kau-lâu, tsēng-ka siān-ì ê bo̍k-phiau. Hông tōa kiaⁿ tsi̍t-tiô ê sī, 2013 nî tsa̍p-gue̍h tshe-la̍k, Tiong-kok kok-ka tsú-sik 習近平 tī Ìn-nî Bâ-lî-tó tsèng-sik thê-tshut "兩岸一家親" ê kóng-huat liáu-āu, Kua Bûn-tiat sī tē-it-ê tòe 習近平 ê tshùi-bóe kóng "兩岸一家親" ê Tâi-oân tsèng-tī jîn-bu̍t, 習近平 thiaⁿ-liáu liông sim tōa hí, Tiong-kok kín kā Kua Bûn-tiat tòng-tsoh "ka-kī ê lâng". Tshú-āu, Kua Bûn-tiat it-tsài huat-piáu pô͘ Τiong-kiōng kha-tshng ê giân-lūn. Tâi-pak tshī-bîn kā Kua Bûn-tiat kóng tsoh sī "I-ta-lí-ah kok kî"— le̍k, pe̍h, âng saⁿ sik, khó-lêng ū lâng thiaⁿ khah bô, kóng Kua Bûn-tiat sī pin-nn̂g khah tshing-tshó, gōa-piáu sī le̍k-·ê, lāi-té pe̍h-·ê, pō͘ pō͘ tsi̍t-ē kui tshùi sī âng-·ê. 2019 nî peh-gue̍h tshe-la̍k, Tâi-oân Bîn-tsiòng-tóng sêng-li̍p, kiaⁿ hông kóng kah Le̍k-iâⁿ jú kiâⁿ jú hn̄g. Káu-gue̍h tshe-saⁿ, Kua Bûn-tiat tsiap-siū 《POP Tōa-kok-bîn 》tsuan-hóng ê sî, bat pió-thài kòe sī tshim-le̍k ê Kua Bûn-tiat kóng i ka-kī ê té-sik bô piàn, iû-goân sī le̍k-té-·ê.

　　 Kua Bûn-tiat káⁿ ū-iáⁿ sī tshim-le̍k-· ê? i nā tsin-tsiàⁿ sī tshim-le̍k-·ê, bô-khó-lêng tī gō͘-gue̍h huat-piáu kok-tsèng pe̍h-phôe-su, lāi-iông the̍h kàu Nn̄g-hōaⁿ tio̍h tiông-sin khé-tāng Hòe-ba̍uh kah Ho̍k-ba̍uh tâm-phòaⁿ; Kua Bûn-tiat nā tsin-tsiàⁿ sī tshim-le̍k-·ê, bô-khó-lêng ē khì kah Nâ-sik ê Tiong-kok Kok-bîn-tóng tàu-khang soán tsóng-thóng hù-tsóng-thóng, siūⁿ beh ián tò le̍k-sik ê Bîn-tsìn-tóng; tsa̍p-it-gue̍h tsa̍p-gō͘, ū lâng mn̄g kóng, Kua Bûn-tiat kòe-óng bat kóng tshut-sì kàu taⁿ ka-kī siōng thó-ià ê sī báng-á, ka-tsua̍h kah Tiong-kok Kok-bîn-tóng. Kin-á-ji̍t khiok beh kah Tiong-kok Kok-bîn-tóng tséng-ha̍p? Kua Bûn-tiat nā tsin-tsiàⁿ sī tshim-le̍k-·ê, bô-khó-lêng ìn kóng, ka-kī tsin thó-ià Kok-bîn-tóng, tān-sī koh khah thòng-hūn Bîn-tsìn-tóng; Kua Bûn-tiat nā tsin-tsiàⁿ sī tshim-le̍k-·ê, bô-khó-lêng ē tī tsa̍p-jī-gue̍h tshe-peh kóng Bîn-tsìn-tóng tsú-se̍k, tsóng-thóng hāu-soán-jîn Lōa Tshing-tik "lâng tshing-ho͘ i sī Tâi-to̍k kim-sun, góa khòaⁿ i tsit-má í-king sī Tâi-to̍k ku-sun".

Tsit-khoán ê Kua Bûn-tiat kóng i sī tshim-le̍k-·ê, m̄ kiaⁿ tshiò phòa lâng ê tshùi! (231215)

Tsù, 兩岸一家親 　習近平 tshiáⁿ liām Hôa-gí


《綠色短評》　李南衡

　　　　　Tsit款ê柯文哲講伊是深綠ê，m̄驚笑破人ê嘴！

十二月初六播出ê華視新聞專訪中，民眾黨總統參選人柯文哲講「我內心本質猶原是深綠ê！」真tsē人聽了lóng gāng去。

　　2014年十一月初七，台北市長選舉電視辯論會，中國國民黨候選人連勝文質疑無黨派候選人柯文哲過去bat講家己是「金龜綠」，tsit-má卻講beh重開機、超越藍綠，態度反起反倒。柯文哲反駁講「我講過我是金龜綠，hit當時是為tio̍h向tsit-ê社會證明你ê銃傷是真ê，我án-ne講是為tio̍h台灣社會ê和諧，你今á日講我是金龜綠，你是teh拆裂tsit-ê社會，為tio̍h你個人ê政治利益！」柯文哲是講2010年十一月二六，五都選舉前一暗，連勝文tī永和市助選，hông開銃誤傷tio̍h送去台大病院，有人懷疑連勝文tio̍h傷是假ê，當時台大創傷醫學部主任柯文哲出面澄清「我是深綠ê，我是上大ê證人，tsit-ê無可能造假」。逐个o-ló柯文哲，hit遍台北市長選舉真tsē台北市民投票選hō͘柯文哲。

2014年柯文哲當選市長了後，一再聲明伊是穿白袍ê醫生，代表白色力量，超越藍綠惡鬥。真tsē市民相信白色mā bē bái。2015年八月十八，柯文哲市長第一遍去上海參加雙城論壇，開幕致辭講伊支持「兩岸一家親」ê精神kah「四個互相」原則，達到促進交流、增加善意ê目標。Hông大驚一tiôê是，2013年十月初六，中國國家主席習近平tī印尼巴厘島正式提出「兩岸一家親」ê講法了後，柯文哲是第一個tòe習近平ê嘴尾講「兩岸一家親」ê台灣政治人物，習近平聽了龍心大喜，中國緊kā柯文哲當作「家己ê人」。此後，柯文哲一再發表pô͘中共尻川ê言論。台北市民kā柯文哲講作是「意大利國旗」—綠、白、紅三色，可能有人聽khah無，講柯文哲是檳榔khah清楚：外表是綠ê，內底白ê，哺哺一下歸嘴是紅ê。2019年八月初六，台灣民眾黨成立，驚hông講kah綠營愈kiâⁿ愈遠。九月初三，柯文哲接受《POP大國民》專訪ê時，bat表態過是深綠ê柯文哲講伊家己ê底色無變，猶原是綠底ê。

　　柯文哲敢有影是深綠ê？伊若真正是深綠ê，無可能tī五月發表國政白皮書，內容提到兩岸tio̍h重新啟動貨貿kah服貿談判；柯文哲若真正是深綠ê，無可能會去kah藍色ê中國國民黨鬥khang選總統副總統，想beh ián倒綠色ê民進黨；十一月十五，有人問講，柯文哲過往bat講出世到taⁿ家己上討厭ê是báng-á、ka-tsua̍h kah中國國民黨。今á日卻beh kah中國國民黨整合？柯文哲若真正是深綠ê，無可能應講：家己真討厭國民黨，但是koh khah痛恨民進黨；柯文哲若真正是深綠ê，無可能會tī十二月初八講民進黨主席、總統候選人賴清德「人稱呼伊是台獨金孫，我看伊tsit-má已經是台獨龜孫」。

Tsit款ê柯文哲講伊是深綠ê，m̄驚笑破人ê嘴！ (231215)

註：兩岸一家親　　習近平　　　請唸華語