《綠色短評》

 | | | 轉寄

空氣銃phah天，趙少康上gâu！

作者 李南衡, TsoânTâijī/全台字 by Tsng Hūi-phêng 2024.02.11





Tsoânbîn Tâioânjī pán/全民台灣字版簡稱TsoânTâiJī



《 Le̍ksik toánphêng 》　　 Lí Lâmhêng

　　　 khongkhì tshèng phah thiⁿ, Tiō Siáukhong siōng gâu!

　　2024 nî tsóngthóng hù tsóngthóng tōasoán, ū kúiūi hāusoánjîn tsin ài piáuián khongkhì tshèng phah thiⁿ. Ū thiaⁿtio̍h tshèng siaⁿ ígōa, nátshiūⁿ siáⁿ to bô. Kúiê lâng tiongkan, nátshiūⁿ bô lâng ētàng kah Tiō Siáukhong pí phēng.

2024 nî itgue̍h tshetshit, Tiongkok Kokbîntóng hù tsóngthóng hāusoánjîn Tiō Siáukhong tsútōng thàukòe mûithé hiòng Tiongkok Koktâipān huah siaⁿ,"tshiáⁿ Koktâipān tsoánkò káihòngkun iúkuan pō͘mn̂g, tshun tsi̍t lépài Tâioân tio̍h beh soánkí, mài koh lâi Háikiap tiongsòaⁿ hūkīn, tshiáⁿ lín hō͘ Tâioân Háikiap pótshî hôpêng, hō͘ soánkí pótshî pênghô, ta̍k kang ánne lâi hō͘ Tâioân jînbîn aple̍k, goán soánkí tsiahni̍h tiōngiàu, tshiáⁿ mài koh lâi lah." Khólêng Tâioân lī Tiongkok Tāilio̍k siuⁿ hn̄g, Tiō Siáukhong khang tshèng phah thiⁿ, Tiongkok lóng bô thiaⁿtio̍h, ahsī suijiân ū thiaⁿtio̍h, kinpún bô ài tshap i.

Itgue̍h tshetshit tsì tshepeh, Tiongkok phài tshut 9 tsiah pái kunki ( kîtiong 1 tsiah "Ūn 8" hoántsiâmki tsìnji̍p Tâioân Sailâm khonge̍k); 4 tâitshù kunlām tī Tâihái tsíūûi ua̍htāng; 3 lia̍p khongphiau khìkiû, tshiauua̍t Háikiap tiongsòaⁿ. Tshepeh tsì tshikáu, Tiongkok phài tshut 10 tsiahtshù kunki ( kîtiong 2 tsiah "Tshiam 16" tsiànki tsìnji̍p Tâioân Sailâm khonge̍k); 4 tâitshù kunkàm tī Ttâi hái tsiuûi ua̍htāng; 4 lia̍p khongphiau khìkiû (kîtiong 2 lia̍p pue kòe Tâioân tó thiⁿténg). Tshikáu tsì tshetsa̍p, Tiongkok phài tshut 8 tsiahtshù kunki ( kîtiong 1 tsiah tshiauua̍t Háikiap tiongsòaⁿ ）; 5 tâitshù kunlām , tī Tâihái tsiuûi ua̍htāng; 1 lia̍p khongphiau khìkiû tshiauua̍t Háikiap tiongsòaⁿ. Tshetsa̍p tsì tsa̍pit, Tiongkok phài tshut 15 tsiahtshù kunki (kîtiong 1 tsiah "Ūn 8" hoántsiâmki, 1 tsiah "Ūn 9" thongsìn tùikhòngki tsìnji̍p Sailâm khonge̍k); 4 tâitshù kunlām tī Tâihái tsiuûi ua̍htāng; 3 lia̍p khongphiau khìkiû (kîtiong 1 lia̍p puikòe Tāipak thiⁿténg). Tsa̍pit tsì tsa̍pjī, Tiongkok phài tshut 10 tsiahtshù kunki (kîtiong ū 2 tsiah tshiauua̍t Háikiap tiongsòaⁿ kah pakpō͘, Sailâm khonge̍k); 6 tâitshù kunlāmtī Tâihái tsiuûi ua̍htāng; 5 lia̍p khongphiau khìkiû. Tsa̍pjī tsì tsa̍psaⁿ, Tiongkok phài tshut 8 tsiahtshù kunki (kîtiong 1 tsiah tsìnji̍p Sailâm khonge̍k); 6 tâitshù kunki tī Tâihái tsiuûi ua̍htāng; 3 lia̍p khongphiau khìkiû. Tsa̍psaⁿ tsì tsa̍psì, Tiongkok phài tshut 4 tâitshù kunlām tī Tâi hái tsiuûi ua̍htāng; 1 lia̍p khongphiau khìkiû. Sǹgsǹg tsi̍tē, tsit lépài Tiongkok lóngtsóng phài tshut 60 tsiahtshù kunki, 33 tâitshù kunlām, 20 lia̍p khongphiau khìkiû.

Hō͘ lán siūⁿkhí 2023 nî tsa̍pjīgue̍h tshetsa̍p, Tiongkok Kokbîntóng hù tsóngthóng hāusoánjîn Tiō Siáukhong tsiapsiū hóngbūn ê sî, kiôngtiāu tio̍h kiônghòa Nn̄ghōaⁿ hō͘sìn tùiōe. I kóng, Tiongkok Kokbîntóng hoántùi Tâito̍k ê li̍ptiûⁿ, mā iaukiû Tāilio̍k hō͘siong piáusī siānì, í Tâioân lâng siōngkài kiaⁿ ê tsiàntsing lâi kóng, tsiànki mài tshiauua̍t kòe Háikiap tiongsòaⁿ kah lâi se̍h Tâioân, tsiah bē kā Tâioân bú kah ta̍kê tsin kiaⁿhiâⁿ. I tsìn tsi̍tpō͘ kóng, tôngsî, Tāilio̍k bīntùi Tâioân tēit sòaⁿ ê tangpō͘ tsiàn khu, huitôaⁿ, pinggoân tio̍h ētàng kiámtsió, jîtshiáⁿ tio̍h íntsún Tâioân phài kunsū kuantshatoân siông tsù kuantshat, í khakpó Tâioân antsoân kah Tāilio̍k kunsū bē tùi Tâioân kò͘sêng uihia̍p, suijiân Tùihōaⁿ sī m̄ sī tôngì lán m̄tsai, tānsī Kokbîntóng ê kipún li̍ptiûⁿ bêngkhak, hibāng hō͘siong piáuta̍t siānì.

Hókatsài, Tiō Siáukhong lo̍ksoán, nā bô, tán i tsiū jīm hù tsóngthóng liáuāu, tsiah tsaiiáⁿ i ê ōe kinpún sī khang tshèng phah thiⁿ. Beh tsai to̍h siuⁿ bān lah! (240202)



Pe̍h-ōe-jī-pán/白話字版



《 Le̍k-sik toán-phêng 》　　 Lí Lâm-hêng

　　　 khong-khì tshèng phah thiⁿ, Tiō Siáu-khong siōng gâu!

　　2024 nî tsóng-thóng hù tsóng-thóng tōa-soán, ū kúi-ūi hāu-soán-jîn tsin ài piáu-ián khong-khì tshèng phah thiⁿ. Ū thiaⁿ-tio̍h tshèng siaⁿ í-gōa, ná-tshiūⁿ siáⁿ to bô. Kúi-ê lâng tiong-kan, ná-tshiūⁿ bô lâng ē-tàng kah Tiō Siáu-khong pí phēng.

2024 nî it-gue̍h tshe-tshit, Tiong-kok Kok-bîn-tóng hù tsóng-thóng hāu-soán-jîn Tiō Siáu-khong tsú-tōng thàu-kòe mûi-thé hiòng Tiong-kok Kok-tâi-pān huah siaⁿ,"tshiáⁿ Kok-tâi-pān tsoán-kò kái-hòng-kun iú-kuan pō͘-mn̂g, tshun tsi̍t lé-pài Tâi-oân tio̍h beh soán-kí, mài koh lâi Hái-kiap tiong-sòaⁿ hū-kīn, tshiáⁿ lín hō͘ Tâi-oân Hái-kiap pó-tshî hô-pêng, hō͘ soán-kí pó-tshî pêng-hô, ta̍k kang án-ne lâi hō͘ Tâi-oân jîn-bîn ap-le̍k, goán soán-kí tsiah-ni̍h tiōng-iàu, tshiáⁿ mài koh lâi lah." Khó-lêng Tâi-oân lī Tiong-kok Tāi-lio̍k siuⁿ hn̄g, Tiō Siáu-khong khang tshèng phah thiⁿ, Tiong-kok lóng bô thiaⁿ-tio̍h, ah-sī sui-jiân ū thiaⁿ-tio̍h, kin-pún bô ài tshap i.

It-gue̍h tshe-tshit tsì tshe-peh, Tiong-kok phài tshut 9 tsiah pái kun-ki ( kî-tiong 1 tsiah "Ūn 8" hoán-tsiâm-ki tsìn-ji̍p Tâi-oân Sai-lâm khong-e̍k); 4 tâi-tshù kun-lām tī Tâi-hái tsíū-ûi ua̍h-tāng; 3 lia̍p khong-phiau khì-kiû, tshiau-ua̍t Hái-kiap tiong-sòaⁿ. Tshe-peh tsì tshe-káu, Tiong-kok phài tshut 10 tsiah-tshù kun-ki ( kî-tiong 2 tsiah "Tshiam 16" tsiàn-ki tsìn-ji̍p Tâi-oân Sai-lâm khong-e̍k); 4 tâi-tshù kun-kàm tī Ttâi hái tsiu-ûi ua̍h-tāng; 4 lia̍p khong-phiau khì-kiû (kî-tiong 2 lia̍p pue kòe Tâi-oân tó thiⁿ-téng). Tshe-káu tsì tshe-tsa̍p, Tiong-kok phài tshut 8 tsiah-tshù kun-ki ( kî-tiong 1 tsiah tshiau-ua̍t Hái-kiap tiong-sòaⁿ ）; 5 tâi-tshù kun-lām , tī Tâi-hái tsiu-ûi ua̍h-tāng; 1 lia̍p khong-phiau khì-kiû tshiau-ua̍t Hái-kiap tiong-sòaⁿ. Tshe-tsa̍p tsì tsa̍p-it, Tiong-kok phài tshut 15 tsiah-tshù kun-ki (kî-tiong 1 tsiah "Ūn 8" hoán-tsiâm-ki, 1 tsiah "Ūn 9" thong-sìn tùi-khòng-ki tsìn-ji̍p Sai-lâm khong-e̍k); 4 tâi-tshù kun-lām tī Tâi-hái tsiu-ûi ua̍h-tāng; 3 lia̍p khong-phiau khì-kiû (kî-tiong 1 lia̍p pue-kòe Tāi-pak thiⁿ-téng). Tsa̍p-it tsì tsa̍p-jī, Tiong-kok phài tshut 10 tsiah-tshù kun-ki (kî-tiong ū 2 tsiah tshiau-ua̍t Hái-kiap tiong-sòaⁿ kah pak-pō͘, Sai-lâm khong-e̍k); 6 tâi-tshù kun-lāmtī Tâi-hái tsiu-ûi ua̍h-tāng; 5 lia̍p khong-phiau khì-kiû. Tsa̍p-jī tsì tsa̍p-saⁿ, Tiong-kok phài tshut 8 tsiah-tshù kun-ki (kî-tiong 1 tsiah tsìn-ji̍p Sai-lâm khong-e̍k); 6 tâi-tshù kun-ki tī Tâi-hái tsiu-ûi ua̍h-tāng; 3 lia̍p khong-phiau khì-kiû. Tsa̍p-saⁿ tsì tsa̍p-sì, Tiong-kok phài tshut 4 tâi-tshù kun-lām tī Tâi hái tsiu-ûi ua̍h-tāng; 1 lia̍p khong-phiau khì-kiû. Sǹg-sǹg tsi̍t-ē, tsit lé-pài Tiong-kok lóng-tsóng phài tshut 60 tsiah-tshù kun-ki, 33 tâi-tshù kun-lām, 20 lia̍p khong-phiau khì-kiû.

Hō͘ lán siūⁿ-khí 2023 nî tsa̍p-jī-gue̍h tshe-tsa̍p, Tiong-kok Kok-bîn-tóng hù tsóng-thóng hāu-soán-jîn Tiō Siáu-khong tsiap-siū hóng-būn ê sî, kiông-tiāu tio̍h kiông-hòa Nn̄g-hōaⁿ hō͘-sìn tùi-ōe. I kóng, Tiong-kok Kok-bîn-tóng hoán-tùi Tâi-to̍k ê li̍p-tiûⁿ, mā iau-kiû Tāi-lio̍k hō͘-siong piáu-sī siān-ì, í Tâi-oân lâng siōng-kài kiaⁿ ê tsiàn-tsing lâi kóng, tsiàn-ki mài tshiau-ua̍t kòe Hái-kiap tiong-sòaⁿ kah lâi se̍h Tâi-oân, tsiah bē kā Tâi-oân bú kah ta̍k-ê tsin kiaⁿ-hiâⁿ. I tsìn tsi̍t-pō͘ kóng, tông-sî, Tāi-lio̍k bīn-tùi Tâi-oân tē-it sòaⁿ ê tang-pō͘ tsiàn khu, hui-tôaⁿ, ping-goân tio̍h ē-tàng kiám-tsió, jî-tshiáⁿ tio̍h ín-tsún Tâi-oân phài kun-sū kuan-tshat-oân siông tsù kuan-tshat, í khak-pó Tâi-oân an-tsoân kah Tāi-lio̍k kun-sū bē tùi Tâi-oân kò͘-sêng ui-hia̍p, sui-jiân Tùi-hōaⁿ sī m̄ sī tông-ì lán m̄-tsai, tān-sī Kok-bîn-tóng ê ki-pún li̍p-tiûⁿ bêng-khak, hi-bāng hō͘-siong piáu-ta̍t siān-ì.

Hó-ka-tsài, Tiō Siáu-khong lo̍k-soán, nā bô, tán i tsiū jīm hù tsóng-thóng liáu-āu, tsiah tsai-iáⁿ i ê ōe kin-pún sī khang tshèng phah thiⁿ. Beh tsai to̍h siuⁿ bān lah! (240202)



　　2024年總統副總統大選，有幾位候選人真ài表演空氣銃phah天。有聽tio̍h銃聲以外，ná-tshiūⁿ siáⁿto無。幾個人中間，ná-tshiūⁿ無人ētàng kah趙少康比phēng。

2024年一月初七，中國國民黨副總統候選人趙少康主動透過媒體向中國國台辦huah聲：「請國台辦轉告解放軍有關部門，tshun一禮拜台灣tio̍h beh選舉，mài koh來海峽中線附近，請línhō͘台灣海峽保持和平，hō͘選舉保持平和，ta̍k工án-ne來hō͘台灣人民壓力，阮選舉tsiah-ni̍h重要，請mài koh來lah。」 可能台灣離中國大陸siuⁿ遠，趙少康空銃phah天，中國lóng無聽tio̍h、ah-是雖然有聽tio̍h，根本無ài tshap伊。

一月初七至初八，中國派出9隻次軍機（其中1隻「運8」反潛機進入台灣西南空域）；4台次軍艦tī台海周邊活動；3粒空飄氣球，超越海峽中線。初八至初九，中國派出10隻次軍機（其中2隻「殲16」戰機進入台灣西南空域）；4台次軍艦tī台海周邊活動；4粒空飄氣球（其中2粒飛過台灣島天頂）。初九至初十，中國派出8隻次軍機（其中1隻超越海峽中線）；5台次軍艦，tī臺海周邊活動；1粒空飄氣球超越海峽中線。初十至十一，中國派出15隻次軍機（其中1隻「運8」反潛機、1隻「運9」通信對抗機進入西南空域）；4台次軍艦tī台海周邊活動；3粒空飄氣球（其中1粒飄越台北上空）。十一至十二，中國派出10隻次軍機（其中有2隻超越海峽中線kah北部、西南空域）；6台次軍艦tī台海周邊活動；5粒空飄氣球。十二至十三，中國派出8隻次軍機（其中1隻進入西南空域）；6台次軍艦tī台海周邊活動；3粒空飄氣球。十三至十四，中國派出4台次軍艦tī台海周邊活動；1粒空飄氣球。算算一下，tsit禮拜中國lóng總派出60隻次軍機，33台次軍艦，20粒空飄氣球。

Hō͘咱想起2023年十二月初十，中國國民黨副總統候選人趙少康接受訪問ê時，強調tio̍h強化兩岸互信對話。伊講，中國國民黨反對台獨ê立場，mā要求大陸互相表示善意，以台灣人上kài驚ê戰爭來講，戰機mài超越過海峽中線kah來se̍h台灣，tsiahbē kā台灣舞kah ta̍k个真驚惶。伊進一步講，同時，大陸面對台灣第一線ê東部戰區，飛彈、兵源tio̍hētàng減少，而且tio̍h允准台灣派軍事觀察員常駐觀察，以確保台灣安全kah大陸軍事bē對台灣構成威脅，雖然對岸是m̄是同意咱m̄知，但是國民黨ê基本立場明確，希望互相表達善意。

好佳哉，趙少康落選，nā無，等伊就任副總統了後，才知影伊ê話根本是空銃phah天。Beh知to̍h siuⁿ慢ah！ (240202)