《綠色短評》

 | | | 轉寄

烏白罵民進黨政府無能，咱聽數字按怎講！

作者 李南衡, TsoânTâijī/全台字 by Tsng Hūi-phêng 2024.01.07




Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　 Lí Lâmhêng

　 O͘pe̍h mē Bîntsìntóng tsènghú bô lêng, lán thiaⁿ sò͘jī ántsóaⁿ kóng!

Tsa̍pitgue̍h tshesì ēpo͘, Tiongkok Kokbîntóng tī Tâipak tshītsènghú tsêng kóngtiûⁿ kípān bān lâng tsōsè ua̍htāng, Má Ingkiú tsêng tsóngthóng tì sû kóng, Bîntsìntóng tsiptsèng 7 nî gōa si̍ttsāi sī tsò liáu siuⁿkòe tsha. I kóng i bat tsoh kòe Tâipak tshītiúⁿ mā bat tsoh kòe tsóngthóng, tsi̍tê tsènghú ētàng tsò kah tsiahni̍h tsha mā bô kántan.

Kám ánne? lâng kóng sò͘jī ē kóngōe, lán lâi thiaⁿ sò͘jī ántsóaⁿ kóng.

Tiongiong tsènghú tsit kúi nî tsâitsèng tsóngkuatsoàn, Tiongkok Kokbîntóng Má Ingkiú tsènghú tsiptsèng peh nî, nînî ângjī, hūtsè lúilúi. Siōnghó·ê 2015 nî hūtsè 100 ik, siōngtsha·ê 2018 nî hū tsè 2,141 ik. Bîntsìntóng Tshòa Ingbûn tsènghú tsiptsèng tshit nî gōa, ta̍k nî lóng ū tshuntsîⁿ, siōngtsha·ê 2017 nî tútú tsiap Má tsènghú 2016 nî hūtsè 442 ik, kanta tshun 25 ik, siōnghó·ê 2022 nî tshun 4,964 ik.

Má Ingkiú tsêng tsóngthóng tsiptsèng 8 nî, kingtsè sêngtióng pêngkin 2.8%, pí tsoânkiû pêngkin ê 3.3% khah kē. Tshòa Ingbûn tsóngthóng tsiptsèng tshit nî gōa, Tâioân ùi 2019 nî khaisí, kingtsè sêngtióng lu̍t tshiaukòe 3%, suijiân e̍ktsêng tng giâmtiōng, tānsī Tâioân kingtsè piáuhiān tsiok súikhùi, 2020 kàu 2021 nî, kingtsè sêngtióng lu̍t ùi 3.39% tshiong kàu 6.53%. Má Ingkiú tsêng tsóngthóng tsiptsèng 8 nî Tâioân kingtsè sī Atsiu siōng bóe miâ, ha̍ktsiá píkàu Má Ingkiú tsêng tsóngthóng tsiptsèng 8 nî, kah Tshòa Ingbûn tsóngthóng tsiptsèng 7 nî gōa, kingtsè oântsoân bô huattō͘ siopí.

Lán lâi khòaⁿ tshutkháu kah gōasiau tèngtuaⁿê sò͘ kù thóngkè tio̍h tsiok tshingtshó, Má Ingkiú tsêng tsóngthóng tsiptsèng ê 2008 nî 3,517.3 ik bíkim, itti̍t kàu 2016 nî 4,445.4 ik bíkim. Tshòa Ingbûn tsóngthóng tsiptsèng ê tsòikīn 2 nî 2021 tsì 2022 nî tshiong phòa 6,741 ik bíkim, tshutkháu sò͘jī ta̍k nî sing koân, kūnî (2022 nî ) lán tsoân kok tùi gōa bō͘e̍k, íking tshiaukòe 9,000 ik bíkim, pí Má Ingkiú tsêng tsóngthóng 2016 nî kau hō͘ Tshòa Ingbûn tsóngthóng ê sêngtsik sêngtióng 70%, lâng kóng ánne kiò tsoh :"Tâioân sángia̍p siahsiah kiò!"

　　 Má Ingkiú tsêng tsóngthóng jīmlāi 8 nî, Tâioân sitgia̍p lu̍t siōngkoân sī 2009 nî 5.85%, siōngkē sī 2015 nî 3.78%, Tshòa Ingbûn tsóngthóng tsiptsèng kàu bo̍ktsêng tshit nî gōa, Tâioân sitgia̍p lu̍t siōngkoân sī 2021 nî 3.95%, siōng kē sī 2019 nî sī 3.64%.

　　 Má Ingkiú tsêng tsóngthóng tsiptsèng ê tsêng sì nî, Tâioân kó͘tshī itti̍t tī 7, 8,000 tiám gô lâi gô khì, tìsú 2012 nî piàⁿ liânjīm ê sî, bat tsohkòe Má tsènghú Kingtsèpō͘ tiúⁿ ê Ún Khébêng tōasiaⁿ huah, tshiáⁿ ta̍kê tsitshî Má Ingkiú tsóngthóng, i nā liânjīm sêngkong, Tâioân kó͘tshī tio̍h ē pehtsiūⁿ tsi̍tbān tiám. Má Ingkiú tsêng tsóngthóng liânjīm sêngkong, tānsī lóng m̄bat tsiūⁿ tsi̍tbān tiám, siōnghó·ê 2014 nî hongkuan sī 8,972.5 tiám. Ū tsin tsē lâng koài Ún Khébêng o͘pe̍h khui tsiphiò. Ún Khébêng káisueh kóng, soán Má Ingkiú Tâioân kó͘tshī ē tsiūⁿ tsi̍tbān tiám, sī tsi̍t tsióng soánkí gígiân. Tshòa Ingbûn tsóngthóng bô kóng siáⁿmi̍h soánkí gígiân phiàn soánphiò, tsiptsèng tē jī nî ê 2017 nî hongkuan, Tâioân kó͘tshī tio̍h tsiūⁿ tsi̍tbān tiám, tsòikīn 2023 nî tsa̍pjīgue̍h jītshit, Tâioân kó͘tshī sī 17,897 tiám.

　　 Má Ingkiú tsêng tsóngthóng kóng, tsi̍tê tsènghú beh tsò kah tsiahni̍h tsha mā bô kántan. Goânlâi i sī teh kóng i kakī. 　　　(231229)


Pe̍h-ōe-jī-pán/白話字版



《 Le̍k-sik toán-phêng 》　 Lí Lâm-hêng

　 O͘-pe̍h mē Bîn-tsìn-tóng tsèng-hú bô lêng, lán thiaⁿ sò͘-jī án-tsóaⁿ kóng!

Tsa̍p-it-gue̍h tshe-sì ē-po͘, Tiong-kok Kok-bîn-tóng tī Tâi-pak tshī-tsèng-hú tsêng kóng-tiûⁿ kí-pān bān lâng tsō-sè ua̍h-tāng, Má Ing-kiú tsêng tsóng-thóng tì sû kóng, Bîn-tsìn-tóng tsip-tsèng 7 nî gōa si̍t-tsāi sī tsò liáu siuⁿ-kòe tsha. I kóng i bat tsoh kòe Tâi-pak tshī-tiúⁿ mā bat tsoh kòe tsóng-thóng, tsi̍t-ê tsèng-hú ē-tàng tsò kah tsiah-ni̍h tsha mā bô kán-tan.

Kám án-ne? lâng kóng sò͘-jī ē kóng-ōe, lán lâi thiaⁿ sò͘-jī án-tsóaⁿ kóng.

Tiong-iong tsèng-hú tsit kúi nî tsâi-tsèng tsóng-kuat-soàn, Tiong-kok Kok-bîn-tóng Má Ing-kiú tsèng-hú tsip-tsèng peh nî, nî-nî âng-jī, hū-tsè lúi-lúi. Siōng-hó-·ê 2015 nî hū-tsè 100 ik, siōng-tsha-·ê 2018 nî hū tsè 2,141 ik. Bîn-tsìn-tóng Tshòa Ing-bûn tsèng-hú tsip-tsèng tshit nî gōa, ta̍k nî lóng ū tshun-tsîⁿ, siōng-tsha-·ê 2017 nî tú-tú tsiap Má tsèng-hú 2016 nî hū-tsè 442 ik, kan-ta tshun 25 ik, siōng-hó-·ê 2022 nî tshun 4,964 ik.

Má Ing-kiú tsêng tsóng-thóng tsip-tsèng 8 nî, king-tsè sêng-tióng pêng-kin 2.8%, pí tsoân-kiû pêng-kin ê 3.3% khah kē. Tshòa Ing-bûn tsóng-thóng tsip-tsèng tshit nî gōa, Tâi-oân ùi 2019 nî khai-sí, king-tsè sêng-tióng lu̍t tshiau-kòe 3%, sui-jiân e̍k-tsêng tng giâm-tiōng, tān-sī Tâi-oân king-tsè piáu-hiān tsiok súi-khùi, 2020 kàu 2021 nî, king-tsè sêng-tióng lu̍t ùi 3.39% tshiong kàu 6.53%. Má Ing-kiú tsêng tsóng-thóng tsip-tsèng 8 nî Tâi-oân king-tsè sī A-tsiu siōng bóe miâ, ha̍k-tsiá pí-kàu Má Ing-kiú tsêng tsóng-thóng tsip-tsèng 8 nî, kah Tshòa Ing-bûn tsóng-thóng tsip-tsèng 7 nî gōa, king-tsè oân-tsoân bô huat-tō͘ sio-pí.

Lán lâi khòaⁿ tshut-kháu kah gōa-siau tèng-tuaⁿê sò͘ -kù thóng-kè tio̍h tsiok tshing-tshó, Má Ing-kiú tsêng tsóng-thóng tsip-tsèng ê 2008 nî 3,517.3 ik bí-kim, it-ti̍t kàu 2016 nî 4,445.4 ik bí-kim. Tshòa Ing-bûn tsóng-thóng tsip-tsèng ê tsòe-kīn 2 nî 2021 tsì 2022 nî tshiong phòa 6,741 ik bí-kim, tshut-kháu sò͘-jī ta̍k nî sing koân, kū-nî (2022 nî ) lán tsoân kok tùi gōa bō͘-e̍k, í-king tshiau-kòe 9,000 ik bí-kim, pí Má Ing-kiú tsêng tsóng-thóng 2016 nî kau hō͘ Tshòa Ing-bûn tsóng-thóng ê sêng-tsik sêng-tióng 70%, lâng kóng án-ne kiò tsoh :"Tâi-oân sán-gia̍p siah-siah kiò!"

　　 Má Ing-kiú tsêng tsóng-thóng jīm-lāi 8 nî, Tâi-oân sit-gia̍p lu̍t siōng-koân sī 2009 nî 5.85%, siōng-kē sī 2015 nî 3.78%, Tshòa Ing-bûn tsóng-thóng tsip-tsèng kàu bo̍k-tsêng tshit nî gōa, Tâi-oân sit-gia̍p lu̍t siōng-koân sī 2021 nî 3.95%, siōng kē sī 2019 nî sī 3.64%.

　　 Má Ing-kiú tsêng tsóng-thóng tsip-tsèng ê tsêng sì nî, Tâi-oân kó͘-tshī it-ti̍t tī 7, 8,000 tiám gô lâi gô khì, tì-sú 2012 nî piàⁿ liân-jīm ê sî, bat tsoh-kòe Má tsèng-hú King-tsè-pō͘ -tiúⁿ ê Ún Khé-bêng tōa-siaⁿ huah, tshiáⁿ ta̍k-ê tsi-tshî Má Ing-kiú tsóng-thóng, i nā liân-jīm sêng-kong, Tâi-oân kó͘-tshī tio̍h ē peh-tsiūⁿ tsi̍t-bān tiám. Má Ing-kiú tsêng tsóng-thóng liân-jīm sêng-kong, tān-sī lóng m̄-bat tsiūⁿ tsi̍t-bān tiám, siōng-hó-·ê 2014 nî hong-kuan sī 8,972.5 tiám. Ū tsin tsē lâng koài Ún Khé-bêng o͘-pe̍h khui tsi-phiò. Ún Khé-bêng kái-sueh kóng, soán Má Ing-kiú Tâi-oân kó͘-tshī ē tsiūⁿ tsi̍t-bān tiám, sī tsi̍t tsióng soán-kí gí-giân. Tshòa Ing-bûn tsóng-thóng bô kóng siáⁿ-mi̍h soán-kí gí-giân phiàn soán-phiò, tsip-tsèng tē jī nî ê 2017 nî hong-kuan, Tâi-oân kó͘-tshī tio̍h tsiūⁿ tsi̍t-bān tiám, tsòe-kīn 2023 nî tsa̍p-jī-gue̍h jī-tshit, Tâi-oân kó͘-tshī sī 17,897 tiám.

　　 Má Ing-kiú tsêng tsóng-thóng kóng, tsi̍t-ê tsèng-hú beh tsò kah tsiah-ni̍h tsha mā bô kán-tan. Goân-lâi i sī teh kóng i ka-kī. 　　　(231229)




十一月初四下晡，中國國民黨tī台北市政府前廣場舉辦萬人造勢活動，馬英九前總統致詞講，民進黨執政7年外實在是做了siuⁿ過差。伊講伊bat作過台北市長mā bat作過總統，一個政府ētàng做kah tsiah-ni̍h差mā無簡單。

Kám án-ne？人講數字ē講話，咱來聽數字按怎講。

中央政府tsit幾年財政總決算，中國國民黨馬英九政府執政八年，年年紅字，負債lú-lú。上好ê2015年負債100億，上差ê2018年負債2,141億。民進黨蔡英文政府執政七年外，逐年lóng有tshun錢，上差ê2017年tú-tú接馬政府2016年負債442億，kan-ta tshun 25億，上好ê2022年tshun 4,964億。

馬英九前總統執政8年，經濟成長平均2.8％，比全球平均ê3.3％ khah低。蔡英文總統執政七年外，台灣ùi 2019年開始，經濟成長率超過3%，雖然疫情tng嚴重，但是台灣經濟表現足súi氣，2020到2021年，經濟成長率ùi 3.39%衝到6.53%。馬英九前總統執政8年台灣經濟是亞洲上尾名，學者比較馬英九前總統執政8年，kah蔡英文總統執政7年外，經濟完全無法度相比。

咱來看出口kah外銷訂單ê數據統計tio̍h足清楚：馬英九前總統執政ê 2008年3,517.3億美金，一直到2016年4,445.4億美金。蔡英文總統執政ê最近2年2021至2022年衝破6,741億美金，出口數字逐年升koân，舊年（2022年）咱全國對外貿易，已經超過9,000億美金，比馬英九前總統2016年交hō͘蔡英文總統ê成績成長70%，人講án-ne叫作:「台灣產業siah-siah叫！」

　　馬英九前總統任內8年，台灣失業率上koân是2009年5.85%，上低是2015年3.78%，蔡英文總統執政到目前七年外，台灣失業率上koân是2021年3.95％，上低是2019年是3.64%。

　　馬英九前總統執政ê前四年，台灣股市一直tī7、8,000點gô來gô去，致使2012年拚連任ê時，bat作過馬政府經濟部長ê尹啟銘大聲喝，請ta̍kê支持馬英九總統，伊若連任成功，台灣股市tio̍hē peh上一萬點。馬英九前總統連任成功，但是lóngm̄-bat上一萬點，上好ê2014年封關是8,972.5點。有真tsē人怪尹啟銘烏白開支票。尹啟銘解說講：選馬英九台灣股市ē上一萬點，是一種選舉語言。蔡英文總統無講啥物選舉語言騙選票，執政第二年ê2017年封關，台灣股市tio̍h上一萬點，最近2023年十二月二七，台灣股市是17,897點。

　　馬英九前總統講：一個政府beh做kah tsiah-ni̍h差mā無簡單。原來伊是teh講伊家己。　　　(231229)