《綠色短評》

 | | | 轉寄

日本beh送疫苗hō͘台灣，中國teh跳啥？

作者 李南衡, TsoânTâijī/全台字 by Tsng Hūiphêng 2021.06.06

Tsoânbîn Tâioânjī pán/全民台灣字版簡稱TsoânTâiJī
《 Le̍ksik toánphêng 》　　　　　　　　　　 Lí Lâmhêng 　　　　　　　 Ji̍tpún beh sàng e̍kbiâu hō͘ Tâioân, Tiongkok teh thiàu siáⁿ?
　　 Gō͘go̍eh jīpeh, Ji̍tpún 《 Sánking sinbûn 》 pòtō, Ji̍tpún tsènghú tsi̍tē tsaiiáⁿ Búhàn hìiām e̍ktsêng tī Tâioân khoktōa, tsiok khiàm e̍kbiâu, sûisî khólī beh kiòngèng"AZ e̍kbiâu"hō͘ Tâioân. Pòtō kóng, Ji̍tpún tsènghú ū kah Bíkok 輝瑞 io̍htshiúⁿ tshiamiok bé 1 ik 9,400 bān tse e̍kbiâu, ū kah Bíkok 莫德納 io̍htshiúⁿ tshiamiok bé 5,000 bān tse e̍kbiâu. Tàu khílâi ū 2 ik 4,000 bān tse ( iok 1 ik 2,000 bān lâng hūn) , khakpó 16 hòe ísiōng kokbîn tsù e̍kbiâu ê sò͘liōng. Lēnggōa Ji̍tpún tsènghú ū ke bé 1 ik 2,000 bān tse ê"AZ e̍kbiâu", ū beh sàng hō͘ suiàu ê kokka, m̄nā ū Tâioân ê hūn, jîtshiáⁿ ē sing sûn=mn̄g Tâioân tsènghú suiàu e̍kbiâu ê sò͘liōng kah thêkiong ê sîkan. Gō͘go̍eh jīpeh ēpo͘, Ji̍tpún gōasiōng 茂木敏充 tsèngsi̍t, Ji̍tpún tsènghú ū teh khólī thêkiong"AZ e̍kbiâu"hō͘ Tâioân, i te̍kpia̍t thêkhí, tī 311 tang Ji̍tpún tōa tētāng liáuāu, Tâioân siōng tsá thêkiong tsioân bō͘khóan oântsō͘ Ji̍tpún. In tsaiiáⁿ Tâioân tī tshitgo̍eh kok sán e̍kbiâu tsiūⁿtshī tsìntsêng, tsin suiàu e̍kbiâu, só͘í Ji̍tpún tsènghú tsiahē piàⁿ la̍kgo̍eh tshesì sàng 124 bān tse e̍kbiâu khì Tâioân. Ji̍tpún Kāuseⁿ Lôtōngséng ū kah AZ io̍htshiúⁿ hia̍psiong siukái ha̍piok tiâukhoán,"AZ e̍kbiâu"tsiah ētàng tshut hòe khì Tâioân.

　　 Sūsi̍t siōng, 2011 nî Ji̍tpún 311 tōa tētāng, Tâioân sī tēitê oântsō͘, oântsō͘ siōngtsē ê kokka, kuankhóan tshiaukòe 200 ik ji̍tîⁿ, pí kîtha só͘ū kokka lóng tsóng ê kuankhóan koh khah tsē. Kūnî sìgo̍eh, Ji̍tpún e̍ktsêng khoktōa khiàm tshùi’am ê sî, Tâioân kuan sàng Ji̍tpún 200 bān phìⁿ tshùi’am. 2016 nî Tâilâm tētāng, Ji̍tpún sûisî kuan bíkim tsi̍tpah bān; 2018 nî Hualian tētāng ê sî, Ji̍tpún sûisî phài kiùlântūi kàu tsaikhu kiùtsai.

　　 Tùi Ji̍tpún tsènghú ū beh thêkiong"AZ e̍kbiâu"hō͘ Tâioân, gō͘go̍eh jīpeh àm, Tshòa Ingbûn tsóngthóng tī Twitter ēng Ji̍tbûn siátshut kámsiā bûn, i kóng"TâiJi̍t tsi kan ê sio kiatliân, hiánhiān tshutlâi bîntsú kokka ētàng thàukòe hō͘siong hia̍ptsō͘, lâi kiônghòa tùi kokka ê tīlí, ná tshintshiūⁿ e̍kbiâu ētàng hō͘ lâng biáne̍kla̍t ánne. Góa tsin huaⁿhí tī tsitê khùnlân ê sîtsūn, TâiJi̍t kan ētàng hō͘siōng tsitshî, tàutīn tō͘kòe lânkuan ê thāitō͘ pí íóng koh khah sianbêng, góa tùi sianghong tshimkāu ê iúgî tshimtshim piáusī kámsiā."

　　 Thiaⁿkóng Ji̍tpún tsènghú beh thêkiong"AZ e̍kbiâu"hō͘ Tâioân, Tiongkok gōakaupō͘ huatgiânjîn Tiō Li̍pkian tējī kang tio̍h tshiàngsiaⁿ,"Tâioân ētàng tittio̍h Tiongkok e̍kbiâu ê lō͘ sī thongtháu· ê, nāsī tsiá e̍kbiâu ' bô͘to̍k’ (bô͘ kiû to̍kli̍p) sī bôkhólêng ta̍ttio̍h bo̍ktik·ê."

Gō͘go̍eh saⁿtsa̍p it, Tiongkok gōakaupō͘ huatgiân jîn 汪文斌tī kìtsiáhōe kóng, Tiongkok kúi piàn piáusī gōanì tsīn siōngtōa ê ló͘le̍k pangtsō͘ Tâioân tôngpau èngtùi e̍ktsêng, tānsī Bîntsìntóng tongkio̍k khiok ùi tsèngtī sulī tshuthuat, tùi Tiongkok ê siānì tèⁿ bô khòaⁿtio̍h, tse sī tùi Tâioân tôngpau sèⁿmiā kiānkhong ê hutsī kah thúnta̍h. Ji̍tpún bo̍ktsêng iáu bô huattō͘ khakpó tsū sin e̍kbiâu ê tshiongtsiok kiongkip, khiok suanpò͘ beh hiòng Tâioân tēkhu thêkiong e̍kbiâu. E̍kbiâu oântsō͘ ingkai tio̍h hôikui bánkiù sèⁿmiā ê tsho͘sim, bô ingkai lûnlo̍h tsoh tô͘bô͘ tsèngtī sulī ê kangkū. I siōngbóeá tsit kúikù ōe bêngbêng sī teh mā in Tiongkok kakī.

　　 Ji̍tpún beh sàng e̍kbiâu hō͘ Tâioân, Tiongkok teh thiàu siáⁿ? Tshiò phòa lâng ê tshùi! 　　(210604)
Tsù, 輝瑞　 莫德納 　　 tshiáⁿ liām Hôagí


Pe̍h-ōe-jī-pán/白話字版
《 Le̍k-sik toán-phêng 》　　　　　　　　　　　 Lí Lâm-hêng 　　　　　　　 Ji̍t-pún beh sàng e̍k-biâu hō͘ Tâi-oân, Tiong-kok teh thiàu siáⁿ?
　　 Gō͘-go̍eh jī-peh, Ji̍t-pún 《 Sán-king sin-bûn 》 pò-tō, Ji̍t-pún tsèng-hú tsi̍t-ē tsai-iáⁿ Bú-hàn hì-iām e̍k-tsêng tī Tâi-oân khok-tōa, tsiok khiàm e̍k-biâu, sûi-sî khó-lī beh kiòng-èng"AZ e̍k-biâu"hō͘ Tâi-oân. Pò-tō kóng, Ji̍t-pún tsèng-hú ū kah Bí-kok 輝瑞 io̍h-tshiúⁿ tshiam-iok bé 1 ik 9,400 bān tse e̍k-biâu, ū kah Bí-kok 莫德納 io̍h-tshiúⁿ tshiam-iok bé 5,000 bān tse e̍k-biâu. Tàu khí-lâi ū 2 ik 4,000 bān tse ( iok 1 ik 2,000 bān lâng hūn) , khak-pó 16 hòe í-siōng kok-bîn tsù e̍k-biâu ê sò͘-liōng. Lēng-gōa Ji̍t-pún tsèng-hú ū ke bé 1 ik 2,000 bān tse ê"AZ e̍k-biâu", ū beh sàng hō͘ su-iàu ê kok-ka, m̄-nā ū Tâi-oân ê hūn, jî-tshiáⁿ ē sing sûn=mn̄g Tâi-oân tsèng-hú su-iàu e̍k-biâu ê sò͘-liōng kah thê-kiong ê sî-kan. Gō͘-go̍eh jī-peh ē-po͘, Ji̍t-pún gōa-siōng 茂木敏充 tsèng-si̍t, Ji̍t-pún tsèng-hú ū teh khó-lī thê-kiong"AZ e̍k-biâu"hō͘ Tâi-oân, i te̍k-pia̍t thê-khí, tī 311 tang Ji̍t-pún tōa tē-tāng liáu-āu, Tâi-oân siōng tsá thê-kiong tsi-oân bō͘-khóan oân-tsō͘ Ji̍t-pún. In tsai-iáⁿ Tâi-oân tī tshit-go̍eh kok sán e̍k-biâu tsiūⁿ-tshī tsìn-tsêng, tsin su-iàu e̍k-biâu, só͘-í Ji̍t-pún tsèng-hú tsiah-ē piàⁿ la̍k-go̍eh tshe-sì sàng 124 bān tse e̍k-biâu khì Tâi-oân. Ji̍t-pún Kāu-seⁿ Lô-tōng-séng ū kah AZ io̍h-tshiúⁿ hia̍p-siong siu-kái ha̍p-iok tiâu-khoán,"AZ e̍k-biâu"tsiah ē-tàng tshut hòe khì Tâi-oân.

　　 Sū-si̍t siōng, 2011 nî Ji̍t-pún 311 tōa tē-tāng, Tâi-oân sī tē-it-ê oân-tsō͘, oân-tsō͘ siōng-tsē ê kok-ka, kuan-khóan tshiau-kòe 200 ik ji̍t-îⁿ, pí kî-tha só͘-ū kok-ka lóng tsóng ê kuan-khóan koh khah tsē. Kū-nî sì-go̍eh, Ji̍t-pún e̍k-tsêng khok-tōa khiàm tshùi-am ê sî, Tâi-oân kuan sàng Ji̍t-pún 200 bān phìⁿ tshùi-am. 2016 nî Tâi-lâm tē-tāng, Ji̍t-pún sûi-sî kuan bí-kim tsi̍t-pah bān; 2018 nî Hua-lian tē-tāng ê sî, Ji̍t-pún sûi-sî phài kiù- lân-tūi kàu tsai-khu kiù-tsai.

　　 Tùi Ji̍t-pún tsèng-hú ū beh thê-kiong"AZ e̍k-biâu"hō͘ Tâi-oân, gō͘-go̍eh jī-peh àm, Tshòa Ing-bûn tsóng-thóng tī Twitter ēng Ji̍t-bûn siá-tshut kám-siā bûn, i kóng"Tâi-Ji̍t tsi kan ê sio kiat-liân, hián-hiān tshut-lâi bîn-tsú kok-ka ē-tàng thàu-kòe hō͘-siong hia̍p-tsō͘, lâi kiông-hòa tùi kok-ka ê tī-lí, ná tshin-tshiūⁿ e̍k-biâu ē-tàng hō͘ lâng bián-e̍k-la̍t án-ne. Góa tsin huaⁿ-hí tī tsit-ê khùn-lân ê sî-tsūn, Tâi-Ji̍t kan ē-tàng hō͘-siōng tsi-tshî, tàu-tīn tō͘-kòe lân-kuan ê thāi-tō͘ pí í-óng koh khah sian-bêng, góa tùi siang-hong tshim-kāu ê iú-gî tshim-tshim piáu-sī kám-siā."

　　 Thiaⁿ-kóng Ji̍t-pún tsèng-hú beh thê-kiong"AZ e̍k-biâu"hō͘ Tâi-oân, Tiong-kok gōa-kau-pō͘ huat-giân-jîn Tiō Li̍p-kian tē-jī kang tio̍h tshiàng-siaⁿ,"Tâi-oân ē-tàng tit-tio̍h Tiong-kok e̍k-biâu ê lō͘ sī thong-tháu-· ê, nā-sī tsiá e̍k-biâu ' bô͘-to̍k’ (bô͘ kiû to̍k-li̍p) sī bô-khó-lêng ta̍t-tio̍h bo̍k-tik-·ê."

Gō͘-go̍eh saⁿ-tsa̍p it, Tiong-kok gōa-kau-pō͘ huat-giân jîn 汪文斌tī kì-tsiá-hōe kóng, Tiong-kok kúi piàn piáu-sī gōan-ì tsīn siōng-tōa ê ló͘-le̍k pang-tsō͘ Tâi-oân tông-pau èng-tùi e̍k-tsêng, tān-sī Bîn-tsìn-tóng tong-kio̍k khiok ùi tsèng-tī su-lī tshut-huat, tùi Tiong-kok ê siān-ì tèⁿ bô khòaⁿ-tio̍h, c he sī tùi Tâi-oân tông-pau seⁿ-miā kiān-khong ê hut-sī kah thún-ta̍h. Ji̍t-pún bo̍k-tsêng iáu bô huat-tō͘ khak-pó tsū sin e̍k-biâu ê tshiong-tsiok kiong-kip, khiok suan-pò͘ beh hiòng Tâi-oân tē-khu thê-kiong e̍k-biâu. E̍k-biâu oân-tsō͘ ing-kai tio̍h hôe-kui bán-kiù seⁿ-miā ê tsho͘-sim, bô ing-kai lûn-lo̍h tsoh tô͘-bô͘ tsèng-tī su-lī ê kang-kū. I siōng-bóe-á tsit kúi-kù ōe bêng-bêng sī teh mā in Tiong-kok ka-kī.

　　 Ji̍t-pún beh sàng e̍k-biâu hō͘ Tâi-oân, Tiong-kok teh thiàu siáⁿ? Tshiò phòa lâng ê tshùi! 　　(210604)
Tsù, 輝瑞　 莫德納 　　 tshiáⁿ liām Hôa-gí


　　五月二八，日本《產經新聞》報導，日本政府一下知影武漢肺炎疫情tī台灣擴大，足欠疫苗，隨時考慮beh供應「AZ疫苗」hō͘台灣。報導講，日本政府有kah美國輝瑞藥廠簽約買1億9,400萬劑疫苗、有kah美國莫德納藥廠簽約買5,000萬劑疫苗。鬥起來有2億4,000萬劑（約1億2,000萬人份），確保16歲以上國民注疫苗ê數量。另外日本政府有加買1億2,000萬劑ê「AZ疫苗」，有beh送hō͘需要ê國家，m̄-nā有台灣ê份，而且會先詢問台灣政府需要疫苗ê數量kah提供ê時間。五月二八下晡，日本外相茂木敏充證實，日本政府有teh考慮提供「AZ疫苗」hō͘台灣，伊特別提起，tī 311東日本大地動了後，台灣上早提供支援募款援助日本。In知影台灣tī七月國產疫苗上市進前，真需要疫苗，所以日本政府tsiah-ē拼六月初四送124萬劑疫苗去台灣。日本厚生勞動省有kah AZ藥廠協商修改合約條款，「AZ疫苗」tsiah ē-tàng出貨去台灣。

　　事實上，2011年日本311大地動，台灣是第一個援助、援助上tsēê國家，捐款超過200億日圓，比其他所有國家lóng總ê捐款koh khahtsē。舊年四月，日本疫情擴大欠嘴掩ê時，台灣捐送日本200萬片嘴掩。2016年台南地動，日本隨時捐美金一百萬；2018年花蓮地動ê時，日本隨時派救難隊到災區救災。

　　對日本政府有beh提供「AZ疫苗」hō͘台灣，五月二八暗，蔡英文總統tīTwitter用日文寫出感謝文，伊講「台日之間ê相結連，顯現出來民主國家會tàng透過互相協助，來強化對國家ê治理，ná親像疫苗會tàng hō͘人免疫力án-ne。我真歡喜tī tsit-ê困難ê時陣，台日間會tàng互相支持、鬥陣渡過難關ê態度比以往koh khah鮮明，我對雙方深厚ê友誼深深表示感謝。」

　　聽講日本政府beh提供「AZ疫苗」hō͘台灣，中國外交部發言人趙立堅第二工tio̍h唱聲：「台灣ē-tàng得tio̍h（中國）大陸疫苗ê路是通tháu-·ê，若是藉疫苗『謀獨』（謀求獨立）是無可能達tio̍h目的-·ê。」

五月三十一，中國外交部發言人汪文斌tī記者會講，中國幾遍表示願意盡上大ê努力幫助台灣同胞應對疫情，但是民進黨當局卻ùi政治私利出發，對中國ê善意tèⁿ無看tio̍h，tse是對台灣同胞生命健康ê忽視kah thún踏。日本目前猶無法度確保自身疫苗ê充足供給，卻宣佈beh向台灣地區提供疫苗。疫苗援助應該tio̍h回歸挽救生命ê初衷，無應該淪落作圖謀政治私利ê工具。伊上尾á tsit幾句話明明是teh罵in中國家己。

　　日本beh送疫苗hō͘台灣，中國teh跳啥？笑破人ê嘴！　　(210604)
註：輝瑞　　莫德納　　請唸華語