《綠色短評》

 | | | 轉寄

中國疫苗，無講你m̄知thang驚！

作者 李南衡, TsoânTâijī/全台字 by Tsng Hūiphêng 2021.06.13

Tsoânbîn Tâioânjī pán/全民台灣字版簡稱TsoânTâiJī
《 Le̍ksik toánphêng 》 Lí Lâmhêng 　　　　　　　 Tiongkok e̍kbiâu, bô kóng lí m̄tsai thang kiaⁿ!
　　 Tâioân ê Búhàn hìiām púnthó͘ ànlē tsìnji̍p gō͘·go̍eh hutjiânkan tsēngka tsin tsē, tsin kín. Tâioân ū lâng itti̍t huahkóng tio̍h bé Tiongkok e̍kbiâu. Gō͘go̍eh jīla̍k, Tiongkok Koktâipān huatgiânjîn 朱鳳蓮 mn̄g kóng, tùi sèkài ōesing tso͘tsit jīnkhó ê Tiongkok e̍kbiâu, Tiongkok ū beh kuan hō͘ Tâioân, Tâioân tàuté ài á·sī bôài? Lio̍kúihōe ti̍tti̍t kóng lán tsènghú kah BⁿT Tikkok goântshiúⁿ tsiaptshiok tsháikáng e̍kbiâu, tshaputto tsiapkīn oânsêng tshiamiok ê sî, inūi Tiongkok kàiji̍p tsó͘tòng, iântî kàu kináji̍t iáu bôhuattō͘ tshiamiok. Khah iàukín·ê, lán ingkai hō͘ ta̍kê tsaiiáⁿ, Tiongkok e̍kbiâu ê tsinsi̍t tsōnghóng, kah Tiongkok e̍kbiâu ū jōani̍h khióngpò͘.

Tiongkok e̍kbiâu tsúiàu ū saⁿ tsióng, tēit tsióng sī Tiongkok 科興 e̍kbiâu (Sinovac) , kántshing kiò tsoh"科興 e̍kbiâu", tsoân sèkài ū 23 ê kokka tēkhu tsháṳōng; tē jī tsióng sī Kokio̍h tsi̍pthoân pakkiaⁿ singbu̍t e̍kbiâu, kántshing kiò tsoh"kokio̍h e̍kbiâu"（Sinopharm）, tsoân sèkài ū 37 ê kokka tēkhu tsháṳōng; tē saⁿ tsióng sī Tiongkok 康希諾 singbu̍t e̍kbiâu 克威莎（Convidencia）, te̍ktiám sī tsù tsi̍t tâng tio̍h ēsái, tsin tsió gōakok tsháṳōng. Tsiàu sèkài ōesing tso͘tsit tsuanka ê pòkò, Tiongkok saⁿ tsióng e̍kbiâu ê kiōngtông te̍ksik sī, ūsin ê tsabó͘lâng, 60 hòe ísiōng nîtióngtsiá kah ū bānsèngpēⁿ ê hoāntsiá, tsù liáuāu ê hoánèng téng antsoânsèng ê tsèngkì bô kàu.

　　 Lâm Bítsiu 智利ū bé 6,600 bān tse ê Tiongkok 科興 e̍kbiâu, jīgue̍h tshesaⁿ khaisí tsù ílâi, tī tsoânkok 1,900 bān jînkháu tiong íking ū 29%（551 bān lâng ） tsù tēit tse, ū 15%（285 bān lâng ） tsù liáu nn̄g tse, tānsī khaktsín lē tiantò jú tsē. Saⁿgue̍h tshe, Thó͘níkî khaisí tsù Tiongkok 科興 e̍kbiâu, kàu saⁿgo̍eh jījī, ū tshiaukòe 800 bān lâng tsù kòe tēit tse, ū 500 bān lâng tsù oân nn̄g tse, iok tsiàm Thó͘níkî jînkháu ê 15%. Kàu saⁿgo̍eh jīit lúikè khaktsín ànlē thu̍tphòa 300 bān, tanji̍t liânsòa sìkang phòa nn̄gbān lē. Ínkhí Thó͘níkî jînbîn siongtong putbóan. Tiongkok thêkiong hō͘ Pase siōngkài tsē Tiongkok 科興 e̍kbiâu, tānsī Pase Búhàn hìiām síbông jînsò͘ íking tshiaukòe 40 bān lâng. Sìgo̍eh jīkáu. Thàikok lútsú pâikiûtūi tūioân kah kangtsok jînoân khì tsù Tiongkok 科興e̍kbiâu, gō͘go̍eh tsa̍pjī, jītsa̍p jī ê lâng khì tsò sàitsêng kiámtshik, giām tshut lóng tsóng iôngsèng hoánèng.

Tiongkok Kokio̍h e̍kbiâu mā bô hó kah tohūi khì. Sìgo̍eh tshikáu sinbûn pòtō, Huilu̍tpin tsóngthóng ê 126 ê sûisin antsoân jînoân, khòsè tī kūnî té to̍h lóng ū tsù Kokio̍h e̍kbiâu, tsòikīn kiámtshik tsoânthé khaktsín. Gō͘go̍eh tshegō͘ sinbûn pòtō, Lamhui tangpō͘, jînkháu tsa̍pbān ê tókok Sisea, íking ū la̍ksiâⁿ bîntsiòng tsù kòe Búhàn hìiām e̍kbiâu, kîtiong la̍ksiâⁿ (saⁿbān la̍k tshing lâng) tsù Tiongkok Kokio̍h e̍kbiâu. Tsòikīn tsi̍tⁿ̄g lépài kai kok e̍ktsêng singun, ū saⁿhun tsṳt ê tāngpēⁿ pēⁿlē ū tsù kòe nn̄g tse e̍kbiâu. Jīgo̍eh tshesì, 匈牙利 tsèngsik khàihòng bîntsiòng tōa kuibô͘ tsù Tiongkok Kokio̍h e̍kbiâu liáuāu, khiok piàn tsoh tsoânkiû Búhàn hìiām síbông lu̍t siōng koân ê kokka.

Gō͘gue̍h jītsa̍p sinbûn pòtō, ū gō͘ miâ tsiânóng Ua̍tlâm khótshat ê Tiongkok tsuanka, tńgkhì Tiongkok liáuāu khaktsín liámpēⁿ, tsit gō͘ ūi tsuanka tshutkok tsêng lóng ū tsù kòe Tiongkok kok sán e̍kbiâu, khósioh bô kóng toh tsi̍t pâi ê e̍kbiâu. Kîtiong tsi̍t miâ tsuanka íking tsoán tsoh tāngtsèng hoāntsiá, kàu gō͘go̍eh tsa̍ppeh i itti̍t ū"siókhóa ho͘khip khùnlân".

　　 Tiongkok e̍kbiâu, bô kóng lí m̄tsai thang kiaⁿ! Beh tsù Tiongkok e̍kbiâu ê lâng tshiáⁿ gia̍h tshiú. (210528)

Tsù, 智利 　匈牙利 　tshiáⁿ liām Hôagí

Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng 　　　　　　　 Tiong-kok e̍k-biâu, bô kóng lí m̄-tsai thang kiaⁿ!
　　 Tâi-oân ê Bú-hàn hì-iām pún-thó͘ àn-lē tsìn-ji̍p gō͘-go̍eh hut-jiân-kan tsēng-ka tsin tsē, tsin kín. Tâi-oân ū lâng it-ti̍t huah-kóng tio̍h bé Tiong-kok e̍k-biâu. Gō͘-go̍eh jī-la̍k, Tiong-kok Kok-tâi-pān huat-giân-jîn 朱鳳蓮 mn̄g kóng, tùi sè-kài ōe-sing tso͘-tsit jīn-khó ê Tiong-kok e̍k-biâu, Tiong-kok ū beh kuan hō͘ Tâi-oân, Tâi-oân tàu-té ài á-·sī bô-ài? Lio̍k-úi-hōe ti̍t-ti̍t kóng lán tsèng-hú kah BⁿT Tik-kok goân-tshiúⁿ tsiap-tshiok tshái-káng e̍k-biâu, tsha-put-to tsiap-kīn oân-sêng tshiam-iok ê sî, in-ūi Tiong-kok kài-ji̍p tsó͘-tòng, iân-tî kàu kin-á-ji̍t iáu bô-huat-tō͘ tshiam-iok. Khah iàu-kín-·ê, lán ing-kai hō͘ ta̍k-ê tsai-iáⁿ, Tiong-kok e̍k-biâu ê tsin-si̍t tsōng-hóng, kah Tiong-kok e̍k-biâu ū jōa-ni̍h khióng-pò͘.

Tiong-kok e̍k-biâu tsú-iàu ū saⁿ tsióng, tē-it tsióng sī Tiong-kok 科興 e̍k-biâu (Sinovac) , kán-tshing kiò tsoh"科興 e̍k-biâu", tsoân sè-kài ū 23 ê kok-ka tē-khu tshái-iōng; tē jī tsióng sī Kok-io̍h tsi̍p-thoân pak-kiaⁿ sing-bu̍t e̍k-biâu, kán-tshing kiò tsoh"kok-io̍h e̍k-biâu"（Sinopharm）, tsoân sè-kài ū 37 ê kok-ka tē-khu tshái-iōng; tē saⁿ tsióng sī Tiong-kok 康希諾 sing-bu̍t e̍k-biâu 克威莎（Convidencia）, te̍k-tiám sī tsù tsi̍t tâng tio̍h ē-sái, tsin tsió gōa-kok tshái-iōng. Tsiàu sè-kài ōe-sing tso͘-tsit tsuan-ka ê pò-kò, Tiong-kok saⁿ tsióng e̍k-biâu ê kiōng-tông te̍k-sik sī, ū-sin ê tsa-bó͘-lâng, 60 hòe í-siōng nî-tióng-tsiá kah ū bān-sèng-pēⁿ ê hoān-tsiá, tsù liáu-āu ê hoán-èng téng an-tsoân-sèng ê tsèng-kì bô kàu.

　　 Lâm Bí-tsiu 智利ū bé 6,600 bān tse ê Tiong-kok 科興 e̍k-biâu, jī-gue̍h tshe-saⁿ khai-sí tsù í-lâi, tī tsoân-kok 1,900 bān jîn-kháu tiong í-king ū 29%（551 bān lâng ） tsù tē-it tse, ū 15%（285 bān lâng ） tsù liáu nn̄g tse, tān-sī khak-tsín lē tian-tò jú tsē. Saⁿ-gue̍h tshe, Thó͘-ní-kî khai-sí tsù Tiong-kok 科興 e̍k-biâu, kàu saⁿ-go̍eh jī-jī, ū tshiau-kòe 800 bān lâng tsù kòe tē-it tse, ū 500 bān lâng tsù oân nn̄g tse, iok tsiàm Thó͘-ní-kî jîn-kháu ê 15%. Kàu saⁿ-go̍eh jī-it lúi-kè khak-tsín àn-lē thu̍t-phòa 300 bān, tan-ji̍t liân-sòa sì-kang phòa nn̄g-bān lē. Ín-khí Thó͘-ní-kî jîn-bîn siong-tong put-bóan. Tiong-kok thê-kiong hō͘ Pa-se siōng-kài tsē Tiong-kok 科興 e̍k-biâu, tān-sī Pa-se Bú-hàn hì-iām sí-bông jîn-sò͘ í-king tshiau-kòe 40 bān lâng. Sì-go̍eh jī-káu. Thài-kok lú-tsú pâi-kiû-tūi tūi-oân kah kang-tsok jîn-oân khì tsù Tiong-kok 科興e̍k-biâu, gō͘-go̍eh tsa̍p-jī, jī-tsa̍p jī ê lâng khì tsò sài-tsêng kiám-tshik, giām tshut lóng tsóng iông-sèng hoán-èng.

Tiong-kok Kok-io̍h e̍k-biâu mā bô hó kah toh-ūi khì. Sì-go̍eh tshe-káu sin-bûn pò-tō, Hui-lu̍t-pin tsóng-thóng ê 126 ê sûi-sin an-tsoân jîn-oân, khò-sè tī kū-nî té to̍h lóng ū tsù Kok-io̍h e̍k-biâu, tsòe-kīn kiám-tshik tsoân-thé khak-tsín. Gō͘-go̍eh tshe-gō͘ sin-bûn pò-tō, Lam-hui tang-pō͘, jîn-kháu tsa̍p-bān ê tó-kok Si-se- a, í-king ū la̍k-siâⁿ bîn-tsiòng tsù kòe Bú-hàn hì-iām e̍k-biâu, kî-tiong la̍k-siâⁿ (saⁿ-bān la̍k tshing lâng) tsù Tiong-kok Kok-io̍h e̍k-biâu. Tsòe-kīn tsi̍t-nn̄g lé-pài kai kok e̍k-tsêng sing-un, ū saⁿ-hun tsi-it ê tāng-pēⁿ pēⁿ-lē ū tsù kòe nn̄g tse e̍k-biâu. Jī-go̍eh tshe-sì, 匈牙利 tsèng-sik khài-hòng bîn-tsiòng tōa kui-bô͘ tsù Tiong-kok Kok-io̍h e̍k-biâu liáu-āu, khiok piàn tsoh tsoân-kiû Bú-hàn hì-iām sí-bông lu̍t siōng koân ê kok-ka.

Gō͘-gue̍h jī-tsa̍p sin-bûn pò-tō, ū gō͘ miâ tsiân-óng Ua̍t-lâm khó-tshat ê Tiong-kok tsuan-ka, tńg-khì Tiong-kok liáu-āu khak-tsín liám-pēⁿ, tsit gō͘ ūi tsuan-ka tshut-kok tsêng lóng ū tsù kòe Tiong-kok kok sán e̍k-biâu, khó-sioh bô kóng toh tsi̍t pâi ê e̍k-biâu. Kî-tiong tsi̍t miâ tsuan-ka í-king tsoán tsoh tāng-tsèng hoān-tsiá, kàu gō͘-go̍eh tsa̍p-peh i it-ti̍t ū"sió-khóa ho͘-khip khùn-lân".

　　 Tiong-kok e̍k-biâu, bô kóng lí m̄-tsai thang kiaⁿ! Beh tsù Tiong-kok e̍k-biâu ê lâng tshiáⁿ gia̍h tshiú. (210528)

Tsù, 智利 　匈牙利 　tshiáⁿ liām Hôa-gí

　　台灣ê武漢肺炎本土案例進入五月忽然間增加真tsē、真緊。台灣有人一直喝講tio̍h買中國疫苗。五月二六，中國國台辦發言人朱鳳蓮問講，對世界衛生組織認可ê中國疫苗，中國有beh捐hō͘台灣，台灣到底愛抑是無愛？陸委會直直講咱政府kah BⁿT德國原廠接觸採購疫苗，差不多接近完成簽約ê時，因為中國介入阻擋，延遲到今á日猶無法度簽約。Khah要緊ê，咱應該hō͘逐个知影，中國疫苗ê真實狀況，kah中國疫苗有jōa-ni̍h恐怖。

中國疫苗主要有三種：第一種是中國科興疫苗（Sinovac），簡稱叫作「科興疫苗」，全世界有23个國家地區採用；第二種是國藥集團北京生物疫苗，簡稱叫作「國藥疫苗」（Sinopharm），全世界有37个國家地區採用；第三種是中國康希諾生物疫苗克威莎（Convidencia），特點是注一筒tio̍hē-sái，真少外國採用。照世界衛生組織專家ê報告，中國三種疫苗ê共同特色是，有身ê查某人、60歲以上年長者kah有慢性病ê患者，注了後ê反應等安全性ê證據無夠。

　　南美洲智利有買6,600萬劑ê中國科興疫苗，二月初三開始注以來，tī全國1,900萬人口中已經有29%（551萬人）注第一劑，有15%（285萬人）注了兩劑，但是確診例顚倒愈tsē。三月初，土耳其開始注中國科興疫苗，到三月二二，有超過800萬人注過第一劑，有500萬人注完兩劑，約佔土耳其人口ê15%。到三月二一累計確診案例突破300萬，單日連續四工破兩萬例。引起土耳其人民相當不滿。中國提供hō͘巴西上蓋tsē中國科興疫苗，但是巴西武漢肺炎死亡人數已經超過40萬人。四月二九。泰國女子排球隊隊員kah工作人員去注中國科興疫苗，五月十二，二十二个人去做賽前檢測，驗出lóng總陽性反應。

中國國藥疫苗mā無好kahtoh位去。四月初九新聞報導，菲律賓總統ê126个隨身安全人員，靠勢tī舊年底tio̍h lóng有注國藥疫苗，最近檢測全體確診。五月初五新聞報導，南非東部、人口十萬ê島國西施亞，已經有六成民眾注過武漢肺炎疫苗，其中六成（三萬六千人）注中國國藥疫苗。最近一兩禮拜該國疫情升溫，有三分之一ê重病病例有注過二劑疫苗。二月初四，匈牙利正式開放民眾大規模注中國國藥疫苗了後，卻變作全球武漢肺炎死亡率上koânê國家。

五月二十新聞報導，有五名前往越南考察ê中國專家，轉去中國了後確診染病，tsit五位專家出國前lóng有注過中國國產疫苗，可惜無講toh一牌ê疫苗。其中一名專家已經轉作重症患者，到五月十八伊一直有「小khóa呼吸困難」。 　　中國疫苗，無講你m̄知thang驚！Beh注中國疫苗ê人請gia̍h手。 (210528)

註：智利　匈牙利　　請唸華語