《綠色短評》

 | | | 轉寄

蕭美琴堅強上súi ê身影

作者 李南衡, TsoânTâijī/全台字 by Tsng Hūiphêng 2021.07.11

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng
Siau Bíkhîm kiankiông siōng súi ê siniáⁿ
　　 Kiⁿî gō͘·gue̍h khaisí, Tâioân bīntùi sin tsi̍tpho e̍ktsêng ê thiautsiàn, kasiōng lán hiòng gōakok tēng 2,000 bān tse e̍kbiâu kiòngèng tsin bô úntēng ê tsênghóng tsi hā, Bíkok, Ji̍tpún nn̄gê Tâioân tiōngiàu ê bîntsú tângphōaⁿ, tsiok tshingtshó Tiongkok sūnsè beh bē, beh sàng Tiongkok e̍kbiâu hō͘ Tâioân, pik Tâioân tī "tsi̍tê Tiongkok" ēbīn súiōng Tiongkok e̍kbiâu; tī Tâioân ê Nâpe̍htóng tshiò Tâioân tsènghú bé bô e̍kbiâu, lāisîn thong gōakúi, tsètsō Tâioân jînbîn ê hoânló putan, pik Tâioân tsiapsiū Tiongkok e̍kbiâu.

Ji̍tpún kah Bíkok khòaⁿ tsāi gánlāi, tsiksî hiòng lán tshuntshut oântsō͘. Ji̍tpún kóaⁿkín tsài 124 bān tse e̍kbiâu lâi kiù kip, Bíkok saⁿ ūi tshamgīoân tsuankang tsē Bíkok kunki lâi Siôngsan, suanpò͘ Bíkok beh sàng Tâioân 75 bān tse e̍kbiâu, tsin kín tio̍h ē ūn lâi.

Tsit tiongkan, ū gōakau thoântūi ê ló͘le̍k, ū Tâikiâu ê tsáutsông, ū Bíkok kokhōe kah kokkài khòa tóngphài thēngkàuté; tī kòethêngtiong, Tshòa Ingbûn tsóngthóng itti̍t tsútōng hiòng Bíhong tsingtshú, piáuta̍t Tâioân kah sèkài tsin tsē kokka kāngkhoán, lóng tôngsî tú tio̍h e̍ktsêng thiautsiàn kah e̍kbiâu kiòngèng bô úntēng ê khùnkéng, Tâioân tsiok suiàu kohkhah tsē e̍kbiâu, Tâioân suiàu bîntsú tângphōaⁿ kohkhah tōa ê tsitshî le̍kliōng. Tshòa Ingbûn tsóngthóng ēsái kóng sī bômê bôji̍t kah TsùbÍ tāipiáu Siau Bíkhîm thong tiānōe, sûisî ti̍ttsiap hē tsílēng, tôngsî Siau Bíkhîm tāipiáu pòaⁿmê mā phah tiānōe hiòng tsóngthóng pòkò siōng sin ê tsìntián.

Bíkok hutjiânkan suanpò͘ beh sàng Tâioân 250 bān tse Mótenah e̍kbiâu, sī la̍kgue̍h tshela̍k suanpò͘ beh sàng lán Tâioân 75 bān tse ê saⁿ pōe gōa. Bíkok tsènghú kā Siau Bíkhîm tāipiáu kóng, nā tsiàu itpuaⁿ thêngsū suiàu tsin tsē kang, nā beh ài kín tio̍h tshinsin khì Thénási tsiu ê Munhuesu niá hòe. Siau Bíkhîm tāipiáu tongjiân tsaiiáⁿ tsá tsi̍tji̍t tsá tsi̍tji̍t hó, tsá tsi̍ttiámtsing tsá tsi̍ttiámtsing hó, i bô tējī kù ōe, sûisî tshinsin piàⁿ khì niá hòe, jîtshiáⁿ tshinba̍k khòaⁿ só͘ū ê e̍kbiâu sàng khí khì Tionghôa hângkhong hòeūnki téng.

　　 La̍kgue̍h tsa̍pkáu, Bíkok Kokbūīⁿ huatgiânjîn Phúlaisuh（Ned Price）piáusī, e̍kbiâu íking sūnlī tingki, ītēng ē tī bînátsài pe kàu Tâioân. I tī Twitter huatbûn í "khí pue loh!" ê jīgán lâi suatbêng tsit piàn sàng Tâioân e̍kbiâu ê hinghùn tsi tsêng, bûn tiong ū the̍h kàu Bíkok kuansàng 250 bān tse Mótenah e̍kbiâu hō͘ Tâioân, tsitmá íking sūnlī ūn sàngtshut khì ah. Phúlaisuh koh tī bûn tiong thêkhí, hibāng thàukòe Tâioân kah Bíkok ê kongkiōng ōesing tângphōaⁿ kuanhē, ē táng káikiù sèkài kok tē ê sèⁿmiā, Bíkok Kokbū īⁿ tsin huaⁿhí ētàng tsitshî si̍thiān Pe̍hkiong piàⁿla̍t tī pangtsō͘ sèkài tsiànsèng “COVID19”（Búhàn hìiām）e̍ktsêng ê sênglo̍k. Phúlaisuh tī bûn tiong te̍kpia̍t tah tsi̍t tiuⁿ lán kok Tsùbí tāipiáu Siau Bíkhîm ê siòngphìⁿ, i khiā tī thêngkipêng khòaⁿ e̍kbiâu ūnsàng khí khì Tionghôa hângkhong hòiki ê kui ê kòethêng, tsioktsiok ū la̍k tiámtsing. I te̍kpia̍t kā Siau Bíkhîm tāipiáu ê siniáⁿ hip· lo̍h·lâi pho͘ hō͘ ta̍kê khòaⁿ.

　　 Lán só͘ū ê Tâioânlâng khòaⁿtio̍h Siau Bíkhîm khiā tī thêngkipêng ê siniáⁿ, si̍ttsāi tsin m̄kam. Sūsi̍t siōng lán khòaⁿtio̍h·ê sī Siau Bíkhîm kiankiông, siōng súi ê siniáⁿ! (210625)

Pe̍h-ōe-jī-pán/白話字版
《 Le̍k-sik toán-phêng 》 Lí Lâm-hêng
Siau Bí-khîm kian-kiông siōng súi ê sin-iáⁿ
　　 Kin-nî gō͘-·gue̍h khai-sí, Tâi-oân bīn-tùi sin tsi̍t-pho e̍k-tsêng ê thiau-tsiàn, ka-siōng lán hiòng gōa-kok tēng 2,000 bān tse e̍k-biâu kiòng-èng tsin bô ún-tēng ê tsêng-hóng tsi hā, Bí-kok, Ji̍t-pún nn̄g-ê Tâi-oân tiōng-iàu ê bîn-tsú tâng-phōaⁿ, tsiok tshing-tshó Tiong-kok sūn-sè beh bē, beh sàng Tiong-kok e̍k-biâu hō͘ Tâi-oân, pik Tâi-oân tī "tsi̍t-ê Tiong-kok" ē-bīn sú-iōng Tiong-kok e̍k-biâu; tī Tâi-oân ê Nâ-pe̍h-tóng tshiò Tâi-oân tsèng-hú bé bô e̍k-biâu, lāi-sîn thong gōa-kúi, tsè-tsō Tâi-oân jîn-bîn ê hoân-ló put-an, pik Tâi-oân tsiap-siū Tiong-kok e̍k-biâu.

Ji̍t-pún kah Bí-kok khòaⁿ tsāi gán-lāi, tsik-sî hiòng lán tshun-tshut oân-tsō͘. Ji̍t-pún kóaⁿ-kín tsài 124 bān tse e̍k-biâu lâi kiù kip, Bí-kok saⁿ ūi tsham-gī-oân tsuan-kang tsē Bí-kok kun-ki lâi Siông-san, suan-pò͘ Bí-kok beh sàng Tâi-oân 75 bān tse e̍k-biâu, tsin kín tio̍h ē ūn lâi.

Tsit tiong-kan, ū gōa-kau thoân-tūi ê ló͘-le̍k, ū Tâi-kiâu ê tsáu-tsông, ū Bí-kok kok-hōe kah kok-kài khòa tóng-phài thēng-kàu-té; tī kòe-thêng-tiong, Tshòa Ing-bûn tsóng-thóng it-ti̍t tsú-tōng hiòng Bí-hong tsing-tshú, piáu-ta̍t Tâi-oân kah sè-kài tsin tsē kok-ka kāng-khoán, lóng tông-sî tú tio̍h e̍k-tsêng thiau-tsiàn kah e̍k-biâu kiòng-èng bô ún-tēng ê khùn-kéng, Tâi-oân tsiok su-iàu koh-khah tsē e̍k-biâu, Tâi-oân su-iàu bîn-tsú tâng-phōaⁿ koh-khah tōa ê tsi-tshî le̍k-liōng. Tshòa Ing-bûn tsóng-thóng ē-sái kóng sī bô-mê bô-ji̍t kah Tsù-bÍ tāi-piáu Siau Bí-khîm thong tiān-ōe, sûi-sî ti̍t-tsiap hē tsí-lēng, tông-sî Siau Bí-khîm tāi-piáu pòaⁿ-mê mā phah tiān-ōe hiòng tsóng-thóng pò-kò siōng sin ê tsìn-tián.

Bí-kok hut-jiân-kan suan-pò͘ beh sàng Tâi-oân 250 bān tse Mó-te-nah e̍k-biâu, sī la̍k-gue̍h tshe-la̍k suan-pò͘ beh sàng lán Tâi-oân 75 bān tse ê saⁿ pōe gōa. Bí-kok tsèng-hú kā Siau Bí-khîm tāi-piáu kóng, nā tsiàu it-puaⁿ thêng-sū su-iàu tsin tsē kang, nā beh ài kín tio̍h tshin-sin khì Thé-ná-si tsiu ê Munhuesu niá hòe. Siau Bí-khîm tāi-piáu tong-jiân tsai-iáⁿ tsá tsi̍t-ji̍t tsá tsi̍t-ji̍t hó, tsá tsi̍t-tiám-tsing tsá tsi̍t-tiám-tsing hó, i bô tē-jī kù ōe, sûi-sî tshin-sin piàⁿ khì niá hòe, jî-tshiáⁿ tshin-ba̍k khòaⁿ só͘-ū ê e̍k-biâu sàng khí khì Tiong-hôa hâng-khong hòe-ūn-ki téng.

　　 La̍k-gue̍h tsa̍p-káu, Bí-kok Kok-bū-īⁿ huat-giân-jîn Phú-laisuh（Ned Price）piáu-sī, e̍k-biâu í-king sūn-lī ting-ki, ī-tēng ē tī bîn-á-tsài pe kàu Tâi-oân. I tī Twitter huat-bûn í "khí pue loh!" ê jī-gán lâi suat-bêng tsit piàn sàng Tâi-oân e̍k-biâu ê hing-hùn tsi tsêng, bûn tiong ū the̍h kàu Bí-kok kuan-sàng 250 bān tse Mó-te-nah e̍k-biâu hō͘ Tâi-oân, tsit-má í-king sūn-lī ūn sàng-tshut khì ah. Phú-laisuh koh tī bûn tiong thê-khí, hi-bāng thàu-kòe Tâi-oân kah Bí-kok ê kong-kiōng ōe-sing tâng-phōaⁿ kuan-hē, ē táng kái-kiù sè-kài kok tē ê sèⁿ-miā, Bí-kok Kok-bū- īⁿ tsin huaⁿ-hí ē-tàng tsi-tshî si̍t-hiān Pe̍h-kiong piàⁿ-la̍t tī pang-tsō͘ sè-kài tsiàn-sèng “COVID-19”（Bú-hàn hì-iām）e̍k-tsêng ê sêng-lo̍k. Phú-laisuh tī bûn tiong te̍k-pia̍t tah tsi̍t tiuⁿ lán kok Tsù-bí tāi-piáu Siau Bí-khîm ê siòng-phìⁿ, i khiā tī thêng-ki-pêng khòaⁿ e̍k-biâu ūn-sàng khí khì Tiong-hôa hâng-khong hòe-ki ê kui ê kòe-thêng, tsiok-tsiok ū la̍k tiám-tsing. I te̍k-pia̍t kā Siau Bí-khîm tāi-piáu ê sin-iáⁿ hip· lo̍h·lâi pho͘ hō͘ ta̍k-ê khòaⁿ.

　　 Lán só͘-ū ê Tâi-oân-lâng khòaⁿ-tio̍h Siau Bí-khîm khiā tī thêng-ki-pêng ê sin-iáⁿ, si̍t-tsāi tsin m̄-kam. Sū-si̍t siōng lán khòaⁿ-tio̍h-·ê sī Siau Bí-khîm kian-kiông, siōng súi ê sin-iáⁿ! (210625)


　　今年五月開始，台灣面對新一波疫情ê挑戰，加上咱向外國訂2,000萬劑疫苗供應真無穩定ê情況之下，美國、日本兩個台灣重要ê民主同伴，足清楚中國順勢beh賣、beh送中國疫苗hō͘台灣，逼台灣tī「一個中國」下面使用中國疫苗；tī台灣ê藍白黨笑台灣政府買無疫苗，內神通外鬼，製造台灣人民ê煩惱不安，逼台灣接受中國疫苗。

日本kah美國看在眼內，即時向咱伸出援助。日本趕緊載124萬劑疫苗來救急，美國三位參議員專工坐美國軍機來松山，宣布美國beh送台灣75萬劑疫苗，真緊tio̍h會運來。

Tsit中間，有外交團隊ê努力，有台僑ê走tsông，有美國國會kah各界跨黨派挺到底；tī過程中，蔡英文總統一直主動向美方爭取，表達台灣kah世界真tsē國家仝款，lóng同時抵tio̍h疫情挑戰kah疫苗供應無穩定ê困境，台灣足需要koh-khah tsē疫苗，台灣需要民主同伴koh-khah大ê支持力量。蔡英文總統ē-sái講是無暝無日kah駐美代表蕭美琴通電話，隨時直接下達指令，同時蕭美琴代表半暝mā拍電話向總統報告上新ê進展。

美國忽然間宣布beh贈送台灣250萬劑Mó-te-nah疫苗，是六月初六宣布beh贈送咱台灣75萬劑ê三倍外。美國政府kā蕭美琴代表講，若照一般程序需要真tsē工，若beh愛緊tio̍h親身去Thé-ná-si州ê Munhuesu領貨。蕭美琴代表當然知影早一日早一日好、早一點鐘早一點鐘好，伊無第二句話，隨時親身拼去領貨，而且親目看所有ê疫苗送起去中華航空貨運機頂。

　　六月十九，美國國務院發言人Phú-laisuh（Ned Price）表示，疫苗已經順利登機，預定ē tī明á載飛到台灣。伊tīTwitter發文以「起飛loh！」ê字眼來說明tsit遍贈送台灣疫苗ê興奮之情，文中有提到美國捐送250萬劑Mó-te-nah疫苗hō͘台灣，tsit-má已經順利運送出去ah。Phú -laisuh koh tī文中提起，希望透過台灣kah美國ê公共衛生同伴關係，會táng解救世界各地ê生命，美國國務院真歡喜ē-tàng支持實現白宮拚力tī幫助世界戰勝“COVID-19”（武漢肺炎）疫情ê承諾。Phú-laisuh tī文中特別貼一張咱國駐美代表蕭美琴ê相片，伊khiā tī停機坪看疫苗運送起去中華航空貨機ê歸個過程，足足有六點鐘。伊特別kā蕭美琴代表ê身影hip·落來pho͘ hō͘ ta̍k-ê看。

　　咱所有ê台灣人看tio̍h蕭美琴徛tī停機坪ê身影，實在真m̄甘。事實上咱看tio̍h-·ê是蕭美琴堅強，上súi ê身影！ (210625)