《綠色短評》

 | | | 轉寄

到底tó一黨貪腐？

作者 李南衡, TsoânTâijī/全台字 by Tsng Hūi-phêng 2024.01.14




Tsoânbîn Tâioânjī pán/全民台灣字版簡稱TsoânTâiJī


《 Le̍ksik toánphêng 》　　 Lí Lâmhêng

　　　　　　Tàuté tó tsi̍t tóng thamhú?

　　2023 nî tsa̍pjīgue̍h jītshit, Tiongkok Kokbîntóng li̍phuatīⁿ thoân tiàukhui kìtsiáhōe, lia̍t kí Bîntsìntóng 10 tōa thamhú ànkiāⁿ, paukuat e̍kbiâu tsháikáng hong tsûn 30 nî, Tshiausu Pase keⁿ̄g gîhûn téng. Tiongkok Kokbîntóng ánne khòaⁿtio̍h o͘iáⁿ tio̍h tôaⁿ tshèng, bô hó. Nā ū thamhú sūsi̍t in ingkai tshiautsi̍p tsuliāu thêtshut khòngkò; nāsī ū hoāntsōe sūsi̍t hông phòaⁿ hêng· ê, siōng hó sī tsi̍t kiāⁿ tsi̍t kiāⁿ thêtshut lâi kóng tshingtshó, lâng thiaⁿliáu tsiah ē sìn tsiah ē ho̍k.

Lán khòaⁿ Tiongkok Kokbîntóng ê thamhú, Má Ingkiú tsènghú ê Hêngtsèngīⁿ pìsutiúⁿ kiam Tiongkok Kokbîntóng hù tsúse̍k Lîm Iksè, tī li̍phuat úigoân jīmlāi siu thòaⁿsái gia̍ptsiá iūkhoán 6,300 bān kho͘, 2012 nî tsa̍pgue̍h jīgō͘ thêkhí kongsò͘, 2013 nî sìgue̍h saⁿtsa̍p, Tâipak tēhng huatīⁿ itsím phòaⁿtshú Lîm Iksè ha̍ppèng tsiphêng iúkî tô͘hêng 7 nî 4 kògue̍h, thítua̍t kongkoân 5 nî, pēng kho hua̍t kim 1,580 bān kho͘. Tamjīm kòe Má tsènghú tsâitsèng pō͘tiúⁿ Lí Su̍ttik, 2017 nî tsa̍pgue̍h hō͘ kiámhong khísò͘, 2004 nî Tâipaktshītiúⁿ Má Ingkiú ê tsâitsèng kio̍ktiúⁿ jīmlāi kiam jīm 大巨蛋 àn tsinsím úigoân ê sî, sia̍phiâm tô͘ lī Oánhiông tsìtsió 30 ik kho͘ kah gūitsō bûnsu phòaⁿ hêng 9 nî. Má Ingkiú pānkongsik tsújīm Lōa Sò͘jû hông khòngkò tī i Tâipaktshī gīoân jīmlāi Tāipak Siangtsútsheⁿ àn siu iū, 2020 nî tsa̍pjīgue̍h jīsaⁿ, tsòiko huatīⁿ phòaⁿtshú iúkî tô͘hêng 7 nî 6 kògue̍h tô͘hêng, thítua̍t kongkoân 4 nî.

Lîm Siksan Li̍phuatīⁿ pìsutiúⁿ jīmlāi, siu Bāngoán khoki kongsi 2,800 bān kho͘ iūkhoán, 2023 nî tsa̍pitgue̍h tsòiko huatīⁿ pokhôe siōngsò͘ Lîm Siksan siu iū àn tēngàn, tsiàu Koténg Huatīⁿ í 7 ê ûihoán thamu tītsōe tiâulē siuiū tsōe, 2 ê sétsîⁿ tsōe kah tsâisán lâigoân putbêng tsōe kiōng phòaⁿ hêng 13 nî, íki̍p lēng tsi̍tê siuiū tsōe phòaⁿ hêng 4 nî 8 kògue̍h, Koténg Huatīⁿ tshâitēng ha̍ppèng tsiphêng 13 nî 8 kògue̍h. Li̍púi Liāu Koktòng, Tân Tshiaubêng khansia̍p li̍púi tsi̍p thé sia̍ptham àn, 2022 nî tshitgue̍h tshela̍k, huatīⁿ itsím suanphòaⁿ Liāu Koktòng phòaⁿ hêng 8 nî 6 kògue̍h, thítua̍t kongkoân 4 nî. Tân Tshiaubêng phòaⁿ hêng 7 nî 8 kògue̍h. Miâule̍k koāntiúⁿ Tshî Iāutshiong hông khòngkò tī 1998 nî Miâule̍k koān Thâuhūn tìntiúⁿ jīmlāi, ûihuat he̍khuat khìthô͘ tsèngbêng í tô͘ lī khìthô͘ gia̍p tsiá. Tāipak Tēīⁿ kingkòe tsa̍p kúi nî símlí, 2013 nî tshitgue̍h jīsaⁿ, tsiah i tô͘lī tsōe suanphòaⁿ Tshî Iāutshiong 9 nî tô͘hêng, thítua̍t kongkoân 6 nî. Lí Tiâukhim tī 2005 nî tsì 2012 nî Lâmtâu koāntiúⁿ jīmlāi, khansia̍p tio̍h 96 kiāⁿ hôikhàu àn, 15 kiāⁿ siuiū àn, 2022 nî káugue̍h, king nn̄gsím suanphòaⁿ 4 kiāⁿ bô tsōe, kîtha 90 kiāⁿ ū tsōe ha̍ppèng tsoh 81 tsōe, hêng kî tsóngkiōng 450 nî 4 kògue̍h. Tongkim Tiongkok Kokbîntóng tsúse̍k Tsu Li̍plûn tsò Thôhn̂g koāntiúⁿ sî ê hù koāntiúⁿ Ia̍p Sèbûn sia̍phiâm Pattik, Nâkháu Ā ha̍pgî tsūthe̍h siu iū tshiaukòe 2,000 bān kah tsâisán lâigoân putbêng àn. 2019 nî la̍kgue̍h tshetshit, Koténg Huatīⁿ tshâitēng Ia̍p Sèbûn 3 tsōe ha̍ppèng tsiphêng 14 nî tô͘hêng, bu̍tsiu 3,317 bān kho͘. Tsu Li̍plûn tsò Sinpak tshītiúⁿ sî ê hù tshītiúⁿ Khó͘ Tsìkian līiōng To͘king àn, siu iū 615 bān kho͘. itsím, jīsím lóng phòaⁿ Khó͘ Tsìkian 10 nî tô͘hêng, 2019 nî saⁿgue̍h tshetshit Tsòiko Huatīⁿ pokhôe siōngsò͘ tsoân àn tēngàn.

Tsútiuⁿ búle̍k thóngit Tâioân ê Tiongkok ha̍ktsiá Lí Gē, ū sî mā ē kóng liôngsim ōe, tsòikīn i kóng, Bîntsìntóng tham kuaⁿ bôkoán jōatsē mā bô Tiongkok Kokbîntóng ê tsa̍phun tsi it.

　　 Tsin·ê, Tiongkok Kokbîntóng ê tham kuaⁿ ūkàu tsē, sian kóng to kóng bē oân. (240105)

Tsù, 大巨蛋　　 tshiáⁿ liām Hôagí




Pe̍h-ōe-jī-pán/白話字版



《 Le̍k-sik toán-phêng 》　　 Lí Lâm-hêng

　　　　　　Tàu-té tó tsi̍t tóng tham-hú?

　　2023 nî tsa̍p-jī-gue̍h jī-tshit, Tiong-kok Kok-bîn-tóng li̍p-huat-īⁿ thoân tiàu-khui kì-tsiá-hōe, lia̍t kí Bîn-tsìn-tóng 10 tōa tham-hú àn-kiāⁿ, pau-kuat e̍k-biâu tshái-káng hong tsûn 30 nî, Tshiau-su Pa-se ke-nn̄g gî-hûn téng. Tiong-kok Kok-bîn-tóng án-ne khòaⁿ-tio̍h o͘-iáⁿ tio̍h tôaⁿ tshèng, bô hó. Nā ū tham-hú sū-si̍t in ing-kai tshiau-tsi̍p tsu-liāu thê-tshut khòng-kò; nā-sī ū hoān-tsōe sū-si̍t hông phòaⁿ hêng-· ê, siōng hó sī tsi̍t kiāⁿ tsi̍t kiāⁿ thê-tshut lâi kóng tshing-tshó, lâng thiaⁿ-liáu tsiah ē sìn tsiah ē ho̍k.

Lán khòaⁿ Tiong-kok Kok-bîn-tóng ê tham-hú, Má Ing-kiú tsèng-hú ê Hêng-tsèng-īⁿ pì-su-tiúⁿ kiam Tiong-kok Kok-bîn-tóng hù tsú-se̍k Lîm Ik-sè, tī li̍p-huat úi-goân jīm-lāi siu thòaⁿ-sái gia̍p-tsiá iū-khoán 6,300 bān kho͘, 2012 nî tsa̍p-gue̍h jī-gō͘ thê-khí kong-sò͘, 2013 nî sì-gue̍h saⁿ-tsa̍p, Tâi-pak tē-hng huat-īⁿ it-sím phòaⁿ-tshú Lîm Ik-sè ha̍p-pèng tsip-hêng iú-kî tô͘-hêng 7 nî 4 kò-gue̍h, thí-tua̍t kong-koân 5 nî, pēng kho hua̍t kim 1,580 bān kho͘. Tam-jīm kòe Má tsèng-hú tsâi-tsèng pō͘-tiúⁿ Lí Su̍t-tik, 2017 nî tsa̍p-gue̍h hō͘ kiám-hong khí-sò͘, 2004 nî Tâi-pak-tshī-tiúⁿ Má Ing-kiú ê tsâi-tsèng kio̍k-tiúⁿ jīm-lāi kiam jīm 大巨蛋 àn tsin-sím úi-goân ê sî, sia̍p-hiâm tô͘ lī Oán-hiông tsì-tsió 30 ik kho͘ kah gūi-tsō bûn-su phòaⁿ hêng 9 nî. Má Ing-kiú pān-kong-sik tsú-jīm Lōa Sò͘-jû hông khòng-kò tī i Tâi-pak-tshī gī-oân jīm-lāi Tāi-pak Siang-tsú-tsheⁿ àn siu iū, 2020 nî tsa̍p-jī-gue̍h jī-saⁿ, tsòe-ko huat-īⁿ phòaⁿ-tshú iú-kî tô͘-hêng 7 nî 6 kò-gue̍h tô͘-hêng, thí-tua̍t kong-koân 4 nî.

Lîm Sik-san Li̍p-huat-īⁿ pì-su-tiúⁿ jīm-lāi, siu Bāng-oán kho-ki kong-si 2,800 bān kho͘ iū-khoán, 2023 nî tsa̍p-it-gue̍h tsòe-ko huat-īⁿ pok-hôe siōng-sò͘ Lîm Sik-san siu iū àn tēng-àn, tsiàu Ko-téng Huat-īⁿ í 7 ê ûi-hoán tham-u tī-tsōe tiâu-lē siu-iū tsōe, 2 ê sé-tsîⁿ tsōe kah tsâi-sán lâi-goân put-bêng tsōe kiōng phòaⁿ hêng 13 nî, í-ki̍p lēng tsi̍t-ê siu-iū tsōe phòaⁿ hêng 4 nî 8 kò-gue̍h, Ko-téng Huat-īⁿ tshâi-tēng ha̍p-pèng tsip-hêng 13 nî 8 kò-gue̍h. Li̍p-úi Liāu Kok-tòng, Tân Tshiau-bêng khan-sia̍p li̍p-úi tsi̍p thé sia̍p-tham àn, 2022 nî tshit-gue̍h tshe-la̍k, huat-īⁿ it-sím suan-phòaⁿ Liāu Kok-tòng phòaⁿ hêng 8 nî 6 kò-gue̍h, thí-tua̍t kong-koân 4 nî. Tân Tshiau-bêng phòaⁿ hêng 7 nî 8 kò-gue̍h. Miâu-le̍k koān-tiúⁿ Tshî Iāu-tshiong hông khòng-kò tī 1998 nî Miâu-le̍k koān Thâu-hūn tìn-tiúⁿ jīm-lāi, ûi-huat he̍k-huat khì-thô͘ tsèng-bêng í tô͘ lī khì-thô͘ gia̍p tsiá. Tāi-pak Tē-īⁿ king-kòe tsa̍p kúi nî sím-lí, 2013 nî tshit-gue̍h jī-saⁿ, tsiah i tô͘-lī tsōe suan-phòaⁿ Tshî Iāu-tshiong 9 nî tô͘-hêng, thí-tua̍t kong-koân 6 nî. Lí Tiâu-khim tī 2005 nî tsì 2012 nî Lâm-tâu koān-tiúⁿ jīm-lāi, khan-sia̍p tio̍h 96 kiāⁿ hôe-khàu àn, 15 kiāⁿ siu-iū àn, 2022 nî káu-gue̍h, king nn̄g-sím suan-phòaⁿ 4 kiāⁿ bô tsōe, kî-tha 90 kiāⁿ ū tsōe ha̍p-pèng tsoh 81 tsōe, hêng kî tsóng-kiōng 450 nî 4 kò-gue̍h. Tong-kim Tiong-kok Kok-bîn-tóng tsú-se̍k Tsu Li̍p-lûn tsò Thô-hn̂g koān-tiúⁿ sî ê hù koān-tiúⁿ Ia̍p Sè-bûn sia̍p-hiâm Pat-tik, Nâ-kháu Ā ha̍p-gî tsū-the̍h siu iū tshiau-kòe 2,000 bān kah tsâi-sán lâi-goân put-bêng àn. 2019 nî la̍k-gue̍h tshe-tshit, Ko-téng Huat-īⁿ tshâi-tēng Ia̍p Sè-bûn 3 tsōe ha̍p-pèng tsip-hêng 14 nî tô͘-hêng, bu̍t-siu 3,317 bān kho͘. Tsu Li̍p-lûn tsò Sin-pak tshī-tiúⁿ sî ê hù tshī-tiúⁿ Khó͘ Tsì-kian lī-iōng To͘-king àn, siu iū 615 bān kho͘. it-sím, jī-sím lóng phòaⁿ Khó͘ Tsì-kian 10 nî tô͘-hêng, 2019 nî saⁿ-gue̍h tshe-tshit Tsòe-ko Huat-īⁿ pok-hôe siōng-sò͘ tsoân àn tēng-àn.

Tsú-tiuⁿ bú-le̍k thóng-it Tâi-oân ê Tiong-kok ha̍k-tsiá Lí Gē, ū sî mā ē kóng liông-sim ōe, tsòe-kīn i kóng, Bîn-tsìn-tóng tham kuaⁿ bô-koán jōa-tsē mā bô Tiong-kok Kok-bîn-tóng ê tsa̍p-hun tsi it.

　　 Tsin-·ê, Tiong-kok Kok-bîn-tóng ê tham kuaⁿ ū-kàu tsē, sian kóng to kóng bē oân. (240105)

Tsù, 大巨蛋　　 tshiáⁿ liām Hôa-gí




　　2023年十二月二七，中國國民黨立法院團召開記者會，列舉民進黨10大貪腐案件，包括疫苗採購封存30年、超思巴西雞卵疑雲等。中國國民黨án-ne看tio̍h烏影tio̍h彈銃，無好。若有貪腐事實in應該搜集資料提出控告；若是有犯罪事實hông判刑ê，上好是一件一件提出來講清楚，人聽了tsiahē信tsiahē服。

咱看中國國民黨ê貪腐：馬英九政府ê行政院秘書長兼中國國民黨副主席林益世，tī立法委員任內收炭屎業者賄款6,300萬元，2012年十月二五提起公訴，2013年四月三十，臺北地方法院一審判處林益世合併執行有期徒刑7年4個月，褫奪公權5年，併科罰金1,580萬元。擔任過馬政府財政部長李述德，2017年十月hō͘檢方起訴，2004年台北市長馬英九ê財政局長任內兼任大巨蛋案甄審委員ê時，涉嫌圖利遠雄至少30億元kah偽造文書判刑9年。馬英九辦公室主任賴素如hông控告tī伊台北市議員任內台北雙子星案收賄，2020年十二月二三，最高法院判處有期徒刑7年6個月徒刑，褫奪公權4年。

林錫山立法院秘書長任內，收網遠科技公司2,800萬元賄款，2023年十一月最高法院駁回上訴林錫山收賄案定案，照高等法院以7個違反貪汙治罪條例收賄罪、2個洗錢罪kah財產來源不明罪共判刑13年、以及另一個收賄罪判刑4年8個月，高等法院裁定合併執行13年8個月。立委廖國棟、陳超明牽涉立委集體涉貪案，2022年七月初六，法院一審宣判廖國棟判刑8年6個月、褫奪公權4年。陳超明判刑7年8個月。苗栗縣長徐耀昌hông控告tī 1998年苗栗縣頭份鎮長任內，違法核發棄土證明以圖利棄土業者。台北地院經過十幾年審理，2013年七月二三，tsiah依圖利罪宣判徐耀昌9年徒刑、褫奪公權6年。李朝卿tī 2005年至2012年南投縣長任內，牽涉tio̍h 96件回扣案、15件收賄案，2022年九月，更二審宣判4件無罪，其他90件有罪合併作81罪，刑期總共450年4個月。當今中國國民黨主席朱立倫做桃園縣長時ê副縣長葉世文涉嫌八德、林口Ā合宜住宅收賄超過2,000萬kah財產來源不明案。2019年六月初七，高等法院裁定葉世文3罪合併執行14年徒刑，沒收3,317萬元。朱立倫做新北市長時ê副市長許志堅利用都更案，收賄615萬元。一審、二審lóng判許志堅10年徒刑，2019年三月初七最高法院駁回上訴全案定案。

主張武力統一台灣ê中國學者李毅，有時māē講良心話，最近伊講：民進黨貪官無管jōa-tsē mā無中國國民黨ê十分之一。

　　真ê，中國國民黨ê貪官有夠tsē，仙講to講bē完。 (240105)

註：大巨蛋　　請唸華語