《綠色短評》

| | | 轉寄

世界上kài bē見笑ê是tó一个?

Tsoânbîn Tâioânjī pán/全民台灣字版簡稱TsoânTâiJī

《 Le̍ksik toánphêng 》 Lí Lâmhêng


Sèkài siōng kài bē kiànsiàu ê sī tó tsi̍tê?
  
Tshitgue̍h tsheit sī Tiongkok Kiōngsántóng kiàn tóng tsi̍tpah tsiunî kìliāmji̍t, kinkì Tiongkok Sinhôasiā la̍kgue̍h saⁿtsa̍p ēpo͘ ê pòtō, paukuat Tiongkok Kokbîntóng tsêng tsúse̍k Liân Tsiàn, Âng Siùthiāu, Tshinbîntóng tsúse̍k Sòng Tshó͘jû téng, lio̍ksio̍k hiòng Tiongkok Kiōngsántóng piáuta̍t tsiokhō.

   Kinkì pòtō, Liân Tsiàn tī hōtiān tsítshut,"Tiongkok Kiōngsántóng tshòng kiàn pah nî, tsútō sîn tsiu tāilio̍k kiànsiat tshittsa̍pjī nî, Tionghôa bîntso̍k ho̍khing tsìntêng íking ta̍tkàu gō͘tshing nî le̍ksú sin ko’hong!"tsin ǹgbāng nn̄g hōaⁿ kuanhē hôpêng huattián,"só͘ū Tionghôa jîlú ha̍p la̍t ūi lán bîntso̍k ê sūgia̍p tsài tsō sin iû". Bat tsòkòe Tionghôa Bînkok hù tsóngthóng, Tiongkok Kokbîntóng tsúse̍k ê Liân Tsiàn, i ê hōtiān sī kóng, hó tit tsi̍tpah tang tsêng ê tshitgue̍h tsheit Tiongkok Kiōngsántóng kiàn tóng, tsiah ū huattō͘ tī jītsa̍ppeh nî āu ê 1949 nî, kā Tiongkok Kokbîntóng ê Tionghôa Bînkok iántó, Tiongkok Kiōngsántóng tsiah ē tàng "tsútō sîn tsiu tāilio̍k kiànsiat tshittsa̍pjī nî, "Tionghôa bîntso̍k ho̍khing tsìntêng" tsiah ū huattō͘ "íking ta̍tkàu gō͘tshing nî le̍ksú sin kohong!" Liân Tsiàn tsittīn sī móasim kámsiā Tiongkok Kiōngsántóng, 1949 nî kā Tiongkok Kokbîntóng ê Tionghôa Bînkok tsènghú phah kah tsáu bô lō͘, puttikí tsiah tsáulâi Tâioân tsò lānbîn.

   Tiongkok Kokbîntóng tsêng tsúse̍k Âng Siùthiāu thàukòe hōhâm piáusī,"Tionghôa bîntso̍k úitāi ho̍khing sī le̍ksú ê pitjiân". Tsiok hibāng nn̄g hōaⁿ "tshioktsìn iôngha̍p, simlêng khèha̍p, kia̍ttsīn simla̍t kiōngtông oânsêng kokka thóngit tōa gia̍p, kiōng tiok kokka hùkiông, bîntso̍k ho̍khing, jînbîn hēnghok ê Tiongkok bāng." lán kanta beh mn̄g Âng Siùthiāu tsêng tsúse̍k, lí tng nî ná ē í "lānbîn" ê sinhūn tsáulō͘ lâi Tâioân? Phiah siáⁿmi̍h lān lâi Tâioân tshòng siáⁿ?

  Bat tsòkòe Tiongkok Kokbîntóng tiongiong tóng pō͘ pìsu tiúⁿ, Tâioân séngtiúⁿ, hiānjīm Tshinbîntóng tsúse̍k ê Sòng Tshó͘jû tī hōtiān tiong tsítshut, "Tiongkok Kiōngsántóng kankhó͘ tohtso̍at, hùntàu put hāi, tiôngtsìn huahā, í jînbîn hoktsí ūi sing, jînlūi miāūn kiōngtôngthé ūi liām, tshimtshim hō͘ sèkan lâng tiôngsin khòaⁿthāi". Sêng ǹgbāng bīlâi sianghong tìle̍k tshioktsìn nn̄g hōaⁿ hôpêng huattián,"si̍thiān Tionghôa bîntso̍k ho̍khing". Sòng Tshó͘jû sī kóng, hókatsài 100 nî tsêng Tiongkok Kiōngsántóng tshòngli̍p, 1949 nî kā Tiongkok Kokbîntóng ê Tionghôa Bînkok tsènghú kóaⁿ lâi Tâioân, tsiah ē tàng tiôngtsìn huahā, Tiongkok Kiōngsántóng si̍ttsāi tsin liáuputkhí. Tshéngkàu Sòng Tshó͘jû tsúse̍k, lí tng nî ná ē í "lānbîn" ê sinhūn tsáulō͘ lâi Tâioân? Sī tó tsi̍tê úitāi ê tóng hāi lí piàn tsoh lānbîn? Lí kináji̍t tōatōa kā oló?

   Siōng kài khiáu ê sī Tiongkok Kokbîntóng tiongiong tóng pō͘, oântsoân bô phah sǹg beh huat hōtiān, kanta kiôngtiāu kòikhì bôlūn Tiongkok Kokbîntóng iah sī Tiongkok Kiōngsántóng ê tóng khèng, nn̄g tóng lóng bô phah hōtiān hō͘ tùihong ê tsêng lē.

Tsátsêng Tiongkok Kokbîntóng tī Tâioân kàuio̍k lán, Tiongkok kiōngsántóng sī "萬惡的共匪", lán nā bô tòe i ánne kóng tio̍h sī "susiúⁿ ū būntê". Kináji̍t Tiongkok Kiōngsántóng iáu tsng nn̄gtshing lia̍p huitôaⁿ tùi Tâioân, iáu tshùtshù tsó͘gāi lán Tâioân bé Búhàn hìiām e̍kbiâu, bô mā in to̍h tshám síliáu ah, Samūi Tiongkok Kokbîntóng tsêng tsúse̍k kèngjiân kongkhai tōatōa oló Tiongkok Kiōngsántóng, tsi̍tê pí tsi̍tê koh khah bē kiànsiàu!

Sèkài siōng kài bē kiànsiàu ê sī tó tsi̍tê? Lí kóng leh.   (210702)
Tsù," 萬惡的共匪"   tshiáⁿ liām Hôagí

Pe̍h-ōe-jī-pán/白話字版

《 Le̍k-sik toán-phêng 》 Lí Lâm-hêng

Sè-kài siōng kài bē kiàn-siàu ê sī tó tsi̍t-ê?

   Tshit-gue̍h tshe-it sī Tiong-kok Kiōng-sán-tóng kiàn tóng tsi̍t-pah tsiu-nî kì-liām-ji̍t, kin-kì Tiong-kok Sin-hôa-siā la̍k-gue̍h saⁿ-tsa̍p ē-po͘ ê pò-tō, pau-kuat Tiong-kok Kok-bîn-tóng tsêng tsú-se̍k Liân Tsiàn, Âng Siù-thiāu, Tshin-bîn-tóng tsú-se̍k Sòng Tshó͘-jû téng, lio̍k-sio̍k hiòng Tiong-kok Kiōng-sán-tóng piáu-ta̍t tsiok-hō.

   Kin-kì pò-tō, Liân Tsiàn tī hō-tiān tsí-tshut,"Tiong-kok Kiōng-sán-tóng tshòng kiàn pah nî, tsú-tō sîn tsiu tāi-lio̍k kiàn-siat tshit-tsa̍p-jī nî, Tiong-hôa bîn-tso̍k ho̍k-hing tsìn-têng í-king ta̍t-kàu gō͘-tshing nî le̍k-sú sin ko-hong!"tsin ǹg-bāng nn̄g hōaⁿ kuan-hē hô-pêng huat-tián,"só͘-ū Tiong-hôa jî-lú ha̍p la̍t ūi lán bîn-tso̍k ê sū-gia̍p tsài tsō sin iû". Bat tsò-kòe Tiong-hôa Bîn-kok hù tsóng-thóng, Tiong-kok Kok-bîn-tóng tsú-se̍k ê Liân Tsiàn, i ê hō-tiān sī kóng, hó tit tsi̍t-pah tang tsêng ê tshit-gue̍h tshe-it Tiong-kok Kiōng-sán-tóng kiàn tóng, tsiah ū huat-tō͘ tī jī- tsa̍p-peh nî āu ê 1949 nî, kā Tiong-kok Kok-bîn-tóng ê Tiong-hôa Bîn-kok ián-tó, Tiong-kok Kiōng-sán-tóng tsiah ē tàng "tsú-tō sîn tsiu tāi-lio̍k kiàn-siat tshit-tsa̍p-jī nî, "Tiong-hôa bîn-tso̍k ho̍k-hing tsìn-têng" tsiah ū huat-tō͘ "í-king ta̍t-kàu gō͘-tshing nî le̍k-sú sin ko-hong!" Liân Tsiàn tsit-tīn sī móa-sim kám-siā Tiong-kok Kiōng-sán-tóng, 1949 nî kā Tiong-kok Kok-bîn-tóng ê Tiong-hôa Bîn-kok tsèng-hú phah kah tsáu bô lō͘, put-tik-í tsiah tsáu-lâi Tâi-oân tsò lān-bîn.

   Tiong-kok Kok-bîn-tóng tsêng tsú-se̍k Âng Siù-thiāu thàu-kòe hō-hâm piáu-sī,"Tiong-hôa bîn-tso̍k úi-tāi ho̍k-hing sī le̍k-sú ê pit-jiân". Tsiok hi-bāng nn̄g hōaⁿ "tshiok-tsìn iông-ha̍p, sim-lêng khè-ha̍p, kia̍t-tsīn sim-la̍t kiōng-tông oân-sêng kok-ka thóng-it tōa gia̍p, kiōng tiok kok-ka hù-kiông, bîn-tso̍k ho̍k-hing, jîn-bîn hēng-hok ê Tiong-kok bāng." lán kan-ta beh mn̄g Âng Siù-thiāu tsêng tsú-se̍k, lí tng nî ná ē í "lān-bîn" ê sin-hūn tsáu-lō͘ lâi Tâi-oân? Phiah siáⁿ-mi̍h lān lâi Tâi-oân tshòng siáⁿ?

  Bat tsò-kòe Tiong-kok Kok-bîn-tóng tiong-iong tóng pō͘ pì-su tiúⁿ, Tâi-oân séng-tiúⁿ, hiān-jīm Tshin-bîn-tóng tsú-se̍k ê Sòng Tshó͘-jû tīhō-tiān tiong tsí-tshut, "Tiong-kok Kiōng-sán-tóng kan-khó͘ toh-tso̍at, hùn-tàu put hāi, tiông-tsìn hua-hā, í jîn-bîn hok-tsí ūi sing, jîn-lūi miā-ūn kiōng-tông-thé ūi liām, tshim-tshim hō͘ sè-kan lâng tiông-sin khòaⁿ-thāi". Sêng ǹg-bāng bī-lâi siang-hong tì-le̍k tshiok-tsìn nn̄g hōaⁿ hô-pêng huat-tián,"si̍t-hiān Tiong-hôa bîn-tso̍k ho̍k-hing". Sòng Tshó͘-jû sī kóng, hó-ka-tsài 100 nî tsêng Tiong-kok Kiōng-sán-tóng tshòng-li̍p, 1949 nî kā Tiong-kok Kok-bîn-tóng ê Tiong-hôa Bîn-kok tsèng-hú kóaⁿ lâi Tâi-oân, tsiah ē tàng tiông-tsìn hua-hā, Tiong-kok Kiōng-sán-tóng si̍t-tsāi tsin liáu-put-khí. Tshéng-kàu Sòng Tshó͘-jû tsú-se̍k, lí tng nî ná ē í "lān-bîn" ê sin-hūn tsáu-lō͘ lâi Tâi-oân? Sī tó tsi̍t-ê úi-tāi ê tóng hāi lí piàn tsoh lān-bîn? Lí kin-á-ji̍t tōa-tōa kā o-ló?

   Siōng kài khiáu ê sī Tiong-kok Kok-bîn-tóng tiong-iong tóng pō͘, oân-tsoân bô phah sǹg beh huat hō-tiān, kan-ta kiông-tiāu kòe-khì bô-lūn Tiong-kok Kok-bîn-tóng iah sī Tiong-kok Kiōng-sán-tóng ê tóng khìn, nn̄g tóng lóng bô phah hō-tiān hō͘ tùi-hong ê tsêng lē.

Tsá-tsêng Tiong-kok Kok-bîn-tóng tī Tâi-oân kàu-io̍k lán, Tiong-kok kiōng-sán-tóng sī "萬惡的共匪", lán nā bô tòe i án-ne kóng-tio̍h sī "su-siúⁿ ū būn-tê". Kin-á-ji̍t Tiong-kok Kiōng-sán-tóng iáu tsng nn̄g-tshing lia̍p hui-tôaⁿ tùi Tâi-oân, iáu tshù-tshù tsó͘-gāi lán Tâi-oân bé Bú-hàn hì-iām e̍k-biâu, bô mā in to̍h tshám sí-liáu ah, Sam-ūi Tiong-kok Kok-bîn-tóng tsêng tsú-se̍k kèng-jiân kong-khai tōa-tōa o-ló Tiong-kok Kiōng-sán-tóng., tsi̍t-ê pí tsi̍t-ê koh khah bē kiàn-siàu!

Sè-kài siōng kài bē kiàn-siàu ê sī tó tsi̍t-ê? Lí kóng leh.   (210702)
Tsù," 萬惡的共匪"   tshiáⁿ liām Hôa-gí


  七月初一是中國共產黨建黨一百周年紀念日,根據中國新華社六月三十下晡ê報導,包括中國國民黨前主席連戰、洪秀柱、親民黨主席宋楚瑜等,陸續向中國共產黨表達祝賀。

  根據報導,連戰tī賀電指出,「中國共產黨創建百年,主導神州大陸建設七十二年,中華民族復興進程已經達到五千年歷史新高峰!」真ǹg望兩岸關係和平發展,「所有中華兒女合力為咱民族ê事業再造新遒(iû)」。Bat作過中華民國副總統、中國國民黨主席ê連戰,伊ê賀電是講,好得一百冬前ê七月初一中國共產黨建黨,才有法度tī二十八年後ê1949年,kā中國國民黨ê中華民國偃倒(ían-tó),中國共產黨才會tàng「主導神州大陸建設七十二年,」「中華民族復興進程」才有法度「已經達到五千年歷史新高峰!」連戰tsit陣是滿心感謝中國共產黨,1949年kā中國國民黨ê中華民國政府拍kah走無路、不得已才走來台灣作難民。

  中國國民黨前主席洪秀柱透過賀函表示,「中華民族偉大復興是歷史ê必然」。足希望兩岸「促進融合,心靈契合,竭盡心力共同完成國家統一大業,共築國家富強、民族復興、人民幸福ê中國夢。」咱kan-ta beh問洪秀柱前主席,你當年ná會以「難民」ê身分走路來台灣?避啥物難來台灣創啥?

  Bat作過中國國民黨中央黨部秘書長、台灣省長、現任親民黨主席ê宋楚瑜tī賀電中指出,「中國共產黨艱苦卓絕,奮鬥不懈,重振華夏,以人民福祉為先,人類命運共同體為念,深深hō͘世間人重新看待」。誠ǹg望未來雙方致力促進兩岸和平發展,「實現中華民族復興」。宋楚瑜是講,好佳哉100年前中國共產黨創立,1949年kā中國國民黨ê中華民國政府趕來台灣,才會tàng 重振華夏,中國共產黨實在真了不起。請教宋楚瑜主席,你當年那會以「難民」ê身分走路來台灣?是tó一个偉大ê黨害你變作難民?你今á日大大kā o-ló?

  上蓋巧ê是中國國民黨中央黨部,完全無拍算beh發賀電,kan-ta強調過去無論中國國民黨iah是中國共產黨ê黨慶,兩黨攏無拍賀電hō͘對方ê前例。

早前中國國民黨tī台灣教育咱,中國共產黨是「萬惡的共匪」,咱若無tòe伊án-ne講tio̍h是「思想有問題」。今á日中國共產黨猶裝兩千粒飛彈對台灣,猶處處阻礙咱台灣買武漢肺炎疫苗,無罵in to̍h慘死了ah,三位中國國民黨前主席竟然公開大大o-ló中國共產黨.,一个比一个koh khah bē見笑!

世界上kài bē見笑ê是tó一个?你講leh。  (210702)
註:「萬惡的共匪」  請唸華語